1 कुरिन्थियन 12 - Bagheli Bible

पबित्र आत्मा के द्वारा मिलँइ बाले बरदान

¹ हे भाई-बहिनिव, हमार इच्छा इआ ही, कि पबित्र आत्मा के द्वारा मिलँइ बाले बरदानन के बारे माहीं, तूँ पंचे निकहा से जानिल्या।

² अउर इआ बात तूँ पंचे जनतेन हया, कि तूँ पंचे जब यीसु मसीह के ऊपर बिसुआस नहीं करत रहे आह्या, त जइसन सगले मनई गूँगी मूरतिन के पूजा-पाठ करत रहे हें; उहयमेर तुहूँ पंचे घलाय करत रहे हया।

³ एसे हम तोहईं पंचन काहीं इआ चेतउनी देइत हएन, कि जे कोऊ पबित्र आत्मा के अँगुआई से बोलत हय, त उआ यीसु काहीं इआ नहीं कहय, कि ऊँ स्रापित हें, उहयमेर पबित्र आत्मा के अँगुआई बिना, कउनव मनई इआ नहीं कहि सकय, कि यीसु मसीह प्रभू आहीं।

⁴ अउर पबित्र आत्मा के द्वारा हरेक मनई काहीं दूसर-दूसर मेर के बरदान मिलत हें; पय ऊँ सगले बरदानन काहीं देंइ बाला पबित्र आत्मा एकयठे हय।

⁵ अउर हम पंचे दूसर-दूसर मेर के सेबा त करित हएन, पय ऊँ सगलेन के द्वारा एकय प्रभू के सेबा करित हएन, अरथात यीसु मसीह के।

⁶ अउर सेबा के काम त कइअक मेर के हें, पय परमातिमा एकयठे हें, जउन मनइन काहीं दूसर-दूसर मेर के काम करँइ के सक्ती देत हें।

⁷ पय एकयठे पबित्र आत्मा के द्वारा हरेक मनइन काहीं दूसर-दूसर मेर के बरदान दीन जात हें, कि जउने सगले मनइन के भलाई होय।

⁸ काहेकि उहय आत्मा के द्वारा कोहू काहीं ग्यान से बातँय करँय के बरदान मिलत हय, अउर कोहू काहीं उहय आत्मा के द्वारा समझँय के बुद्धी मिलत ही।

⁹ अउर कोहू काहीं उहय आत्मा के द्वारा, बिसुआस माहीं मजबूत होंइ के बरदान दीन जात हय, अउर कोहू काहीं उहय आत्मा के द्वारा, बिमारन काहीं नीक करँइ के बरदान दीन जात हय।

¹⁰ अउर कोहू काहीं अचरज के काम करँइ के सक्ती, अउर कोहू काहीं परमातिमा के सँदेस बतामँइ के बरदान, अउर कोहू काहीं प्रचार करँइ बाले के सँदेस काहीं समझँइ के बरदान दीन जात हय, कि उआ परमातिमा के आत्मा के तरफ से आय, कि कउनव दूसर आत्मा के तरफ से; अउर कोहू काहीं कइअक मेर के भाँसा बोलँइ के बरदान दीन जात हय, अउर कोहू काहीं भाँसन के मतलब बतामँइ के बरदान, उहय आत्मा के द्वारा दीन जात हय।

¹¹ पय ईं सगले बरदानन काहीं उहय एकयठे पबित्र आत्मा देत हय, अउर जेही जउन बरदान देब उचित हय, त उआ अपने मरजी के मुताबिक सगलेन काहीं बाँटि देत हय।

देंह के उदाहरन

¹² अउर जइसन हमरे पंचन म से हरेक मनई के एकयठे देंह हय, पय ओमाहीं कइयकठे अंग हें, अउर देंह माहीं कइयकठे अंग होंइ के बादव, ऊँ सगलेन काहीं मिलाइके एकयठे देंह बनत ही, उहयमेर मसीह घलाय हें।

¹³ काहेकि हम बिसुआसिअन म से चाह उआ यहूदी होय, चाह उआ गैरयहूदी होय, चाह उआ दास होय, अउर चाह स्वतंत्र होय, हम पंचे सगले जने एकयठे आत्मा के द्वारा अउर एकय देंह होंइ के खातिर बपतिस्मा लिहेन हँय; अउर हमहीं सगलेन काहीं एकयठे आत्मा दीन ग हय।

¹⁴ अउर देखा, एकठे देंह माहीं केबल एकयठे अंग नहीं होय, बलकिन खुब अंग होत हें।

¹⁵ त मानि ल्या, कि अगर गोड़ इआ कहय, कि “हम हाँथ न होहेंन, एसे हम देंह के हिस्सा न होहेंन”, त का उआ इआ कारन से देंह के हिस्सा न होय?

