TIMOTE 2 - Bafia Nouveau Testament

Deɓ yi yi seesee bɔ̀ŋzɛ̀n

¹ Kìɓan ki asu ki ntɔki ki ri lɛ, ɓum ɓɛɛ tɔtɔg Bɛ̀ll ɓìɓan, ɓɛ ɓɔɔ̀ɓɔ̀ŋzì nyi, ɓɛ reǹɗèn nyi mɛ̀tɔɓ di ɓɛɛ̀ fafa nyi ɓìtògsɛ̀n ɓisuu ɓum ɓɛ̀cèm,

² ɓisuu mɛfòm, rì ɓum ɓɛ̀cèm ɓɛ ɓɛ ri ɓɛ̀làmì, lɛ di ti ghɛɓ cɛɓ ki fyòoog rì tɛ̀tɛ̀rɛ̀ɛ̀, tì falɛ̀n ɓi rìgherɛ̀n lɛɛ̀gwey, tì ɓa ɗì rìmum.

³ Fɔlɔɔ yɛɛ kiì lɛ, à rɔɔtɛ̀n à ki yɛ̀lɛn ɓi mis mɛ Bɛ̀ll ànɛ à rì ǹghɛɓsì wìs,

⁴ ànɛ a kɔ̀ngi lɛ ɓum ɓɛ̀cèm ɓɛɛ ghɛn cɛɓ, ɓɛ kpaŋ ɓi nɗɛli wulɛ ɓɛɛ yi saaɗ.

⁵ Ɓisuulɛ Bɛ̀ll à rì lɔŋ bogtɛ̀n, mum à ki ɓa girig bog ɓi nyìinyìm ànɛ lɛ rì Bɛ̀ll rì ɓum, nnyɛɛ ri Yeesus Kiris ànɛ à rì mum;

⁶ nnyɛɛ falɛ̀ngà nyimiɗ lɛ a leɓ pon anɛ ɓi gòri ì ɓum ɓɛ̀cèm; fɔlɔɔ a rì kìɓan ki ki kilɛ̀ngà, ɓi cààmɛ̀n ki ki ɓaghà kìsiŋdɛn,

⁷ Kìɓan kiǹ kɛɛ̀ki ɓɛ rɛsìghà mɛ̀ miì lɛ mɓa ǹghagsì-ɓɔlɛ rì ǹkɛ̀nì-fìtom anɛ miì. Nkpaakpaa saaɗ, m̀pwàa ɓi, ǹɗì ǹɗèsàg à ɓumɓɛ ɓɛ yin Ɓɛ̀yudɛ̀n, ànɛ a rèresi ɓɔ rìgherɛ̀n, rì saaɗ.

⁸ Rìkɔ̀n ɗyɛm̀ ɗi ri min lɛ ɓɛ̀baŋì ɓɛɛ ɓɔɔɓɔ̀ŋzàg jàŋ bimiɗ, ɓɛ pɛpɛ̀sì ɓyàg ɓi ɓi ri ɓì tɛnɛn aɗyoo, kɛ̀ɛ̀ bim nsoò paàzì.

Deɓ yi yi seesee ɓɛ̀yiɓ

⁹ Ɓɛ̀yiɓ ɓɛ ghɛɛ̀sɛɛ girig kì waataagh yɛ̀ɛ ki ghɛɛ̀sɛɛ, ɓɛ ɓa rì ntoòrìɗ; ǹwaà waa wɛ̀ kɛɛ̀ yeesɛn, ɓɛ ghɛɛ̀sɛɛ ɓi ki ɓaaghraagh tyòŋ ti ti yeesɛɛ rìɓag, ɓɛ̀ kɛɛ̀ waatɛn mɛrɛ̀ŋ mɛ gol nsoò lɛ mɛ mɛ ri mɛ̀syaghɛn ri ɓyom ɓi ɓi ciɓtaagh kìrɔɔ, nsoò ɓìlàà ɓi ɓi kɛŋi lɛɛ̀gwey.

¹⁰ Lɔŋ ɓìɓan ɓi syeesyee ɓi ɓɛɛ̀ kìkì, ɓyɛɛ ghɛɛ̀sɛɛ kì ɓaà mɛ̀rɛ̀ŋ maa, lɛ fɔlɔɔ yɛɛ ghɛɛ̀sɛɛ rì ɓɛ̀yiɓ ɓɛ ɓɛɛ̀ nɔ̀ɔnɔɔ̀tì rìgherɛ̀n.

¹¹ Giɓ a ghɛ̀ɛ̀sɛɛ lɛ a maàrɛn lɛ fyòoog cààmɛ̀n ki ɓɛɛ̀ rèresi nyi, à ɓa rì mɛ̀wog lɛɛ̀gwey.

¹² Mɛ̀ ǹfaa ɓi ɓɛ̀yiɓ itèɗ wulɛ ɓɛɛ reresi nsoò lɛ ɓɛɛ lami ɓɛ̀baŋì, ɓɛ ghɛɛ̀sɛɛ lɔŋ ki sìmi myɔm maa,

¹³ ɓisuulɛ Adam nnɛ ɓɛ lokà kì kìi, ɓɛ ɓɔ̀ɓ min Ɛɛvɛ,

¹⁴ rì tì lɛ àa Adam nnɛ ɓɛ yegsìghà, lɔŋ giɓ innɛ ɓɛ ɓaghà lɛ, ɓɛ mɛ yègsì, à kì kìɓe.

¹⁵ Nsoò fɔlɔɔ, à ki rì ɓiì ghɛɛ cɛɓ, lɛ à rì rì ɓɔn, ɗì lɛ à ɓèŋi rìgherɛ̀n, à ghɛɓ ɓi nkɔ̀nɛ̀n, à ɓèŋɗɛ̀n ǹtɛnɛn ɓi nghay, à ki sɛɛ̀dɛn nyimiɗ ɓi zi.