ZYAG 2 - Bafia Nouveau Testament

Rìɓa ɗi kɛ̀ɛ̀ zɛɛtɛn ɓi ɓɛg ànɛ a ɓɛ̀soghàsogha

¹ Ɓɛ̀geni ɓɛ̀m, kɛ̀ ɓi ɗiŋzi nlànag ɓi rìgherɛ̀n ɗi ɓì gherɛɛ Kan wìs Yeesus Kiris ànɛ à rì ǹkeŋkèmì.

² I ɓum ɓɛ ɗiŋii yì a ntaŋzɛn win ɓɛsɛ̀ɛ̀ ɓɛɓɛɛ̀ lɛ roànɛ rì bɔŋ i gol ɓi càg rì syeesyee à kìlàà à ǹlònlomɛn, roàmbog rì kìtùg ki kilàà,

³ i ɓì ɓisɛɛ kì kuuraagh roànɛ à waatɛɛ kìlàà ki syeesyee, ɓì kpaa nyi lɛ kɔ̀ri fɛ ɓi-kɔ̀ɔ̀ wu syeesyee wu, ɓì kalì soghàsogha lɛ, wɔ̀ɔ̀ rɛli fɛnii; nsoò lɛ kɔ̀ri ɓi com ki ǹti ǹsaaghràg mɛ̀kòò miì azi,

⁴ fɔlɔɔ a rèsii ɓi nya lɛ ɓì foŋi ǹlànag ɓi nyìinyìm wìn rì tì lɛ ɓì rì ɓɛ̀yɔ̀mì-ɓìɓan ɓɛ ɓɛ ri rì ɓìɓeɓtàg ɓi mɛyitì?

⁵ Mìni ɓɛ̀geni ɓɛ̀m ɓɛ nɗem wooghna! Bɛ̀ll à ɓɔ̀ngà ɓɛ̀soghàsogha ɓɛ ɓi ziinɛ lɛ ɓɛɛ ɓa ɓɛ̀guŋgum ɓi rìgherɛ̀n ɓɛ ki ɓa ri gàɓ ɓi kìlɔ̀ŋ kii ki à kàkà ɓumɓɛ ɓɛ ti ɓɛ keesàg nyi.

⁶ Nni i mìnii mɛ sɛɛti soghàsogha! Àa ɓɛ̀guŋgum ɓɛɛ ti ɓɛ yeesàg mìni, ɓɛ kɛnkɛ̀n ɗì mìni ɓi naa yi ɓɛyɔ̀m?

⁷ Àa ɓɔ yɛɛ ti ɓɛ fengàg syeesyee à ɗii ànɛ ɓì tɛ̀tɛɛgh?

⁸ Nyoey yi yin miì, i ɓì roòzii kìdɔ̀gsɛna ki rifòm fɛlɛ yɛ̀ɛ ki ri kìkànɛn lɛ: Ù ghɛ̀ɛ̀sɛɛ kì keesii romum ànɛ wɔ̀ jàŋbog yɛ̀ɛ wɛ̀ɛmiɗ, di ɓì konaagh.

⁹ Kìɓan kifog i ɓì ɗiŋii ɓi kìsyɔ̀ɔ̀ ki lɛ ɓi lalani ɓum, di ɓì kìi kìɓe; ɓì ghɛ̀ɛ̀sɛɛ kì yiì lɛ ɓì yogsii ɓìdɔ̀gsɛna.

¹⁰ Ɓisuulɛ mum ǹcèm ànɛ à ɓèŋi ɓìdɔ̀gsɛna ɓìcèm, kìɓan kifog à yogsì lɔŋ kidɔ̀gsɛna kifog a yi lɛ à ti rì zɛ̀ɗ ɓi san ànɛ a ɓìdɔ̀gsɛna ɓìcèm.

¹¹ Roànɛ à kpaaghà lɛ: Kɔ̀ɔ kì fisɔ̀mɔ̀g, à kpaaghà girig lɛ kɔ̀ɔ wey mum, fɔɔnnɛ wàa soo kìi ɓi fisɔ̀mɔ̀g, i ù woli mum di ù ti ǹ-yogsì ɓìdɔ̀gsɛna.

¹² Tòtooghna, ɓì kìkì ɓìɓan fɛlɛ yɛ̀ɛ ɓumɓɛ ki ghɛɛ̀sɛɛ lɛ ɓɛ yɔm̀ ri ɓìdɔ̀gsɛna ɓi ɓyɛɛ foŋfoŋ ɓisi ɓi-kɔ̀ɔ̀ wu rikan,

¹³ ɓisuulɛ ɓɛ̀yɔ̀m ɓɛǹ ɓɛ ri ɓiì ɓaà kɛ̀ɛ̀ nyìighnyìg ɓisuu ɓɛroɓɛ ɓɛ ɓaghà kɛ̀ɛ̀ ǹɗem wu nyìighnyìg. Nɗem wu nyìighnyìg wu ti wu kilàg lɛ mum a yagsag ɓɛ̀yɔ̀m.

