Bìoball air-loidhne

ZYAŊ 16 - Bafia Nouveau Testament

¹ Màa kpaa mìni ɓìɓan ɓiǹ lɛ kɛ̀ ɓi kɛ̀ɓtɛn fìɓàg.

² Ɓɛ ri nàɓ mini ɓi naa yi bɔ̀ŋzɛ̀n; cààmɛ̀n ki riì kɔm̀, kɔ yɛɛ ri ɓa lɛ, i mum à woli kìbog ki ɓi mìni, à fèkì lɛ à kìi Bɛ̀ll kìsay.

³ Ɓɛ ri ɓiì kìkii fɔlɔɔ lɛ, ɓɛ yighà ɓi Tààta, ɓɛ̀ kɛɛ̀ ki yi mɛ.

⁴ Wɔ̀lɛ màa kpaa mìni ɓìɓan ɓiǹ lɛ yɛ̀ɛ cààmɛ̀n ki ri kpaŋ, ɓì yitì lɛ ǹkalìghà mìni ɓyɔ̀. Ǹkalìghà ɓi mini ɓyɔ a rìtumɛ̀n ɓisuulɛ m̀ɓaghà rì mìni.

Kìsay ki Kitɛntɛ̀ɛ̀n ki Nghay

⁵ Ɓigomìnɛ ǹkɛ̀ɛ yɛ̀ɛ roànɛ à romgày mɛ̀. Nsoò wààdɛŋ ù tɔɔgh ɓi mɛ lɛ, ù kɛ̀ɛ fe?

⁶ Wɔ̀lɛ bim i mɛ ron mini ɓi mɛ̀rem ɓisuulɛ, màa kpaa mìni ɓìɓan ɓiǹ.

⁷ Ǹsoò fɔlɔɔ, ǹkpaa mìni saaɗ lɛ ki ri mìni kìrɔɔ lɛ nkɛǹ; lɛ i ǹkɛ̀ɛ ɓi, m̀maasì-mɛ̀rem à yin lɛ à yù a lɔ̀ŋkin; wɔ̀lɛ i ǹkɛ̀ɛ, ǹɗom yì mìni nyì.

⁸ Nni yɛ̀ɛ à ri yù, à ri konag ki rèsii ɓumɓɛ ɓi ziinɛ lɛ, mɛ̀yitì maa ɓi kìɓan ki kiɓe, rì ɓi saaɗ, rì ɓi rìren ɗi ɓiɓan ɗi Bɛ̀ll, mɛ ri kìtɛ̀ŋtɛ̀ŋ.

⁹ Mɛ ri kìtɛ̀ŋtɛ̀ŋ ɓi kìɓan ki kiɓe ɓisuulɛ, ɓɛ gherɛɛ ɓi mɛ.

¹⁰ Mɛ ɓa zɛ̀ɗ ɓi kìɓan ki saaɗ ɓisuulɛ, mɛ̀ ǹkɛ̀ɛ yɛ̀ɛ Tààta, ɓyàa ghɛɛ̀di ɓi mɛ.

¹¹ Mɔ zɛ̀ɗ ɓi kìɓan ki riren ɗi ɓiɓan ɗi Bɛ̀ll, ɓisuulɛ, kìɓan ki rifòm ɗi ziinɛ ki mɛ renɛ̀n.

¹² Ǹkaka rì ɓìɓan lɛɛ̀gwey ɓi lɛ nkpaà mìni, nni ɓì yin lɛ ɓì wog ɓyɔ ɓigomìnɛ.

¹³ Lɔŋ yɛ̀ɛ Nghay à ɓɛ̀kɔɔ̀kɔɔ̀ ɓɛ ɓiɓan a ri yù, à ri rèsi mini saaɗ bimiɗ. Lɛ, àa kpaa ɓi mini ɓìɓan ɓi nyimiɗ yɛɛ ɓekii lɛ a kpaà, à rì lɔŋ mini ɓiì kpaà ɓìɓan ɓìcèm ɓi à woogh, à ki kpaa mini ɓìɓan ɓi ɓi ghɛɛ̀sɛɛ kì kìlɛɛ ɓi mɛ̀ru mɛ asu.

