ZYAŊ 4 - Bafia Nouveau Testament

Yeesus rì giɓ anɛ a Samari

¹ Yeesus à wokà lɛ ɓɛ nkalii Ɓɛ̀fàrìzyɛŋ lɛ nyiì syòŋsyoŋ ɓum à cee Zyaŋ lɛ ɓɛɛ ɓa ɓɛ̀yilàg ɓii, à ki ɓàaɓaɓtì ɓɔ;

² wɔ̀lɛ ɓi saaɗ à rìkpaa, Yeesus nyimiɗ a ɓààɓàɓtìghà ɓi ɓum, lɔŋ ɓɛ̀yilàg ɓii ɓɛɛ ɓààɓàɓtìghà ɓɔ.

³ Fɔɔnnɛ à pɛ̀sɛ̀ngà a Zyude à sugtì a Galile.

⁴ Ki ghɛɛ̀sɛ̀ngà lɛ, a fyeè a Samari.

⁵ Nni à kpagà ɓi bàn ìdɛŋ ìnɛ a Samari ɗii lɛ Sikar, jàŋbog rì dɛm inɛ Yakɔɓ à faghà man wiì ànɛ lɛ Yoosɛɓ.

⁶ Kìɗig ki Yakɔɓ ki ɓaghà ɓi dɛm inɛ̀n; Yeesus à kɔ̀rìghà ɓi nwɔŋì wu kiɗig kiǹ, di à mɛ fɔy rikɛ̀ɛ̀; ki ghɛɛ̀sɛ̀ngà kì ɓaà nunùg toroɓ.

⁷ Fɔɔnnɛ giɓ anɛ a Samari à yùghà kì roògh mɛ̀nig, Yeesus à kpaa nyi lɛ: Faa mɛ̀ mɛ̀nig mɛ nɔyɛn.

⁸ Lɛ ɓɛ̀yilàg ɓii ɓɛ kɛngà kì làghiì ɓìɗilàg ɓi bàn.

⁹ Nni giɓ anɛ a Samari ànɛn à ɓàkà nyi lɛ: Lannɛ wɔ̀ muu Ɓɛ̀yudɛ̀n, ù lɔni mɛ̀ mɛ̀nig mɛ nɔyɛn, kɔm̀ lɛ mɛ̀ ǹɗì giɓ anɛ a Samari? Lɛ Ɓɛ̀yudɛ̀n ɓɛ ɓaghà ɓi lɛ ɓɛ wooghrɛ̀n ɗì ɓumɓɛ a Samari.

¹⁰ Fɔɔnnɛ Yeesus à ɓàkà giɓ anɛ̀n lɛ: I wàa yii rìfa ɗi Bɛ̀ll, ù ki yi roànɛ à lɔni wɔ̀ mɛ̀nig mɛ nɔyɛn, di wɔ̀ yaa rì lɛ, ù lɔn nyi mɛ̀nig mɛ noyɛn, di àa ki faa wɔ̀ mɛ̀nig mɛ cɛɓ.

¹¹ Nni giɓ anɛ̀n à kpaaghà nyi lɛ: Kan, wɛ̀ɛnɛ̀n kɛ̀ɛ̀ com ki lɛ ù rog mɛ̀nig miì, kìɗig ki ki rì kìrimɛn, nni mɛ̀nig mɛ cɛɓ mɛ ri wɔ̀ ɓiì ɓaà yì fe?

¹² U fèfeg lɛ wɔ̀ yɛɛ cee seŋi wìs a ǹsɛ̀ɛ̀ anɛ lɛ Yakɔɓ, ànɛ à faghà ɓìsi kìɗig ki, nyimiɗ, rì ɓɔn ɓii, rì ɓìtuwe ɓii, ɓɛ nɔ girig kɔ̀?

¹³ Yeesus à ɓàg nyi lɛ: Mum ǹcèm ànɛ à nɔɔ mɛ̀nig mɛ, à rì ti lɔŋ ɓiì woògh kìnɔli.

¹⁴ Kìɓan kifog, ŋwaànɛ à rì ɓiì nɔɔ̀ mɛ̀nig mɛ ǹɗì nyi ɓiì faà, àa wogtii gɛ ɓi kinɔli. Lɛ mɛ̀nig mɛ ǹɗì nyi ɓiì faà mɛǹ, mɛ ri ɓiì ghalì ǹsim à cɛɓ ki fiɗyàɓ fikɔ̀ɔ̀ ɓi nɗem wii.

