TIMOTE 5 - Bafia Nouveau Testament

Deɓ yi yi ɓuŋi mɛ̀kpɔɓ mɛ ɓɛ̀yiɓ, ɓɛ̀sɛ̀ɛ̀mɛn ɓɛ Kiseŋi, rì ɓɛ̀kpàn ɓɛ ɓɛ ri ɓɛ̀gherɛ̀n

¹ Kɔ̀ɔ fwààdag kitùg ki mum, kìɓan kifog ki ghɛɛ̀sɛɛ lɛ ù reɓ nyi lɔŋ yɛ̀ɛ soŋi; ù reɓkì ɓɛ̀dɛlì lɔŋ yɛ̀ɛ ɓɛ̀goni,

² ù reɓkì ɓɛ̀sɛ̀ɛ̀mɛn ɓɛ ɓɛ̀yiɓ lɔŋ yɛ̀ɛ ù rì lɛ ù reɓ ɓɛ̀gaa, ù reɓkì ɓɛ̀yiɓ ɓɛɓwɛɗ yɛ̀ɛ ù rì lɛ ù reɓ ɓɛ̀goni ɓɛ ɓɛyìɓ; rìkì ɗiǹ ɗìcèm ɗi ɓa ɗìtɛnɛn lɛ kɔɔ̀kɔɔ̀.

³ Nyaasag mɛ̀kpɔɓ mɛ ɓɛ̀yiɓ mɛ mɛ ri lɛ mɛ̀kpɔɓ.

⁴ I ǹkpɔɓ wu giɓ wu ri rì ɓɔn nsoò lɛ dòò, ɓɔɓti ɓɛ ka ghɛ̀ɛ̀sɛɛ kì loògh kì yilaagh lannɛ ɓɛ ri lɛ ɓɛ ghɛɓ ɓi naa yàà i ɓum yɛ̀ɛ ɓɛ̀gherɛ̀n, ɓɛ fa ɓɛ̀yalì ɓaa ɓyom ɓi ɓɛ ghɛɛ̀sɛɛ ɓɔ kì faà lɛ fɔlɔɔ yɛɛ ti à rɔɔghì Bɛ̀ll.

⁵ Ǹkpɔɓ wu wu ri lɛ ǹkpɔɓ, wu wu rɔɓi nlɛŋlɛŋ̀ kɛ̀ɛ̀ mum, wu ri nkpɔɓ wu wu ri rì dyàɓɛn yɛ̀ɛ Bɛ̀ll, wɔ yɛɛ ti wɛ̀ kɛɛ̀ fwɛy ritɔtɔ̀g ɗi Bɛ̀ll ǹghɛɓsɛn ɓi bɔ̀ŋzɛ̀n yɛ̀ɛ ìru yɛ̀ɛ ŋwos.

⁶ Kìɓan kifog, ǹkpɔɓ wu wɛɛ̀ ka nɔ̀ɔnɔɔ̀tì rìyɛ̀y ɗi cɛɓ wu ri kìloŋ nsoò yɛ̀ɛ wu kaka cem̀.

⁷ Ɓìɓan ɓi ki ghɛɛ̀sɛɛ lɛ u siŋɗag mɛ̀kpɔɓ ɓyɛɛ̀ɓìn, lɛ di ɓɛ̀sɛ̀ɛ̀ ɓɛ̀cèm ɓɛɛ ɓa kɛ̀ɛ̀ kìɓan ki ɓum ɓɛ ri lɛ ɓɛ cɛmdɛ̀n mɔ miì.

⁸ I mum à yii ɓi rìɓèŋ ɗi ɓum ɓii, à ɓiisɛ̀n rìmɛɛ ɗii, di à roòzɛɛ rìgherɛ̀n; rìkuu ɗi mum ɗi fɔlɔɔ ɗi ɓeɓtɛɛ ɗi cee ŋwaànɛ à yin ngherɛ̀n.

⁹ Ɓi ɗi lɛ ɓɛɛ kaǹ ǹkpɔɓ wu giɓ ɓi bàlì ì mɛ̀kpɔɓ, wu ghɛɛ̀sɛɛ ɓi kiɓaà giɓ anɛ à ka kpaŋ ɓi bèg mɛ̀tin mɛraa, wu ki ghɛ̀ɛ̀sɛɛ kì ɓaà giɓ anɛ à wɔlà lɔŋ yii bog.

¹⁰ Ki ghɛɛ̀sɛɛ lɛ a ɓa giɓ anɛ ɓum ɓɛ yii ɓìsyeesyee ɓii ɓi mɛkìkìì, ànɛ à mɛ tɔɔsag ɓɔn, ànɛ àa nghàɓkì ɓɛ̀kèn lɛ syeesyee, à sòòghì ɓɛ̀gherɛ̀n mɛ̀kòò, à ghɛɓsàg ɓum ɓɛ nyìinyìg, à ki kaakaa lɛ a ki ɓìɓan ɓi syeesyee.

¹¹ Kìɓan kifog ù ɓèn mɛ̀kpɔɓ mɛ mɛ kaka ɓìɓwɛɗ ɓi ɓɛ̀yiɓ ɓisuulɛ i ɓìɓan ɓi mɛ̀rem maa mɛɛ̀ ka kɔ̀nkɔn ɓi mɛ ghasi ɓɔ rì Kiris ɓɛ ɓa rì zày ìnɛ lɛ ɓɛɛ kɛngi tì mɛ̀wɛy,

¹² ɓɛ ɓa rì bɛ̀lɛn ɓisuulɛ rìkì ɗiǹ ɗi yogsii ǹsiŋdɛn waa wu ǹtonto wu ɓɛ ɓaghà di ɓɛ mɛ teɗ.