¹⁴ À rì mɛ̀ ɓiì kemzii ɓisuulɛ à ri teɗ ɓiɓan ɓyɛm̀, à kpaa mìni ɓyɔ̀.

¹⁵ Ɓìɓan ɓìcèm ɓi Tààta à rì rì ɓyɔ, ɓi ri ɓiŋkɛ̀m, fɔlɔɔ nnɛ màa kpaa miì lɛ, Nghay à ri teɗ ɓiɓan ɓyɛm̀, à kpaa mìni ɓyɔ̀.

Ǹɗemi-kɛŋɛn wu ɓiì lɔ̀ɔ̀ghrɛɛ kinyàà

¹⁶ Cààmɛ̀n lɛsàg ɓyàa ghɛɛ̀di ɓi mɛ; nni yɛ̀ɛ maa cààmɛ̀n à ɓiì ghaghii ti, ɓì ghɛɛ̀di mɛ̀.

¹⁷ Fɔɔnnɛ ɓɛ̀yilàg ɓii ɓɛdɛŋ ɓɛ tɔɔghrɛ̀ngà wɔɔ ɓɔ rì ɓɔ lɛ: Kìɓan ki à kpaa ɓìsi ki, ki ri ɓà azi lɛ cɛ? À kpaa lɛ: Cààmɛ̀n lɛsàg ɓyàa ghɛɛ̀di ɓi mɛ. Yɛ̀ɛ maa cààmɛ̀n à ɓiì ghaghii ti, ɓì ghɛɛ̀dì mɛ̀, rì tì lɛ ǹkɛ̀ɛ yɛ̀ɛ Tààta.

¹⁸ Fɔɔnnɛ ɓɛ kpaaghà lɛ: Cààmɛ̀n lɛsàg ànɛ à kpaa ànɛ, à rì azi lɛ cɛ? Ɓìsii woogh ɓi com ki a kɔ̀nkɔn lɛ a kpaà.

¹⁹ Yeesus à yighà lɛ ɓɛɛ̀ kɔ̀nkɔn lɛ ɓɛɛ tɔg nyi kìɓan kiǹ; fɔɔnnɛ à kpaaghà ɓɔ lɛ: Ɓi tɔɔtɔɔ̀ghrɛ̀n azi anɛ ɓi kìɓan ki màa kpaa mìni lɛ, cààmɛ̀n lɛsàg ɓyàa ghɛɛ̀di ɓi mɛ, nni yɛ̀ɛ maa cààmɛ̀n à ɓiì ghaghii ti ɓì ghɛɛ̀dì mɛ̀.

²⁰ Ǹkalii mìni saaɗ à rìkalì lɛ ɓì ɓiì kìi lɛ ɓì rèn, ɓì ki seeghkɛn, ziinɛ yɔ̀ɔ̀ nyàànyàà. Ɓì ri ɓa ri ǹɗemi-kɛŋɛn, kìɓan kifog ǹɗem win wu kɛŋɛn wu ɓiì lɔ̀ɔ̀ghrɛɛ kinyàà.

²¹ Cààmɛ̀n ki giɓ a kɔ̀rii ɗyem, à rì nɗem wu ɓeɓtɛn lɛ cààmɛ̀n kii ki ntɔɓ ki kpaŋi. Nni i man à mɛ yalɛ̀n, à ɗimzɛ̀n rìkɛŋ ɗii ɗiǹ lɛ kìnyàà ki à rì rì kɔ lɛ ǹto wu mum wu yalɛɛ ɓi ziinɛ.

²² Fɔlɔɔ nnɛ mìni girig bì rì rì ǹɗemi-kɛŋɛn ɓigomìnɛ, kìɓan kifog ǹɗi ghɛɛ̀di mini. Nni yɛ̀ɛ ǹɗi ghɛɛ̀di mini, mɛ̀rem min mɛ ri wog kinyàà, mum àa ki ɓàtɛn ti ɓi mini kìnyàà kiǹ.

