ZYAŊ 3 - Bafia Nouveau Testament

Ìkurè wu lɛ rì Yeesus rì Nikodɛm

¹ Nni ŋwaàdɛŋ ànɛ ɓi nɗaŋ wu Ɓɛ̀fàrìzyɛŋ ɗii lɛ Nikodɛm, à ɓaghà kìbog ki ɓi ɓɛ̀lem ɓɛ ɓum ɓɛ Ɓɛ̀yudɛ̀n,

² à yùghà yɛ̀ɛ Yeesus rì ìru à kpaa nyi lɛ: Raɓì, tì yii lɛ, ù rì ǹɗèsàg ànɛ Bɛ̀ll yɛɛ romiì ɓisuulɛ, ŋwaà yin lɛ à kì dàm yi ɓiɓan yɛ̀ɛ yi wɔ̀ɔ kìki yi, di Bɛ̀ll à yin a lɔ̀ŋkii.

³ Nni Yeesus à ɓàkà nyi lɛ: Ǹkpaa wɔ̀ kɔɔ̀kɔɔ̀ à rìkpaa lɛ, i mum à yalɛɛ tì ɓi nyɔɔnyɔn à rìyalɛ̀n, à yin lɛ à ghɛn kìlɔ̀ŋ ki Bɛ̀ll.

⁴ Fɔɔnnɛ Nikodɛm à tɔkà nyi lɛ: Lannɛ mum à rì lɛ à yalɛ̀ntì di à ti ǹsɛ̀ɛ̀mɛn? À rì nya lɛ à sugtì ɓi ɗùm ɗi jɛɛ à yalɛ̀ntì?

⁵ Yeesus à ɓàg nyi lɛ: Ǹkpaa wɔ̀ kɔɔ̀kɔɔ̀ à rìkpaa lɛ, i mum à yalɛɛ ɓi ri mɛ̀nig rì Ǹghay, à yin lɛ à ɗiŋì ɓi kìlɔ̀ŋ ki Bɛ̀ll.

⁶ Lɛ ŋwaànɛ à yalɛɛ rì mɛ̀mùù, à rì lɔŋ mum à mɛ̀mùù, roànɛ à yalɛɛ rì Ǹghay à rì ǹghay.

⁷ Fɔɔnnɛ kɔ̀ɔ kuurag lɛ màa kpaa wɔ̀ lɛ, ki ghɛɛ̀sɛɛ lɛ ɓi ɓiìti kì yalɛɛ.

⁸ Bɛ̀ɓ ì ti ì fɛɓsag jàŋ inɛ ì kɔni, wɔ̀ɔ̀ wowòg lɔŋ lɛ rìfiŋfìŋ kɔ̀ɔ yi fennɛ ì pɛ̀sɛɛ yì, nsoò jàŋ inɛ yɛɛ̀ kɛ̀nkɛ̀n. Fɔlɔɔ nnɛ mum ǹcèm ànɛ à mɛ yalɛn ri Ǹghay à rì.

⁹ Nni Nikodɛm à pɛ̀ɛ̀zìghà nyi lɛ: Kìɓan kiǹ ki ri lɛ ki kilɛ̀n di ki ɓaɓaa là?

¹⁰ Yeesus à kpaa nyi lɛ: Wɔ̀ lɔŋ nɗèsàg ànɛ a Isirayɛl, kɔ̀ɔ ki yi ɓiɓan ɓi?

¹¹ Ǹkpaa wɔ̀ kɔɔ̀kɔɔ̀ à rìkpaa lɛ, ɓìsiì kpaakpaa ɓiɓan ɓi tì yii, tì ki tɛɛtɛɛ̀zì ɓum ɓìɓan ɓi tì ghɛngà, kìɓan kifog kɛ̀ ɓi kɔ̀n lɛ di ɓyàa teri rìrèsì ɗis.

