खास चेलन 13 - Bagheli Bible

बरनबास अउर साऊल के पठबा जाब

¹ अन्ताकिया सहर के मसीही मन्डली माहीं, कुछ परमातिमा के सँदेस बतामँइ बाले, अउर कुछ उपदेस देंइ बाले रहे हँय; अरथात बरनबास अउर समौन जउन नीगर कहाबत रहे हँय; अउर लूकियुस कुरेन सहर के रहँइ बाले, अउर चउथाई भाग के राजा हेरोदेस के गोद लीन भाई मनाहेम अउर साऊल।

² जब ऊँ पंचे उपबास कइके प्रभू के अराधना करत रहे हँय, तब पबित्र आत्मा उनसे कहिन; “हमरे खातिर बरनबास अउर साऊल काहीं उआ काम के खातिर अलग करा, जउने खातिर हम उनहीं बोलायन हय।”

³ तब ऊँ पंचे उपबास अउर प्राथना कइके, उनखे ऊपर आपन हाँथ धइके बिदा किहिन।

पवलुस के पहिल प्रचार-यात्रा

⁴ तब ऊँ पंचे पबित्र आत्मा के पठए से, सिलूकिया सहर माहीं गें; अउर उहाँ से जल जिहाज माहीं चढ़िके, साइप्रस टापू काहीं चल दिहिन।

⁵ अउर सलमीस सहर माहीं पहुँचिके, परमातिमा के बचन यहूदी लोगन के सभाघरन माहीं सुनाइन; अउर यूहन्ना उनखर सेबा करँइ बाले रहे हँय।

⁶ अउर उआ सगले टापू माहीं घूमत, पाफुस सहर तक पहुँचिगें, उहाँ उनहीं बार-यीसु नाम के एकठे यहूदी जाति के टोना मारँइ बाला, अउर परमातिमा के झूँठ सँदेस बतामँइ बाला मिला।

⁷ उआ राजपाल सिरगियुस पवलुस के साथ माहीं रहत रहा हय, ऊँ खुब बुद्धिमान मनई रहे हँय, अउर ऊँ बरनबास अउर साऊल काहीं अपने लघे बोलाइके, परमातिमा के बचन सुनँय चाहत रहे हँय।

⁸ पय बार-यीसु जउने के दूसर नाम इलीमास घलाय रहा हय, बरनबास अउर साऊल के बिरोध कइके, राजपाल काहीं बिसुआस करँइ से रोंकँइ चाहिस।

⁹ तब साऊल जिनखर नाम पवलुस घलाय हय, पबित्र आत्मा से भरिके ओखे कइती एकटक निहारिके कहिन,

¹⁰ “हे सगले कपट अउर सगले चतुराई से भरे सइतान के सन्तान, हरेक सच्चाई के बइरी, का तँय प्रभू के सीध गइलन काहीं टेंढ़ करब न छोंड़िहे?

¹¹ पय अब देख, प्रभू के हाँथ तोरे ऊपर आय परा हय; अउर तँय कुछ समय तक आँधर रइहे अउर सुरिज काहीं न देखे पइहे।” तबहिनय ओखे आँखी माहीं धुँधलापन अउर अँधिआर छाय ग, अउर उआ एँकई-ओंकई टटोहँय लाग, जउने कोऊ ओखर हाँथ पकड़िके लइ चलय।

¹² तब जउन कुछू भ रहा हय, राजपाल ओही देखिके, अउर प्रभू के उपदेस से अचम्भित होइके, प्रभू के ऊपर बिसुआस किहिन।

पिसिदिया प्रदेस के अन्ताकिया सहर माहीं पवलुस

¹³ तब पवलुस अउर उनखर साथी पाफुस सहर से जिहाज काहीं छोरिके, पंफूलिया प्रदेस के पिरगा सहर माहीं आएँ; अउर यूहन्ना उनहीं उहाँ छोंड़िके यरूसलेम सहर माहीं लउटिगें।

¹⁴ अउर ऊँ पंचे पिरगा सहर से आँगे बढ़िके, पिसिदिया प्रदेस के अन्ताकिया सहर माहीं पहुँचे; अउर पबित्र दिन काहीं यहूदी सभाघर माहीं जाइके बइठिगें।

¹⁵ अउर मूसा के बिधान अउर परमातिमा के सँदेस बतामँइ बालेन के किताबन काहीं पढ़े के बाद, सभा के कुछ अधिकारी उनखे लघे कहबाय पठइन, कि “हे भाइव, अगर सगले मनइन काहीं उपदेस देंइ के खातिर, तोंहरे मन माहीं कउनव बात होय, त बताबा।”

¹⁶ तब पवलुस ठाढ़ होइके, अउर हाँथ से इसारा कइके कहिन; “हे इजराइलिव, अउर परमातिमा के भय मानँइ बाले मनइव, सुना।

