RÒMƐŊ 5 - Bafia Nouveau Testament

Rìɓa ɗi mum à rì lɛ saaɗ ɓi mis mɛ Bɛ̀ll lɛ rìgherɛ̀ɛn, ɗi ti ɗi wumgì ɓìdùn

¹ Yɛ̀ɛ tì ti min ɓumɓɛ ɓɛ ri lɛ saaɗ ɓi mis mɛ Bɛ̀ll lɛ rìgherɛ̀n, tì yiìdi ɓi paàzì rì Bɛ̀ll lɛ Kan wìs Yeesus Kiris.

² Nnyɛɛ mɛ kì lɛ, ti ɗiŋi ɓi geesɛ̀n ì Bɛ̀ll ìnɛ tì ti ìnɛ miì ǹsììrɛn lɛ rìgherɛ̀n, com ki ti nyàànyàà ki ri dyàɓɛn ìnɛ tì rì rì yɔ̀ lɛ tì rì ɓiì ɓaà rì gàɓ ɓi rìkem ɗi Bɛ̀ll.

³ Àa lɔŋ foo ri foo, ti nyàanyaàrɛ̀n girig rì mɛ̀tɔɓ mis, lɛ tì yii lɛ ǹtɔɓ wu ti wu kilàg lɛ mum a ɓa rì kìsììrì,

⁴ kìsììrì ki kilàg lɛ, mum a ceè mɛ̀fèèghrɛn, rìcee ɗi mɛfèèghrɛn ɗiǹ, ɗi fogì mum dyàɓɛn ɓi nɗem.

⁵ Fɔlɔɔ nnɛ dyàɓɛn inɛ̀n ì ti yɛ̀ kɛɛ̀ ɓɔ̀ŋ ɓisi ɓisuulɛ Bɛ̀ll à ɗyɛɛghà ǹkɔ̀nɛ̀n wìì ɓi mɛ̀rem mis, rì Kìtɛntɛ̀ɛ̀n ki Nghay ki à faghà ɓìsi.

⁶ Ɓisuulɛ, cààmɛ̀n ki tì ɓaghà di tì ka yin ɗi ìtèɗ, Kiris à wughà ɓisuu ɓiɓeɓtàg ɓi ɓum, ɓi cààmɛ̀n ki Bɛ̀ll à siŋdɛ̀ngà.

⁷ Ki ɓaghà ǹtɔɓ lɛ mum a gherɛn lɛ a wu ɓisuu mum à saaɗ; mum à ɓaghà nya lɛ à cenɛ̀n lɛ a wu ɓisuu ŋwaànɛ à rì rì syeesyee à ǹɗem.

⁸ Wɔ̀lɛ kìɓan ki Bɛ̀ll a rèsag ǹkɔ̀nɛ̀n wìì ɓi ɓɛg wìs ki ri lɛ: Kiris à wughà ɓisu wis, cààmɛ̀n ki tì ɓaghà di tì kaka ɓɛ̀kìì-kìɓe.

⁹ I bwaɓ yii yi mɛ ka kì lɛ ti ɓa lɛ saaɗ ɓi mis mɛ Bɛ̀ll ɓigomìnɛ, di rì ɗi lɛ a ghɛɓsi ɓìsi lɛ bim i Bɛ̀ll yɛ̀ kɛɛ̀ kpaŋ a lɔ̀ŋkis.

¹⁰ Tì ɓaghà ɓɛ̀bènàbena ɓɛ Bɛ̀ll, wɔ̀lɛ à pègsɛ̀ngà paàzì ànɛ lɛ rì ɓìsi rì nyi ɓi rìwu ɗi Man wiì. Nni ɓigomìnɛ yɛ̀ɛ tì ti min lɛ syeesyee rì nyi, cɛɓ ki Man wiì ki ɓiì ghɛɓsii ɓisì.

¹¹ Àa lɔŋ foo nyi rì nyi, ti nyàànyaa ɓi Bɛ̀ll lɛ Kan wìs Yeesus Kiris ànɛ à mɛ pègsɛn paàzì ànɛ lɛ rì ɓìsi rì Bɛ̀ll.

Adam à syògày rìwu, Yeesus yù rì cɛɓ

¹² Kìɓan kiǹ kɛɛ̀ki yɛ̀ɛ kìɓan ki mum bog à kìghà ki ɗiŋzìghày kìɓe ɓi ziinɛ, rìwu ɗi ki ɗiŋiì lɛ kìɓe, rìwu ɗìn ɗi ki ràm ɓum ɓɛ̀cèm ɓisuulɛ ɓɛ̀sɛ̀ɛ̀ ɓɛ̀cèm ɓɛ kighà kìɓe;

¹³ lɛ yɛ̀ɛ ɓìdɔ̀gsɛna ɓi ɓaghà di ɓi ka yin, kìɓe ki ɓaghà lɔŋ ɓi ziinɛ wɔ̀lɛ, ki yin lɛ ki ɓalɛ̀n lɛ kìɓe, di ɓìdɔ̀gsɛna ɓi yin.

