ZYAŊ 12 - Bafia Nouveau Testament

Yeesus à rì a Bɛtanii

¹ Yɛ̀ɛ Paskà à ɓaghà di à mɛ rɔ̀ɓ mɛru taàfog, Yeesus à kɛ̀ngà a Bɛtanii, jàŋ inɛ Lazaari ànɛ à ghèmzìghà ɓi zɔ̀ŋ à ɓaghà.

² Ɓɛ lamgà nyi ɓìɗilàg wɔɔ, Maata à kàɓkì ɓum ɓyɔ̀. Lazaari à ɓaghà kìbog ki ɓi ɓumɓɛ ɓɛ ɗiɗìghà ǹɗaŋ ri Yeesus.

³ Nni Marii à tekà coo ɓeŋ à tìrààre ti ti ɓaghà tì kɛŋɛn lɛɛ̀gwey; ti ɓaghà tì kìyɛn ɗi caaɓi kidɛŋ lɛ naàr, à sùùrì Yeesus tìrààre tìn ɓi mɛ̀kòò, à ki tɔ̀si nyi mɔ rì tyòŋ tii; fɔɔnnɛ mɛ̀rùù mɛ tirààre mɛ saàghà naa bimiɗ.

⁴ Nni kìbog ki ɓi ɓɛ̀yilàg ɓɛ Yeesus lɛ Zyudas Iskariyot ànɛ à ghɛ̀ɛ̀sɛ̀ngà nyi kì kàɓi, à kpaaghà lɛ:

⁵ Ɓi cɛ nnɛ ɓaa kàɓi ɓi tirààre tìn ɓɛ̀tɔɔsìm ɓɛraa ɓɛ fa mɔ̀ɔ̀ni mɛ̀n ɗì ɓɛ̀soghàsogha

⁶ À kpaaghà ɓi fɔlɔɔ lɛ à ɓiisɛ̀ngà kì ɓɔmì ɓɛ̀soghàsogha, wɔ̀lɛ à kpaaghà lɔŋ fɔlɔɔ lɛ, à ɓaghà wiiwìì. Nni yɛ̀ɛ nyi yɛɛ m̀ɓègì ɓàm à mɔ̀ɔ̀ni, àa ntekì mɔ̀ɔ̀ni mɛ ɓɛ nfogì miì.

⁷ Nni Yeesus à kpaaghà lɛ: Càra nyi a nyam tìrààre tìn ɓi ŋwos anɛ ɓɛ ri ɓòm mɛ.

⁸ Ɓì rì rì ɓɛ̀soghàsogha ɓyààmɛ̀n ɓìcèm, kìɓan kifog mɛ̀ màa ɓa ti ɓi ri mìni ɓyààmɛ̀n ɓìcèm.

⁹ Kìtuu ki Ɓɛ̀yudɛ̀n lɛɛ̀gwey ki wokà lɛ Yeesus à rì a Bɛtanii, nni ɓɛ yughày wɔɔ, àa lɔŋ lɛ ɓɛɛ ghɛǹ nyi, ɓɛ yughày girig lɛ ɓɛɛ ghɛǹ Lazaari ànɛ Yeesus à ghèmzìghà ɓi zɔ̀ŋ.

¹⁰ Ɓɛ̀pìrɛɛtìrɛ̀ ɓɛgwey ɓɛ rengà lɛ ɓɛɛ wey girig Lazaari.

¹¹ Ɓisuulɛ Ɓɛ̀yudɛ̀n lɛɛ̀gwey ɓɛ ghɛŋìghà ɓɔ, ɓɛ kɛǹ kì gherɛɛ Yeesus lɛ kìɓan kii.

Yeesus à ɗiŋii a Yorisalɛm

¹² Ɓi duri tana ɓum lɛɛ̀gwey ɓɛ ɓɛ yughà tìcàɓ ti Paskà ɓɛ wokà lɛ, Yeesus a yùyu a Yorisalɛm.

¹³ Fɔɔnnɛ ɓɛ tekà maŋ mɛ mɛtɛn ɓɛ kpaŋ lɛ ɓɛɛ kɛǹ nyi kìɓoŋì. Ɓɛ kpaakpàà jɛ̀ɛ̀ aɗyoo lɛ: Ozana! Bɛ̀ll a maŋ rìfòm ɗi Isirayɛl, roànɛ a yùu yì ɓi ɗii ɗi Kan.