¹² I ɓì ti kɛ̀ ɓi gherɛn di ǹkpaa mìni ɓìɓan ɓi ɓi ziinɛ, lannɛ ɓì rì min ɓiì gherɛɛ di ǹkpaa mìni ɓìɓan ɓi aɗyòò?

¹³ Ŋwaàdɛŋ à ka ɓɔkà ɓi aɗyòò i ki cee ɓi lɛ Man à mum ànɛ à sɛngày aɗyòò.

¹⁴ Fɛlɛ yɛ̀ɛ Moyis à pɛ̀sìghà nyoo ɓi kìgeŋ aɗyoo ɓi-reɓ, fɔlɔɔ nnɛ ki ghɛɛ̀sɛɛ girig lɛ, ɓɛɛ pɛsi Man à mum aɗyoo,

¹⁵ lɛ di mum ǹcèm ànɛ à gherɛɛ nyi, à ɓa rì cɛɓ ki fiɗyàɓ fikɔ̀ɔ̀.

¹⁶ Lɛ Bɛ̀ll à keesìghà ziinɛ à pyàŋdàg fɔlɔɔ nnɛ à faghà m̀bobog wìì a Man lɛ ŋwaànɛ à gherɛɛ nyi kɛ̀ɛ wu, a ɓa lɔŋ ri cɛɓ ki fiɗyàɓ fikɔ̀ɔ̀.

¹⁷ Lɛ Bɛ̀ll à romgày ɓi Man wiì ɓi ziinɛ lɛ a fa yɔ̀ bɛ̀lɛn, à romgày lɔŋ nyi lɛ a ghɛɓsi yɔ̀.

¹⁸ Ŋwaànɛ à gherɛɛ nyi à yiìdi ri bɛ̀lɛn wɔ̀lɛ roànɛ à gherɛɛ ɓi nyi yɛɛ ti rì bɛ̀lɛn ɓisuulɛ, à gherɛ̀ngà ɓi mbobog à Man à Bɛ̀ll.

¹⁹ Bɛ̀lɛn i rì ǹto lɛ: Kìtɛɛtɛn ki yughày ɓi ziinɛ, ɓum ɓɛ ki keesi birìm à cee kìtɛɛtɛn kìn, lɛ mɛ̀kìkìì maa mɛ ɓaghà mɛ̀ɓeɓtɛn.

²⁰ Lɛ mum ǹcèm ànɛ a kìki kiɓe, à ti à ɓèèzàg kìtɛɛtɛn, kɛ̀ɛ ki yù jàŋ inɛ kìtɛɛtɛn ki ri, lɛ ìris wulɛ ɓìɓan ɓii ɓyɛ̀ kɛɛ̀ ki kpagi dan.

²¹ Wɔ̀lɛ roànɛ à ti à kìlàg ɓìɓan ɓi saaɗ, nnyɛɛ ti à yùlàg jàŋ inɛ kìtɛɛtɛn ki ri, lɛ ɓɛɛ ghɛǹ lɛ tɛntɛ̀ɛ̀n lɛ, a kìki ɓiɓan yɛ̀ɛ kɛɛ̀ kɔ̀ngi Bɛ̀ll.

Zyaŋ à rèsii tì ɓum rìɓa ɗi Yeesus

²² Ajɛ̀m ìnɛn, Yeesus à kɛ̀ngà rì ɓɛ̀yilàg ɓii ɓi ziì Zyude; à ghagsìghà cààmɛ̀n wɔɔ ri ɓɔ, à ki ɓàaɓaɓtì ɓum.

²³ Zyaŋ girig à ɓààɓàɓtìghà ɓum a Enɔŋ, jàŋbog rì Salim lɛ mɛ̀nig mɛ ɓaghà wɔɔ lɛɛ̀gwey. Nni ɓum ɓɛ kɛnkɛ̀ngà wɔɔ lɛ a ɓaɓti ɓɔ.

²⁴ Lɛ ki ɓaghà di ɓɛ ka pig ɓi Zyaŋ ɓi naà-zày.

