ZYAŊ 5 - Bafia Nouveau Testament

Yeesus à wɔ̀ɔ̀zii ŋwaànɛ à ɓaghà kìwɔ̀g, a kìɗig ki lɛ Bɛtzata

¹ Ajɛ̀m ìnɛn, Ɓɛ̀yudɛ̀n ɓɛ ɓaghà rì tìcàɓ, fɔɔnnɛ Yeesus à ɓɔkà a Yorisalɛm.

² A Yorisalɛm, coo kiɗig kidɛŋ ki ri wɔɔ, jàŋbog rì rìɗigì ɗi ɓi bàn ɗi lɛ, ìsuunaa wu jɔ̀ɔ̀, ɓɛ regì kɔ ɓi kìtòkì ki Ɓɛ̀yudɛ̀n lɛ: Bɛtzata; kìɗig kiǹ ki ɓaghà ɓɛ̀tuùtuu mɛtaǹ.

³ Ɓìtuu ɓi ɓɛroroɓ ɓi nɔɔ̀nɔ̀ŋdɛ̀ngà a ɓɛ̀tuùtuu ɓɛ̀n zi, lɛ rì ɓɛ̀ɗyaŋɗyàŋ, [rì ɓɛ̀lɛnlɛm, rì ɓìwɔ̀g, ɓɛ ɓoŋɓòŋ lɛ mɛ̀nig mɛɛ nyɛŋ̀ɗɛn.

⁴ Lɛ ŋwaà-fìtom àa nti à sɛngìì ɓyààmɛ̀n ɓidɛŋ ɓi kìɗig kiǹ, à nyɛ̀ŋzì mɛ̀nig; fɔɔnnɛ ki mɓalàg lɛ, i mɛ̀nig mɛ mɛ nyɛ̀ŋɗɛ̀n, ŋwaànɛ à loogh miì kì kpìi, àa soo roròɓ rìkuu ɗi firoɓ aɗi, à wɔ̀n.]

⁵ Nni roròɓ àdɛŋ à ɓaghà wɔɔ di à mɛ finɛn ɓi fìroɓ, bèg rìtin ɗì ǹtɛ̀ɗ rì taàraa.

⁶ Yɛ̀ɛ Yeesus à ghɛngà nyi ǹnɔ̀nɔŋiyɛn, à ki yi lɛ, à mɛ finɛn ɓi-kɔ̀ɔ̀ wiǹ, nni à tɔkà nyi lɛ: U kɔ̀nkɔn lɛ di wàa wɔ̀ni?

⁷ Roròɓ ànɛ̀n à ɓàg nyi lɛ: Kan, ǹ-yin ɗi mum ànɛ lɛ, à pìg mɛ̀ ɓi kìɗig, di mɛ̀nig mɛ mɛ nyɛŋ̀ɗɛ̀n; lɛ ki ti lɛ cààmɛ̀n ki mɛ̀ɛ nka yeeghyeèghkɛ̀n lɛ nkpi ɓi kìɗig, ŋwaàdɛŋ à log rì mɛ̀.

⁸ Nni Yeesus à kpaaghà nyi lɛ: Pɛ̀sɛn aɗyòò, u teɗ kon wɔɔ̀, u kɛɛ̀ghi.

⁹ Fɔɔnnɛ ŋwaànɛ̀n à ghàskà kì wɔ̀ni, à teɗ kon wiì, à tumɛ̀n rìkɛ̀ɛ̀kɛ̀ɛ̀. Ŋwos anɛ̀n à ɓaghà ŋwosi Saɓàt.

¹⁰ Nni Ɓɛ̀yudɛ̀n ɓɛ kpaaghà ŋwaànɛ ɓɛ wɔɔ̀zìghà ànɛn lɛ: Ŋwosi Saɓàt yɛɛ ri lɛ. Ɓìdɔ̀gsɛna ɓis ɓi gherɛɛ ɓi lɛ, u tɛg kon wɔɔ̀.