¹⁵ Nni giɓ anɛ̀n à kpaaghà nyi lɛ: Kan, faa mɛ̀ mɛ̀nig mɛǹ, di kìnɔli kɛ̀ kɛɛ̀ kìti mɛ, kɛ̀ɛ nki yùti kiroògh mɛ̀nig fɛ.

¹⁶ Yeesus à pɛ̀ɛ̀zì nyi lɛ: Kɛ̀nay kìreŋii yii wɔɔ̀, di u sugtiì fɛ.

¹⁷ Nni giɓ a ɓàkà nyi lɛ: Mɛ̀ ǹ-yin ɗi yii. Yeesus à kpaa nyi lɛ ù kpaa saaɗ yɔɔ̀ kalii lɛ ù yin ɗi yii;

¹⁸ ɓisuulɛ, ù ti mɛ̀wɛy mɛtaǹ, nni ŋwaànɛ ù rì rì nyi ɓigomìnɛ, à yin yii wɔɔ̀, fɔɔnnɛ jɛ̀ɛ̀ ìnɛ wàa kpaa ì rì miì.

¹⁹ Nni giɓ a kpaaghà nyi lɛ: Kan! Ǹghɛɛ lɛ, ù rì ǹkpaŋzì-ɓìɓan.

²⁰ Ɓɛ̀seŋi ɓis ɓɛ mɓɔgsaagh Bɛ̀ll ɓi dòn ìnɛ, kìɓan kifog mìnii kpaaghì lɛ, a Yorisalɛm nnɛ ɓum ɓɛ ghɛɛ̀sɛɛ kì ɓɔgsaagh Bɛ̀ll.

²¹ Fɔɔnnɛ Yeesus à kpaaghà nyi lɛ: Giɓ anɛ! Gherɛn rìkpaa ɗyɛ̀m, lɛ cààmɛ̀n ki riì, ki ɓyàa ɓɔgsi ti ɓi Tààta ɓi dòn ìnɛ, nsoò lɛ a Yorisalɛm.

²² Lɛ mìniì ɓɔɔɓɔgsì com ki ɓì yii ɓi, ɓìsiì ɓɔɔɓɔgsì com ki tì yii, lɛ gòri ì ɓum ì pɛ̀sɛɛ yì a Ɓɛ̀yudɛ̀n.

²³ Wɔ̀lɛ cààmɛ̀n ki tiì, kiŋcèm ki mɛ ki kpaŋ, ki ɓɛ̀kɔɔ̀kɔɔ̀ ɓɛ ɓɛ̀ɓɔgsì Bɛ̀ll ɓɛ ri ɓiì ɓɔgsii Tààta rì nghay, rì saaɗ. Ɓumɓɛ ɓɛɛ̀ ɓɔɔ̀ɓɔ̀gsì nyi fɔlɔɔ ɓɛɛ̀ɓɛ Tààta a kaakàà.

²⁴ Bɛ̀ll àrì Nghay, fɔɔnnɛ ki ghɛɛ̀sɛɛ lɛ ɓumɓɛ ɓɛɛ̀ ɓɔɔɓɔgsì nyi ɓɛɛ ɓɔgsi nyi rì nghay, rì saaɗ.

²⁵ Fɔɔnnɛ giɓ anɛ̀n à kpaaghà Yeesus lɛ: Ǹ-yii lɛ Mèsii à ɓiì yùu, ànɛ à rì ɗii lɛ Kiris. Yɛ̀ɛ à ri yù, à ri kali ɓisi ɓiɓan ɓìcèm.

²⁶ Yeesus à kpaa min nyi lɛ: Mɛ̀ ànɛ ntòtog anɛ rì wɔ̀, mɛ̀ yɛɛ ri Mèsii.

²⁷ Ɓi cààmɛ̀n kiǹ innɛ ɓɛ̀yilàg ɓɛ Yeesus ɓɛ sugtìghày, ɓɛ kuuràg yɛ̀ɛ ɓɛ ghɛngà nyi di a tòtog ri giɓ, kìɓan kifog, kìbog ki ɓi ɓɔ ki ghɛɛsìghà ɓi lɛ, kɛɛ tɔg nyi lɛ, la yɛɛ ri? Nsoò lɛ cɛ kɛɛ̀ki u kpaakpaa ri giɓ anɛ?

