ZYAŊ 20 - Bafia Nouveau Testament

Rìghèmɓɛ̀n ɗi Yeesus

¹ Ŋwosi sɔnɗì sariwa, Marii Madelɛn à pongà a zɔ̀ŋ rì tìrììriì, à ghɛn lɛ, gɔ̀g ìnɛ ì ɓaghà ɓi ŋwɔm wu zɔ̀ŋ ì ti m̀pisiyɛn.

² Fɔɔnnɛ à pɛ̀sɛ̀ngà rì mɛ̀ree, à kɛ̀n kì ghɛɛ̀ lɛ rì Simɔn Pyɛɛri, rì ǹ-yilàg àmbog ànɛ Yeesus àa nkeesàg, à kpaa ɓɔ lɛ: Ɓaa pisii Kan ɓi zɔ̀ŋ, nni tì yii ɓi fennɛ ɓaa foŋi nyi.

³ Nni Pyɛɛri ɓɛɛ̀ ǹ-yilàg àmbog ɓɛ pɛsɛ̀ngà ɓɛ kɛǹ a zɔ̀ŋ.

⁴ Ɓɔɔ̀cèm ɓɛ kɛnkɛ̀ngà ɗì mɛ̀ree, kìɓan kifog, ǹ-yilàg àmbog à fyàgà Pyɛɛri ɓi mɛ̀ree, à log kì kpaŋì a zɔ̀ŋ ɗì nyi.

⁵ Fɔɔnnɛ à laŋmɛ̀ngà lɛ a tɛg wɔɔ ɓi ɗùm, à ghɛn ɓɛ̀ɓanɗas ɓɛ̀ nɔ̀nɔŋiyɛn, wɔ̀lɛ à ɗiŋìghà ɓi ɓi zɔ̀ŋ.

⁶ Nni Simɔn Pyɛɛri ànɛ à ɓaghày nyi ajɛ̀m à kpagà, à ɗiŋì ɓi zɔ̀ŋ, à ghɛn ɓɛ̀ɓanɗas ɓɛ̀nɔ̀nɔŋiyɛn,

⁷ kìlàà ki ki ɓaghà Yeesus ɓi nto, kɛ̀ kɛɛ̀ ki ɓa jàŋbog rì ɓɛ̀ɓanɗas, kɔɔ ɓa kì takakɛn fɔlɔɔ ki nɔ̀ŋziyɛn yi kìpàs.

⁸ Nni ǹ-yilàg àmbog ànɛ à lokà kìkpaŋì a zɔ̀ŋ, à ɗiŋìghà girig, à ghɛn à ki gherɛn.

⁹ Lɛ ɓɛ̀yilàg ɓɛ ɓaghà di ɓɛ ka wog ɓi azi anɛ ɓi rìkàn ɗi ɗi kpaakpààghà lɛ ki ghɛɛ̀sɛ̀ngà lɛ Yeesus a ghemɓɛn yì a ɓìloŋ.

¹⁰ Fɔɔnnɛ ɓɛ̀yilàg ɓɛ pɛsɛ̀ngà, ɓɛ sugtì a mɛɛ.

¹¹ Marii à rɛrɛ̀lìghà ɓi dan, ǹwɔŋì rì zɔ̀ŋ, à renɗèn. Yɛ̀ɛ à rènɗengà, nni à laŋmɛ̀ngà lɛ a ghɛn zɔ̀ŋ ɓi ɗùm.

¹² Fɔɔnnɛ à ghɛngà ɓum ɓɛ titom ɓɛɓɛɛ̀, rì ɓìlàà ɓi puɓ, di ɓɛ kɔkɔrii ɓi jàŋ inɛ ɓɛ nɔŋzìghà kìloŋ ki Yeesus ɓɛ ki lɛ, roànɛ a nto, roàmbog a mɛ̀kòò.

¹³ Ɓum ɓɛ titom ɓɛǹ ɓɛ tɔg nyi lɛ: Giɓ anɛ, cɛ u rènɗèn? Nyii ɓaàg ɓɔ lɛ: Ɓaa pisii Kan wɛ̀m nni mɛ̀ ǹ-yii ɓi jàŋ inɛ ɓaa foŋi nyi.

¹⁴ Yɛ̀ɛ à kpaaghà fɔlɔɔ, nni à lɔ̀ɔ̀ghrɛ̀ngà, à ghɛn Yeesus ǹɗɛrɛriyɛn, kìɓan kifog, à yighà ɓi lɛ Yeesus yɛɛ ri.

¹⁵ Nni Yeesus à tɔkà nyi lɛ: Giɓ anɛ, ɓi cɛnnɛ u rènɗèn? Ghɛn innɛ u kaakàà? Nyii fefèkà lɛ m̀ɓèŋì-dɛm yɛɛ ri. Fɔɔnnɛ à kpaaghà nyi lɛ: Kan! i wɔ̀ yaa pisii nyi fɛ, kali mɛ̀ jàŋ inɛ wàa foŋi nyi di mɛ̀ɛ nteɗ yì nyi.

¹⁶ Yeesus à kpaa nyi lɛ: Marii! nni à lɔ̀ɔ̀ghrɛ̀ngà, à kpaa Yeesus ɓi rì ebìreegh lɛ: Ràɓunì! yɛɛlɔɔ lɛ ǹɗèsàg.

