ZYAG 5 - Bafia Nouveau Testament

¹ Ɓigomìnɛ, mìni ɓɛ̀guŋgum, ramina mɛ̀reè ɓi wog, rɔŋɗɔŋina ɓìkiŋ jɛ̀ɛ̀ aɗyoo ɓisuulɛ ɓì rì ɓiì ghɛɛ̀ mɛ̀tɔɓ lɛɛ̀gwey.

² Ikum win wu ri ɓiì ròo dywɛ̀ɗ, zeg yi ɗi ɓìlàà ɓin,

³ gol yìn rì mɔ̀ɔ̀ni min ɓi ri rì geègee; geègee yiǹ yi ri wusìnɛ̀ɗ ànɛ à rì mìni ɓiì pyèni mis, à tɔ̀ngì mìni yɛ̀ɛ ɗuu. Ɓìi nɗɛ̀ŋi kì taŋzaagh ìkum ɓi mɛ̀ru mɛ siitòn mɛ.

⁴ Ghɛɛna lɛ mɛ̀lèɓ mɛ ɓɛ̀kìì-ɓìsay ɓin ɓɛ ɓɛ saŋsàŋgà mìni ɓìɗilàg ɓi dɛm yin, mɛ ɓì ki ɗighà, mɛɛ̀ rɔŋɗɔŋ ɓikiŋ, ɓìkukug ɓi ɓɛ̀saŋì-mɛ̀saŋ ɓi mɛ kɛ̀n ki kpaŋì ɓi mɛ̀reè mɛ Kan à mɛ̀raŋ mɛ wɛ̀y.

⁵ Ɓi ghɛɓkà ɓi ziinɛ ɓi coo ikum di ɓi nyàànyaa ri cɛɓ, ɓì wùùwùrɛ̀n mìniìɓɔmiɗ ɓisuu ŋwos a kìsɛ̀ɓ.

⁶ Ɓì rengà lɛ ɓɛɛ yeesi ɓumɓɛ ɓɛ ɓaghà kɛ̀ɛ̀ kìɓan, ɓì ki wey ɓɔ, ɓɔɔ kɔrì ɓɛ kɛɛ̀ ram ɓyàg lɛ ɓɛɛ ɗuù rì mìni.

Sììriina mɛ̀rem ɓì ki ɓɔ̀ɔɓɔ̀ŋzì Bɛ̀ll

⁷ Ɓɔɔsoŋ̀ sììriina lɔŋ mɛrem à kpaŋ yɛ̀ɛ Kan à ri sugtiì; ɓì ti ɓì ghɛngì yɛ̀ɛ ǹsalì-dɛm a ti à maasàg nɗem ɓisuu riɓoŋ ɗi bwey yi ǹtonto rì yi siitòn, à kpaŋ yɛ̀ɛ bwey yìn yi ti yi nɔlàg.

⁸ Mìni girig ɓanina mɛ̀rem rì ɓyàg, mɛ̀rem min mɛ siìrɛ̀n rì ìtèɗ lɛ rìyù ɗi Kan ɗi ti jàŋbog.

⁹ Ɓɔɔsoŋ̀, ɓum ɓɛdɛŋ ɓɛ ɓi nyìinyìm wìn ɓɛ̀ kɛɛ̀ cɛmdag ɓɛro ɓɛmɓog, di fɔɔnnɛ ɓɛ̀ kɛɛ̀ yɔ̀m mini; ɓì ghɛɛ! Ǹ-yɔ̀mì-ɓum à ti a suunaa.

¹⁰ Nɔ̀ɔ̀tiina ìkòò wu ɓɛkpaŋzì-ɓìɓan ɓɛ ɓɛ toòghrɛ̀ngà ɓi ɗii ɗi Kan, ɓɛ wokà mɛ̀tɔɓ, ɓɛ niɗ mɛ̀rem.

¹¹ Ghɛɛna, tì ti tì kpaaghì lɛ, ɓumɓɛ ɓɛ siìrɛɛ rì ìtèɗ, ɓɛ ri ɓɛ̀mààghmaagh; ɓì mɛ wog di ɓɛɛ̀ kpaakpaa kinìri ki nɗem ki Zyɔɓ, ɓì ki ghɛngà lèg ànɛ yɛ̀ɛ Kan à kìghà lɛ cɛɓ kii kɛɛ kɛǹ kì syɔnì ɓisuulɛ Kan à rì rì nɗem wu nyìighnyìg lɛɛ̀gwey, rì kìpuɓì ǹɗem.