¹⁷ ईं इजराइली मनइन के परमातिमा हमरे बाप-दादन काहीं चुनि लिहिन, जब ऊँ पंचे मिस्र देस माहीं परदेसी होइके रहत रहे हँय, तब उनखर उन्नति किहिन; अउर आपन बलबन्त हाँथ बढ़ाइके उनहीं उहाँ से निकार लाएँ।

¹⁸ अउर परमातिमा चालिस बरिस तक सुनसान जघा माहीं, उनखे गलतिन काहीं सहत रहिगें।

¹⁹ अउर कनान देस माहीं रहँइ बाली सातव जाति के मनइन काहीं नास कइके, उनखर देस करीब साढ़े चार सव बरिस माहीं इनखे अधिकार माहीं कइ दिहिन।

²⁰ एखे बाद परमातिमा समूएल नबी तक, उनखे बीच माहीं न्याय करँइ बाले ठहराइन।

²¹ एखे बादव ऊँ पंचे एकठे राजा माँगिन: तब परमातिमा चालिस बरिस के खातिर, बिन्यामीन के कुल म से, एकठे मनई अरथात कीस के लड़िका साऊल काहीं उनखे ऊपर राजा बनाइन।

²² एखे बाद परमातिमा साऊल काहीं हटाइके दाऊद काहीं उनखर राजा बनाइन; जिनखे बारे माहीं परमातिमा गबाही दिहिन हीं, कि ‘यिसय के लड़िका दाऊद, हमरे मन के मुताबिक मिलगे हँय, उँइन हमरे सगली इच्छन काहीं पूर करिहँय।’

²³ उनहिन के बंस म से परमातिमा अपने वादा के मुताबिक, इजराइल माहीं मुक्ती देंइ बाले के रूप माहीं, यीसु काहीं पठइन।

²⁴ जिनखे आमँइ से पहिले यूहन्ना बपतिस्मा देंइ बाले इजराइलिअन काहीं, अपने मन काहीं बदलँइ के खातिर बपतिस्मा के प्रचार किहिन।

²⁵ अउर जब यूहन्ना आपन काम पूर करँइ बाले रहे हँय, तब ऊँ कहिन, ‘तूँ पंचे हमहीं का समझते हया? हम ऊँ मनई न होहेंन! बलकिन देखा हमरे बाद एक जने आमँइ बाले हें, जिनखे गोड़ेन के पनहीं के डोरव तक हम छोरँइ के काबिल नहिं आहेन।’

²⁶ हे भाई-बहिनिव, तूँ पंचे जउन अब्राहम के सन्तान आह्या; अउर तूँ पंचे जउन परमातिमा से डेराते हया, तोंहरे लघे इआ मुक्ती के सँदेस पठबा ग हय।

²⁷ काहेकि यरूसलेम सहर के रहँइ बाले, अउर उनखर मुखिया लोग उनहीं नहीं पहिचानिन, अउर न परमातिमा के सँदेस बतामँइ बालेन के बातन काहीं समझिन; जउन हरेक पबित्र दिन काहीं पढ़ी जाती हँय, एसे उनहीं दोसी ठहराइके उन बातन काहीं पूर किहिन।

²⁸ ऊँ पंचे उनहीं मारि डारँइ के काबिल कउनव दोस उनखे ऊपर नहीं पाइन, तऊ राजपाल पिलातुस से बिनती किहिन, कि ‘उनहीं मारि डारा जाय।’

²⁹ अउर जब ऊँ पंचे उनखे बारे माहीं पबित्र सास्त्र माहीं लिखी सगली बातन काहीं पूर किहिन, तब उनहीं क्रूस से नीचे उतारिके कब्र माहीं धरिन।

³⁰ पय परमातिमा उनहीं मरेन म से जिआय दिहिन।

³¹ अउर यीसु अपने चेलन काहीं, जउन उनखे साथ गलील प्रदेस से यरूसलेम सहर माहीं आए रहे हँय, खुब दिनन तक देखाई देत रहिगें; अउर ऊँ पंचे अबहिनव गबाही देंइ के खातिर मनइन के आँगे मवजूद हें।

³² अउर हम तोंहईं पंचन काहीं उआ करार के बारे माहीं, जउन हमरे पंचन के बाप-दादन से कीन गे रही हय, इआ खुसी के खबर सुनाइत हएन।

³³ कि परमातिमा यीसु काहीं जिआइके, उहय करार हमरे पंचन के सन्तानन के खातिर किहिन हीं, जइसन दुसरे भजन माहीं घलाय लिखा हय, कि ‘तूँ हमार लड़िका आह्या; आजय हम तोंहईं पइदा किहेन हय।’

