Kaàtà ànɛ Pol à kàngà TIT 1 - Bafia Nouveau Testament

Pol à tògsii Tit

¹ Mɛ̀ Pol ànɛ ǹɗì ǹkìì-kìsay a Bɛ̀ll, ǹki ɓa ti ǹkɛ̀nì-fìtom a Yeesus Kiris lɛ nsyoŋ̀ yì ɓumɓɛ ɓɛ ri ɓɛ̀ɓɔ̀nɛn lɛ ɓɛɛ gherɛn Bɛ̀ll, ɓɛ ki yi saaɗ ànɛ à rì yɛ̀ɛ rìgherɛ̀n ɗis ɗyɛɛ̀ kpaakpàà,

² kìɓan kiǹ kɛɛ sasaghii ɓi dyàɓɛn i cɛɓ ki fiɗyàɓ fikɔ̀ɔ̀, ki Bɛ̀ll ànɛ a maà pwàà ɓi a kàkà fìɗyàɓ, di ɓyààmɛ̀n ɓi a rìtumɛ̀n ɓi ka yin.

³ Yɛ̀ɛ cààmɛ̀n ki ki ɓaghà kìsiŋdɛn ki kpagà, à kìghà lɛ jɛ̀ɛ̀ yìì yɛ̀ɛ yilɛn ɓi kìɓan ki à faghà mɛ̀ lɛ nlaàlamɓɛ̀n yɛ̀ɛ rìkalì ɗi Bɛ̀ll ànɛ à rì ǹghɛɓsì wìs ɗi ri.

⁴ Ǹkàni wɔ̀ Tit, kɔɔ̀kɔɔ̀ à man wɛm̀ ɓi rìgherɛ̀n ɗi ɗi ri ɓìsi bas, Bɛ̀ll à Seŋi wìs rì ǹkòrì wìs Yeesus Kiris, ɓɛɛ fa wɔ̀ lɛ rì geesɛ̀n, rì fyòoog.

Tit à ghɛ̀ɛ̀sɛɛ kì wòŋzaagh ɓiɓan ɓi ɓi Ɓìseŋi ɓi Kiris ɓi a Kirɛt

⁵ Tit, mɛ̀ɛ ncàri wɔ̀ a Kirɛt lɛ u legsiì kìwòŋzaagh ɓiɓan ɓi ɓi kaka wɔɔ kɛ̀ɛ̀ rìwòŋzàg, ù ki rɛsi ti ɓɛ̀sɛ̀ɛ̀mɛn ɓɛ Kiseŋi ɓi bàn yìcèm lɔŋ yɛ̀ɛ mɛ̀ɛ ǹsiitaagh wɔ̀.

⁶ Mum ǹcèm ànɛ ɓi ɓumɓɛ̀n à ghɛ̀ɛ̀sɛɛ kì ɓaà kɛ̀ɛ̀ kìɓan ki ɓɛ cɛmdɛ̀n, à ɓa giɓ bog, ɓɔn ɓii ɓɛ ghɛɛ̀sɛɛ kì ɓaà ɓɛ̀gherɛ̀n, ɓɛ̀ kɛɛ̀ ɓa ɓɔɓti ɓɛ ɓum ɓɛɛ̀ cɛɛcɛmdɛ̀n lɛ ɓɛ ri lɛ nyùùnyùùgh, nsoò lɛ ɓɛ ri rì ntoòtèɗ.

⁷ Lɛ ki ghɛɛ̀sɛɛ lɛ ǹkɛ̀ɛ̀sì-kìseŋi a ɓa kɛ̀ɛ̀ tìcɔrɔɓ fɛlɛ yɛ̀ɛ m̀ɓèŋì ɓyom ɓi Bɛ̀ll; à ghɛ̀ɛ̀sɛɛ ɓi ki ɓaà rì kalɛn kɛ̀ɛ ɓa ŋwaà bim, kɛ̀ɛ ɓa kinɔɔ̀ mɛ̀rɔ̀g, kɛ̀ɛ ɓa ri ɓìgùg, kɛ̀ɛ ɓa ri kìsyɔ̀ɔ̀ ki lɛ a fɔngi mɔ̀ɔ̀ni ɓi kìcòò.