¹² Ɓɔɔsoŋ̀, kìɓan ki ǹloogh mìni kìkpaà ki ri lɛ, kɛ̀ ɓi kànag bɛ̀ɗ ri ɗyoo, nsoò rì zi, nsoò bɛ̀ɗ inɛ mum à kànɛɛ rì ŋwɔm, kìɓan kifog kɛɛ ɓalag lɛ, i ɓì kpaa lɛ ɛ̀ɛ̀, ki ɓa lɛ ɛ̀ɛ̀; i ɓì kpaa lɛ èe èe, ki ɓa lɛ èe èe; di fɔɔnnɛ kɛ̀ ɓi kpì ɓi ncɛ̀m.

¹³ I mum ɓi mìni à tanɛɛ rì ǹtɔɓ, à ghɛ̀ɛ̀sɛɛ kì ɓɔ̀ŋzii Bɛ̀ll, nsoò lɛ à rì rì kìnyàà, à ghɛ̀ɛ̀sɛɛ kì ɓɔgsii Bɛ̀ll rì tyem.

¹⁴ I ŋwaàdɛŋ ànɛ ɓi nɗaŋ win a roɓi, à reŋì ɓɛ̀sɛ̀ɛ̀mɛn ɓɛ Kiseŋi, lɛ ɓɛɛ ɓɔŋzag Bɛ̀ll ɓisu wii, ɓɛ siŋì nyi mɔ̀ɔ ɓi ɗii ɗi Kan.

¹⁵ I bɔ̀ŋzɛ̀n ìnɛn ì kìlɛɛ rì ǹtyweeyi ɓi nɗem, ì rì ɓiì ghɛɓsii roròɓ ànɛ̀n, kaa soo rì lɛ à kìghà kìɓe, Bɛ̀ll à cenɛ̀n nyi kɔ.

¹⁶ Kìlaaghna lɛ, i wààdɛŋ ù kìi kìɓe, ù rèsì ɓɛ̀goni ɓɛmbog, ɓì ki ɓa ri kìsyɔ̀ɔ̀ ɓi nyìinyìm wìn lɛ ɓi ɓɔŋzag Bɛ̀ll ɓisuu ɓɛgeni ɓin ɓɛ ɓi ghɛghɛɓ ri ɓɔ, fɔɔnnɛ ɓì ɓiì wɔ̀ni. Syeesyee à bɔ̀ŋzɛ̀n à ŋwaànɛ à rì lɛ saaɗ ɓi mis mɛ Bɛ̀ll à ti à ɓalàg rì coo nghɛɓsɛn.

¹⁷ Eli à ɓaghà lɔŋ mum fɛlɛ yɛ̀ɛ ɓìsi, nni à ɓɔ̀ŋzàkà Bɛ̀ll rì nɗem wii wucèm lɛ bwey yɛ̀ kɛɛ̀ nɔ, fɔɔnnɛ bèg yi ghaghìghà yiraa rì ɓɛ̀ŋwii taàfog, bwey yɛ̀ kɛɛ̀ nɔ ɓi ziinɛ.

¹⁸ Ajɛ̀m ìnɛ̀n nnɛ à ɓɔ̀ŋzìghà tì Bɛ̀ll lɛ bwey yɛ̀ɛ nɔti, fɔɔnnɛ ɗyoo ɗi romgày bwey, zi i ki fa ɓiɗilàg ɓi yɛ̀ɛ falàg.

¹⁹ Ɓɔɔsoŋ̀ i kìbog ki ɓi mìni ki ɗimgà bee, ki raɓsɛ̀n rì saaɗ, nnɛ ŋwaàdɛŋ à pɛ̀ɛ̀zii yì nyi ɓi syeesyee à bee,

²⁰ yiina lɛ ŋwaànɛ à ɓiì kìi lɛ ǹkìì-kìɓe a pɛsɛn yì ɓi bee inɛ à tɔlɛ̀ngà miì, à kòri ǹghay wu ǹkìì-kìɓe anɛ̀n ɓi rìwu, à ki kì lɛ Bɛ̀ll a cenɛn ǹkun wu ɓiɓe.