TIMOTE 1 - Bafia Nouveau Testament

Pol à reŋɗɛɛ, à tògsì Timote

¹ Mɛ̀ Pol, ǹkɛ̀nì-fìtom a Yeesus Kiris lɛ rìkɔ̀n ɗi Bɛ̀ll ànɛ à rì ǹghɛɓsì wìs, rì Yeesus Kiris ànɛ à rì dyàɓɛn yis.

² Ǹkàni Timote, à kɔɔ̀kɔɔ̀ wɛ̀m à man ɓi rìgherɛ̀n, Bɛ̀ll Seŋi rì Kan wìs Yeesus Kiris ɓɛɛ fa wɔ̀ lɛ, rì geesɛ̀n, rì rìcenɛ̀n, rì fyòoog.

Kìɓan ki dɔgtɛ̀n yi yi ri ɓìtɛ̀ŋtɛ̀ŋ

³ Fɛlɛ yɛ̀ɛ ǹtɔkà wɔ̀ di ǹti lɛ nkɛǹ a Masedwan, ki ghɛɛ̀sɛɛ lɔŋ lɛ, u kɔkɔri a Efɛɛzɛ lɛ u siìtɛn ɓum ɓɛdɛŋ lɛ ɓɛ̀ kɛɛ̀ rèresi dɔgtɛ̀n yidɛŋ,

⁴ ɓɛ̀ kɛɛ̀ ki mɛ̀ɛ̀tɛn ɓi mɛ̀kànkàn rì rìɓààɓààsì ɗi boo ɗi kɛ̀ɛ̀ sugtag, ɓìɓan ɓiǹ ɓyɛɛ̀ titini ɓum lɛ ɓɛɛ nyoonyòlɛ̀n, ɓyɛ̀ kɛɛ̀ ki ghɛɓsi lɛ fèg à Bɛ̀ll ànɛ lɛ a ghɛɓsi ɓum lɛ rìgherɛ̀n a kɛn asu.

⁵ Rìsyɔn ɗi ɓi kìɓan ki ǹtɔɔgh wɔ̀ kiǹ ɗi ri lɛ, ǹkɔ̀nɛ̀n ànɛ à rìì ɓi nɗem wu wu ri wù tɛnɛn, rì ɓi nɗem wu wu ri lɛ sɛɛghisɛɛghi, rì ɓi rìgherɛ̀n ɗi kɛ̀ɛ̀ tìfyèèrɛnà.

⁶ Ɓum ɓɛdɛŋ ɓɛ nagà bee inɛ̀n, ɓɛ nɔɔ̀tì bee i ǹkpaakpaayɛn ɓiɓan ɓi kɛ̀ɛ̀ ìsu.

⁷ Ki kɔnkɔ̀n ɓɔ lɛ di ɓaa ɓaa ɓumɓɛ ɓɛ pɔɔ̀zii kì yiì ɓìdɔ̀gsɛna, kìɓan kifog ɓɛ̀ kɛɛ̀ yi nsoò com kɔm̀ ki ɓɛɛ̀ kpaakpàà, nsoò ki ɓɛɛ̀ sìisiìrɛ̀n ɗì rìkakàlì lɛ ki ri yɛ̀ɛ ɓɔɔ̀ kpaaghì.

⁸ Tì yii lɛ syeesyee lɛ ɓìdɔ̀gsɛna ɓi rɔɔtɛɛ, di mum à kìi kìsay ri ɓyɔ yɛ̀ɛ kɛɛ̀ kɔ̀nkɔ̀n;

⁹ tì ki yii lɛ ɓìdɔ̀gsɛna ɓi yin ɓifalɛn ɓisuu ŋwaà saaɗ, ɓi ri lɔŋ ɓisuu ɓumɓɛ ɓɛ ri rì rìgɛn, rì ɓɛ̀roɓɛ ɓɛ̀ kɛɛ̀ wooghrɛn, ɓɛ̀ɓènì rìgherɛ̀n, rì ɓɛ̀kìì-kìɓe, rì ɓumɓɛ ɓɛ ti ɓɛ̀ kɛɛ̀ risi nsoò Bɛ̀ll, nsoò ɓyom ɓi ɓi ri kìcèlì, rì ɓisuu ɓumɓɛ ɓɛ ti ɓɛ weeyì ɓɛ̀seŋi ɓaa, rì ɓɛ̀jɛɛ ɓaa, rì ɓisuu ɓɛwolì-ɓum,

¹⁰ ɓɛ̀kìì-kìzyaa, ɓɛ̀baŋì ɓɛ ɓɛ ti ɓɛ kɔràg rì ɓɛ̀ro ɓɛ̀baŋì(n) ɓɛ̀kìì-dune ì ɓɛ̀kpàn, rì ɓɛ̀pwààpwaà, ɓɛ̀kànɛ̀n bɛ̀ɗ yi ɓɛpwàà, rì com kìcèm ki ki yin yɛ̀ɛ syeesyee à dɔgtɛ̀n ànɛ à rì ǹtɛnɛn a kpaakpàà.

