खास चेलन 2 - Bagheli Bible

पबित्र आत्मा के उतरब

¹ जब पिन्तेकुस्त तेउहार के दिन आबा, त ऊँ पंचे सगले जन एक जघा माहीं एकट्ठा रहे हँय।

² अउर एकाएक अकास से बड़ी आँधी कि नाईं सनसनाहट के बोल सुनान, अउर ओसे सगला घर जहाँ ऊँ पंचे बइठ रहे हँय, गूँजिगा।

³ अउर उनहीं आगी कि नाईं जीभँय फटत देखाई दिहिन; अउर उनमा से हरेक जन के ऊपर आइके ठहर गईं।

⁴ अउर ऊँ पंचे सगले जन पबित्र आत्मा से भरिगें, अउर आत्मा जउनमेर उनहीं बोलँइ के सामर्थ दिहिन, ऊँ पंचे अनजान भाँसा माहीं बोलँइ लागें।

⁵ अउर अकास के नीचे के सगले देसन से आए यहूदी भक्त, यरूसलेम सहर माहीं रहत रहे हँय।

⁶ जब उआ बोल सुनान त उहाँ भीड़ लगिगे, अउर सगले मनई घबराइगें, काहेकि हरेक जन काहीं इहय सुनाई देत रहा हय, कि ईं पंचे हमरेन भाँसा माहीं बोलि रहे हँय।

⁷ अउर ऊँ पंचे सगले जन चउआइके अउर अचरज मानिके कहँइ लागें; देखा, “ईं पंचे जउन बोलि रहे हँय, का ईं सगले जन गलील प्रदेस के रहँइ बाले न होंहीं?

⁸ त पुनि काहे हम पंचे हरेक जन अपने-अपने जनम भूमि के भाँसा सुनित हएन?

⁹ हम पंचे जउन पारथी, अउर मेदी, अउर एलामी लोग, अउर मेसोपोटामिया, अउर यहूदिया, अउर कप्पदूकिया, अउर पुन्तुस, अउर आसिया।

¹⁰ अउर फ्रूगिया, अउर पंफूलिया, अउर मिस्र, अउर लीबिया देस, जउन कुरेने सहर के लघे हय, ईं सगले देसन के रहँइ बाले, अउर रोम देस से आए मनई, का यहूदी, का यहूदी धरम धारन करँइ बाले, क्रेती अउर अरबी घलाय हें।”

¹¹ पय अपने-अपने भाँसा माहीं उनसे परमातिमा के बड़े-बड़े कामन के चरचा सुनित हएन।

¹² अउर ऊँ सगले सुनँइ बाले चउआइगें, अउर घबराइके एक दुसरे से कहँइ लागें, कि “इआ का होइ रहा हय?”

¹³ पय कुछ जने यीसु मसीह के खास चेलन के हँसी उड़ाइके कहिन, “ईं सगने जन कुछ जादा नबा अंगूर के रस पी लिहिन हीं।”

पतरस के भाँसन

¹⁴ तब पतरस उन गेरहँव के साथ ठाढ़ भें, अउर खुब चंडे से कहँइ लागें, “हे यहूदी लोगव, अउर यरूसलेम सहर के सगले रहँइ बाले मनइव! एखर मतलब हमहीं बतामँइ द्या, हमरे बातन काहीं बड़े ध्यान से सुना।

¹⁵ ईं पंचे नसा माहीं नहिं आहीं, जइसा कि तूँ पंचे समझते हया, काहेकि अबे त सकार के नव बजा हय, काहेकि एतनीदार कोऊ नसा नहीं करय।

¹⁶ बलकिन इआ उआ बात आय, जउने के बारे माहीं परमातिमा के सँदेस बतामँइ बाले योएल नबी कहिन रहा हय;

¹⁷ ‘परमातिमा कहिन हीं, कि अन्त के दिनन माहीं अइसा होई, कि हम आपन आत्मा सगले मनइन के ऊपर उड़ेलब, अउर तोंहार लड़िका-बिटिया भबिस्सबानी करिहँय, अउर तोंहार नवजमान दरसन देखिहँय, अउर तोंहार बुढ़ान मनई सपन देखिहँय।