¹³ À kɛ̀ɛ̀dì kì ɓaà lɛ, yɛ̀ɛ ɓɛ ri kɛ̀ɛ̀ kìsay, ɓɛ yilàg ǹdèŋì wulɛ, rì naa ìnɛ̀n miì ɓɛ ɗiŋì, ɓɛ teetì cɛɓ ki ɓɛ̀ɓɔlɛ rì mɛ̀wɔ̀wɔrì, ɓɛ sagtɛ̀n ɓi rìɓa ɗi ɓɛ ri kɛ̀ɛ̀ kìsay, ɓɛ kpaakpàà ɓìɓan ɓi ɓaa ghɛ̀ɛ̀sɛɛ ɓi ki kpaà.

¹⁴ Rìkɔ̀n ɗyɛm̀ ɗi ri lɛ mɛ̀kpɔɓ mɛ mɛ kaka ɓɔɓti, mɛɛ kɛngi tì mɛ̀wɛy, mɛ yay ɓɔn, mɛ ɓeŋ̀ naa yaa, di fɔɔnnɛ ɓɛ̀ kɛ̀ɛ nɛm bènàbena bee inɛ a totog ɓìsi kìɓe.

¹⁵ Ɓisuulɛ ɓɛ̀ro ɓɛdɛŋ ɓɛ ti gì ɓɛ̀ ɗimɛn bee, ɓɛ nɔɔ̀tì Satàn.

¹⁶ I giɓ adɛŋ ànɛ à rì ǹgherɛ̀n à rì rì mɛ̀kpɔɓ mɛ mɛ riì ɓi boo yìì i mum, à ghɛ̀ɛ̀sɛɛ mɔ kìɓèŋi, lɛ ǹtɛ̀g wu mɛkpɔɓ mɛǹ wɛ̀ kɛɛ̀ siŋ ɗi Kìseŋi ki Kiris, fɔɔnnɛ Kìseŋi ki ri lɛ ki teɗ ǹtɛ̀g wu mɛkpɔɓ mɛ mɛ ri kɛ̀ɛ̀ mum.

¹⁷ Ɓɛ̀sɛ̀ɛ̀mɛn ɓɛ Kiseŋi ɓɛ ɓɛɛ̀ kɛ̀ɛkɛɛ̀sì ɓìɓan lɛ syeesyee, à ɓiisɛ̀n ɓɛ̀roɓɛ ɓɛɛ̀ teetekì ǹtɔɓ lɛ ɓɛɛ kakali ɓìɓan ɓi Bɛ̀ll ɓɛ ki rèresi ɓyɔ, ɓɛ ghɛɛ̀sɛɛ rì ǹyaasɛ̀n ànɛ à cee à ɓɛ̀ro ɓɛmbog gɛ̀n yiɓɛɛ̀.

¹⁸ Ɓisuulɛ ki ri kìkànɛn lɛ: Ɓaa kàŋ ɓi ŋwɔm wu sanìnya ànɛ a kìki kisay, fɔɔnnɛ ǹkìì-kìsay a ghɛ̀ɛ̀sɛɛ rì mɛ̀lèɓ.

¹⁹ Kɔ̀ɔ gherag sɔmìnà à ǹsɛ̀ɛ̀mɛn a Kìseŋi di ɓɛ̀nkɔ̀ɔwa ɓɛ yin ɓɛɓɛɛ̀ nsoò lɛ ɓɛraa ɓɛ ɓɛɛ ɓaàzi sɔmìnà ànɛn.

²⁰ Ɓumɓɛ ɓɛ kii kìɓe, fwààdag ɓɔ ɓi mis mɛ ɓum ɓɛ̀cèm fɔɔnnɛ ɓɛ̀ro ɓɛmbog ɓɛ ri girig ɓiì risii.

²¹ M̀ɓɔ̀ŋzaagh wɔ̀ ɓi mis mɛ Bɛ̀ll rì ɓi mis mɛ Yeesus Kiris, rì ɓi mis mɛ ɓum ɓɛ titom ɓɛ ɓɛ ri ɓɛ̀ɓɔ̀nɛn lɛ, u ɓeŋ̀ ɓìɓan ɓi ǹsiitaagh wɔ̀ ɓiǹ, kɔ̀ɔ saa mum ìsu, kɔ̀ɔ ki ɓa ri nɗèè wu nɗem.

²² Kɔ̀ɔ fyɛ̀ɗmag kisaghii mum ɓyàg ɓi nyoo lɛ duri yàa tani, kɔ̀ɔ ɓɛmdag ɓiɓe ɓi ɓum ɓɛdɛŋ, ɓèŋɗɛn wɛ̀ɛmiɗ ntɛnɛn.

²³ Càra kìɓan ki lɛ mɛ̀nig mɛɛ̀mɛ u nɔlag mɔ rì mɔ, wɔ̀lɛ ù nɔlàg ɓɔɔ mɛrɔ̀g ɓisuu kifuu kɔɔ, rì kìɓan kɔɔ ki nyàanyamɓɛ̀n ɓyààmɛ̀n ɓìcèm.

²⁴ Ɓìɓe ɓi ɓum ɓɛdɛŋ ɓi ti ɓi ɓalàg ɓi kìtɛɛtɛn nsoò di ɓɛ ka yɔm̀ ɓi ɓɔ; ɓi ɓɛro ɓɛmbog ɓi ghɛnàg ajɛ̀m ì ɓɛ̀yɔ̀m.

²⁵ Fɔlɔɔ nnɛ mɛ̀kìkìì mɛ syeesyee mɛ ti mɛ ghɛnàg lɛ tɛntɛ̀ɛ̀n, mɛ mɛ rɔɔtɛɛ ɓi mɛ̀ kɛɛ̀ ki rɔ̀ɓ a rìnyam.