Bìoball air-loidhne

« Roimhe

Air adhart »

ZYAŊ 1 - Bafia Nouveau Testament

Jɛ̀ɛ̀ ì rì lɛ, yɔ̀ kìtɛɛtɛn, yɔ̀ cɛɓ

¹ A rìtumɛ̀n, Jɛ̀ɛ̀ ì ɓaghà, nni Jɛ̀ɛ̀ ì ɓaghà ɓɛɛ̀ Bɛ̀ll, Jɛ̀ɛ̀ ì ki ɓaghà Bɛ̀ll.

² I ɓaghà ɓɛɛ̀ Bɛ̀ll a rìtumɛ̀n.

³ Jɛ̀ɛ̀ ìnɛn yɛ̀ɛ kighà ɓyom ɓìcèm, nni ɓi ɓyom ɓi ɓi kilɛ̀ngà, kidɛŋ ki kilɛ̀ngà ɓi kɛ̀ɛ̀ yɔ̀.

⁴ Cɛɓ ki ɓaghà ɓi Jɛ̀ɛ̀ ìnɛn, cɛɓ kìn ki ki fafa ɓum kìtɛɛtɛn.

⁵ Kìtɛɛtɛn ki lomlòm ɓi birìm, birìm yɛ̀ kɛɛ̀ ki teɗ kɔ.

⁶ Bɛ̀ll à romgày ŋwaàdɛŋ ɗii lɛ Zyaŋ.

⁷ Nnyɛɛ yughày fɛlɛ yɛ̀ɛ wusìnɛ̀ɗ à kìtɛɛtɛn lɛ di ɓum ɓɛɛ gherɛn lɛ rìkpaa ɗii.

⁸ Nyii ɓaghà ɓi kitɛɛtɛn, kìɓan kifog à yùghày lɛ a kpaà ɓum kìɓan ki kitɛɛtɛn.

⁹ Jɛ̀ɛ̀ ìnɛn ì ɓaghà kɔɔ̀kɔɔ̀ à kìtɛɛtɛn, ki ki yughà ɓi ziinɛ lɛ kɛɛ kpeŋzi ɓum ɓɛ̀cèm.

¹⁰ Jɛ̀ɛ̀ ì ɓaghà ɓi ziinɛ, yɛ̀ɛ ki kìghà ziinɛ, wɔ̀lɛ ziinɛ ì yitìghà ɓi yɔ̀.

¹¹ Ì yughà a ɓum ɓii, ɓum ɓii ɓɛ̀ kɛɛ̀ ki ghàɓ yɔ̀;

¹² wɔ̀lɛ ì faghà ɓum ɓɛ̀cèm ɓɛ ɓɛ ghaɓkà kɔ, ɓɛ gherɛ̀n ɗii ɗi yɔ̀, ìtèɗ wulɛ ɓɛɛ ɓa ɓɔn ɓɛ Bɛ̀ll.

¹³ Ɓumɓɛ̀n ɓɛ ghalà ɓi ɓɔn ɓɛ Bɛ̀ll rì nyoo ì mɛ̀mùù fɛlɛ yɛ̀ɛ ɓɔn ɓɛ ɓum ɓɛɛ̀ yalàg, lɔŋ Bɛ̀ll yɛɛ faghà ɓɔ cɛɓ ki nyɔn.

¹⁴ Fɔɔnnɛ jɛ̀ɛ̀ ì ghalà mum ànɛ à ghɛɓkà ɓi nyìinyìm wìs, ǹɗonɛn, rì geesɛ̀n, rì saaɗ, tì ki ghɛngà rìkem ɗii, rìkem ɗìn ɗi ki ɓa ɗi mbobog à Man ànɛ à pɛ̀sɛ̀ngày yɛ̀ɛ Seŋì.

¹⁵ Zyaŋ à rɛlìghà wusìnɛ̀ɗ ànɛ ɓi kìɓan kii, à làmɓɛ̀n lɛ: Nnyɛɛ ri ŋwaànɛ ǹkpaaghà mìni lɛ: Roànɛ à rìì mɛ̀ ajɛ̀m, à lokày rì mɛ̀, ɓisuulɛ nyii ɓaghà di mɛ̀ ǹka yin.

