Bìoball air-loidhne

RÒMƐŊ 6 - Bafia Nouveau Testament

Geesɛ̀n ì Bɛ̀ll ì ti ì kwèɗkì ɓum ɓi rìkpàn ɗi kiɓè

¹ Nni ti kpaà min lɛ cɛ? Tì ghɛ̀sɛɛ nya lɛ tì kɛ̀n asu tì ghɛghɛ̀ɓ ɓi kìɓe, lɛ di geesɛ̀n ì Bɛ̀ll yɛ̀ɛ ɓiìsɛn kì tèghɛɛ a lɔ̀ŋkis?

² Èe èe. Tì rì ɓìloŋ ɓi san ànɛ a kìɓe, nni lannɛ tì rì lɛ tì ghɛɓtì ɓi kìɓe?

³ Ɓì yii ɓi lɛ ɓìsi ɓɛ̀sɛ̀ɛ̀ ɓɛ̀cèm ɓɛ tì ɓàɓtɛ̀ngà ɓi Yeesus Kiris ɓi ɗùm, ɓi rìwu ɗii nnɛ tì ɓàɓtɛ̀ngà lɔɔ?

⁴ Ɓi bàɓtis nnɛ tì ɓòmɓɛ̀ngà ɓi zɔ̀ŋ rì nyi, lɛ ti wu ǹɗaŋ ɗi nyi, di fɔlɔɔ nnɛ ɓìsi girig ti ghɛɓ cɛɓ ki nyɔn fɛlɛ yɛ̀ɛ Kiris à ghèmɓɛ̀ngày a ɓìloŋ ɓi-tèɗ wu rikem ɗi Seŋi.

⁵ Ɓisuulɛ i tì ràrɛ̀ngà rì nyi lɛ kɔɔ̀kɔɔ̀ ɓi rìwu ɗi ɗi pisɛɛ ɗiŋkii, tì rì girig ɓiì ɓaà ɓɛ̀ràrɛn ɗi nyi ɓi rìghèmɓɛ̀n ɗi ɓilòŋ ɗi ɗi pisɛɛ ɗiŋkiì.

⁶ Tì ghɛ̀ɛ̀sɛɛ kì konaagh ki yiì lɛ fìɗyàɓ fis fi riɓa fi abɛ̀y fɛlɛ yɛ ɓum, fi ɓaghà fi kpanɛn ɓi kɔrɔs ǹɗaŋ ɗi nyi, lɛ di Bɛ̀ll a waà nyoo ì kìɓe inɛ tì rì rì yɔ̀, yɛ̀ɛ tyɛ̀ ki ɓa ti ɓɛkpàn ɓɛ kiɓè.

⁷ Ɓisuulɛ ŋwaànɛ à mɛ wu, à mɛ lèg ɓi rìkpàn ɗi kiɓè.

⁸ Wɔ̀lɛ i tì wughà ǹɗaŋ ri Kiris, tì rì rì ǹtyweeyi lɛ tì ɓiì ghɛɓì girig ǹɗaŋ ri nyì.

⁹ Tì yii fɔlɔɔ lɛ, à tumɛ̀n yɛ̀ɛ Kiris à ghèmbɛ̀ngày a ɓìloŋ, à yiìdi lɛ à wu tì, rìwu ɗi yiìdi ri ìtèɗ ɓi nyì.

¹⁰ Lɛ à wughà ɓisan ànɛ a kìɓe gɛ̀n bog ɓi gɛ̀n yicèm, wɔ̀lɛ rìghɛɓ ɗi a ghɛghɛɓ ɓigomìnɛ, a ghɛghɛɓ ɗyɔ ɓisuu Bɛ̀ll.

¹¹ Fɔlɔɔ nnɛ mìni girig, ghɛɛna mìniìɓɔmiɗ fɛlɛ yɛ̀ɛ ɓumɓɛ ɓɛ ti ɓìloŋ ɓi san ànɛ a kìɓe, ɓɛ ki ɓa cem ɓisuu Bɛ̀ll, ɓi Yeesus Kiris ɓi ɗùm.

¹² Kìɓe ki ghɛɛ̀sɛɛ tì ɓi min lɛ ki lamì nyoo yìn inɛ ì ti ì wulàg, lɛ kɛɛ ki lɛ ɓi kiki ɓìɓan ɓi nyoo ìnɛ̀n ì ti ì kɔ̀ngì.

¹³ Kɛ̀ ɓi cìtɛn ti ɓìkàɓ ɓin ɓi nyoo ɓi kìɓe fɛlɛ yɛ̀ɛ ɓyom ɓi kisay ɓi ɓi rìkì ɗi ɓiɓan ɓi ɓeɓtɛn, kìɓan kifog faana mìniìɓɔmiɗ ri Bɛ̀ll fɛlɛ yɛ̀ɛ ɓum ɓɛ̀cèm ɓɛ ɓɛ sughiì a nyɔ̀ɛ̀y, ɓì ki fa ɓikàɓ ɓin ɓi nyoo rì Bɛ̀ll ɓi sìg à ɓyom ɓi kisay, ɓi ɓi rìkì ɗi ɓiɓan ɓi ɓi ri lɛ saaɗ.