¹⁸ बलकिन हम अपने सेबकन अउर सेबिकन के ऊपर घलाय आपन आत्मा उड़ेलब, अउर ऊँ पंचे भबिस्सबानी करिहँय।

¹⁹ अउर हम ऊपर अकास माहीं अचरज के काम, अउर नीचे धरती माहीं चमत्कार देखाउब, अरथात खून, आगी अउर धुँआ के बदरी।

²⁰ प्रभू के महान अउर तेजोमय दिन के आमँइ से पहिले, सुरिज माहीं अँधिआर, अउर जोंधइआ खून कि नाईं होइ जई।’

²¹ अउर जे कोऊ प्रभू के नाम लेई, उहय मुक्ती पाई।

²² हे इजराइल देस के रहँइ बाले मनइव, ईं बातन काहीं सुना, कि यीसु नासरी एकठे मनई रहे हँय, जिनखर परमातिमा के तरफ से होंइ के सबूत, उन सामर्थ के कामन, अउर अचरज के कामन, अउर चमत्कारन से प्रगट हय, जउन परमातिमा तोंहरे बीच माहीं, यीसु द्वारा कइके देखाइन हीं, जिनहीं तूँ पंचे खुदय जनते हया।

²³ उनहिन काहीं, जब ऊँ परमातिमा के ठहराई योजना, अउर निस्चित पूर्ब ग्यान के मुताबिक, तोंहरे हबाले कइ दीनगें, त तूँ पंचे अधरमी मनइन के मदत से उनहीं क्रूस माहीं चढ़बाइके मारि डारे हया।

²⁴ पय उनहिन काहीं परमातिमा मउत के बन्धन से छोड़ाइके, पुनि जिआय दिहिन, काहेकि उनखे खातिर इआ सम्भव नहीं रहा, कि मउत उनहीं अपने काबू माहीं रख सकय।

²⁵ काहेकि राजा दाऊद उनखे बारे माहीं कहिन हीं, कि ‘हम प्रभू काहीं हमेसा अपने आँगे देखत रहेन हँय, काहेकि ऊँ हमरे दहिनी कइती हें, जउने हम गिरे न पाई।

²⁶ एसे हमार हिरदँय आनन्दित हय, अउर हमार जीभ मगन भे ही; बलकिन हमार देंह आसा माहीं जिअत रही।

²⁷ काहेकि अपना हमरे प्रान काहीं अधोलोक माहीं न छोंड़ब; अउर न अपने पबित्र जन काहीं सड़इन देब!

²⁸ अपना हमहीं जीबन के गइल बतायन हय; अपना हमहीं अपने दरसन के द्वारा आनन्द से भर देब’।

²⁹ हे हमार भाई-बहिनिव, हम ऊँ कुलपति राजा दाऊद के बारे माहीं, तोंहसे हिम्मत के साथ कहि सकित हएन, कि ऊँ मरिगें अउर गाड़ दीनगें, अउर उनखर कब्र आज तक हमरे इहाँ मवजूद ही।

³⁰ काहेकि ऊँ परमातिमा के सँदेस बतामँइ बाले रहे हँय, अउर जानत रहे हँय, कि परमातिमा कसम खाइके उनहीं बचन दिहिन हीं, कि उनखे बंस म से एक जने काहीं उनखे राजगद्दी माहीं बइठाउब।

³¹ एसे आँगे होंइ बाली बातन काहीं, ऊँ पहिलेन से देखिके, मसीह के जिन्दा होंइ के बारे माहीं भबिस्सबानी किहिन, कि ‘न त उनखर प्रान अधोलोक माहीं छोंड़ा ग, अउर न उनखर देंह सड़ँय पाई’।

