TIMOTE 6 - Bafia Nouveau Testament

¹ Ɓum ɓɛ̀cèm ɓɛ ɓɛ ri ɓɛ̀kpàn ɓɛ ghɛɛ̀sɛɛ kì ghɛɛ̀ ɓɛ̀masà ɓaa lɛ ɓɛ ri ɓumɓɛ ɓɛ ghɛɛ̀sɛɛ rì bɔgsɛ̀n bimiɗ, di fɔɔnnɛ ɓum ɓɛ̀ kɛɛ̀ sòòti lɛ rì ɗii ɗi Bɛ̀ll, rì dɔgtɛ̀n yìs.

² Fɔɔnnɛ ɓɛ̀kpàn ɓɛ ɓɛ̀masà ɓaa ɓɛ ri ɓɛ̀gherɛ̀n, ɓɛ ghɛɛ̀sɛɛ ɓi ki sɛɛtii ɓɛ̀masà ɓaa rì ǹkpaà lɛ ɓɛ ri ɓɛ̀geni ɓaa ɓɛ righerɛ̀n; kìɓan kifog ɓɛ ghɛɛ̀sɛɛ ɓɔ kì kìkii ɓisay à cee fɔlɔɔ ɓisuulɛ ɓɛ ri ɓɛ̀gherɛ̀n, rì tì lɛ ɓɛ̀geni ɓaa ɓɛ nɗem ɓɛɛ̀ɓɛ ɓɛɛ̀ kìki kisay fɔlɔɔ lɛ syeesyee.

Pol à ɓùŋi kìɓan ki ɓɛ̀pwààpwaà ɓɛ ɓɛrèsàg, rì kìsee ki mɔ̀ɔ̀ni, à faɓtì Timote deɓ ɓi ɓìɓan ɓidɛŋ

³ Ɓìɓan ɓi ù ghɛ̀ɛ̀sɛɛ kì rèsaagh di u siisiŋdàg ɓyɛɛ̀ ɓìn lɔɔ. I mum a rèresi dɔgtɛ̀n ìdɛŋ, kɛ̀ɛ nɔ̀ɔ̀ti ɓi syeesyee à rìkpaa à Kan wìs Yeesus Kiris, rì yɛ̀ɛ rìrèsì ɗi dɔgtɛ̀n ìnɛ ì ghɛ̀ɛ̀sɛɛ ɗì rìfalɛ̀n ɗi ɓi rìgherɛ̀n, ɓyɛɛ̀ kpaakpàà,

⁴ di ɓìdaŋà ɓi roni ŋwaànɛ̀n miì ɓi nɗem, kɛ̀ɛ ki yi com, à rì ŋwaànɛ a roròɓ firoɓ fi lɛ a nyoònyòlɛ̀n di a saasaàkɛ̀n ɓi kìɓan ki mii; jàŋ inɛ̀n yɛ̀ɛnɛ ɓìɓan ɓidɛŋ ɓi ti ɓi fuughàg yì fɛlɛ yɛ̀ɛ m̀mììghrɛ̀n, ɓɛ̀paàzì, mɛ̀wɔ̀wɔrì, kìnɗèmɓàg ki ɓiɓan ɓi ɓeɓtɛn,

⁵ rì nyoey yi yɛ̀ kɛɛ̀ ren ɓi nyìinyìm à ɓumɓɛ mɛ̀yitì maa mɛ ti ɓigɛŋ, ɓɛ̀ kɛɛ̀ yi saaɗ, ɓɛ ki fèki lɛ rìfalɛ̀n ɗi ɓi rìgherɛ̀n ɗi ri kìɓan ki mum à rì lɛ à fɔ̀nfɔ̀n miì.

⁶ Ki ri lɔŋ saaɗ lɛ rìfalɛ̀n ɗi ɓi rìgherɛ̀n ɗi ri bee i rìfɔ̀n, di mum à nyààrɛɛ rì gàɓ ì com ìnɛ à rì rì yɔ̀.

⁷ Ɓisuulɛ tì yùghày ɓi ri com ɓi ziinɛ, fɔlɔɔ nnɛ tyàa sug ɓi girig rì com.

⁸ I tì rì lɛ rì ɓìɗilàg rì com ki waatɛn lèg ànɛn à ghɛ̀sɛ̀n ɗì ɓìsi.

⁹ Kìɓan kifog ɓɛ̀roɓɛ ɓɛɛ̀ kɔ̀nkɔn lɛ di ɓaa kumi, ɓɛ ti ɓɛ kpilàg ɓi mɛ̀fèèghrɛn rì ɓi fìram fi lɛ ɓɛɛ ɓa rì zày ì ɓìɓan ɓi ɓiyèg rì ɓi ɓeɓtɛn ɓi ɓi ti ɓi pikì mum ɓi rìɗyaŋ rì ɓi rìwu.

¹⁰ Ɓisuulɛ kìsee ki mɔ̀ɔ̀ni ki ri ǹɗyèm wu ɓiɓan ɓi ɓeɓtɛn ɓìcèm, nni ɓum ɓɛdɛŋ ɓɛ ɓɛ falɛ̀ngà ɓi kìsee ki mɔ̀ɔ̀ni kìn, ɓɛ ghasɛ̀ngà rì rìgherɛ̀n, ɓɛ ki syòŋ yi ɓɔmiɗ mɛtɔɓ ɓi nyoo lɛɛ̀gwey.

