ZYAŊ 14 - Bafia Nouveau Testament

Yeesus à rì bee inɛ ì kɛ̀ɛ yɛ̀ɛ Bɛ̀ll

¹ Mɛ̀rem min mɛ̀ kɛɛ̀ ɓùùsɛn, gherɛɛna Bɛ̀ll, ɓì gherɛ̀n girig mɛ̀.

² Ɓìden ɓi naa ɓi ri lɛɛ̀gwey ɓi mɛɛ mɛ Seŋi wɛ̀m; i kɛ̀ kɛɛ̀ ɓa fɔlɔɔ, di ǹkalìghà mìni. Ǹkɛ̀ɛ mìni kì pègsɛɛ jàŋ.

³ M̀ɓiì ɓaà lɛ, i ǹkɛ̀ɛ, i m̀mɛ pègsɛn mini jàŋ, ǹsugtìì lɛ nteɗ mìni a lɔ̀ŋkɛm̀, lɛ di mìni girig, ɓi ɓa jàŋ inɛ mɛ̀ ǹɗì.

⁴ Ɓì yii bee inɛ ɓi jàŋ inɛ ǹkɛ̀ɛ.

⁵ Nni Tomas à kpaaghà nyi lɛ: Kan! Tì yii ɓi jàŋ inɛ ù kɛ̀ɛ, nni lannɛ tì rì lɛ tì yi bee inɛ ì kɛ̀ɛ wɔ̀ɔ̀?

⁶ Yeesus à ɓàg nyi lɛ: Mɛ̀ yɛɛ ri bee, rì saaɗ, rì cɛɓ. Mum à yin lɛ à kpaŋ yɛ̀ɛ Tààta di à fyee ɓi a lɔ̀ŋkɛm̀.

⁷ I ɓyàa yi mɛ̀, di ɓì rì lɛ ɓì yi Seŋi wɛ̀m. Nni à tumɛ̀n ɓigomìnɛ, ɓì yii nyi, ɓì mɛ ki ghɛn nyi.

⁸ Nni Filiɓ à kpaaghà nyi lɛ: Kan rèsi ɓìsi Tààta, mɛ̀rem mis mɛɛ kpi ɓi mùm.

⁹ Yeesus à kpaa nyi lɛ: Filiɓ, fìɗyàɓ fi maà ɓa rì mìni, ù ka yighà ɓi mɛ? Ŋwaànɛ à mɛ ghɛn mɛ, à mɛ ghɛn Tààta, nni lannɛ ù kpaa lɛ rèsi ɓìsi Tààta?

¹⁰ Ù gherɛɛ ɓi lɛ, ki ri lɛ mɛ̀ ɓi Tààta, Tààta ɓi mɛ̀? Ɓìɓan ɓi nkpaakpaa mini ɓi, ɓi yin ɓiɓan ɓi mɛ̀ɛmiɗ yɛɛ ɓekii lɛ nkpaà, lɔŋ Tààta ànɛ à rì a lɔ̀ŋkɛm̀, yɛɛ̀ kìki ɓiɓan ɓii.

¹¹ Gherɛɛna mɛ̀ yɛ̀ɛ ǹkpaa mìni lɛ, ki ri lɛ mɛ̀ ɓi Tààta, Tààta ɓi mɛ̀; i ɓì ɓèni fɔlɔɔ, ɓì gherɛ̀n ɓisuu ɓiɓan ɓi nkìkì.

¹² Ǹkalii mìni saaɗ à rìkpaa lɛ, ŋwaànɛ à gherɛɛ mɛ̀, à ɓiì kìi girig ɓìɓan ɓi mɛ̀ɛ nkìkì, à ki kì kɔm̀ ɓìɓan ɓi ɓi cee ɓiǹ ɓisuulɛ ǹkɛ̀ɛ yɛ̀ɛ Tààta.

¹³ Fɔɔnnɛ com kìcèm ki ɓì rì ɓiì tɔɔ̀gh rì ɗii ɗyɛ̀m, ǹɗì mìni kɔ ɓiì kìi, lɛ Tààta a teɗ rìkem ɓi Man.

¹⁴ I ɓì tɔɔgh com rì ɗii ɗyɛ̀m m̀ɓiì kìi kɔ.

Ǹkàg wu riyù ɗi Kitɛntɛ̀ɛ̀n ki Nghay

¹⁵ I ɓì keesii mɛ̀, ɓì ɓiì ɓèŋi ɓidɔ̀gsɛna ɓyɛm̀.

¹⁶ Fɔɔnnɛ m̀ɓiì ɓɔ̀ŋzii Tààta, à rom yì mìni m̀maasì mɛ̀rem adɛŋ, ànɛ à ɓa rì mìni fìɗyàɓ fikɔ̀ɔ̀.