¹¹ Ŋwaànɛ̀n à ɓàg ɓɔ lɛ ŋwaànɛ àa wɔ̀ɔ̀zii mɛ̀, àa kpaa mɛ̀ lɛ: Tera kon wɔɔ̀, u kɛɛ̀ghi.

¹² Fɔɔnnɛ ɓɛ tɔkà min nyi lɛ: Rìkuu ɗi mum aɗi ɗyaa kpaa wɔ̀ lɔɔ lɛ tera kon wɔɔ̀, u kɛɛ̀ghi?

¹³ Wɔ̀lɛ, ŋwaànɛ ɓɛ wɔɔ̀zìghà ànɛn à yighà ɓi ŋwaànɛ à kpaaghà nyi fɔlɔɔ, lɛ Yeesus à ɓaghà di à mɛ ɗim ɓi gwìy ì ɓum ìnɛ ì ɓaghà wɔɔ.

¹⁴ Ajɛ̀m ìnɛn, Yeesus à tanɛ̀ngà rì ŋwaànɛ̀n ɓi naà-Bɛ̀ll, à kpaa nyi lɛ: Ù ghɛɛ yɛ̀ɛ ù mɛ wɔ̀n, kɔ̀ɔ kìti kiɓe, di ù rì ɓiì tulɛɛ ri ǹtɔɓ wudɛŋ wu wu cee fɔ̀lɔ̀ɔ̀.

¹⁵ Fɔɔnnɛ ŋwaànɛ̀n à kɛ̀ngà kì kpaà Ɓɛ̀yudɛ̀n lɛ Yeesus yaa wɔ̀ɔ̀zii nyi.

¹⁶ Kɛɛ̀ki Ɓɛ̀yudɛ̀n ɓɛ nɔɔ̀nɔ̀ɔ̀tìghà Yeesus, lɛ à kìghà kìɓan kiǹ ŋwosi saɓàt.

¹⁷ Nni Yeesus à ɓàkà ɓɔ lɛ: Seŋi wɛ̀m a ka sasày à kpaŋ ɓigomìnɛ, mɛ̀ ǹsasày girig.

¹⁸ Ɓi jɛ̀ɛ̀ ìnɛn nnɛ Ɓɛ̀yudɛ̀n ɓɛ teèsìghà tì nyoo ɓi rìkaakàà ɗi bee inɛ ɓɛɛ wey nyi, àa lɛ rìyogsì ɗi à yoòyògsìghà kìcèlì ki Saɓàt ɗyɔ rì ɗyɔ, lɔŋ ɓisuulɛ à kpaaghà lɛ Bɛ̀ll à rì Seŋi wìì, à foŋɗɛn nyimiɗ ɓi nɗɛli wu Bɛ̀ll.

Ìtèɗ wu Man à Bɛ̀ll wu riì yɛ̀ɛ Seŋi

¹⁹ Nni Yeesus à ɓàkà min ɓɔ , à kpaa lɛ: Ǹkpaa mìni kɔɔ̀kɔɔ̀ à rìkpaa lɛ Man à yin lɛ à kì kìɓan kidɛŋ rì nto wìì, a kìki lɔŋ ɓiɓan ɓi a seesèè di Seŋi a kìkì. Fɔɔnnɛ ɓìɓan ɓi Seŋi a kìkì, ɓyɛɛ̀ɓi Man girig a kìkì.

²⁰ Ɓisuulɛ Seŋi à keesii Man, à ti à rèsàg nyi com kìcèm ki a kìkì. À ki rì nyi ɓiì rèsii ɓiɓan ɓi ɓi cee fɔlɔɔ, lɛ ɓi kuùrag.

²¹ Lɛ fɛlɛ yɛ̀ɛ Seŋi à ti à ghèmzàg ɓìloŋ, à fa ɓyɔ cɛɓ, fɔlɔɔ nnɛ Man à ti à falàg girig ɓumɓɛ à kɔ̀ni cɛɓ.