¹¹ Ɓi ɓɛg wɔ̀ɔ̀, wàànɛ ù rì mum à Bɛ̀ll, lɛgha ɓìɓan ɓiǹ, ɓìcèm; u kaà lɛ rì saaɗ, rì rìfalɛ̀n ɗi ɓi rìgherɛ̀n, rì rìgherɛ̀n yɛ̀ɛ Bɛ̀ll, rì ǹkɔ̀nɛ̀n, ɗì rìnìɗ ɗi nɗem, ɗì rìɓa ɗi lɛ tɛ̀tɛ̀rɛ̀ɛ̀.

¹² Ɗùùya syeesyee à wɛ̀y a rìgherɛ̀n, ù ɓan cɛɓ ki fiɗyàɓ fikɔ̀ɔ̀ ki Bɛ̀ll à reŋìghà wɔ̀ lɛ u teɗ, cɛɓ kìn kɛɛ̀ki ù tòòghrɛ̀ngà ɓìsyeesyee ɓi ɓitòkì miì, ɓi mis mɛ ɓum lɛɛ̀gwey yɛ̀ɛ ù rèsìghà rìgherɛ̀n ɗyɔɔ.

¹³ Ǹtɔɔgh wɔ̀ ɓi mis mɛ Bɛ̀ll ànɛ à ti à falàg ɓyom ɓìcèm cɛɓ, rì ɓi mis mɛ Yeesus Kiris, ànɛ à konàkà kì rèsii righerɛ̀n ɗii ɓi mis mɛ Pilat lɛ,

¹⁴ u ɓeŋ̀ kìdɔ̀gsɛna, kɛ̀ɛ̀ tìfin, kɛ̀ɛ̀ bɛ̀lɛn à kpaŋ a rìsugtìì ɗi Kan wìs Yeesus Kiris,

¹⁵ kìɓan kiǹ ki ri ɓa ɓi cààmɛ̀n ànɛ ɓɛ fekà lɛ kɛɛ ɓa, ɓi rìkì ɗi roànɛ à rì ǹtin wu ɓɛmààgh, à ki ɓa mbobog à ǹlàmì, nyi yɛɛ ri rìfòm ɗi ɗi lamii mɛ̀fòm mɛcèm, nyi Kan ànɛ a ɓɛ̀kan,

¹⁶ nyi cɛ̀ncii yɛɛ yin lɛ à wu, à kɔ̀kɔrii ɓi kìtɛɛtɛn ki mum à yin lɛ à kpaŋ wɔɔ, mum à ka ghɛngà ɓi nyi, nnyɛɛ ghɛɛ̀sɛɛ rì ǹnyaasɛ̀n, rì ìtèɗ fiɗyàɓ fikɔ̀ɔ̀. Ààmɛ̀n.

¹⁷ Tɔgha ɓɛ̀guŋgum ɓɛ ɓi mɛ̀ru mɛ lɛ, ɓɛ̀ kɛɛ̀ ɓa ri kalɛn, ɓɛ̀ kɛɛ̀ ki foŋ dyàɓɛn yaà ɓi ìkum wu wu ri kɛ̀ɛ̀ ǹtyweeyi, ɓɛɛ foŋ lɔŋ dyàɓɛn yaà yɛɛ̀ Bɛ̀ll ànɛ à ti à falàg ɓìsi ɓyom ɓìcèm lɛɛ̀gwey lɛ ti wog kìrɔɔ rì ɓyɔ.

¹⁸ Kali ɓɔ lɛ, ɓɛɛ kiki kìrɔɔ, ɓɛɛ kum̀ ɓi ɓìsyeesyee ɓi mɛkìkìì, ɓɛ ɓa rì rìɓòò, ɓɛ fafà ɓum ɓyom,

¹⁹ fɔlɔɔ nnɛ ɓɛ ri ɓiì taŋzɛɛ ikum wu wu rɔɔtɛɛ wu ki kpegmɛn ɓisuu cɛɓ ki kɛɛ̀ yùyuiy, fɔɔnnɛ ɓɛ ri ɓiì terì kɔɔ̀kɔɔ̀ à cɛɓ.

²⁰ Timote, konag kì ɓèŋi com ki ɓɛ tɛfɛ̀ngà rì wɔ̀, ù lèg kɛɛgh à kɛ̀ɛ̀-su ànɛ kɛ̀ɛ wuɓsɛn ɓiɓan ɓi righerɛ̀n, rì nyoey yi riyi ɗi ɓiɓan ɗi ɗi ri ɓi zɛ̀ɗ.

²¹ Ɓum ɓɛdɛŋ ɓɛ ghasɛ̀ngà rì rìgherɛ̀n lɛ ɓɛ nɔɔ̀tìghà bee inɛ̀n. Geesɛ̀n ì Bɛ̀ll yɛ̀ɛ ɓa rì mìni.