¹⁴ Yeesus à ghɛngà man à jàɗki, à ɓɔg mii aɗyoo lɔŋ yɛ̀ɛ ki ri kìkànɛn lɛ:

¹⁵ Wɔ̀ gɔ̀n ì Siyon, kɔ̀ɔ risi, ghɛna rìfòm ɗyɔɔ ɗi riì ɓi man à jàɗki aɗyoò.

¹⁶ Ɓɛ̀yilàg ɓɛ Yeesus ɓɛ yighà ɓi azi anɛ ɓi kìɓan kiǹ ɓi cààmɛ̀n kiǹ; kìɓan kifog yɛ̀ɛ Yeesus à ɓaghà di à mɛ teɗ rikem, fɔɔnnɛ ɓɛ yitìghà min lɛ, ɓìɓan ɓiǹ ɓi ɓaghà ɓìkànɛn ɓisu wii, nni ɓyɛɛ̀ɓi ɓɛ kighà nyi lɔ̀ɔ̀.

¹⁷ Fɔɔnnɛ gwìy ì ɓumɓɛ ɓɛ ɓaghà ǹɗaŋ ri Yeesus, cààmɛ̀n ki à regìghà Lazaari lɛ a kpaŋ yi ɓi zɔ̀ŋ, à ghèmzì nyi, ì kalìghà kìɓan ki ɓɛ ghɛngà kiǹ.

¹⁸ Fɔlɔɔ yɛɛ kighà lɛ ɓum ɓɛɛ kɛǹ nyi kìɓoŋì lɛɛ̀gwey, lɛ ɓɛ wokà lɛ à kìghà dàm ì kìɓan inɛ̀n.

¹⁹ Nni Ɓɛ̀fàrìzyɛŋ ɓɛ kpaaghà min wɔɔ ɓɔ rì ɓɔ lɛ: Ɓì ghɛɛ! ɓyàa kpaŋzɛn ɓi kiɓan ki, ghɛɛnà yɛ̀ɛ ɓum ɓɛ̀cèm ɓɛ mɛ nɔ̀ɔ̀ti nyi.

Gìrɛg yɛ̀ɛ tɔtɔg lɛ ɓɛɛ ghɛǹ Yeesus

²⁰ Ɓum ɓɛdɛŋ ɓɛ a Gìrɛg ɓɛ ɓaghà ɓi nɗaŋ wu ɓumɓɛ ɓɛ ɓɔkày a Yorisalɛm lɛ ɓɛɛ ɓɔgsi Bɛ̀ll ɓi cààmɛ̀n à tìcàɓ.

²¹ Fɔɔnnɛ ɓɛ kɛngà yɛ̀ɛ Filiɓ ànɛ à ɓaghà ŋwaànɛ a Bɛdsayida ɓi zi ì Galile, ɓɛ tɔg nyi lɛ: Kan ti kɔ̀nkɔn lɛ ti ghɛǹ Yeesus.

²² Nni Filiɓ à kɛ̀ngà kì kpaà Andire fɔlɔɔ, ɓɛ ki ɓasɛn min lɛ rì nyi rì Andire, ɓɛ kɛǹ kì kpaa Yeesus.

²³ Yeesus à ɓàg ɓɔ lɛ: Cààmɛ̀n ki lɛ Man à mum a teɗ rìkem ki kpaŋi.

²⁴ Ǹkalii mìni ɓi saaɗ lɛ: I ɗis ɗi bààzì ɗi kpii ɓi ɓi zi ɗi wu, di ɗi rɔɓi lɔŋ ɗyɔ rì ɗyɔ, wɔ̀lɛ i ɗi wii ɗi ɓa tì rì mis mɛdɛŋ lɛɛ̀gwey.

²⁵ Nni ŋwaànɛ à keesii cɛɓ kii, à rì kɔ ɓiì ɗimzii; roànɛ à ɓèèzɛɛ cɛɓ kii ɓi ziinɛ, nnyɛɛ ri ɓiì ɓèŋi kɔ ɓisuu cɛɓ ki fiɗyàɓ fikɔ̀ɔ̀.

²⁶ I mum à kɔ̀ni lɛ a ki mɛ̀ kìsay, a nɔɔ̀ti mɛ̀, fɔɔnnɛ ǹkìì-kìsay wɛm̀ à ɓiì ɓaà jàŋ inɛ mɛ̀ ǹɗì. Seŋi wɛ̀m à ɓiì ki kemzii ŋwaànɛ a kìki mɛ kìsay.