³² ईंन यीसु काहीं परमातिमा पुनि जिन्दा कइ दिहिन, जेखर हम पंचे सगले जने गबाह हएन।

³³ इआमेर से परमातिमा के दहिने हाँथ से सगलेन से ऊँच पद पाइके, अउर पिता से उआ पबित्र आत्मा पाइके जेखर वादा कीन ग रहा हय, अउर ऊँ उहय पबित्र आत्मा उड़ेल दिहिन, जेही अब तूँ पंचे देखते अउर सुनते हया।

³⁴ काहेकि राजा दाऊद त स्वरग माहीं नहीं चढ़ें; पय ऊँ खुदय कहत हें, कि ‘प्रभू हमरे प्रभू’ से कहिन; ‘हमरे दहिने कइती बइठा,

³⁵ जब तक कि हम तोंहरे बइरिन काहीं तोंहरे गोड़े के नीचे रक्खँइ बाली चउकी कि नाईं न कइ देई।’

³⁶ एसे इजराइल के सगला घराना निस्चित जान लेय, कि परमातिमा उँइन यीसु काहीं, जिनहीं तूँ पंचे क्रूस माहीं चढ़ाया तय, प्रभू अउर मसीह दोनव ठहराइन हीं।”

³⁷ तब सगले सुनँय बाले ब्याकुल होइगें, अउर ऊँ पंचे पतरस अउर सगले खास चेलन से पूँछँइ लागें, “हे भाइव, हम पंचे का करी?”

³⁸ तब पतरस उनसे कहिन, “अपने-अपने मन काहीं बदला, अउर तोंहरे पंचन म से हरेक जन, अपने-अपने पापन के माफी के खातिर, यीसु मसीह के नाम से बपतिस्मा ल्या; त तूँ पंचे पबित्र आत्मा के दान पइहा।

³⁹ काहेकि इआ वादा तोंहरे, अउर तोंहरे सन्तानन, अउर ऊँ सगले दूरी-दूरी के लोगन के खातिर घलाय हय, जिनहीं हमार पंचन के प्रभू परमातिमा अपने लघे बोलइहँय।”

⁴⁰ ऊँ अउर खुब बातन से घलाय गबाही दइ-दइके समझाइन, कि अपने आप काहीं ईं कुटिल मनइन से बचाइके रक्खा।

⁴¹ एसे जेतने जने उनखे बचन काहीं अपनाइन, ऊँ पंचे सगले जन बपतिस्मा लिहिन; अउर उहय दिन तीन हजार मनइन के करीब, यीसु मसीह के खास चेलन के दल माहीं सामिल होइगें।

⁴² अउर ऊँ पंचे यीसु मसीह के खास चेलन से सिच्छा पामँइ, अउर संगति रक्खँइ माहीं, अउर रोटी टोरँइ माहीं, अउर प्राथना करँइ माहीं अपने-आप काहीं समरपित कइ दिहिन।

⁴³ अउर सगले लोगन के ऊपर भय छाइगा, काहेकि यीसु मसीह के खास चेलन के द्वारा, खुब अचरज के काम अउर अदभुत चिन्ह प्रगट होत रहे हँय।

⁴⁴ अउर ऊँ पंचे सगले बिसुआस करँइ बाले एकट्ठा रहत रहे हँय, अउर उनखर सगली चीजँय साझे माहीं रहत रही हँय।

⁴⁵ अउर ऊँ पंचे आपन-आपन धन-सम्पत, अउर समान बेंच-बेंचके जेखर जइसन जरूरत होत रही हय, बाँट देत रहे हँय।

⁴⁶ अउर ऊँ पंचे हरेक दिन एक मन होइके मन्दिर माहीं एकट्ठा होत रहे हँय, अउर घर-घर रोटी टोरत, सच्चे मन से आनन्द के साथ खाना खात रहे हँय।

⁴⁷ अउर परमातिमा के अराधना करत रहे हँय, अउर सगले जन उनसे खुसी रहे हँय, अउर जउन मनई मुक्ती पाबत रहे हँय, उनहीं प्रभू हरेक दिन उनखे दल माहीं मिलाय देत रहे हँय।