²⁸ Nni giɓ a càɗkà bèè yiì ì mɛ̀nig, à sugtì ɓi bàn, à kpaa ɓumɓɛ wɔɔ lɛ:

²⁹ Yùuna kìghɛɛ̀ ŋwaàdɛŋ ànɛ àa kpaa mɛ̀ ɓìɓan ɓìcèm ɓi m̀mɛ kì, ɓaà yi ɓi nnyɛɛ ri Kiris.

³⁰ Fɔɔnnɛ ɓum ɓɛ pɛsɛ̀ngày ɓi bàn, ɓɛ yu jàŋ inɛ Yeesus à ɓaghà.

³¹ Ɓi nyìinyìm ànɛn, ɓɛ̀yilàg ɓii ɓɛ ɓɔɔ̀ɓɔ̀ŋzìghà nyi, di ɓɛɛ̀ kpaakpaa lɛ: Raɓì, ɗiya ɓà maa com.

³² Kìɓan kifog Yeesus à ɓàkà ɓɔ lɛ: Ǹɗì rì ɓìɗilàg ɓidɛŋ ɓi nɗi, ɓi mìnii yii ɓì.

³³ Fɔɔnnɛ ɓɛ̀yilàg ɓɛ tɔɔ̀ghtɔ̀ɔ̀ghrɛ̀ngà wɔɔ ɓɔ rì ɓɔ lɛ: Ŋwaàdɛŋ àa rì nya lɛ, à yùy nyi rì com ki ɗiyɛn giǹ?

³⁴ Yeesus à kpaa ɓɔ lɛ: Ɓìɗilàg ɓyɛm̀ ɓi ri lɛ nki rìkɔ̀n ɗi roànɛ à romgày mɛ̀, ǹki lègsi kisay ki à faghà mɛ̀.

³⁵ Mìnii ti ɓì kpaaghì lɛ ɓɛ̀ŋwii ɓaa rɔ̀ɓ ɓɛnin lɛ mɛ̀saŋ mɛɛ tumɛn. Nni mɛ̀ ǹkpaa mìni lɛ, pìighna mis ɓi ghɛǹ yɛ̀ɛ ɓyom ɓyaa tèɗ ɓi ɓɛ̀dɛm lɛ, ɓɛɛ saŋ.

³⁶ Ǹsaŋì-mɛ̀saŋ à mɛ teɗ mɛlèɓ mii, à ki taŋzɛn ɓiɗùn ɓisuu cɛɓ ki fiɗyàɓ fikɔ̀ɔ̀, lɛ di m̀ɓɛ̀lì-ɓyom rì ǹsaŋì-mɛ̀saŋ, ɓɛɛ nyaàrɛn ǹɗaŋ.

³⁷ Ɓisuulɛ dàɗkì ìnɛ lɛ, i mum bog à ɓɛ̀li, roàmbog à saŋ, ì rì saaɗ.

³⁸ Ǹɗomgà mìni lɛ ɓi kɛǹ mɛ̀saŋ ɓi dɛm inɛ ɓum ɓɛdɛŋ ɓɛɛ salà, mìnii ki ɗiŋi ɓi jàŋ inɛ ɓɔɔ mɛ say kɛ̀ɛ̀ mɛ̀tɔɓ.

³⁹ Ɓumɓɛ a Samari lɛɛ̀gwey ɓɛ ɓi bàn ìnɛn, ɓɛ gherɛ̀ngà Yeesus, ɓi rìkpaa ɗi giɓ anɛ̀n à kpaaghà ɓɔ lɛ: Ŋwaànɛ àa kpaa mɛ̀ ɓìɓan ɓìcèm ɓi m̀mɛ kì.

⁴⁰ Nni yɛ̀ɛ ɓumɓɛ a Samari ɓɛ yughày nyi a nyoo, ɓɛ ɓɔŋzàg nyi lɛ a kɔri a lɔ̀ŋkaa. Fɔɔnnɛ Yeesus à ghagsìghà mɛ̀ru mɛɓɛɛ̀ wɔɔ.

⁴¹ Ɓum ɓɛdɛŋ lɛɛ̀gwey ɓɛ gherɛ̀ngà ɓisuu ɓiɓan ɓi Yeesus nyimiɗ a kpaakpààghà.

⁴² Fɔɔnnɛ ɓɛ kpaaghà giɓ anɛ̀n lɛ, àa rìkpaa ɗyɔɔ ɗyɔ rì ɗyɔ ɗyɛɛ kiì lɛ ti gherɛn. Tì gherɛɛ ɓigomìnɛ lɛ ɓìsiìɓɔmiɗ tì woogh ɓìtòkì ɓii, tì ki yi lɛ, à rì Ǹghɛɓsì-ziinɛ a tààkaà.