¹⁶ Ɓìsiìcèm tì mɛ teɗ ɓɛmààgh ɓɛ ɓi rìɓa ɗii ɗi à rì ǹɗonɛn, à saàsàgtàg ɓìsi geesɛ̀n.

¹⁷ Ɓisuulɛ, ɓìdɔ̀gsɛna ɓi falɛ̀ngà rì Moyis, geesɛ̀n rì saaɗ ɓi yuiy rì Yeesus Kiris.

¹⁸ Mum à ka ghɛngà ɓi Bɛ̀ll, lɔŋ m̀bobog à Man à Bɛ̀ll ànɛ à rì jàŋbog rì Seŋi yɛɛ kighà lɛ ɓɛɛ yi nyi.

Zyaŋ Bàɓtis à kpaa lɛ nyii yin Kiris
( Mt. 3:1-12 ; Mk. 1:1-8 ; Lk. 3:1-18 )

¹⁹ Fɛlɛ nnɛ Zyaŋ à kpaaghà yɛ̀ɛ Ɓɛ̀yudɛ̀n ɓɛ a Yorisalɛm ɓɛ romgày ɓɛ̀pìrɛɛtìrɛ̀ rì ɓɛ̀levìt lɛ ɓɛɛ tɔg nyi lɛ: Wɔ̀ɔ̀ rì ghɛn?

²⁰ À gherɛ̀ngà kɛ̀ɛ pwàà, à gherɛ̀n, à kpaa lɛ: Mɛ̀ ǹ-yin Kiris.

²¹ Nni ɓɛ tɔkà nyi lɛ: Wɔ̀ɔ̀ rì min ghɛn? Wɔ̀ yɛɛ ri Eli gìn? Zyaŋ à ɓàg lɛ: Èe èe. Ù rì ǹkpaŋzì-ɓìɓan anɛ̀n? Zyaŋ lɛ: Àg.

²² Fɔɔnnɛ ɓɛ tɔkà nyi lɛ: Wɔ̀ɔ̀ ki rì min ghɛn? Tì ghɛ̀ɛ̀sɛɛ kì sugtii ki kpaà ɓumɓɛ ɓaa romiì ɓìsi rìɓàg. Wɛ̀ɛmiɗ kali ɓìsi! Wɔ̀ɔ̀ rì ghɛn?

²³ Nni Zyaŋ à ɓàkà lɛ: Mɛ̀ ǹɗì jɛ̀ɛ̀ ì roànɛ a làalam̀ɓɛ̀n ɓi-reɓ lɛ pègsɛɛna bee ì Kan, lɔŋ yɛ̀ɛ ǹkpaŋzì-ɓìɓan Ezayii à kpaaghà.

²⁴ Ɓumɓɛ ɓɛ romgày ɓɛǹ yɛ̀ɛ Zyaŋ, ɓɛ ɓaghà Ɓɛ̀fàrìzyɛŋ.

²⁵ Nni ɓɛ tɔgtìghà nyi lɛ: I wɔ̀ ki yin Kiris, nsoò lɛ Eli, nsoò ǹkpaŋzì-ɓìɓan, ɓisuucɛ nnɛ u ɓàaɓaɓtì ɓum? Zyaŋ à ɓàg ɓɔ lɛ:

²⁶ Mɛ̀ɛ mɓàaɓaɓtì ɓum rì mɛ̀nig, kìɓan kifog ŋwaàdɛŋ à rì foo ɓi nyìinyìm wìn, ànɛ ɓì yii ɓi; nyi yɛɛ riì mɛ̀ ajɛ̀m.

²⁷ Mɛ̀ ǹwuɓsɛɛ gì ɓi nkoŋ wulɛ ǹfùmì ǹɗig wii wu gòò.