Rìgherɛ̀n ɗi ghɛɛ̀sɛɛ kìɓaà rì mɛ̀kìkìì

¹⁴ Ɓɛ̀geni ɓɛ̀m, ki ghɛɓsii cɛ lɛ mum a kpaàkpaa rì ŋwɔm lɛ à rì rì rìgherɛ̀n di à yin ɗi mɛ̀kìkìì mɛ syeesyee? Rìkuu ɗi righerɛ̀n ɗiǹ ɗi ri nya lɛ ɗi ghɛɓsì nyi?

¹⁵ I geni wìn a baŋì àdɛŋ nsoò lɛ à giɓ, ɓɛ ri nyoo zɛy, ɓɔ kɛ̀ɛ̀ com ki ɗiyɛn ɓɛŋwos ɓɛcèm;

¹⁶ nnɛ kìbog ki ɓi mìni ki kalii ɓɔ lɛ: Kɛ̀ɛna lɛ fyòoog, ɓi ɓaɓɓɛn a ɗuu ɓi wurag, kɛ̀ɛ fa ɓɔ com ki ki ri ɓɔ rì gɛɓsɛ̀n ɓi san ànɛ a mɛ̀mùù, fɔlɔɔ a ghɛɓsii cɛ?

¹⁷ Fɔlɔɔ nnɛ rìgherɛ̀n ɗi ri gìrig; i ɗi ri kɛ̀ɛ̀ mɛ̀kìkìì di ɗi ri kìloŋ ɓi ɗyɔmiɗ.

¹⁸ Kìɓan kifog ŋwaàdɛŋ à rì lɛ à kpaa lɛ: Wɔ̀ɔ̀ rì rì rìgherɛ̀n, mɛ̀ rì mɛ̀kìkìì; rèsi mɛ̀ rìgherɛ̀n ɗyɔɔ ɗi ɗi ri kɛ̀ɛ̀ mɛ̀kìkìì, mɛ̀ɛ nɗesi wɔ̀ ɗiŋkɛ̀m ɓi mɛ̀kìkìì mɛm̀.

¹⁹ Ù ti ù gheràg lɛ Bɛ̀ll à rì lɔŋ bog, fɔlɔɔ a rì lɛ syeesyee; ɓìɓeɓtàg ɓi mɛghay ɓi ti ɓi gheràg girig fɔlɔɔ, ɓi ki ririsi.

²⁰ Wɔ̀ mum à kɛ̀ɛ̀ ɗyomzɛ̀n, ù kɔ̀ni ɓi lɛ u yi lɛ rìgherɛ̀n ɗi ɗi ri kɛ̀ɛ̀ mɛ̀kìkìì ɗi ghɛɓsii ɓi com?

²¹ Abiraham à seŋi wìs a ghɛnɛ̀ngà lɛ saaɗ ɓi mis mɛ Bɛ̀ll ɓi mɛ̀kìkìì lɛ à fùnɛ̀ngà Isag à man wiì ɓi rìkùna ɗi ɓɛɛ̀ tɔ̀ngi ɓyom ɓi ɓɛɛ ɓɔgsi Bɛ̀ll rì ɓyɔ miì.

²² Ù ghɛɛ foo lɛ rìgherɛ̀n rì mɛ̀kìkìì ɓi kɛɛ̀kɛ̀ɛ̀ghà ǹɗaŋ, fɔɔnnɛ mɛ̀kìkìì mɛ roòzìghà rìgherɛ̀n ɗii lɛ kɔɔ̀kɔɔ̀.

²³ Jàŋ inɛ̀n yɛ̀ɛnɛ jɛ̀ɛ̀ ìnɛ ì rì ǹkànɛn lɛ: Abiraham à gherɛ̀ngà Bɛ̀ll, nni kìɓan kiǹ kɛɛ kighà lɛ a ghɛnɛn lɛ à rì lɛ saaɗ ɓi mis mɛ Bɛ̀ll, yɛ̀ɛ ron, nni fɔɔnnɛ ɓɛ reŋìghà nyi lɛ rìghan ɗi Bɛ̀ll.

²⁴ Ɓì ghɛɛ min lɛ mum à ti à ghɛnàg lɛ saaɗ ɓi mis mɛ Bɛ̀ll lɛ mɛ̀kìkìì mii, àa lɛ rìgherɛ̀n ɗyɔ rì ɗyɔ.

²⁵ Rahaɓ ànɛ à ɓaghà giɓ a rìɓàmɓà nyi girig à ghɛnɛ̀ngà lɛ saaɗ ɓi mis mɛ Bɛ̀ll lɛ mɛ̀kìkìì mii, ɓisuulɛ à ghàɓkà ɓum ɓɛ mɛwoorag lɛ syeesyee, à ki fyeesi ɓɔ ɓi bee ìdɛŋ lɛ ɓɛɛ sug.

²⁶ Fɛlɛ yɛ̀ɛ nyoo ìnɛ ì rì kɛ̀ɛ̀ ǹghay ì rì kìloŋ, fɔlɔɔ nnɛ rìgherɛ̀n ɗi ɗi yin ɗi mɛ̀kìkìì ɗi ri girig kìloŋ.