ZYAG 1 - Bafia Nouveau Testament

Zyag à reŋɗɛɛ, à tògsì

¹ Mɛ̀ Zyag, ànɛ ǹɗì Ǹkìì-kìsay a Bɛ̀ll rì à Kan Yeesus Kiris, ǹkàni mɛ̀pwìɗ mɛ Isirayɛl, ǹtɛ̀ɗ ɗì mɛɓɛɛ̀ mɛ mɛ saàtɛ̀ngà zi bimiɗ. Ǹtògsii yàà!

Kìɓan ki mɛfèèghrɛn rì mɛ̀tɔɓ

² Mìni ɓɛ̀geni ɓɛ̀m, terina mɛ̀kuu mɛ mɛtɔɓ mɛ̀cèm mɛ ɓì rì lɛ ɓì tulɛ̀n rì mɔ lɛ mɛ ri kìɓan ki kinyàà ki kɔɔ̀kɔɔ̀,

³ ɓì ki yi lɛ, cààmɛ̀n kìcèm ki rìgherɛ̀n ɗin ɗi tulɛɛ rì mɛ̀fèèghrɛn, ki ri ɓiì kìi lɛ ɓi ɓa rì kìnìri ki nɗem;

⁴ kìɓan kifog, ki ghɛɛ̀sɛɛ lɛ rìnìɗ ɗin ɗi nɗem ɗyɛɛ ki ɓìɓan ɓi ɓi rɔɔtɛɛ lɛ kɔɔ̀kɔɔ̀, di fɔlɔɔ nnɛ ɓi ɓa ɓumɓɛ ɓɛ kii lɛ, ɓɔ kɛ̀ɛ̀ bɛ̀lɛn nsoò bog, ɓɛ ki ɓa ɓɛronɛn ɗi ɓìɓan ɓìcèm, com ki ki kaarɛ̀n ɓɔ, kɛ̀ kɛɛ̀ ɓa.

⁵ I ŋwaàdɛŋ ànɛ ɓi mìni à kaarɛɛ ɗyomzɛ̀n, a tɔg ɗyɔ rì Bɛ̀ll ànɛ à ti à falàg ɓum ɓɛ̀cèm ɗyomzɛ̀n zɛy rì zɛy, rì syeesyee à nɗem, fɔɔnnɛ àrì nyi ɗyɔ ɓiì faà;

⁶ kìɓan kifog, à ghɛ̀ɛ̀sɛɛ ɗyɔ kìlɔnì rì ǹtyweeyi kɛ̀ɛ ɓa ri nyoey; ɓisuulɛ ŋwaànɛ à rì rì nyoey à pisɛɛ ɓìkus ɓi riɓày ɓi bɛ̀ɓ yɛɛ̀ nyɛ̀ɛnyɛŋ̀zì di yɛɛ̀ ɓɔɔɓɔgsì aɗyoo.

⁷ Rìkuu ɗi mum ɗìn ɗyɛ̀ kɛɛ̀ fèg ɓi nɗem lɛ ɗi ri ɓiì terì com kidɛŋ yɛ̀ɛ Kan.

⁸ Ŋwaànɛ fɔlɔɔ a rì kɛ̀ɛ̀ bimiɗ à nɗɛli anɛ à sììrɛɛ miì ɓi ɓìɓan ɓii ɓìcèm.

⁹ Maaseŋi wìn a rìgherɛ̀n ànɛ à rì soghàsogha, a nyaàrɛn ɗì rìpɛ̀sì ɗi Bɛ̀ll à pɛ̀sii nyi aɗyòò.

¹⁰ Wɔ̀lɛ guŋgum nyii ghɛɛ̀sɛɛ kì nyààrɛɛ ri rìsɛɛ̀dì ɗi Bɛ̀ll à sɛɛ̀dii nyi, ɓisuulɛ à rì ɓiì ghaghii yɛ̀ɛ kìsàmà ki caaɓi.

¹¹ Ŋwos a pɛ̀sɛ̀n yì rì rìtɔ̀n ɗii ɗi syàn, à kì lɛ caaɓi kɛɛ womdag, kìsàmà ki caaɓi kiǹ ki kpi, kìrɔɔ ki kɔ ɓɛ̀ kɛɛ̀ ghɛɛ̀di. Fɔlɔɔ nnɛ guŋgum a rì ɓiì wom̀daagh ɓi ɓìɓan ɓìcèm ɓi a kìkì.

¹² Mààgh rì ŋwaànɛ à ti à nìɗkì nɗem di à tulɛɛ rì mɛ̀fèèghrɛn; ɓisuulɛ i à mɛ ghɛn mɛfèèghrɛn fɔlɔɔ, à rì ɓiì terì tàm à cɛɓ ànɛ Kan à kàkà ɓumɓɛ ɓɛ ti ɓɛ keesàg nyi.

¹³ Mum kɛ̀ɛ kì lɛ i à rì ɓi mɛ̀fèèghrɛn, a kpaa lɛ Bɛ̀ll yɛɛ̀ fèeghfeèghrɛ̀n mɛ̀. Ɓisuulɛ Bɛ̀ll à yin lɛ kìɓe ki fèèghrɛ̀n nyi, nyimiɗ kɛ̀ɛ ki fèèghrɛn mum.

¹⁴ Kìɓan kifog mum bimiɗ à ti à ɓalàg rì mɛ̀fèèghrɛn lɛ ɓìɓeɓtàg ɓi ɓiɓan ɓi ɓyɛɛ̀ kɔ̀nkɔn nyi ɓyɛɛ ti ɓi syogì nyi, ɓi ki teki nyi nɗem.