⁸ Kìɓan kifog à ghɛ̀ɛ̀sɛɛ kì yiì rìghàɓ ɗi ɓɛ̀kèn, à keesì ɓìɓan ɓi syeesyee, à ɓa rì ɗyomzɛ̀n, à ɓa lɛ saaɗ, à ɓa ǹtɛnɛn ɓi mis mɛ Bɛ̀ll, à ki ɓìɓ nɗem,

⁹ à sììrɛ̀n lɛ tiŋtiŋ ɓi kɔɔ̀kɔɔ̀ à jɛ̀ɛ̀ lɔŋ yɛ̀ɛ ɓɛ resìghà nyi yɔ̀, fɔlɔɔ nnɛ à rì ɓiì ɓaà rì ìtèɗ wulɛ a rereɓ ɓum yɛ̀ɛ syeesyee à dɔgtɛ̀n a rèrèsì, à ki kì lɛ ɓumɓɛ ɓɛɛ̀ ɗùùɗuu ri syeesyee à dɔgtɛ̀n ɓɛɛ yi lɛ ɓɔ yɛɛ ri ɓi zɛ̀ɗ.

¹⁰ Ǹkpaa fɔlɔɔ ɓisuulɛ ɓum lɛɛ̀gwey ɓɛ ri rì ntoòtèɗ, ɓɔ rì mɓog à ŋwɔm ɓɛ ki ɓa ri ǹ-yègsɛ̀n à ɓiìɓììsɛ̀n ɓi nyìinyìm à Ɓɛ̀yudɛ̀n ɓɛ ɓɛ ri ɓɛ̀kìristɛ̀n,

¹¹ ɓɛ ghɛɛ̀sɛɛ kì sìmi ɓumɓɛ̀n myɔm. Ɓɛɛ̀ ɓùuɓuùsì ɓɛ̀bimiɗ ɓɛ naa yi ɓum, ɓɛ rerèsì yɔ ɓìɓan ɓi ɓi ghɛɛ̀sɛɛ ɓi, lɛ ɓɛɛ fɔnfɔn mɔ̀ɔ̀ni mɛ ntoòrìɗ.

¹² Kìbog ki ɓi ɓɔ ki ki ri ǹkpaŋzì-ɓìɓan waà, ki kpaaghà lɛ: Mìni ɓumɓɛ a Kirɛt, ɓi ɓalag lɔŋ ɓɛ̀pwààpwaà cààmɛ̀n kìcèm, ɓì nyɛngì yɛ̀ɛ nyàm yi ɓi cog, ɓì ki ɓa ɓɛ̀ɓɔɓwɛɗ ɓɛ ɓɛɛ̀ fèfeg lɔŋ lɛ ɓìɗilàg.

¹³ Jɛ̀ɛ̀ ìnɛ à kpaaghà ìnɛn ì rì miì, kìɓan kiǹ kɛɛ̀ki ù ghɛ̀ɛ̀sɛɛ ɓɔ kì fwààdaagh ù nyɛzì jɛ̀ɛ̀, di fɔɔnnɛ ɓɛɛ ɓa rì syeesyee à rìgherɛ̀n,

¹⁴ ɓɛ̀ kɛɛ̀ ki ɓa lɛ ɓɛ falɛ̀n ɓi mɛ̀kànkàn mɛ Ɓɛ̀yudɛ̀n, rì ɓi ɓìdɔ̀gsɛna ɓi ɓumɓɛ ɓɛ lɔghii jɛ̀m rì saaɗ.

¹⁵ Com kìcèm ki ri kì tɛnɛn ɓisuu ɓumɓɛ ɓɛ ri ɓɛ̀tɛnɛn, wɔ̀lɛ com kidɛŋ ki yin ki tɛnɛn ɓisuu ɓumɓɛ ɓɛ ri lɛ tɔɔtɔɓki, ɓɛ̀ kɛɛ̀ ɓa ɓɛgherɛ̀n, ɓisuulɛ ɗyomzɛ̀n rì nɗem waa, ɓi ri lɛ tɔɔtɔɓki.

¹⁶ Ɓɛ ti ɓɛ kpaaghì lɛ ɓɔɔ yii Bɛ̀ll, kìɓan kifog ɓɛ roòròòzɛ̀n nyi ɓi mɛ̀kìkìì maa, ɓum ɓɛ ɓeèzɛɛ rìɓa ɗyaa ɗiǹ, ɓɛ ri rì ǹtoòtèɗ, ɓɛ̀ kɛɛ̀ ki ɓa ɓumɓɛ ɓɛ ri lɛ ɓɛ ki syeesyee à kìɓan nsoò bog.