²⁸ Ɓìɓan ɓiǹ ɓi kilɛ̀ngà a Bɛtanii, cɛcɛɗ ki Zyuridɛŋ, ɓi jàŋ inɛ Zyaŋ à ɓààɓàɓtìghà ɓum.

²⁹ Ɓi duri tana, Zyaŋ à ghɛngà di Yeesus à tiì a lɔ̀ŋkii, à kpaa lɛ man à jɔ̀ɔ̀ à Bɛ̀ll ànɛ a pipisi kiɓe ki ɓum ɓi ziinɛ yɛɛ ri lɛ.

³⁰ Nnyɛɛ ri roànɛ mɛ̀ɛ ǹkpaa lɛ ŋwaàdɛŋ à rìì mɛ̀ ajɛ̀m, à lokày mɛ̀ beèbɛ̀y, ɓisuulɛ nyii ɓaghà di mɛ̀ ǹka yin.

³¹ Mɛ̀ ǹ-yighà ɓi nyi, kìɓan kifog, ǹ-yùghày lɛ mɓaɓti ɓum rì mɛ̀nig, lɛ di Isirayɛl àa yii nyi.

³² Zyaŋ à kpaatìghà lɛ ǹghɛngà di Ǹghay a sɛnsɛn yi aɗyoo yɛ̀ɛ kuùkuù, à yù nyi kì ɓɛ̀lii ɓi nyòò.

³³ Mɛ̀ ǹ-yighà ɓi nyi, wɔ̀lɛ roànɛ à romgày mɛ̀ lɛ mɓààɓàɓtì ɓum rì mɛ̀nig, à kpaaghà mɛ̀ lɛ: Ŋwaànɛ ù rì ɓiì ghɛɛ̀ di Ǹghay à sɛniì, ɓi nyoo à rɔ̀ɓ ɓi nyi, roànɛ̀n yɛɛ ɓiì ɓàɓtii ɓum rì Kìtɛntɛ̀ɛ̀n ki Nghay.

³⁴ Mɛ̀ ǹghɛngà kìɓan kiǹ, fɔɔnnɛ ǹkpaaghà miì lɛ, nnyɛɛ ri Man à Bɛ̀ll.

Ɓɛ̀yilàg ɓɛ Yeesus ɓɛ ǹtonto
( Mt. 4:18-22 )

³⁵ Ɓi duri tana, Zyaŋ à ɓaghà di à kaka wɔɔ ri ɓɛ̀yilàg ɓii ɓɛdɛŋ ɓɛɓɛɛ̀.

³⁶ Yɛ̀ɛ à ghɛngà di Yeesus a ghaghààgh, nni à kpaaghà lɛ: Man à jɔ̀ɔ̀ à Bɛ̀ll innɛ.

³⁷ Kìɓɛ̀ɛ̀ kii ki ɓɛyilàg ki wokà com ki à kpaaghà, ki ki nɔ̀ɔ̀ti Yeesus.

³⁸ Yɛ̀ɛ Yeesus à lɔ̀ɔ̀ghrɛ̀ngày, à ghɛn lɛ ɓɛɛ̀ nɔ̀ɔnɔɔ̀tìì nyi, nni à tɔkà ɓɔ lɛ: Cɛ ɓi kaakàà? Ɓɛ̀roɓɛ̀n ɓɛ kpaa nyi lɛ: Raɓì, yɛɛ lɔɔ lɛ ǹɗèsàg, fennɛ ù kɔ̀kɔrii?

³⁹ Yeesus à kpaa ɓɔ lɛ: Yùunay, di ɓi ghɛǹ. Nni ɓɛ kɛǹgà ɓɛ ghɛn jàŋ inɛ à kɔ̀kɔ̀rìghà, ɓɛ ratɛ̀n kì ghagsii ŋwos anɛ̀n ri nyi, ki ɓaghà nunùg mɛ̀kɛ̀ɛ̀ mɛnin à ŋwos nkɛ̀nɛn.