¹¹ Ɓìɓan ɓiǹ ɓyɛɛ̀ɓi Syeesyee à Ɓɔlɛ à ǹkeŋkèmì à Bɛ̀ll ànɛ à rì ǹtin wu ɓɛmààgh a rèrèsì. Syeesyee à Ɓɔlɛ ànɛ̀n nnɛ ɓɛ reɓsɛ̀ngà rì mɛ̀.

¹² Ǹtògsaagh Yeesus Kiris à Kan wìs, ànɛ à faghà mɛ̀ ìtèɗ ɓisuulɛ, à ghɛngà lɛ ǹɗì mum ànɛ ɓɛ ri lɛ ɓɛ tyweeyì, yɛ̀ɛ à ɓɔ̀ngà mɛ̀ lɛ nki nyi kìsay.

¹³ Màànɛ ǹfeèfèngàkà nyi abɛ̀y, ǹ-yeèyèèsì ɓɛ̀gherɛ̀n, ǹkìkì rìbaŋì, mɛ̀ ànɛ̀n innɛ Bɛ̀ll à wokà nyìinyìg ɓisuulɛ ǹ-yighà ɓi com ki ǹkìkìghà, lɛ m̀ɓaghà kɛ̀ɛ̀ kìgherɛɛ.

¹⁴ Fɔɔnnɛ geesɛ̀n ì Kan wìs ì rongà ì sòsòɓ, ɓi mɛ̀ bas ɗì rìgherɛ̀n rì ǹkɔ̀nɛ̀n ànɛ à rì ɓi Yeesus Kiris.

¹⁵ Jɛ̀ɛ̀ ìnɛ ì rì kɔɔ̀kɔɔ̀ à jɛ̀ɛ̀ ànɛ ɓum ɓɛ̀cèm ɓɛ ghɛɛ̀sɛɛ lɔŋ kiterì rì ǹtyweeyi wucèm yɛ̀ɛ ri lɛ Yeesus Kiris à yùghà ɓi ziinɛ lɛ a ghɛɓsi ɓɛ̀kìì-kìɓe, nni ɓi ɓɛ̀kìì-kìɓe ɓɛǹ, mɛ̀ yɛɛ ri lɛ ɓog.

¹⁶ Wɔ̀lɛ Bɛ̀ll à wokà mɛ̀ nyìinyìg lɛ di Yeesus Kiris a resi rìnìɗ ɗii ɗi nɗem ɓi mɛ̀ fɛlɛ yɛ̀ɛ ǹkìì-kìɓe à ǹtonto, fɔɔnnɛ kìɓan kiǹ ki ɓiì ɓaà kìrèmzɛnà ɓisuu ɓumɓɛ ɓɛ ri ɓiì gherɛɛ nyi lɛ ɓɛɛ teɗ cɛɓ ki fiɗyàɓ fikɔ̀ɔ̀.

¹⁷ Roànɛ a maà làlàmì cààmɛ̀n kìcèm ànɛ à yin lɛ à wu, roànɛ ɓum ɓɛ yin lɛ ɓɛ ghɛn, nyi yɛɛ ri m̀bobog à Bɛ̀ll ànɛ à ghɛ̀ɛ̀sɛɛ lɛ rì ǹnyaasɛ̀n, rì rìkem fìɗyàɓ fikɔ̀ɔ̀. Ààmɛ̀n.

¹⁸ Man wɛm̀ Timote, kìɓan ki mɛ̀ ǹsiŋ̀dɛɛ wɔ̀ ki rarɛɛ yì rì ɓìɓan ɓi Nghay à rèsìghà ɓi san wɔ̀ɔ̀; ɓi ɗi yɛ̀ɛ ɓìɓan ɓiǹ ɓyɛɛ̀ kpaakpàà, ki ghɛɛ̀sɛɛ lɛ u ɗùu syeesyee à wɛ̀y,

¹⁹ ù ɓèŋ rìgherɛ̀n rì syeesyee à ǹɗem. Syeesyee à ǹɗem ànɛ̀n, ɓum ɓɛdɛŋ ɓɛ mɛ naŋ nyi, rìgherɛ̀n ɗyaa ɗi ɓɛǹ mɛ̀nig yɛ̀ɛ ɓumɓɛ rìɓày à teri.

²⁰ Imenee rì Alɛgsaŋdirɛ ɓɛ ǹfaghà rì Satàn lɛ ɓɛɛ yilag rìɓèŋ ɗi myɔm maa lɛ ɓɛ̀ kɛɛ̀ tògti Bɛ̀ll kìɓe, ɓɛ ri ɓi bàlì ì ɓumɓɛ̀n.