³⁴ अउर उनखे इआ रीत से मरेन म से जिआमँइ के बारे माहीं घलाय, कि ऊँ कबहूँ न सड़िहँय, ऊँ अइसन कहिन हीं; कि हम दाऊद के ऊपर के पबित्र अउर अटल किरपा तोंहरे ऊपर करब।

³⁵ एसे ऊँ एकठे अउर भजन माहीं घलाय कहिन हीं; कि ‘तूँ अपने पबित्र जन काहीं सड़ँय न देहा।’

³⁶ काहेकि दाऊद त परमातिमा के इच्छा के मुताबिक, अपने समय माहीं सेबा पूर कइके मरिगें; अउर अपने बाप-दादन माहीं जाइ मिलें; अउर सड़ घलाय गें।

³⁷ पय जिनहीं परमातिमा जिआइन, ‘ऊँ सड़ँय नहीं पाएँ।’

³⁸ एसे हे भाई-बहिनिव, तूँ पंचे जानिल्या, कि यीसु के द्वारा पापन के माफी के खबर तोंहईं पंचन काहीं सुनाई जात ही।

³⁹ अउर जउने बातन से तूँ पंचे मूसा के बिधान के द्वारा, निरदोस नहीं ठहर सकत रहे आह्या, उँइन सगली बातन से, हरेक मनई उनखे ऊपर बिसुआस किहे के कारन निरदोस ठहरत हें।

⁴⁰ एसे चउकस रहा, अइसन न होय, कि परमातिमा के सँदेस बतामँइ बालेन के किताब माहीं, जउन लिखा हय, तोंहरेव पंचन के ऊपर आय परय।

⁴¹ ‘हे बुराई करँइ बाले मनइव, देखा, अउर अचरज माना, अउर मिट जा; काहेकि हम तोंहरे दिनन माहीं एकठे काम करब; अइसन काम, कि अगर कोऊ तोंहसे ओखर चरचा करय, त तूँ पंचे कबहूँ बिसुआस न करिहा’।”

⁴² पवलुस अउर बरनबास जब उहाँ से जात रहे हँय, तब कुछ मनई उनसे बिनती करँइ लागें, कि आमँइ बाले अँगले पबित्र दिन काहीं ईं बातँय पुनि सुनाई जाँय।

⁴³ अउर जब सभा खतम होइगे, तब यहूदी लोग अउर यहूदी मत माहीं आए भक्तन म से, खुब जने पवलुस अउर बरनबास के पीछे-पीछे चल दिहिन; अउर ऊँ पंचे उनसे बात कइके समझाइन कि, परमातिमा के किरपा माहीं बने रहा।

गैरयहूदी लोगन के बीच माहीं पवलुस के प्रचार के सुरुआत

⁴⁴ अँगले पबित्र दिन काहीं, सहर के सगले मनई परमातिमा के बचन सुनँय के खातिर एकट्ठा होइगें।

⁴⁵ पय यहूदी लोग भीड़ काहीं देखिके डाह से भरिगें, अउर पवलुस के बुराई कइके उनखे बातन के बिरोध माहीं बोलँइ लागें।

⁴⁶ तब पवलुस अउर बरनबास निडर होइके कहिन, “जरूरी रहा हय, कि परमातिमा के बचन पहिले तोंहईं पंचन काहीं सुनाबा जात, पय जब तूँ पंचे ओही सुनँय नहीं चहते आह्या, अउर अपने-आप काहीं अनन्त जीबन के काबिल नहीं ठहरउते आह्या, त देखा, हम गैरयहूदी लोगन के लघे जइत हएन।

⁴⁷ काहेकि प्रभू हमहीं इआ हुकुम दिहिन हीं; कि ‘हम तोहईं गैरयहूदी लोगन के खातिर जोति ठहराएन हँय’; जउने तूँ धरती के छोर तक मुक्ती के कारन बना।”

⁴⁸ इआ सुनिके गैरयहूदी लोग आनन्दित भें, अउर परमातिमा के बचन के बड़ाई करँइ लागें, अउर जेतने अनन्त जीबन पामँइ के खातिर ठहराए गे रहे हँय, ऊँ पंचे प्रभू के ऊपर बिसुआस किहिन।

⁴⁹ तब प्रभू के बचन उआ सगले देस माहीं फइलँय लाग।

⁵⁰ पय जउने मेहेरिअन के समाज माहीं आदर रहा हय अउर भक्त रही हँय, उनहीं अउर सहर के नेतन काहीं यहूदी लोग उकसाइन, अउर पवलुस अउर बरनबास के ऊपर बड़ा उपद्दरव कर बाइके, उनहीं अपने सीमा से बहिरे निकार दिहिन।

⁵¹ तब पवलुस अउर बरनबास, उनखे अँगुअय अपने गोड़ेन के धूधुर झारिके, इकुनियुम सहर माहीं चलेगें।

⁵² अउर चेला लोग आनन्द से अउर पबित्र आत्मा से भरपूर होत रहिगें।