⁴⁰ Andire à geni Simɔn Pyɛɛri à ɓaghà kìbog ki ɓi ɓum ɓɛ kiɓɛ̀ɛ̀ ɓɛ ɓɛ wokà kìɓan ki Zyaŋ à kpaaghà, ɓɛ nɔɔ̀tì Yeesus.

⁴¹ Andire ànɛn à lokà kì tanɛɛ ri Simɔn à geni, à kpaa nyi lɛ: Tyàa ghɛɛ Mèsii, yɛɛ lɔɔ lɛ Kiris.

⁴² Fɔɔnnɛ à syògà Simɔn yɛ̀ɛ Yeesus. Yeesus à fiɓì nyi à kpaa lɛ: Simɔn, man à Zyonas ɓɛ ri wɔ̀ ɓiì reŋɗaagh lɛ Sefas, yɛɛ lɔɔ lɛ Pyɛɛri.

⁴³ Ɓi duri tana Yeesus à ɓekà lɛ a kɛǹ a Galile, nni à tanɛ̀ngà Filiɓ à kpaa nyi lɛ: Nɔ̀ɔ̀ti mɛ̀.

⁴⁴ Filiɓ à ɓaghà ŋwaànɛ a Bɛdsayida, ɓi bàn ì ɓɛ̀-Andire ɓɛɛ̀ Pyɛɛri.

⁴⁵ Fɔɔnnɛ Filiɓ à tuusɛ̀ngà rì Natanayɛl, à kpaa nyi lɛ: Tyàa ghɛɛ ŋwaànɛ kìɓan kii ki ri kìkànɛn ɓi kaàtà à ɓìdɔ̀gsɛna ɓi Moyis rì ɓi ɓɛ̀kaàtà ɓɛ ɓɛkpaŋzì-ɓìɓan, nnyɛɛ ri Yeesus à man à Yoosɛɓ ànɛ a Naazarɛt.

⁴⁶ Nni Natanayɛl à kpaaghà Filiɓ lɛ: Cɛ ki cem kɛɛ ri lɛ ki kpaŋ yì a Naazarɛt? Fɔɔnnɛ Filiɓ à kpaaghà nyi lɛ: Yuiy u ghɛǹ.

⁴⁷ Yɛ̀ɛ Yeesus à ghɛngà di Natanayɛl a yùyuiy nyi a nyoo nni à kpaaghà lɛ: Natanayɛl à rì kɔɔ̀kɔɔ̀ à muu Isirayɛl ànɛ à yin ɗi mɛ̀ɗyɔg.

⁴⁸ Nni Natanayɛl à tɔkà Yeesus lɛ: Wɔ̀ɔ̀ yii mɛ̀ fe? Yeesus à pɛ̀ɛ̀zì nyi lɛ: Màa ghɛɛ wɔ̀ cààmɛ̀n ki wàa rì a nɗyèm wu fìgyee zi, di Filiɓ à ka reŋii ɓi wɔ.

⁴⁹ Fɔɔnnɛ Natanayɛl à kpaaghà min Yeesus lɛ: Raɓì, ù rì Man à Bɛ̀ll, ù rì rìfòm ɗi Isirayɛl.

⁵⁰ Yeesus à bàg nyi lɛ: Yɛ̀ɛ ǹkalii wɔ̀ lɛ màa ghɛɛ wɔ̀ a nɗyèm wu fìgyee zi, nnɛ ù gherɛɛ, ù rì ɓiì ki ghɛɛ̀ ɓìɓan ɓidɛŋ ɓi ɓi teghɛɛ ɓi cee fɔlɔɔ.

⁵¹ Ǹkalii mìni kɔɔ̀kɔɔ̀ à rìkpaa lɛ, ɓì rì ɓiì ghɛɛ̀ di ɗyoo ɗi nɛmɓɛɛ, ɓum ɓɛ titom ɓɛ Bɛ̀ll ɓɛ ɓɔɓɔ̀g ɓɛ sɛnsɛ̀n Man à mum a nto.

« Roimhe

Air adhart »

Bible Society of Cameroon

Lean sinn:

Ceanglaichean taic

Sanasan