¹⁷ Nnyɛɛ ri Ǹghay à ɓɛ̀kɔɔ̀kɔɔ̀ ɓɛ ɓiɓan ànɛ ziinɛ ì yin lɛ ì teɗ, ɓisuulɛ ì ghɛɛ ɓi nyi, yɛ̀ kɛɛ̀ ki yi nyi. Lɔŋ mìni yɛɛ yii nyi ɓisuulɛ à rì ɓi mìni.

¹⁸ Màa càɗ ɓi mini ɓɔɔ̀zii, ǹɗì ɓiì sugtii yi a lɔ̀ŋkin.

¹⁹ Cààmɛ̀n lɛsàg ziinɛ yàa ghɛɛ̀di ɓi mɛ, lɔŋ mìni yɛɛ ri mɛ̀ ɓiì seesee ɓisuulɛ ǹɗì cem, nni mìni girig ɓì ɓiì ɓaà rì cɛɓ.

²⁰ Ŋwos anɛ̀n ɓì yii gɛ lɛ, ǹɗì ɓi Seŋi wɛ̀m, mìni ɓi mɛ̀, mɛ̀ ɓi mìni.

²¹ Ŋwaànɛ à rì rì ɓìdɔ̀gsɛna ɓyɛm̀ à ki ɓèŋ ɓyɔ, nnyɛɛ keesii mɛ̀. Nni ŋwaànɛ à keesii mɛ̀ innɛ Seŋi wɛ̀m à ɓiì kesii, mɛ̀ ǹkeesì girig nyi, ǹki rèsɛn nyi lɛ a yi mɛ̀.

²² Fɔɔnnɛ Zyuudɛ, àa roànɛ lɛ Iskariyot, a kpaaghi nyi lɛ: Kan! Ki ɓaa la lɛ ɓìsi ɓɛɛ̀ɓɛ u resɛn lɛ ti yi wɔ̀, kɔ̀ɔ rèsɛn ziinɛ?

²³ Yeesus à ɓàg nyi lɛ: I mum à keesii mɛ̀, à ɓiì ɓèŋi jɛ̀ɛ̀ yɛ̀m, Seŋi wɛ̀m à rì nyi ɓiì keesi; tì ɓiì yùu a lɔ̀ŋkii, tì pègsɛ̀n ìkɔ̀ɔ̀ wis a lɔ̀ŋkii.

²⁴ Mum ànɛ à kessi ɓi mɛ, à yin lɛ à ɓèŋ ɓìɓan ɓyɛm̀; nni jɛ̀ɛ̀ ìnɛ ɓi wowog inɛ, ì yin jɛ̀ɛ̀ yɛ̀m, ì rì lɔŋ jɛ̀ɛ̀ ì Tààta ànɛ à romgày mɛ̀.

²⁵ Ǹkpaa mìni ɓìɓan ɓiǹ yɛ̀ɛ ǹkaka lɛ rì mìni.

²⁶ Kìɓan kifog m̀maasì mɛ̀rem ànɛ à rì Kìtɛntɛ̀ɛ̀n ki Nghay ki Tààta à ɓiì romìì ɓi ɗii ɗyɛ̀m, yɛɛ ri mìni ɓiì rèsaagh ɓiɓan ɓìcèm, à ki kì lɛ, ɓi yiti ɓìɓan ɓìcèm ɓi ǹkalìghà mìni.

²⁷ Ǹcàri mìni fyòoog, ǹfaa mìni fyòoog wɛ̀m. Mɛ̀ ǹfaa ɓi mini nyi yɛ̀ɛ ziinɛ ì ti ì falàg. Mɛ̀rem min mɛ̀ kɛɛ̀ cɛɛcɛɛ̀rɛ̀n, nsoò lɛ mɛ yeèghyèèghkɛ̀n.

²⁸ Ɓyàa woogh fɛlɛ yɛ̀ɛ màa kpaa mìni lɛ ǹkɛ̀ɛ, m̀ɓiì ki sugtii yi a lɔ̀ŋkin. I ɓyàa keesii mɛ̀ di ɓì rì lɛ ɓì nyààrɛ̀n lɛ, ǹkɛ̀ɛ yɛ̀ɛ Tààta ɓisuulɛ, Tààta à ceetii mɛ̀.

²⁹ Ǹkpaa mìni ɓìɓan ɓiǹ ɓigomìnɛ di ɓi ka kilɛn ɓi, lɛ yɛ̀ɛ ɓi ri ɓiì kìlɛɛ, ɓì gherɛ̀n.

³⁰ Tyàa tòki ti ɓi ri mìni, ɓisuulɛ rìfòm ɗi ziinɛ ɗi tiì, nni ɗi yin ɗi ìtèɗ wulɛ ɗi ki mɛ̀ com.

³¹ Wɔ̀lɛ ki ghɛɛ̀sɛɛ lɛ, ziinɛ yɛ̀ɛ yi lɛ, ǹkeesii Tààta rì tì lɛ, nkìki ɓiɓan lɔŋ yɛ̀ɛ Tààta à kpaaghà mɛ̀ lɛ nki. Pɛ̀sɛɛna aɗyoo, ti pɛsɛn fɛ̀.