²² Seŋi à yin ɓiì renɗeni ɓiɓan ɓi ɓum, wɔ̀lɛ Man innɛ à faghà rìren ɗi ɓiɓan ɗicèm,

²³ lɛ di ɓum ɓɛ̀cèm ɓɛɛ nyaàsi Man lɔŋ yɛ̀ɛ ɓɛɛ̀ nyaanyaàsì Seŋi. I mum à nyaasii ɓi Man, di à nyaasii ɓi Seŋi ànɛ à romgày nyi.

²⁴ Ǹkalii mìni kɔɔ̀kɔɔ̀ à rìkpaa lɛ, ŋwaànɛ à woogh jɛ̀ɛ̀ yɛ̀m, à ki gherɛn roànɛ à romgày mɛ̀, à ti rì cɛɓ ki fiɗyàɓ fikɔ̀ɔ̀. À yin lɛ à yù a rìren ɗi ɓiɓan, kìɓan kifog, à mɛ pɛ̀sɛn yi ɓi rìwu, à ɗiŋì ɓi cɛɓ.

²⁵ Nkpaa mìni kɔɔ̀kɔɔ̀ à rìkpaa lɛ cààmɛ̀n ki riì, kiŋcèm kɛɛ ti lɛ, kɛɛ̀ki ɓìloŋ ɓi ɓiì woògh jɛ̀ɛ̀ ì Man à Bɛ̀ll. Fɔɔnnɛ ɓɛ̀roɓɛ ɓɛ ri ɓiì woògh jɛ̀ɛ̀ yìì, ɓɛ ɓiì ghɛɓì.

²⁶ Lɛ fɛlɛ yɛ̀ɛ Seŋi à rì rì ìtèɗ wu fayɛn cɛɓ, fɔɔnnɛ à kìghà lɛ, Man a ɓa girig rì ìtèɗ wu fayɛn cɛɓ.

²⁷ À faghà nyi ìtèɗ wulɛ a yɔm̀ ɓìɓan ɓi ɓum lɛ, à rì Man à mum.

²⁸ Nni kɛ̀ ɓi kuurag kiɓan kiǹ; cààmɛ̀n ki tiì, ki ɓum ɓɛ̀cèm ɓɛ ɓɛ ri ɓi zɔ̀ŋ ɓɛ ɓiì woògh jɛ̀ɛ̀ yìì, ɓɛ kpagìì.

²⁹ Fɔɔnnɛ ɓɛ̀roɓɛ ɓɛ kighà kìrɔɔ, ɓɛ ri ɓiì ghemɓɛɛ lɛ ɓɛɛ teɗ cɛɓ; ɓɛ̀roɓɛ ɓɛ kighà kìɓe, ɓɛ ghemɓɛ̀n lɛ ɓɛɛ teɗ bɛ̀lɛn.

³⁰ Mɛ̀ ǹ-yiǹ ɓiì kìkii kiɓan kidɛŋ rì nto wɛ̀m, nɗenɗen ɓiɓan lɔŋ yɛ̀ɛ mɛ̀ɛ nwowòg, fɔɔnnɛ rìren ɗyɛ̀m ɗi ɓiɓan ɗi ri lɛ saaɗ lɛ, ǹ-yin ɓiì kaakaa rikɔ̀n ɗyɛm̀, nkaakaa lɔŋ rikɔ̀n ɗi roànɛ à romgày mɛ̀.

³¹ I mɛ̀ɛmiɗ yaa rì wusìnɛ̀ɗ ànɛ ɓi kìɓan kɛm̀, di com ki ǹɗì lɛ ǹkpaa ki yin lɛ ki wooghrɛ̀n.

³² Nni yɛ̀ɛ ŋwaàdɛŋ yɛɛ ri wusìnɛ̀ɗ ànɛ ɓi kìɓan kɛm̀, fɔɔnnɛ ǹ-yii lɛ, com ki a kpaakpaa ɓi san wɛ̀m ki ri saaɗ.

³³ Ɓì romgà ɓum yɛ̀ɛ Zyaŋ, Zyaŋ à rèsì mìni saaɗ ànɛ ɓi rìɓa ɗyɛ̀m.

