ZYAŊ 10 - Bafia Nouveau Testament

Syeesyee à m̀ɓèŋì-jɔ̀ɔ̀

¹ Ǹkpaa mìni kɔɔ̀kɔɔ̀ à rìkpaa lɛ ŋwaànɛ à fyee ɓi asuunaa lɛ a ɗiŋi ɓi kìlaa ki jɔ̀ɔ̀, kìɓan kifog à ɓɔg gari ɓi jàŋ idɛŋ à ɗinì ɓi kìlaa, à rì lɛ nyi wiiwìì, nyi tì zyaàzyaa.

² Lɔŋ roànɛ à ɗiŋii asuunaa yɛɛ ri syeesyee à m̀ɓèŋì-jɔ̀ɔ̀ yiǹ.

³ M̀ɓèŋì-ìsuunaa à nɛm ŋwaànɛ̀n ìsuunaa lɛ a ɗiŋi, jɔ̀ɔ̀ yii yi wog jɛ̀ɛ̀ yìì; à ki regi jɔ̀ɔ̀ yii lɔŋ ɓi mii, à kɛ̀n ɗì yɔ ɓidan.

⁴ I à mɛ kpaŋzi jɔ̀ɔ̀ yii yicèm, à syòŋ yɔ bee, yɔɔ nɔɔ̀nɔ̀ɔ̀tì nyi lɛ, yi yii jɛ̀ɛ̀ yìì.

⁵ Yi yin lɛ yi nɔɔ̀tì ǹkèn a mum, kìɓan kifog yi ri ɓiì ghɛŋii nkèn a mum fìràɓ lɛ yi remzii ɓi jɛ̀ɛ̀ yi ɓɛ̀kèn.

⁶ Yeesus à tekà ɓɔ dàɗkì ìnɛn, kìɓan kifog ɓɛ̀ kɛɛ̀ wog kiɓan ki a kpaaghà ɓɔ.

⁷ Nni Yeesus à kpaatìghà ɓɔ lɛ: Ǹkpaa mìni kɔɔ̀kɔɔ̀ à rìkpaa lɛ mɛ̀ yɛɛ ri ìsuunaa wu gari ì jɔ̀ɔ̀.

⁸ Ɓum ɓɛ̀cèm ɓɛ ɓɛ lokày kì yùu ri mɛ̀, ɓɛ ri, ɓɛ̀wiiwìì, rì ɓɛ̀zyaàzyaa. Wɔ̀lɛ jɔ̀ɔ̀ yi wokà ɓi rikpaa ɗyàà.

⁹ Mɛ̀ yɛɛ ri ìsuunaa, ŋwaànɛ à fyee a lɔ̀ŋkɛm̀ à ɗiŋì à ɓiì ghɛɛ̀ cɛɓ. À ɓiì kìi lɛ à ɗiŋì, à kpaŋ à ki tanɛn ɓiɗilàg.

¹⁰ Wiiwìì à ti à yùlàg lɔŋ lɛ, a yiì, à wey, à ki cuusi. Ɓi mɛ̀, mɛ̀ ǹ-yùghà lɛ, jɔ̀ɔ̀ yɛɛ ɓa rì cɛɓ, yi ki ɓa ri kɔ lɛɛ̀gwey.

¹¹ Mɛ̀ yɛɛ ri syeesyee à m̀ɓèŋì-jɔ̀ɔ̀. Syeesyee à m̀ɓèŋì-jɔ̀ɔ̀ a falag cɛɓ kii ɓisuu jɔ̀ɔ̀ yii.

¹² Wɔ̀lɛ ŋwaànɛ a ɓèŋɓeŋ jɔ̀ɔ̀ lɛ ɓɛɛ leɓ nyi, kɛ̀ɛ ki ɓa mɓèŋì-jɔ̀ɔ̀, jɔ̀ɔ̀ yɛ̀ kɛɛ̀ ki ɓa lɛ yiŋkii, à ti à kìlàg lɛ, i à ghɛɛ ǹgɔn, à rinì jɔ̀ɔ̀, à làn. Ǹgɔn à yù kì ɓangii jɔ̀ɔ̀, à san yɔ.

¹³ Ŋwaànɛ̀n à ti à làngì fɔlɔɔ ɓisuulɛ, a kìki kisay ɓisuu mɔ̀ɔ̀ni, ǹɗem wii wɛ̀ kɛɛ̀ kɛsi ri jɔ̀ɔ̀.