¹⁴ Kìɓe kaa làmi ɓi mini, ɓisuulɛ àa ɓìdɔ̀gsɛna ɓyɛɛ̀ làlami mìni, lɔŋ geesɛ̀n ì Bɛ̀ll.

Ɓɛ̀kpàn ɓɛ saaɗ

¹⁵ Nni la min? Tì rì nya ɓiì kìkii kiɓe lɛ yɛ̀ɛ ɓìdɔ̀gsɛna ɓi lamii ɓi ɓisi, lɔŋ geesɛ̀n ì Bɛ̀ll yɛ̀ɛ lamii ɓìsi wa? Ki yin fɔlɔɔ.

¹⁶ Ɓì yii ɓi lɛ, i ɓì càrɛɛ lɛ ɓi ɓa ɓɛ̀kpàn ɓɛ mum lɛ ɓi kiki ŋwaànɛ̀n miì mɛ̀wog, lɔŋ lɛ ɓì ghali ɓɛ̀kpàn ɓɛ mum ànɛ ɓi kìki mɛwog anɛ̀n; kòo lɛ kìɓe, ki ki ti ki syogìì rìwu, kòo lɛ mɛ̀wog, mɛ mɛ ti mɛ kilàg lɛ mum a ɓa lɛ saaɗ ɓi mis mɛ Bɛ̀ll?

¹⁷ Bɛ̀ll a teɗ rìkem, lɛ mìni ɓɛ ɓì ka ɓaghà ɓɛ̀kpàn ɓɛ kiɓe, ɓigomìnɛ, mìni yɛ̀ɛ mɛ nɔ̀ɔ̀ti ri nɗem win wucèm, deɓ yi ɓi rìrèsàg ɗi ɓì tekà.

¹⁸ Yɛ̀ɛ Bɛ̀ll à pisìghà mìni ɓi rìkpàn ɗi kiɓe, ɓì mɛ ghay ɓɛkpàn ɓɛ saaɗ.

¹⁹ Ǹkpaa fɔlɔɔ yɛ̀ɛ ɓum ɓɛ ti ɓɛ kpaaghì ɓisuulɛ, ɓì rì rì ìɓwɛɗ ɓi nyoo; fɛlɛ yɛ̀ɛ ɓì càɗkà ɓìkàɓ ɓin ɓi nyoo lɛ ɓyɛɛ ɓa ɓɛ̀kpàn ɓi rìkì ɗi ɓiɓan ɓi tifin, rì kìɓùùsì, lɛ ɓi ghɛɓ cɛɓ ki ɓùùɓuu, fɔlɔɔ nnɛ càrina ɓyɔ ɓigomìnɛ lɛ ɓyɛɛ ɓa ɓɛ̀kpàn ɓɛ saaɗ di ɓi ghɛɓ cɛɓ ki ki ri kìtɛnɛn.

²⁰ Lɛ yɛ̀ɛ ɓì ɓaghà ɓɛ̀kpàn ɓɛ kiɓe, ɓì ɓaghà ɓi ɓɛtiniyɛn lɛ ɓi nɔɔ̀ti saaɗ.

²¹ Nni ɓyom aɗi ɓyɛɛ̀ɓi ɓì fɔ̀ngà ɓi cààmɛ̀n kiǹ? Lɔŋ ɓyom ɓi ɓyɛɛ̀ fafa mini ǹtoòrìɗ ɓigomìnɛ, lɛ rìsyɔn ɗi miì ɗi ri lɛ rìwu.

²² Nni ɓigomìnɛ ɓì ti ɓɛ̀ kòrɛn ɓi kìɓe, ɓì mɛ ki ghay ɓɛkpàn ɓɛ Bɛ̀ll, rìfɔ̀n ɗi ɓì rì rì ɗyɔ ɓi rìɓa ɗìn, ɗi ri cɛɓ ki ki ri kìtɛnɛn, rìsyɔn ɗi miì ɗi ɓa cɛɓ ki fiɗyàɓ fikɔ̀ɔ̀.

²³ Ɓisuulɛ mɛ̀lèɓ mɛ kiɓe mɛ ri lɛ rìwu, kìɓan kifog, rìɓòò ɗi Bɛ̀ll a kìki ɓum zɛy ɗi ri cɛɓ ki fiɗyàɓ fikɔ̀ɔ̀ ɓi Yeesus Kiris à Kan wìs.

« Roimhe

Air adhart »

Bible Society of Cameroon

Lean sinn:

Ceanglaichean taic

Sanasan