¹⁶ अउर अगर कान कहय, कि “हम आँखी न होहेंन, एसे देंह के हिस्सा न होहेंन।” त का उआ इआ कारन से देंह के हिस्सा न होय?

¹⁷ पय अगर हमार पंचन के सगली देंह आँखिन होत, त हम पंचे कइसन सुनित? उहयमेर अगर हमार पंचन के सगली देंह कानय होत, त हम पंचे कइसन सूँघित?

¹⁸ पय सचमुच परमातिमा अपने मरजी के मुताबिक, हरेक अंगन काहीं हमरे पंचन के देंह माहीं जोड़िके रक्खिन हीं।

¹⁹ अउर अगर सगले अंग एकय मेर के होतें, त का देंह होत? नहीं।

²⁰ अउर देंह माहीं अंग त खुब होत हें, पय देंह एकयठे होत ही।

²¹ अउर आँखी हाँथ से इआ नहीं कहि सकय, कि “हमहीं तोर जरुरतय नहिं आय”, अउर न मूड़ गोड़ेन से कहि सकय, कि “हमहीं तोंहार जरूरत नहिं आय।”

²² बलकिन हमरे देंह के जउन अंग, दुसरे अंगन से कमजोर समझे जात हें, ऊँ जादा जरूरी होत हें;

²³ अउर देंह के जउने अंगन काहीं हम पंचे जादा आदर के काबिल नहीं समझी, अरथात जिनहीं देखामँइ माहीं लाज लागत ही, उनहिन के आदर हम पंचे जादा करित हएन, अरथात उनहीं ओन्हन से मूदिके रक्खित हएन।

²⁴ पय जउने अंगन काहीं दुसरे मनइन काहीं देखामँइ माहीं कउनव परेसानी नहीं होय, उनहीं हम पंचे ओन्हन से मूदिके नहीं रक्खी; पय परमातिमा हमरे पंचन के देंह काहीं अइसन बनाइन हीं, कि जउने अंगन के कउनव महत्व नहीं रहा आय, उनहीं अउर जादा आदर मिलय।

²⁵ जउने देंह माहीं फूट न परय, पय अंग एक दुसरे के बराबर चिन्ता करँय।

²⁶ एसे अगर देंह के एकठे अंग दुख पाबत हय, त सगले अंग ओखे साथ दुखी होत हें; अउर अगर एकठे अंग के बड़ाई होत ही, त ओखे साथ मिलिके सगले अंग खुसी मनाबत हें।

²⁷ अउर इहइमेर से तुहूँ पंचे घलाय सगले बिसुआसी भाई-बहिनी मिलिके मसीह के देंह आह्या, अउर उनखे देंह के अंग आह्या।

²⁸ अउर परमातिमा मसीही मन्डली माहीं कइअक जनेन काहीं नियुक्त किहिन हीं, पहिल यीसु मसीह के खास चेला लोगन काहीं, दूसर परमातिमा के सँदेस बतामँइ बालेन काहीं, तीसर सिच्छा देंइ बालेन काहीं, अउर एखे बाद अचरज के काम करँइ बालेन काहीं, अउर बिमारन काहीं नीक करँइ बालेन काहीं, अउर दुसरे मनइन के मदत करँइ बालेन काहीं, अउर अँगुआई करँइ बालेन काहीं, अउर हरेक मेर के भाँसा बोलँइ बालेन काहीं, घलाय नियुक्त किहिन हीं।

²⁹ एसे सगले जने यीसु मसीह के खास चेला नहीं होंय, अउर सगले जने परमातिमा के सँदेस बतामँइ बाले नहीं होंय, अउर सगले जने परमातिमा के बचन सिखामँइ बाले नहीं होंय, अउर न त सगले जने अचरज के काम करँइ बाले होत आहीं।

³⁰ उहयमेर सगले जनेन काहीं, बिमारन काहीं नीक करँइ के बरदान नहीं मिलत आय, अउर सगले जनेन काहीं, हरेकमेर के भाँसा बोलँइ के बरदान नहीं मिलत आय, अउर न त सगले जनेन काहीं हरेक भाँसा के मतलब बतामँइ के बरदान मिलत आय।

³¹ एसे तूँ पंचे पबित्र आत्मा के द्वारा, मिलँइ बाले बड़े से बड़े बरदानन काहीं पामँय के धुन माहीं लगे रहा, पय अब हम तोहईं सगलेन से खास बरदान के बारे माहीं बताइत हएन।