¹⁴ Mɛ̀ yɛɛ ri syeesyee à m̀ɓèŋì-jɔ̀ɔ̀. Ǹ-yii jɔ̀ɔ̀ yɛm̀, jɔ̀ɔ̀ yɛm̀ yi ki yii mɛ̀,

¹⁵ lɔŋ yɛ̀ɛ Tààta à yii mɛ̀, mɛ̀ ǹki yi Tààta; mɛ̀ ǹki faa cɛɓ kɛ̀m ɓisuu jɔ̀ɔ̀ yɛm̀.

¹⁶ Ǹɗì tì rì jɔ̀ɔ̀ yidɛŋ yi yi ka yin ɓi kìlaa ki. Ki ghɛɛ̀sɛɛ lɛ nteɗ yì girig yɔ; yi ri ɓiì woògh jɛ̀ɛ̀ yɛ̀m, fɔɔnnɛ kìtuu ki jɔ̀ɔ̀ ki ɓiì ɓaà kìfog, m̀ɓèŋì à ɓa bog.

¹⁷ Tààta à keesii mɛ̀ ɓisuulɛ, ǹfaa cɛɓ kɛ̀m lɛ di nki teeti kɔ.

¹⁸ Mum à ɓàtɛɛ ɓi mɛ cɛɓ, lɔŋ mɛ̀ɛmiɗ yɛɛ faa kɔ̀. Ǹɗì rì ìtèɗ wulɛ nfa kɔ, ǹki ɓa ti ri ìtèɗ wulɛ ǹteetì kɔ̀; kìɓan ki Seŋi wɛ̀m à reɓsìghà mɛ̀ lɛ nki kɛɛ̀ kìn.

¹⁹ Fɔɔnnɛ Ɓɛ̀yudɛ̀n ɓɛ ghasɛ̀ngà tì gàɓ yiɓɛɛ̀ ɓisuu ɓitòkì ɓiǹ.

²⁰ Kìgwey ki ɓi ɓɔ ki kpaakpààghà lɛ: Yeesus à rì rì kìɓeɓtàg ki nghay, à ki ɓa ti ndùŋɛn, ɓisuucɛ nnɛ ɓi wowog ɓiɓan ɓii?

²¹ Ɓɛ̀ro ɓɛmbog ɓɛ kpaakpàà lɛ: Ɓìtòkì ɓi ŋwaànɛ ɓi yin ɓitòkì ɓi ŋwaànɛ à rì rì kìɓeɓtàg ki nghay. Kìɓeɓtàg ki nghay ki ri nya lɛ ki ŋwaɗ mis mɛ ɓɛɗyaŋɗyaŋ?

Ɓɛ̀yudɛ̀n ɓɛ ɓeni Yeesus

²² Tìcàɓ ti gòn inɛ ɓɛ faghà naà-Bɛ̀ll rì Bɛ̀ll ti ɓaghà a Yorisalɛm, ki ɓaghà ɓi cààmɛ̀n à bùmà.

²³ Nni Yeesus à kɛ̀ɛ̀kɛ̀ɛ̀ghà ɓi naà-Bɛ̀ll ɓi tuùtuu anɛ ɓɛ nɗegì lɛ, tuùtuu a Salomɔŋ.

²⁴ Ɓɛ̀yudɛ̀n ɓɛ taŋzɛ̀ngà nyi a nyoo, ɓɛ kpaa nyi lɛ: U kɔ̀nkɔn lɛ mɛ̀rem mɛɛ ɗiìɗìlɛ̀n ɓìsi ɓi mùm à kpaŋ ɓigomìbe? Nkòo wɔ̀ yɛɛ ri Kiris, kali ɓìsi lɛ tɛntɛ̀ɛ̀n.

²⁵ Nni Yeesus à ɓakà ɓɔ lɛ: M̀mɛ kpaa mini, kɛ̀ ɓi gherɛn. Ɓiɓan ɓi nkìki ɓi ɗii ɗi Seŋi wɛ̀m, ɓyɔ yɛɛ rèresi rikuu ɗi mum ɗi ǹɗì.

²⁶ Kìɓan kifog, ɓì gherɛɛ ɓi lɛ, yɛ̀ɛ ɓì yin jɔ̀ɔ̀ yɛm̀.

²⁷ Jɔ̀ɔ̀ yɛm̀ yi ti yi wokì jɛ̀ɛ̀ yɛ̀m, mɛ̀ ǹ-yii yɔ, yɔɔ ki ti yi nɔɔ̀tàg mɛ̀.

