1 कुरिन्थियन 4 - Bagheli Bible

मसीह के सेबक

¹ परमातिमा के जउन बातँय मनइन से छिपी रही हँय, उँइन बातन के भन्डारी, अउर मसीह के सेबक हम पंचे आहेन, इआ बात मनइन काहीं समझँय चाही।

² पय जेही भन्डारी के काम सउँपा जात हय, त ओमाहीं इआ बात देखी जात ही, कि उआ इमानदार होय।

³ हमहीं एखर एक्कव चिन्ता नहिं आय, कि तूँ पंचे हमार न्याय करा, इआ कि मनइन के कउनव अदालत। अउर वास्तव माहीं हम खुदव आपन न्याय नहीं करी।

⁴ काहेकि हमार मन हमहीं कउनव बात माहीं दोसी नहीं ठहराबय, तऊ हम एसे निरदोस नहीं ठहरी, काहेकि हमार जाँच-परताल करँइ बाले केबल प्रभू आहीं।

⁵ एसे जब तक प्रभू न आमँय, त समय से पहिले कउनव बात के न्याय न किहा, काहेकि जब प्रभू अइहँय त अँधिआर माहीं छिपी बातन काहीं उँजिआर माहीं देखइहँय, अउर मनइन के मन के उद्देसन काहीं घलाय प्रगट करिहँय। तब परमातिमा के तरफ से हरेक जन के उचित बड़ाई होई।

⁶ हे भाई-बहिनिव, हम ईं बातन माहीं खुद के, अउर अपुल्लोस के उदाहरन दइके, तोंहसे जउन चरचा किहेन हय, त उआ उदाहरन के रूप माहीं आय किहेन हँय, कि जउने तूँ पंचे हमसे पंचन से सिखिके, पबित्र सास्त्र माहीं लिखी बातन से जादा आँगे न बढ़ा, अउर एक जने के पच्छ लइके, अउर दुसरे मनई के बिरोध कइके, अहंकार से फूल न जा।

⁷ अउर को कहत हय, कि तूँ पंचे दुसरे मनई से बढ़िके हया? अउर तोंहरे लघे अइसन कउन चीज ही, जउने काहीं तूँ पंचे परमातिमा से नहीं पाए आह्या? अउर अगर सब कुछ, तोहईं परमातिमय से मिला हय, त पुनि तूँ अइसन घमन्ड काहे करते हया, कि हम पंचे खुदय पाएन हँय?

⁸ अउर तूँ पंचे इआ सोचते हया, कि हमहीं कउनव चीज के कमी नहिं आय, अउर हम पंचे धनी होइ गएन हँय, बाह भाई बाह! तूँ पंचे त बिना हमरेन राजा बन गया हय। पय इआ केतनी निकही बात होत, जब तूँ पंचे सचमुच राजा बन जात्या, कि जउने हमहूँ पंचे घलाय तोंहरे साथ राज करित।

⁹ हमहीं त अइसन लागत हय, कि हमहीं पंचन काहीं जउन यीसु मसीह के खास चेला आहेन, परमातिमा ऊँ मनइन कि नाईं आखिरी जघा माहीं रक्खिन हीं, जिनहीं मउत के सजा पामँइ के हुकुम होइ जात ही; काहेकि हम पंचे संसार के मनइन, अउर स्वरगदूतन के नजर माहीं, तमासा बन गएन हँय।

¹⁰ हम पंचे मसीह के बारे माहीं प्रचार करित हएन, एसे मनई हमहीं पंचन काहीं निरबुद्धी मानत हें, पय हाँ, भाइव, तूँ पंचे त इआ घमन्ड करते हया, कि हम पंचे मसीह के बारे माहीं खुब जानित हएन, हमहीं पंचन काहीं मनई कमजोर मानत हें, पय तूँ पंचे खुद काहीं सक्तिसाली मनते हया, मनई तोंहार पंचन के मान-सम्मान करत हें, अउर हम पंचे अपमान सहित हएन।

¹¹ अउर हम पंचे अबय तक भूँख-पिआस सहित हएन, फटे-पुरान ओन्हा पहिरित हएन, मार सहित हएन, अउर इहाँ-उहाँ मारे-मारे फिरित हएन।

¹² अउर हम पंचे खुद मेहनत कइके काम करित हएन, मनई हमार पंचन के बुराई करत हें, पय हम पंचे उनहीं आसिरबाद देइत हएन; ऊँ पंचे हमहीं सताबत हें, अउर हम पंचे सहित हएन।

¹³ ऊँ पंचे हमहीं पंचन काहीं बदनाम करत हें, अउर हम पंचे उनसे प्रेम से बातँय करित हएन। अउर हम पंचे आजव तक संसार के कूरा-कचड़ा कि नाईं माने जइत हएन।

पवलुस के चेतउनी

¹⁴ ईं बातन काहीं हम तोहईं पंचन काहीं सरमिन्दा करँइ के खातिर न होय लिखित हएन, पय अपने पियार लड़िका कि नाईं जानिके, ईं बातन के द्वारा तोहईं समझाइत हएन।

¹⁵ काहेकि अगर तोहईं, मसीह के बारे माहीं सिखामँइ बाले चाह हजारन मनई घलाय होतें, तऊ तोंहार पंचन के आत्मिक पिता खुब जने नहिं आहीं; पय मसीह यीसु के बारे माहीं खुसी के खबर सुनामँइ के कारन, हम तोंहार पंचन के आत्मिक पिता कहाएन।

¹⁶ एसे हम तोंहसे इआ बिनती करित हएन, कि तोंहार चाल-चलन हमरे कि नाईं होय।

¹⁷ एसे हम तीमुथियुस काहीं, तोंहरे लघे पठएन हँय, जउन प्रभू माहीं बिसुआस करँइ के कारन, हमार पियार अउर बिसुआस के काबिल लड़िका आहीं। अउर हम हरेक जघा माहीं, अउर हरेक मसीही मन्डली माहीं मसीह के बारे माहीं जउन उपदेस देइत हएन, ऊँ उनखे बारे माहीं तोहईं पंचन काहीं सुध देबइहँय।

¹⁸ पय तोंहरे पंचन म से कुछ जने घमन्ड से अइसन फूलिगे हँय, कि जइसन हम तोंहरे लघे कबहूँ अउबय न करब।

¹⁹ पय अगर प्रभू के मरजी होई, त हम तोंहरे लघे हरबिन अउब, अउर जउन घमन्ड से फूले हें, त उनखे बातन भर काहीं नहीं, पय उनखे सक्तिव काहीं देख लेब।

²⁰ काहेकि परमातिमा के राज माहीं रहँइ के खातिर केबल बातँय भर करब जरूरी नहीं आय, पय परमातिमा के सक्ती हमरे पंचन के जीबन माहीं काम करँइ चाही।

²¹ अउर तूँ पंचे इआ बताबा, कि का चहते हया? का हम तोहईं डाँटँइ के खातिर डंडा लइके तोंहरे लघे अई, इआ कि प्रेम अउर नम्र सुभाव के साथ अई?