खास चेलन 4 - Bagheli Bible

महासभा के आँगे पतरस अउर यूहन्ना

¹ जब पतरस अउर यूहन्ना मनइन से बात करत रहे हँय, तबहिनय याजक अउर मन्दिर के सिपाहिन के मुखिया, अउर सदूकी लोग उनखे लघे आएँ।

² काहेकि ऊँ पंचे खुब गुस्सान रहे हँय, एसे कि पतरस अउर यूहन्ना, सगले मनइन काहीं उपदेस देत रहे हँय, कि यीसु मसीह मर के जिन्दा होइगे हँय, उहइमेर जेतने मनई मरिगे हँय, ऊँ सगले यीसु मसीह के द्वारा पुनि मरेन म से जिन्दा होंइ हँय, इआ कहिके प्रचार करत रहे हँय।

³ अउर ऊँ पंचे उनहीं पकड़िके दुसरे दिन तक जेल माहीं रक्खिन, काहेकि साँझ होइगे रही हय।

⁴ पय बचन के सुनँय बालेन म से खुब जने बिसुआस किहिन, अउर उनखर गिनती पाँच हजार के करीब होइगे रही हय।

⁵ दुसरे दिन यहूदी लोगन के राजा, अउर धारमिक अँगुआ लोग, अउर मूसा के बिधान सिखामँइ बाले यरूसलेम सहर माहीं एकट्ठा भें।

⁶ अउर महायाजक हन्ना, अउर कैफा, अउर यूहन्ना, अउर सिकन्दर, अउर जेतने महायाजक के घराना के रहे हँय, सगले यरूसलेम सहर माहीं एकट्ठा भें।

⁷ अउर पतरस अउर यूहन्ना काहीं बीच म ठाढ़ कइके पूछँइ लागें, कि तूँ पंचे इआ काम कउने सामर्थ से, अउर कउने नाम से किहा हय?

⁸ तब पतरस पबित्र आत्मा से भरिके उनसे कहँइ लागें,

⁹ हे यहूदी समाज के मुखिअव, अउर धारमिक अँगुअव, इआ लाँगड़ मनई के साथ जउन भलाई कीन गे ही, अगर आज हमसे पंचन से ओखे बारे माहीं पूँछ-ताँछ कीन जात ही, कि उआ कइसन निकहा होइगा।

¹⁰ त तूँ पंचे सगले जन अउर सगले इजराइली मनई जान लेंय, कि जिनहीं तूँ पंचे क्रूस माहीं चढ़ाया तय, अउर परमातिमा उनहीं मरेन म से जिन्दा कइ दिहिन, इआ लाँगड़ मनई यीसु मसीह नासरी के नाम से, तोंहरे आँगे नीक-सूख ठाढ़ हय।

¹¹ ईं यीसु उहय पथरा आहीं जेही तूँ पंचे राजा के कारीगर लोग तुच्छ ठहराया तय, उहय कोनमा के खास पथरा बनिगा।

¹² अउर “यीसु के अलाबा कउनव दुसरे के द्वारा मुक्ती नहीं मिल सकय; काहेकि स्वरग के नीचे मनइन माहीं, अउर कउनव दूसर नाम नहीं दीनगा, जेखे द्वारा हम पंचे मुक्ती पाय सकी।”

¹³ जब ऊँ पंचे पतरस अउर यूहन्ना के साहस देखिन, अउर इआ जानिन, कि ईं पंचे अनपढ़ अउर साधारन मनई आहीं, त अचरज मानिन; अउर पुनि उनहीं पहिचान लिहिन, कि “ईं पंचे त यीसु के साथ रहे हँय।”

¹⁴ अउर उआ मनई काहीं जउन निकहा भ रहा हय, उनखे साथ ठाढ़ देखिके, ऊँ पंचे उनखे बिरोध माहीं कुछू नहीं कहि सकें।

¹⁵ पय उनहीं सभा के बहिरे जाँइ के हुकुम दइके, ऊँ पंचे आपस माहीं बिचार करँइ लागें,

¹⁶ कि “हम पंचे ईं मनइन के साथ का करी? काहेकि यरूसलेम सहर के रहँइ बालेन के ऊपर प्रगट हय, कि इनखे द्वारा एकठे मसहूर चमत्कार देखाबा ग हय; अउर हम पंचे ओखर इनकार नहीं कइ सकी।

¹⁷ पय एसे कि इआ बात मनइन माहीं अउर जादा न फइल जाय, हम पंचे उनहीं डेरबाई धमकाई, कि ऊँ पंचे इआ नाम से पुनि कउनव मनई से बात न करँय।”

¹⁸ तब उनहीं बोलाइन अउर चेतउनी दइके इआ कहिन, कि “यीसु के नाम से कुछू न बोल्या अउर न सिखाया।”