¹⁴ Kɔlɛ à tumɛ̀n ɓi Adam à kpaŋ ɓi Moyis, rìwu ɗi ciìzìghà lɛ rì ɓum ɓɛ̀cèm ɓɛ ɓɛ kighà ɓi kiɓe ki Adam à kìghà miì. Adam ànɛn yɛɛ ɓaghà kìfèèghrɛnà ki roànɛ à ghɛ̀ɛ̀sɛ̀ngà kì yùu.

¹⁵ Wɔ̀lɛ rìnàn ɗi yin com kìfog ɗì rìɓòò ɗi Bɛ̀ll à kìi ɓum; i ɓum lɛɛ̀gwey ɓɛ cuughà ɓi rìnàn ɗi mum bog, bɔ̀ɓ yaŋ ɗi geesɛ̀n rì rìɓòò ɗi Bɛ̀ll à kìghà ɓum zɛy rì zɛy ɓi m̀bobog à mum ànɛ lɛ Yeesus Kiris; rìɓòò ɗi Bɛ̀ll ɗiǹ ɗi ri ɗìkòmɛn ɓum lɛɛ̀gwey à cee fɔlɔɔ.

¹⁶ Rìsyɔn ɗi ɓi rìɓòò ɗi Bɛ̀ll ɗi yin com kìfog rì rìsyɔn ɗi ɓi kìɓe ki mbobog à mum. Ɓɛ̀yɔ̀m ɓɛ ɓi kìɓe ki kìbog ki mum ki kighà, ɓɛ syɔngà rì ǹcɛ̀m, kɔlɛ rìɓòò ɗi Bɛ̀ll à kìghà ɓum zɛy rì zɛy di ɓɛ mɛ kì ɓiɓe lɛɛ̀gwey ɗi syɔngà lɛ ɓum ɓɛɛ ɓa lɛ sɛɛghisɛɛghi ɓi mis mɛ Bɛ̀ll.

¹⁷ I rìnàn ɗi kibog ki mum ɗi kighà lɛ rìwu ɗyɛɛ̀ ragɛn, lɛ kìbog ki mum kìn, bɔ̀ɓ yaŋ ri ɓumɓɛ ɓɛɛ̀ teki lɛ rì geesɛ̀n yìì inɛ ì tèghɛɛ, rì rìɓòò ɗi ɓi rìren ɗii ɗi ɓiɓan, ɓɛ ri kì lɛ, ɓɛ ghɛɓ, ɓɛ ki làmi lɛ m̀bobog à mum ànɛ lɛ Yeesus Kiris.

¹⁸ Nni fɔlɔɔ nnɛ yɛ̀ɛ rìnàn dìfog ɗi kighà lɛ ǹcɛ̀m a saà a ɓum ɓɛ̀cèm, fɔlɔɔ nnɛ syeesyee à rìkì bog à mɛ kì lɛ rìɓa ɗi lɛ sɛɛghisɛɛghi ɓi mis mɛ Bɛ̀ll, ɗi ɗi ti ri falàg cɛɓ, ɗyɛè saà girig a ɓum ɓɛ̀cèm.

¹⁹ Ɓisuulɛ yɛ̀ɛ ǹtoòtèɗ wu kìbog ki mum ki kighà, wu ghaasìghà ɓum lɛɛgwey ɓɛ̀kìì-kìɓe, mɛ̀wog mɛ m̀bobog à mum à kìghà mɛ ri ɓiì kìi lɛ ɓum lɛgwey ɓɛɛ ɓa lɛ saaɗ ɓi mis mɛ Bɛ̀ll.

²⁰ Kɔlɛ ɓìdɔ̀gsɛna ɓi yughày lɛ di kìɓe kɛɛ teghɛn, wɔ̀lɛ jàŋ bimiɗ ìnɛ kìɓe ki ɓaghà kì rììtɛn geesɛ̀n ì Bɛ̀ll ì tèghɛ̀ngà tì ì cee fɔlɔɔ.

²¹ Ɓi lèg ànɛ lɛ, yɛ̀ɛ kìɓe ki ciìcììzìghà ɓum ɗì rìwu, geesɛ̀n ì Bɛ̀ll yɛ̀ɛ làlami rì saaɗ, ɓisuu cɛɓ ki fiɗyàɓ fikɔ̀ɔ̀ lɛ Yeesus Kiris à Kan wìs.