Kaàtà ànɛ Pol à kàngà TIT 2 - Bafia Nouveau Testament

Deɓ yi yi seesee ɓɛ̀gherɛ̀n gbàà yìcèm

¹ Ɓi san wɔ̀ɔ̀, rèresi ɓum ɓìɓan ɓi ɓi ri lɔŋ yɛ̀ɛ syeesyee à dɔgtɛ̀n a kpaakpàà.

² Ù kpaa ɓìtùg ɓi ɓum lɛ ɓyɛ̀ kɛɛ̀ nɔnɔ mɛrɔ̀g lɛɛ̀gwey, ɓɛ ghɛɛ̀sɛɛ kìɓaà rì rìmum, rì ɗyomzɛ̀n, ɓɛ ki ɓa ri ìtèɗ ɓi rìgherɛ̀n, rì ɓi nkɔ̀nɛ̀n, rì ɓi rìɓìɓ ɗi nɗem.

³ Ù kpaa ɓɛ̀sɛ̀ɛ̀mɛn ɓɛ ɓɛ̀yiɓ lɛ ɓɛ ghɛɛ̀sɛɛ girig kì ɓaà rì cɛɓ ki ɓum ɓɛ ri lɛ ɓɛ ghɛn lɛ ki ri cɛɓ ki ɓɛgherɛ̀n, ɓɛ̀ kɛɛ̀ ɓa ri mɛ̀wɔ̀wɔrì, ɓɛ̀ kɛɛ̀ ɓa ɓɛkpàn ɓɛ mɛrɔ̀g, ɓɛ ghɛɛ̀sɛɛ kìfafaa ɓɛsyeesyee ɓɛ deɓ,

⁴ lɛ di ɓɛɛ resag ɓɛ̀yiɓ ɓɛ ɓwɛ̀ɗ yɛ̀ɛ ɓɛɛ keèsi lɛ rì ɓɛ̀yii ɓaa, rì ɓɔn ɓaa,

⁵ ɓɛ ɓa rì ɗyomzɛ̀n, ɓɛ ɓeŋɗɛ̀n ɗì ndèŋì wu ɓidan, ɓɛ ɓa ɓɛ̀yiɓ ɓɛ ɓɛ foŋi ǹɗem rì gìlɛ̀n ìnɛ ɓi naa lɛ syeesyee, ɓɛ rɔɔtàg mɛ̀rem ɓɛ wog ɓɛ̀yii ɓaa, fɔɔnnɛ ɓum ɓaa fen ɓi jɛ̀ɛ̀ ì Bɛ̀ll.

⁶ Rereɓ girig ɓɛ̀dɛlì lɛ ɓɛɛ ɓa rì ɗyomzɛ̀n ɓi ɓìɓan ɓìcèm.

⁷ Wɛ̀ɛmiɗ ù ɓa kìfèèghrɛnà ɓi rìkì ɗi ɓiɓan ɓi syeesyee, ù rèèrèsàg ɓum dɔgtɛ̀n inɛ ì rì ǹtɛnɛn, ɗì rìmum.

⁸ Ɓìtòkì ɓyɔɔ ɓyɛɛ ɓa lɛ sɛɛghi sɛɛghi, kɛ̀ɛ̀ com ki ɓɛ fen miì, lɛ di ɓɛ̀bènàbena ɓis ɓɛɛ wog ǹtoòrìɗ, ɓɛ rɔɓ kɛ̀ɛ̀ kìɓan ki ɓeɓtɛn ki ɓɛ fen a lɔ̀ŋkis.

⁹ Ù kpaa ɓɛ̀kpàn lɛ ɓɛɛ wog ɓɛ̀masà ɓaa ɓi ɓìɓan ɓìcèm, ɓɛ puùpùɓsi ɓɔ mɛ̀rem, ɓɛ̀ kɛɛ̀ tùùzi kiɓan ki ɓɛ̀masà ɓaa ɓɛ kpaa,

¹⁰ ɓɛ̀ kɛɛ̀ fyaasi com, wɔ̀lɛ ɓɛ ghɛɛ̀sɛɛ kì rèsii ɓyààmɛ̀n ɓìcèm lɛ ɓɛ ri ɓumɓɛ ɓɛ ghɛɛ̀sɛɛ kì tyweeyii lɛ kɔɔ̀kɔɔ̀, fɔlɔɔ nnɛ ɓi ɓìɓan ɓìcèm ɓɛ ɓiì kìi lɛ ɓum ɓɛɛ nyaàsi dɔgtɛ̀n ì Bɛ̀ll ànɛ à rì ǹghɛɓsì wìs.

Kìsay ki geesɛ̀n ì Bɛ̀ll yɛɛ̀ kìki ɓi ɓɛ̀gherɛ̀n

¹¹ Ɓisuulɛ geesɛ̀n ì Bɛ̀ll ìnɛ ì rì ǹsim à cɛɓ ɓisuu ɓum ɓɛ̀cèm, ì mɛ rèsɛ̀n,

¹² geesɛ̀n yìì inɛ̀n yɛ̀ɛ rèresi ɓisi lɛ ti roòzɛn cɛɓ ki kɛ̀ɛ̀ rìgherɛ̀n rì ɓìɓeɓtàg ɓi ɓiɓan ɓi ɓyɛɛ̀ kɔ̀ngi ɓum ɓi ziinɛ, tì ghɛɓ ɓi ziinɛ rì ɗyomzɛ̀n, tì ɓa lɛ saaɗ tì ki falɛn ɓi rìgherɛ̀n,

¹³ cààmɛ̀n ki ti ka ɓoŋɓoŋ coo ŋwos a kìnyàà ànɛ à rì dyàɓɛn yis, tì ki ɓoŋɓoŋ ti rìkem ɗi Bɛ̀ll wìs anɛ à teŋmɛɛ, rì ǹghɛɓsì wìs Yeesus Kiris,

¹⁴ ànɛ à falɛ̀ngà nyimiɗ ɓisu wis lɛ a pwaŋ̀ yì ɓìsi ɓi kìɓe mɛkuu mɛ̀cèm, à kì lɛ ti ɓa kìlɔ̀ŋ kitɛnɛn ki kɛɛ woòghrɛn ɗì nyi; ki falɛ̀n ɓi rìkìkì ɗi ɓiɓan ɓi syeesyee.

¹⁵ Ɓìɓan ɓi ù ghɛ̀ɛ̀sɛɛ kì kakalii ɓum ɓyɛɛ̀ ɓìn lɔɔ, ù tèètèèsì ɓɔ nyoo, ù ki fwààdag ɓɔ ɗì ìtèɗ wu rilàmì wùcèm wu ù rì rì wɔ. Kɔ̀ɔ gherɛn lɛ mum a sɛɛ̀ti wɔ̀.