¹⁹ पय पतरस अउर यूहन्ना उनहीं जबाब दिहिन, कि “तुहिन पंचे न्याय करा, कि का इआ परमातिमा के लघे भला हय, कि हम पंचे परमातिमा के बात से बढ़िके, तोंहार पंचन के बात मानी।

²⁰ काहेकि इआ त हमसे होइन नहीं सकय, कि जउन हम पंचे देखेन अउर सुनेन हय, उआ न कही।”

²¹ तब ऊँ पंचे उनहीं अउर डेरबाय धमकायके छोंड़ दिहिन, काहेकि खुब मनइन के कारन उनहीं सजा देंइ के मोका नहीं मिला, एसे कि जउन घटना भे रही हय, ओखे कारन सगले मनई परमातिमा के बड़ाई करत रहे हँय।

²² काहेकि उआ मनई जउने काहीं अदभुत रीति से नीक कीन ग रहा हय, उआ चालिस साल से जादा उमिर के रहा हय।

बिसुआसी लोगन के प्राथना

²³ ऊँ पंचे उहाँ से छूटि के अपने साथिन के लघे आएँ, अउर जउन कुछू प्रधान याजक लोग, अउर यहूदी समाज के धारमिक अँगुआ लोग, उनसे कहिन रहा हय, उनहीं सुनाइन।

²⁴ इआ सुनिके ऊँ पंचे एक चित्त होइके, खुब चंडे परमातिमा से कहिन, “हे स्वामी, अपना उहय आहेन जउन स्वरग अउर धरती अउर समुद्र अउर जउन कुछू उनमा हय बनायन हय।

²⁵ अपना पबित्र आत्मा के द्वारा, अपने सेबक हमरे पंचन के पूरबज राजा दाऊद के मुँहे से कहेन तय, कि ‘ईं जातिअन के मनई न जाने काहे आपन अहंकार देखाइन? अउर देस-देस के मनई काहे बेमतलब के बातँय सोचिन?’

²⁶ प्रभू अउर उनखे मसीह के बिरोध माहीं धरती के राजा ठाढ़ भें, अउर हाकिम एक साथ एकट्ठा होइगें।

²⁷ काहेकि बेलकुल सही अपना के सेबक यीसु के बिरोध माहीं, जिनखर अपना अभिसेक किहेन हँय, हेरोदेस राजा, अउर पुन्तियुस पिलातुस घलाय, गैरयहूदी अउर इजराइलिअन के साथ इआ सहर माहीं एकट्ठा भें।

²⁸ कि जउन कुछ पहिलेन से अपना के सामर्थ, अउर मरजी से ठहराबा ग रहा हय, उहय करँय।

²⁹ अब, हे प्रभू, उनखे धमकिन काहीं देखी; अउर अपने सेबकन काहीं इआ बरदान देई, कि अपना के बचन बड़े साहस से सुनामँय।

³⁰ अउर चंगा करँइ के खातिर अपना आपन हाँथ बढ़ाई; कि चिन्ह अउर अचरज के काम, अपना के पबित्र सेबक यीसु के नाम से कीन जाँय।”

³¹ जब ऊँ पंचे प्राथना कइ चुके, त उआ जघा जहाँ ऊँ पंचे एकट्ठा रहे हँय, डोलिगे, अउर ऊँ पंचे सगले जन पबित्र आत्मा से भरिगें, अउर परमातिमा के बचन साहस के साथ सुनाबत रहिगें।

बिसुआसी लोगन के समूहिक जीबन

³² बिसुआस करँइ बालेन के मंडली एक चित्त, अउर एक मन के रही हय, इहाँ तक कि कउनव अपने धन-सम्पत काहीं, आपन नहीं कहत रहा आय, पय सगला साझे के रहा हय।

³³ अउर खास चेला लोग बड़े सामर्थ से प्रभू यीसु के जिन्दा होंइ के गबाही देत रहिगें, अउर उन सगलेन के ऊपर असीम किरपा रही हय।

³⁴ अउर उनमा से कोऊ निरधन नहीं रहा, काहेकि जेखे लघे जमीन इआ कि घर रहे हँय, ऊँ पंचे उनहीं बेंच-बेंचके, बिकी चीजन के दाम लइ आबत रहे हँय, अउर ओही खास चेलन काहीं दइ देत रहे हँय।

³⁵ अउर जइसन जेही जरूरत होत रही हय, खास चेला लोग ओहिन के मुताबिक, हरेक जन काहीं बाँटि देत रहे हँय।

³⁶ अउर साइप्रस टापू माहीं पइदा भे, यूसुफ नाम के एक जने लेबी रहे हँय, जउने के नाम खास चेला लोग बरनबास अरथात (सान्ति के लड़िका) रक्खिन रहा हय।

³⁷ उनखर कुछ जमीन रही हय, जउने काहीं ऊँ बेंचिन, अउर कीमत के सगला पइसा-रुपिआ लइआइके खास चेलन काहीं दइ दिहिन।