²³ Ŋwos anɛ̀n, ɓyàa tɔg ti ɓi mɛ kìɓan. Ǹkpaa mìni ɓi saaɗ lɛ: Com kìcèm ki ɓì ri tɔg Tààta, à ri fa mini kɔ ɓi ɗii ɗyɛ̀m.

²⁴ À kpaŋ ɓigomìnɛ, ɓì ka tɔg ɓi com kidɛŋ ɓi ɗii ɗyɛ̀m. Tɔɔghna, ɓɛɛ fa mìni, di fɔɔnnɛ kìnyàà kin kɛɛ roǹ.

²⁵ Màa kpaa mìni ɓìɓan ɓiǹ ɓi dàɗkì. Cààmɛ̀n ki riì kɛɛ̀ki màa tòòghrɛn ti ɓi ri mìni ɓi dàɗkì, ǹɗi kpaa lɔŋ mini ɓìɓan ɓi ɓi seesee Tààta lɛ tɛntɛ̀ɛ̀n.

²⁶ Ŋwos anɛ̀n ɓì tɔɔgh gɛ Tààta ɓìɓan ɓi ɗii ɗyɛ̀m, nni mɛ̀ ǹki kalii ɓi mìni lɛ, m̀ɓɔ̀ŋzaagh gɛ Tààta ɓisu wiǹ;

²⁷ lɛ Tààta nyimiɗ a keesii mìni ɓisuulɛ ɓì keesìghà mɛ̀, ɓì ki gherɛn lɛ m̀pɛ̀sɛ̀ngày yɛ̀ɛ Bɛ̀ll.

²⁸ M̀pɛ̀sɛ̀ngày yɛ̀ɛ Tààta, ǹ-yùy ɓi ziinɛ. Nni ɓigomìnɛ m̀pɛ̀sɛɛ ɓi ziinɛ, ǹsugtì yɛ̀ɛ Tààta.

²⁹ Fɔɔnnɛ ɓɛ̀yilàg ɓii ɓɛ kpaaghà nyi lɛ: Ghɛna ɓà min yɛ̀ɛ u tòtog ri ɓìsi ɓigomìnɛ lɛ tɛntɛ̀ɛ̀n, kɛ̀ɛ̀ dàɗkì.

³⁰ Ɓigomìnɛ tì mɛ yi lɛ ù yii ɓìɓan ɓìcèm, rì tì lɛ, ki ghɛɓsii ɓi com lɛ mum a tɔg wɔ̀ ǹtɔɔ̀tɔɔgh. Fɔlɔɔ nnɛ tì gherɛɛ miì lɛ ù ɓaghày yɛ̀ɛ Bɛ̀ll.

³¹ Nni Yeesus à ɓàkà ɓɔ lɛ: Ɓigomìnɛ nnɛ ɓì mɛ gherɛ̀n?

³² Ɓì ghɛɛ! Cààmɛ̀n ki riì, kiŋcèm ki mɛ kpaŋ, kɛɛ̀ki ɓì ɓiì tyàŋzɛɛ, mum ǹcèm à nɔ̀ɔ̀tì bee yiì, ɓi càɗ mɛ̀ cɛ̀ncɛm; nsoò fɔlɔɔ, ǹ-yin cɛ̀ncɛm, lɛ Tààta à rì ɓɛɛ̀ mɛ̀.

³³ Mɛ̀ɛ ǹkpaa mìni ɓìɓan ɓiǹ lɛ, ɓi ɓa rì fyòoog a lɔ̀ŋkɛm̀. Ɓì ɓiì ɓaà rì ǹ-yeesɛ̀n ɓi ziinɛ nni sììriina mɛ̀rem, mɛ̀ m̀mɛ yag ziinɛ ɓi-tèɗ.

« Roimhe

Air adhart »

Bible Society of Cameroon

Lean sinn:

Ceanglaichean taic

Sanasan