²⁵ Nni nyoey yi kpighà lɛ rì ɓɛ̀yilàg ɓɛ Zyaŋ, rì muu Ɓɛ̀yudɛ̀n ɓi kìɓan ki ritɛn, ɓi ɓìsyɔ̀ɔ̀ ɓi righerɛ̀n ɗi Ɓɛ̀yudɛ̀n.

²⁶ Fɔɔnnɛ ɓɛ̀yilàg ɓɛ kɛngà yɛ̀ɛ Zyaŋ ɓɛ kpaa nyi lɛ: Raɓì, ŋwaànɛ ɓìi nɗì rì nyi cɛcɛɗ ki Zyuridɛŋ, ànɛ wɔ̀ɔ ntɛɛzsii ɓìsi rìɓa ɗii, à ti girig ɓiì ɓàaɓaɓtì ɓum, fɔɔnnɛ ɓum ɓɛ̀cèm ɓɛɛ̀ sùusuùrɛ̀n a lɔ̀ŋkii.

²⁷ Nni Zyaŋ à ɓàkà ɓɔ lɛ: Mum à yin lɛ à ɓa rì com kidɛŋ, ki ki yin ki Bɛ̀ll à faa nyi.

²⁸ Mìniìɓɔmiɗ ɓì rì mɛ̀ ɓɛ̀wusìnɛ̀ɗ lɛ, ǹkpaaghà lɛ, àa mɛ̀ yɛɛ ri Kiris, kìɓan kifog, ɓɛ romgày mɛ̀ lɛ nsyoŋ̀ yì nyi bee.

²⁹ Ŋwaànɛ à rì rì giɓ, yɛɛ ri yii giɓ; wɔ̀lɛ rìghan ɗi yii giɓ ɗi ɗi ri wɔɔ ɗi ti ɗi nyaàràg yɛ̀ɛ mɛ̀nɔ̀ɓɔ̀, lɛ jɛ̀ɛ̀ ì yii giɓ inɛ ɗyɛɛ̀ wowòg. Rìkuu ɗi kinyàà ɗiǹ ɗyɛɛ̀ɗi mɛ̀ ǹɗì ǹɗonɛn ri ɗyɔ̀.

³⁰ Ki ghɛɛ̀sɛɛ lɛ nyii ɓɔɓɔg, mɛ̀ nsisìlì.

³¹ Ŋwaànɛ à pɛ̀sɛɛ yì aɗyoo, à teŋmɛɛ à cee ɓum ɓɛ̀cèm; roànɛ à pɛ̀sɛɛ yì ɓi ziinɛ, à rì lɔŋ ŋwaànɛ ɓi ziinɛ, fɔɔnnɛ a ki kpaakpaa ɓiɓan ɓi ɓi ziinɛ. Ŋwaànɛ à pɛ̀sɛɛ yì a ɗyoo,

³² ɓìɓan ɓi à ghɛngà rì ɓi à wokà ɓyɛɛ̀ɓi a rèrèsì; nni mum à ki teri ɓi rirèsì ɗii ɗiǹ.

³³ I mum à ki teri rìrèsì ɗii, di à gherɛɛ yɛɛ lɔɔ lɛ Bɛ̀ll à ti à kpaaghì saaɗ.

³⁴ Ɓisuulɛ, roànɛ Bɛ̀ll à romgày, a kakali ɓiɓan ɓi Bɛ̀ll; lɛ Bɛ̀ll à ti à roòzàg nyi rì Nghay wìì lɛ pisa.

³⁵ Seŋi à keesii Man, fɔɔnnɛ à faghà ɓìɓan ɓìcèm ɓi ɓyàg ɓii.

³⁶ Nni mum ǹcèm ànɛ à gherɛɛ Man, à rì rì cɛɓ ki fiɗyàɓ fikɔ̀ɔ̀; ŋwaànɛ à woogh ɓi nyi, àa ghɛn ɓi cɛɓ, kìɓan kifog, rìbaŋì ɗi Bɛ̀ll ɗi kaka nyi ɓi nyòò.