²⁸ Ǹti ǹfalàg yɔ cɛɓ ki fiɗyàɓ fikɔ̀ɔ̀, yàa wu ɓi nsoò ŋwos bog, mum à ki yin lɛ à ɓàtɛ̀n yɔ ɓi càg kɛm̀.

²⁹ Seŋi wɛ̀m ànɛ à faghà mɛ̀ yɔ, à cee ɓum ɓɛ̀cèm, fɔɔnnɛ mum à yin lɛ à ɓàtɛ̀n yɔ ɓi càg ki Tààta.

³⁰ Rì mɛ̀ rì Tààta, tì rì lɔŋ mum bog.

³¹ Fɔɔnnɛ Ɓɛ̀yudɛ̀n ɓɛ ɓadɛ̀ngà tì gɔ̀g lɛ ɓɛɛ rogi nyi.

³² Nni Yeesus à kpaatìghà min ɓɔ lɛ: Mɛ̀ɛ nkìi ɓɛ̀gɛn ɓɛ ɓiɓan lɛɛ̀gwey ɓi mis min, rì ìtèɗ wu Tààta, nni ɓi ɓìɓan ɓiǹ, kibe kɛɛ̀ki ɓì ti mɛ̀ ɓiì rogii gɔ̀g miì?

³³ Ɓɛ̀yudɛ̀n ɓɛ ɓag nyi lɛ: Tì yin lɛ tì rogì wɔ̀ gɔ̀g ɓi syeesyee à kìɓan anɛ ù kìi, wɔ̀lɛ tii rogì wɔ̀ gɔ̀g ɓisuu zɛɛtɛn yi ù rì rì yɔ ɓi san ànɛ yɛ̀ɛ Bɛ̀ll, ɓisuulɛ, wɛ̀ɛnɛ lɔŋ mum, ù ki kɔ̀n lɛ u terɛn wɛ̀ɛmiɗ yɛ̀ɛ Bɛ̀ll?

³⁴ Nni Yeesus à ɓàkà ɓɔ lɛ: Ki yin kikànɛn ɓi ɓìdɔ̀gsɛna ɓin lɛ: Bɛ̀ll à kpaaghà lɛ ɓì rì bɛ̀ll?

³⁵ Tì yii lɛ mum à yin lɛ à pisì kìɓan ki ki ri kìkànɛn; nni i mɛ̀kànì mɛ regii ɓumɓɛ Bɛ̀ll à tòòghrɛ̀ngà rì ɓɔ lɛ bɛ̀ll,

³⁶ mìnii kalì roànɛ Bɛ̀ll à ɓɔ̀ngà à rom yì lɛ à sɛɛtii Bɛ̀ll, ɓisuulɛ màa kalii lɛ, ǹɗì Man à Bɛ̀ll?

³⁷ I ǹki rɔ̀ɓi kɛ̀ɛ nkì ɓisay ɓi Seŋi wɛ̀m, ɓì rɔ̀ɓ kɛ̀ ɓi gherɛn mɛ.

³⁸ Kìɓan kifog, i nkìki ɓisay ɓii, nsoò ɓyàa gherɛɛ ɓi mɛ, gherɛɛna ɓyɔ, fɔɔnnɛ ɓì ɓiì kìi lɛ, ɓì yi, ɓì ki ghɛn lɛ Tààta à rì ɓi mɛ̀, mɛ̀ ɓi Tààta.

³⁹ Fɔɔnnɛ ɓɛ mɛɛ̀ kaatìghà bee inɛ ɓɛɛ ɓaǹ nyi; wɔ̀lɛ Yeesus à sɔtɛ̀n ɓɔ ɓi ɓyàg.

⁴⁰ Nni Yeesus à kɛ̀ɛ̀dìghà cɛcɛɗ ki Zyuridɛŋ, ɓi jàŋ inɛ Zyaŋ à ka ɓààɓàɓtìghà ɓum, à kɔ̀rì wɔɔ.

⁴¹ Fɔɔnnɛ ɓum lɛɛ̀gwey ɓɛ yughày nyi a nyoo, ɓɛ kpaakpàà lɛ: Zyaŋ à kìghà ɓi dàm nsoò bog, kìɓan kifog, ɓìɓan ɓìcèm ɓi Zyaŋ à kpaaghà à ràɗ ɗì ŋwaànɛ ɓi ɓaghà saaɗ.

⁴² Nni ɓum lɛɛ̀gwey ɓɛ gherɛ̀ngà Yeesus.