1 थिस्सलुनीकियन 5 - Bagheli Bible

प्रभू दुसराय आमँइ बाले हें तूँ पंचे तइआर रह्या

¹ हे भाई-बहिनिव, समय अउर दिन तारीख के बारे माहीं तोंहईं पंचन काहीं लिखँइ के कउनव जरूरत नहिं आय।

² काहेकि तूँ पंचे त खुदय निकहा से जनते हया, कि जइसन रात माहीं चोर अचानक आबत हय, उहयमेर प्रभू के आमँइ के दिन आमँइ बाला हय।

³ जब लोग-बाग इआ कहत होइहँय, कि सब कुसल-मंगल हय, अउर कुछू डेर नहिं आय, तबहिनय उनखे ऊपर एकय एक घोर संकट आय परी, जइसन लड़कहाई मेहेरिआ के पीरा; अउर ऊँ कउनव मेर से न बचि हँय।

⁴ पय हे भाई-बहिनिव, तूँ पंचे त पाप रूपी अँधिआर माहीं नहिं आह्या, कि उआ दिन तोंहरे ऊपर चोर कि नाईं अचानक आय परय।

⁵ काहेकि तूँ पंचे सगले जने त जोति अउर दिन के सन्तान आह्या, हम पंचे न रातय के आहेन, न अँधिआरय के।

⁶ एसे हम पंचे अबिसुआसी लोगन कि नाईं सोबत न रही, बलकिन सचेत अउर अपने ऊपर काबू रखँइ चाही।

⁷ काहेकि जउन सोबत हें, त ऊँ रातयके सोबत हें, अउर जउन मतबार होत हें, ऊँ रातयके मतबार होत हें।

⁸ पय हम पंचे त दिन के आहेन, बिसुआस अउर प्रेम के झिलम पहिरिके अउर मुक्ती के आसा के टोप पहिरिके सचेत रही।

⁹ काहेकि परमातिमा हमहीं पंचन काहीं क्रोध के खातिर नहीं, बलकिन एसे ठहराइन हीं, कि हम पंचे अपने प्रभू यीसु मसीह के व्दारा मुक्ती पाई।

¹⁰ प्रभू यीसु मसीह हमरे पंचन के खातिर एसे मरे, कि हम पंचे चाह जिअत रही, चाह मर जई, जब ऊँ दुसराय अइहँय, सब जन मिलिके उनहिन के साथ जिअत रहब।

¹¹ इआ कारन एक दुसरे काहीं सान्ति द्या, अउर एक दुसरे काहीं आत्मिक रूप से बढ़ामँय के खातिर मदत करा, जइसन तूँ पंचे करतेव हया।

मसीही मन्डली के खातिर उपदेस

¹² हे भाई-बहिनिव, हम पंचे तोंहसे बिनती करित हएन, कि जउन तोंहरे बीच माहीं मेहनत करत हें, अउर प्रभू माहीं तोंहार अँगुआई करत हें, अउर तोंहईं सिच्छा देत हें, उनखर सम्मान करा।

¹³ अउर उनखे इआ काम के कारन, उनहीं बड़े प्रेम से आदर के काबिल समझा, अउर आपस माहीं मिल-जुलिके रहा।

¹⁴ अउर हे भाई-बहिनिव, हम पंचे तोंहईं समझाइत हएन, जिनखर चाल-चलन निकहा नहिं आय, उनहीं समझाबा, डरपोकन काहीं ढाढ़स द्या, कमजोरन काहीं सम्हारा, अउर सगलेन के साथ सहनसीलता देखाबा।

¹⁵ अउर सचेत रहा कोऊ, कोहू के साथ बुराई के बदले बुराई न करा, बलकिन हमेसा भलाई करँइ के खातिर तइआर रहा, अपसय माहीं भर नहीं, बलकिन सगले मनइन के साथ भलाई करँइ के कोसिस करा।

¹⁶ हमेसा आनन्दित रहा।

¹⁷ हमेसा प्राथना करँइ माहीं लगे रहा।

¹⁸ हरेक बात माहीं धन्यबाद करा; काहेकि जेतने जने मसीह यीसु माहीं हया, तोंहरे खातिर परमातिमा के इहय इच्छा ही।

¹⁹ पबित्र आत्मा के काम काहीं न दबाबा।

²⁰ परमातिमा के सँदेस बतामँइ बालेन के बातन काहीं तुच्छ न जाना।

²¹ सगली बातन काहीं पहिले जाँचा-परखा जउन निकही होंय, उनहीं अपनाबा।

²² अउर हरेकमेर के बुराइन से बचे रहा।

आसिरबाद

²³ सान्ति देंइ बाले परमातिमा खुदय तोंहईं पूरी तरह से पबित्र करँय; अउर तोंहार आत्मा, प्रान अउर देंह हमरे पंचन के प्रभू यीसु मसीह के आमँइ तक, पूर-पूर निरदोस अउर सुरच्छित रहय।

²⁴ काहेकि परमातिमा जउन तोंहईं बोलाइन हीं, सच्चे हँय, अउर ऊँ अइसनय करिहँय।

²⁵ हे भाई-बहिनिव हमरे पंचन के खातिर प्राथना करत रहा।

²⁶ सगले बिसुआसी भाई-बहिनिव, आपस माहीं मसीही प्रेम के साथ नबस्कार करा।

²⁷ हम तोंहईं प्रभू के किरिआ धराइके कहित हएन, कि इआ चिट्ठी सगले भाई-बहिनिन काहीं पढ़िके सुनाई जाय।

²⁸ प्रभू यीसु मसीह के किरपा तोंहरे ऊपर होत रहय। आमीन!