¹⁵ Ɓìɓeɓtàg ɓi ɓɛfèg ɓi mum ɓi nɗem, ɓi ti lɛ i ɓi teri ɗyem, ɓi yay kìɓe; kìɓe ki ɓalàg lɛ i kaa tèɗ, ki yay rìwu.

Rìkì ɗi mum a ki yɛ̀ɛ jɛ̀ɛ̀ ì Bɛ̀ll yɛɛ̀ kpaakpàà

¹⁶ Mìni ɓɔɔseŋi ɓɛ̀m ɓɛ nɗem, kɛ̀ ɓi pwààrɛn:

¹⁷ Com ki syeesyee kìcèm ki ɓɛ ri lɛ ɓɛ fa ɓìsi, rì rìɓòò ɗìcèm ɗi ɗi rɔɔtɛɛ lɛ kɔɔ̀kɔɔ̀, ɓi ti ɓi ɓalàg yì aɗyoo, yɛ̀ɛ Seŋi ànɛ à rì rì kìtɛɛtɛn, ànɛ à ti kɛ̀ɛ cenɗɛn, nsoò kìfìì ki lɛ à rì lɛ à lɔ̀gtɛ̀n, ki yin a lɔ̀ŋkii.

¹⁸ À faghà ɓìsi cɛɓ ɓi rìkɔ̀n ɗii, rì jɛ̀ɛ̀ yìì i saaɗ lɛ ti ɓa fɛlɛ yɛ̀ɛ ɓìɗùn ɓi ǹtonto ɓi ɓyom ɓi à kìghà.

¹⁹ Mìni ɓɛ̀geni ɓɛ̀m ɓɛ nɗem, ɓì ghɛ̀ɛ̀sɛɛ kì yiì fɔlɔɔ. Fɔlɔɔ nnɛ mum bimiɗ à ghɛ̀ɛ̀sɛɛ kì ɓaà lɛ fyɛ̀ɗ lɛ a wog, kɛ̀ɛ fyaŋzi ki tòòghrɛɛ, kɛ̀ɛ ki fyaŋzag ki woògh bim,

²⁰ ɓisuulɛ ŋwaànɛ bim yɛɛ̀ kìkì, à ti kɛ̀ɛ roòzi rikì ɗi ɓiɓan ɓi ɓi ri lɛ saaɗ ɓi mis mɛ Bɛ̀ll.

²¹ Kìɓan kiǹ kɛɛ̀ki ɓì ghɛ̀ɛ̀sɛɛ kì càri ɓiɓan ɓi tifin, rì kìɓe mɛkuu mɛ̀cèm, ɓì teɗ jɛ̀ɛ̀ ìnɛ ì ɓɛ̀lɛ̀ngà ɓi mìni, ìnɛ ì ki rì lɛ ì ghɛɓsì ɓyɛɓ ɓin, rì ǹɗem wu tɛ̀tɛ̀rɛ̀ɛ̀.

²² Kìina ɓìɓan ɓi jɛ̀ɛ̀ ì Bɛ̀ll yɛɛ̀ kpaakpàà, kɛ̀ ɓi rɔ̀ɓ lɔŋ lɛ rìwowòg ɗi jɛ̀ɛ̀ ìnɛ̀n ɗyɔ rì ɗyɔ, ɓì pwààpwààrɛ̀n mìniìɓɔmiɗ ri ɓɛ̀fèg ɓɛ ɓɛ ri ɓìtɛ̀ŋtɛ̀ŋ.

²³ Ɓisuulɛ ŋwaànɛ a wowog jɛ̀ɛ̀ ìnɛn, kɛ̀ɛ kì ɓiɓan ɓi yɛɛ̀ kpaakpàà, à rì fɛlɛ yɛ̀ɛ ŋwaànɛ à ti à kìlàg lɛ, i à ghɛɛ ìsu wii ɓi ŋwii yɛ̀ɛ wu ri,

²⁴ ajɛ̀m ìnɛn à pɛ̀sɛ̀n à ghaagh, à ghàs kì ɗimzɛɛ lannɛ à rì.

²⁵ Kìɓan kifog, i mum à sìŋii ɓìdɔ̀gsɛna ɓi ɓi rɔɔtɛɛ lɛ kɔɔ̀kɔɔ̀, ɓi ɓyɛɛ̀ foŋfoŋ mum ɓi-kɔ̀ɔ̀ wu rikan, à ki sììrɛn, àa ɓi rìwowòg ɗi lɛ i à woogh, à ɗimzɛ̀n, lɔŋ ɓi rìkìkì ɗi ɓiɓan ɓi miì rì ìtèɗ, ŋwaànɛ̀n yɛɛ ri ɓiì woògh kìrɔɔ ɓi rìkì ɗii ɗiǹ.

²⁶ I mum a fèfeg lɛ à rì mum à rìgherɛ̀n kɛ̀ɛ ki ɓèŋ rìlemàg ɗii, kìɓan kifog à yèèghyègsì ǹɗem wii, rìgherɛ̀n ɗi ŋwaànɛ̀n ɗi ghɛɓsii ɓi com.

²⁷ Rìgherɛ̀n ɗi ɗi ri ɗìtɛnɛn, ɗi ki ɓa kɛ̀ɛ̀ tìfin ɓi mis mɛ Bɛ̀ll à Seŋi wìs ɗyɛɛ̀ tɔtɔg lɛ mum a kɛngi kì ghɛɛ̀ lɛ rì ɓɔɔ̀zii rì mɛ̀kpɔɓ cààmɛ̀n ki ɓɛ ri rì ǹɗemi-kɛŋɛn, à ki ɓèŋɗɛn lɛ kɛ̀ɛ kì ɓìɓan ɓi tifin ɓi ɓi ziinɛ.