¹⁷ Yeesus à kpaa nyi lɛ: Kɔ̀ɔ kòm mɛ, ɓisuulɛ ǹka ɓɔg ɓi yɛ̀ɛ Seŋi wɛ̀m; kìɓan kifog kɛ̀na a ɓɛ̀geni ɓɛ̀m, u kpaa ɓɔ lɛ m̀ɓɔɔgh yɛ̀ɛ Seŋi wɛ̀m, nnyɛɛ ri girig Seŋi wìn, yɛ̀ɛ Bɛ̀ll wɛ̀m, ànɛ à rì girig Bɛ̀ll wìn.

¹⁸ Fɔɔnnɛ Marii madelɛn à kɛ̀ngà kì kpaà ɓɛ̀yilàg lɛ nyaa ghɛɛ Kan, ànɛ̀n à kpaa nyi ɓìɓan ɓi nyii kpaa ɓɛǹ ɓin.

Yeesus à rèsɛɛ a ɓɛ̀yilàg ɓii

¹⁹ Cɛŋkò ki ŋwosi sɔnɗì nyimiɗ anɛ̀n, mɛ̀suunaa mɛ ɓi naa ìnɛ ɓɛ̀yilàg ɓɛ ɓaghà wɔɔ ɓɛtaŋzɛn, mɛ ɓaghà mɛ̀rogakɛn lɛ, ɓɛ rirìsìghà Ɓɛ̀yudɛ̀n. Nni Yeesus à yùghà, à rɛlì ɓi nyìinyìm wàà, à kpaa ɓɔ lɛ: Fyòoog a ɓa rì mìni.

²⁰ Yɛ̀ɛ à kpaaghà fɔlɔɔ, nni à rèsìghà ɓɔ lɛ, rì ɓyàg ɓii, rì bèn yìì. Ɓɛ̀yilàg ɓɛ nyaàrɛ̀n yɛ̀ɛ ɓɛ ghɛngà Kan.

²¹ Yeesus à ɓììtì ɓɔ kìkpaà lɛ: Fyòoog a ɓa rì mìni. Fɛlɛ yɛ̀ɛ Tààta à romgày mɛ̀, mɛ̀ ǹɗomi girig mìni.

²² Lɔŋ yɛ̀ɛ à kpaaghà fɔlɔɔ, nni à fɛɓkà ɓɔ bɛ̀ɛ̀bɛ̀ɛ̀ ɓi nyoo, à kpaa ɓɔ lɛ: Terina Kìtɛntɛ̀ɛ̀n ki Nghay.

²³ Ɓum ɓɛ̀cèm ɓɛ ɓì ɓiì cenɛɛ ɓiɓe, ɓɛɛ̀ɓɛ ɓìɓe ɓyaa ɓi ri ɓiì ɓaà ɓì cenɛn, ɓɛ̀roɓɛ ɓì cenɛɛ ɓi ɓiɓe, ɓìɓe ɓyaa ɓi rɔɓ kɛ̀ɛ̀ rìcenɛ̀n.

²⁴ Tomas ànɛ ɓɛ nɗegì lɛ Didim, kìbog ki ɓi ɓɛ̀yilàg ɓɛ Yeesus ntɛ̀ɗ rì ɓɛɓɛɛ̀, à ɓaghà ɓi wɔɔ cààmɛ̀n ki Yeesus à yùghày kiǹ.

²⁵ Nni ɓɛ̀yilàg ɓɛmbog ɓɛ kpaaghà nyi lɛ: Tyàa ghɛɛ Kan. Tomas à ɓàg ɓɔ lɛ: I ǹghɛɛ ɓi ɓifìlì ɓi tyɛmì ɓi ɓyàg ɓii, kɛ̀ɛ nki foŋ manàcàg wɛm̀ ɓi ɓìfìlì ɓi tyɛmì nsoò lɛ ǹfoŋ càg kɛm̀ ɓi bèn yìì, ǹ-yin lɛ ǹgherɛ̀n.

²⁶ Ajɛ̀m ì mɛ̀ru taàraa, ɓɛ̀yilàg ɓɛ Yeesus ɓɛ ɓatìghà ɓɛ̀taŋzɛn ɓi naa, Tomas à ɓaghà wɔɔ ri ɓɔ. Mɛ̀suunaa mɛ ɓaghà mɛ̀rogakɛn, nni Yeesus à yùghày, à rɛlì ɓɔ ɓi nyìinyìm, à kpaa ɓɔ lɛ: Fyòoog a ɓa rì mìni.

²⁷ Fɔɔnnɛ à kpaaghà Tomas lɛ: Nàmay manàcàg wɔɔ̀ fɛ, ù ki ghɛn ɓyàg ɓyɛm̀; nàmay càg u kom̀ bèn yɛ̀m; kɔ̀ɔ teteɗ nyoey, gherɛn.

²⁸ Tomas à ɓàg nyi lɛ: Kan wɛ̀m, rì Bɛ̀ll wɛ̀m!

²⁹ Yeesus à kpaa nyi lɛ: Ù gherɛɛ ɓisuulɛ ù mɛ ghɛn mɛ? Mààgh rì ɓɛ̀roɓɛ ɓɛ gherɛ̀ngà ɓɛ̀ kɛɛ̀ ghɛn.

³⁰ Yeesus à kìtìghà dàm yi ɓiɓan yidɛŋ lɛɛ̀gwey ɓi mis mɛ ɓɛyilàg ɓii, yi yi yin fɛ yì kànɛn ɓi kaàtà ànɛ.

³¹ Kìɓan kifog, gàɓ ìnɛ ì rì ǹkànɛn lɛ di ɓi gherɛn lɛ Yeesus à rì Kiris, Man à Bɛ̀ll, rì tì lɛ, i ɓì gherɛɛ, ɓì ɓa rì cɛɓ lɛ nyi.