Yeesus à wɔ̀ɔ̀zii man à ǹkɔ̀mɛ̀n ɓɛ̀sujàà

⁴³ Yɛ̀ɛ mɛ̀ru mɛ kiɓɛ̀ɛ̀ mɛǹ mɛ ghaghìghà, nni Yeesus à pɛ̀sɛ̀ngà wɔɔ lɛ a kɛǹ a Galile.

⁴⁴ Lɛ nyimiɗ a kalìghà lɛ: Ǹkpaŋzì-ɓìɓan a maà kem ɓi ɓi kìlɔ̀ŋ kii.

⁴⁵ Yɛ̀ɛ à kpagà a Galile, ɓumɓɛ wɔɔ ɓɛ ghaɓ nyi lɛ syeesyee, lɛ ɓɛ ghɛngà ɓìɓan ɓìcèm ɓi à kìghà a Yorisalɛm, ɓi cààmɛ̀n à tìcàɓ ti Paskà, lɛ ɓumɓɛ̀n ɓɛ kɛǹgà girig tìcàɓ tiǹ.

⁴⁶ Fɔɔnnɛ à sugtìghà min a Kana, ɓi zi ì Galile, jàŋ inɛ à ghaasìghà mɛ̀nig mɛrɔ̀g. Ǹkɔ̀mɛ̀n-ɓɛ̀sujàà ɓɛ rifòm adɛŋ à ɓaghà a Kapɛrinawum, nni man wiì à baŋì à roròɓkà.

⁴⁷ Yɛ̀ɛ ŋwaànɛ̀n à wokà lɛ, Yeesus àa m̀pɛ̀sɛɛ yì a Zyude, à yù a Galile, fɔɔnnɛ à kɛ̀ngà nyi a nyoo, à ɓɔ̀ŋzàg nyi lɛ, ɓɔɔ sɛǹ a Kapɛrinawum, ànɛ̀n a wɔɔ̀zi man wiì à baŋì, ànɛ à ɓaghà di à ti ɓiì kɔ̀ɔkɔɔ̀sì.

⁴⁸ Nni Yeesus à kpaaghà nyi lɛ: Mìnii ri lɔŋ lɛ, i ɓì ghɛɛ ɓi dàm yi ɓiɓan, rì ɓɛ̀koŋnyoo ɓɛ ɓiɓan, kɛ̀ ɓi gherɛn.

⁴⁹ Fɔɔnnɛ ǹkɔ̀mɛ̀n-ɓɛ̀sujàà à ɓàkà nyi lɛ: Kan yuiy ɓà a mɛɛ mɛm̀ di ŋwɔɓti wɛ̀m à ka maasi ɓi.

⁵⁰ Yeesus à kpaa nyi lɛ: Kɛ̀na man wɔɔ̀ à rì cem. Ŋwaànɛ̀n à gherɛ̀ngà rìkpaa ɗi Yeesus à kpaaghà nyi ɗìn, fɔɔnnɛ à pɛ̀sɛ̀ngà à kɛ̀n.

⁵¹ Yɛ̀ɛ à sɛnsɛ̀ngà a mɛɛ, nni ɓɛ̀kìì-ɓìsay ɓii ɓɛ yughà nyi kìɓoŋì ɓi bee, ɓɛ kpaa nyi lɛ: Man wɔɔ̀ à rì cem.

⁵² Fɔɔnnɛ à tɔkà ɓɔ lɛ: Fin innɛ nyoo yìì yàa sààmɛɛ? Ɓɛ ɓag̀ nyi lɛ: Ìi nsààmɛɛ rìŋ̀kò ɓi cààmɛ̀n à rìkɛ̀ɛ̀ ɗìfog.

⁵³ Fɔɔnnɛ seŋi man ànɛ̀n à yitìghà lɛ, cààmɛ̀n kiǹ kɛɛ̀ki Yeesus àa nkpaa nyi lɛ: Man wɔɔ̀ à rì cem. Nni à gherɛ̀ngà Yeesus rì rìmɛɛ ɗii ɗicèm.

⁵⁴ Dàm ìnɛn yɛ̀ɛ ɓaghà dàm ì kìɓɛ̀ɛ̀ inɛ Yeesus à kìghà a Galile, di à ɓaa yì a Zyude.