Yeesus à ɓùŋi kìɓan ki riwù ɗiì

²⁷ Ɓi cààmɛ̀n ki, ǹɗem wɛ̀m wu ri wù ɓùùsɛn, ǹɗì lɛ ǹkpaa la? Nkpaà nya lɛ Tààta, ghɛɓsi mɛ̀ ɓi kìɓan ki ki yuu kì ghɛnɛɛ a lɔ̀ŋkɛm̀ ɓi cààmɛ̀n ki? Wɔ̀lɛ ɓisuu cààmɛ̀n kɔm̀ kiǹ nnɛ ǹ-yùghà.

²⁸ Tààta, kemzi ɗii ɗyɔɔ. Nni jɛ̀ɛ̀ ì ɓaghày aɗyoo lɛ: M̀mɛ kemzi ɗyɔ, m̀ɓiì ki kemzii ti ɗyɔ̀.

²⁹ Gwìy ì ɓum ìnɛ ì ɓaghà wɔɔ, ì wokà jɛ̀ɛ̀ ìnɛn, ì kpaa lɛ: Baàbàn yɛ̀ɛ ɓoogh. Ɓɛ̀ro ɓɛmbog lɛ: Ŋwaàfìtom yɛɛ toòghrɛɛ rì nyi.

³⁰ Fɔɔnnɛ Yeesus à kpaaghà ɓɔ lɛ: Àa ɓisu wɛ̀m nnɛ jɛ̀ɛ̀ ìnɛn yàa tòòghrɛɛ.

³¹ Ɓi cààmɛ̀n ki, kìɓan ki ziinɛ ki yuù kì renɛɛ, ɓigomìnɛ. Ɓɛ yuù kì màagh rifòm ɗi ziinɛ ɓi dan.

³² Nni mɛ̀ ǹɗì ɓiì ɓaà lɛ, i ɓɛ mɛ pisi mɛ ɓi zi, ɓɛ ɓɔgsì mɛ̀ aɗyoo, ǹsyòŋ yì ɓum ɓɛ̀cèm a lɔ̀ŋkɛm̀.

³³ À kpaaghà fɔlɔɔ lɛ a resi rìkuu ɗi riwù ɗi à ghɛ̀ɛ̀sɛɛ kì wiì.

³⁴ Nni gwìy ìnɛn ì ɓàkà nyi lɛ: Ɓìsii yilàkà ɓi ɓìdɔ̀gsɛna lɛ: Kiris à ɓiì kɔ̀rii fiɗyàɓ fikɔ̀ɔ̀. Nni lannɛ ù kpaa lɛ: Ki ghɛɛ̀sɛɛ lɛ ɓɛɛ ɓɔgsi Man à mum aɗyoo? Ghɛn yɛɛ ri kɔm̀ Man à mum àncèm?

³⁵ Yeesus à kpaa ɓɔ lɛ: Kìtɛɛtɛn ki kaka a lɔ̀ŋkin ɓi maa cààmɛ̀n, fɔɔnnɛ kɛ̀ɛ̀ghiina, cààmɛ̀n ki ɓì kaka rì kìtɛɛtɛ̀n; lɛ, birìm yɛ̀ kɛɛ̀ ràɗ mini. Ŋwaànɛ a kɛ̀ɛ̀kɛɛ ɓi birìm à yii ɓi fe nnɛ a kɛ̀nkɛ̀n.

³⁶ Cààmɛ̀n ki ɓì rì rì kìtɛɛtɛn, gherɛɛna kɔ, di fɔlɔɔ nnɛ ɓi ɓa ɓɔn ɓɛ kitɛɛtɛn. Yɛ̀ɛ Yeesus à kpaaghà ɓìɓan ɓiǹ, nni à pɛ̀sɛ̀ngà à kɛ̀n kìnyamzɛɛ fìràɓ.

Ɓɛ̀yudɛ̀n ɓɛ gherɛɛ ɓi Yeesus

³⁷ Nsoò yɛ̀ɛ Yeesus à kìghà dàm yi ɓiɓan lɛɛ̀gwey ɓi mis maa, ɓɛ gherɛ̀ngà ɓi nyi,

³⁸ lɛ kɛɛ kilɛn lɔŋ yɛ̀ɛ ǹkpaŋzì-ɓìɓan Ezayii à kpaaghà lɛ: Kan, ghɛn yɛɛ gherɛ̀ngà ɓɔlɛ ànɛ tì kpaaghà? Càg ki Kan ki resɛ̀ngà yɛ̀ɛ ghɛn?