³⁴ Ɓi san wɛ̀m, àa mum yɛɛ ri wusìnɛ̀ɗ ànɛ ɓi rìɓa ɗyɛ̀m, kìɓan kifog, ǹkpaa lɔŋ fɔlɔɔ lɛ, di ɓi ɓa rì cɛɓ.

³⁵ Zyaŋ à ɓaghà fɛlɛ yɛ̀ɛ lamɓà ànɛ a ròòròò, à kpeèkpèŋzì jàŋ, nni ki kɔngà mìni lɛ ɓi nyaàrɛn rì kìtɛɛtɛn kii ɓi maa cààmɛ̀n.

³⁶ Ǹɗì rì wusìnɛ̀ɗ ànɛ a rèresi kiɓan kɛm̀, à cee rìrèsì ɗi Zyaŋ à rèsìghà, nnyɛɛ ri ɓìɓan ɓi Tààta à faghà mɛ̀ lɛ nki. Ɓìɓan ɓiǹ ɓyɛɛ̀ rèresi lɛ Tààta yɛɛ romgày mɛ̀.

³⁷ Fɔɔnnɛ Tààta nyimiɗ anɛ à romgày mɛ̀, à rèsìghà girig kìɓan kɛm̀; ŋwos adɛŋ, ɓì ka wokà ɓi jɛ̀ɛ̀ yìì, kɛ̀ ɓi ki ghɛn ìsu wìì.

³⁸ Fɔɔnnɛ ɓìɓan ɓii ɓi yin mini ɓi nɗem, lɛ ɓì gherɛɛ ɓi roànɛ à romgày.

³⁹ Ɓi fifiɓi mɛkànì mɛ kaàtà à Bɛ̀ll, lɛ ɓi fèfeg lɛ ɓi mɛ̀kànì mɛǹ nnɛ ɓì rì ɓiì ɓaà rì cɛɓ ki fiɗyàɓ fikɔ̀ɔ̀. Mɛ̀kànì mɛǹ mɔ yɛɛ̀ ki rèresi kiɓan kɛm̀.

⁴⁰ Nsoò fɔlɔɔ, ɓì kɔ̀ni ɓi lɛ di ɓyàa yùu yì a lɔ̀ŋkɛm̀ lɛ ɓi ghɛǹ cɛɓ.

⁴¹ Ǹ-yin ɓiì kaakaa rikem a ɓum.

⁴² Wɔ̀lɛ ǹ-yii mìni, ǹkɔ̀nɛ̀n à Bɛ̀ll à yin mini ɓi mɛ̀rem.

⁴³ Ǹ-yùghà ɓi ɗii ɗi Seŋi wɛ̀m kɛ̀ ɓi kɔ̀n lɛ ɓi ghaɓ mɛ̀, wɔ̀lɛ, i ŋwaàdɛŋ à yùu ɓi ɗii ɗii ɗi nyimiɗ, nyi nnɛ ɓì rì ɓiì ghàɓi.

⁴⁴ Lannɛ ɓì rì lɛ ɓì gherɛ̀n, di ɓi faafàlɛ̀n rìkem mìni rì mìni, kɛ̀ ɓi kaa rikem ɗi ɗi riì yɛ̀ɛ Bɛ̀ll cɛ̀ncii?

⁴⁵ Kɛ̀ ɓi fèg lɛ ǹɗì mìni ɓiì sɔmɛɛ yɛ̀ɛ Tààta; ŋwaànɛ à rì mìni ɓiì sɔmɛɛ, nnyɛɛ ri Moyis ànɛ ɓì faghà ǹtyweeyi ri nyi,

⁴⁶ ɓisuulɛ i ɓì gherɛ̀ngà Moyis, di ɓì rì lɛ ɓì gherɛ̀n mɛ̀, lɛ kìɓan kɛm̀ kɛɛ̀ki à kàngà.

⁴⁷ Nni i ɓì gherɛɛ ɓi ɓiɓan ɓi à kàngà, lannɛ ɓì rì ɓiì gherɛɛ ɓi mɛ̀ ǹkpaa?