³⁹ Ɓɛ ɓaghà ɓi lɛ ɓɛ gherɛ̀n ɓisuulɛ Ezayii à kpaatìghà lɛ:

⁴⁰ À ɗiŋzìghà ɓɔ tìɗyaŋ, à ki kì lɛ ɓɛ̀ kɛɛ̀ ɓa ti ri syeesyee à ɗyomzɛ̀n, lɛ ɓɛ̀ kɛɛ̀ ghɛnɛn ti rì mis maa, mɛ̀rem maa mɛ̀ kɛɛ̀ fègti kiɓan ki syeesyee, lɛ ɓɛ ɓiì ki lɔ̀ɔ̀ghrɛɛ mɛrem, ǹki wɔ̀ɔ̀zi ɓɔ.

⁴¹ Kìɓan kiǹ kɛɛ̀ki Ezayii à kalìghà yɛ̀ɛ à ghɛngà rìkem ɗi Yeesus, ɓi cààmɛ̀n ki à kpaakpààghà kìɓan kii.

⁴² Nsoò fɔlɔɔ mɛ̀fòm mɛ Ɓɛ̀yudɛ̀n mɛdɛŋ lɛɛ̀gwey mɛ gherɛ̀ngà nyi, kìɓan kifog, ɓɛ resìghà ɓi kiɓan kiǹ lɛ tɛntɛ̀ɛ̀n ɓi mis mɛ ɓum, lɛ Ɓɛ̀fàrìzyɛŋ ɓɛ ɓiì ki nàɓi ɓɔ ɓi naà-bɔ̀ŋzɛ̀n.

⁴³ Ɓisuulɛ ɓɛ ɓiisɛ̀ngà kì kɔ̀ni rikem ɗi ɓum à cee ɗi Bɛ̀ll.

⁴⁴ Nni Yeesus à kpaaghà jɛ̀ɛ̀ aɗyoo lɛ: Ŋwaànɛ à gherɛɛ mɛ̀, à gherɛɛ ɓi lɔŋ lɛ mɛ̀, à gherɛɛ girig roànɛ à romgày mɛ̀.

⁴⁵ I mum à ghɛɛ mɛ̀, di à ghɛɛ roànɛ à romgày mɛ̀.

⁴⁶ Mɛ̀ ǹ-yùghà ɓi ziinɛ fɛlɛ yɛ̀ɛ kìtɛɛtɛn, lɛ mum ǹcèm ànɛ à gherɛɛ mɛ̀ kɛ̀ɛ ɓa ɓi birìm.

⁴⁷ I mum à woogh ɓìɓan ɓyɛm̀, kɛ̀ɛ ɓèŋ ɓyɔ, àa mɛ̀ yɛɛ ri nyi ɓiì faà bɛ̀lɛn, lɛ ǹ-yùghà ɓi ki faà ziinɛ bɛ̀lɛn, ǹ-yùghà lɔŋ lɛ nghɛɓsi yɔ̀.

⁴⁸ Nni ŋwaànɛ à ɓèni mɛ̀, kɛ̀ɛ ghàɓ ɓiɓan ɓyɛm̀, à rì rì ŋwaànɛ à ɓiì renì kìɓan kii. Ɓìɓan ɓi ǹkalìghà ɓyɛɛ ri ren kiɓan kii ɓi siitòn a ŋwos.

⁴⁹ Lɛ ɓìɓan ɓi nkpaakpàà, ɓi yin ɓiɓan ɓyɛm̀ ɓi mɛ̀ɛmiɗ, lɔŋ Tààta nyimiɗ anɛ à romgày mɛ̀, nnyɛɛ siŋdɛ̀ngà mɛ̀ ɓìɓan ɓi ǹghɛ̀ɛ̀sɛɛ kì kpaà, rì ɓi ǹghɛ̀ɛ̀sɛɛ kì rèsaagh ɓum.

⁵⁰ Fɔɔnnɛ ǹ-yii lɛ ǹsiŋdɛn wii wu ri cɛɓ ki fiɗyàɓ fikɔ̀ɔ̀. Nni ɓìɓan ɓi nkpaakpàà, mɛ̀ɛ nkpaakpaa lɔŋ ɓyɔ yɛ̀ɛ Tààta à kalìghà mɛ̀ lɛ ǹkpaà.