RÒMƐŊ 3 - Bafia Nouveau Testament

Kìrɔɔ ki Ɓɛ̀yudɛ̀n ɓɛ ri rì kɔ

¹ Kìrɔɔ ki muu Ɓɛ̀yudɛ̀n à rì min ɗi kɔ ki ri lɛ cɛ? Nsoò lɛ, kɛ̀rɛ̀n à rì min ɗi gɛɓsɛ̀n aɗi?

² Kìrɔɔ kaa ki tèghɛɛ bee lɛɛ̀gwey; rì ɓɔ nnɛ Bɛ̀ll à ka lokà kì reɓsɛɛ ɓiɓan ɓii.

³ Nni la! I ɓum ɓɛdɛŋ ɓɛ ɓi nyìinyìm wàà ɓɛ ɓaghà ɓumɓɛ ɓɛ gherɛɛ ɓi, rìɓa ɗyaa ɗi kɛ̀ɛ̀ rìgherɛ̀n ɗiǹ ɗyɛɛ ri ɓiì kìi lɛ Bɛ̀ll a rɔɓ kɛ̀ɛ roòzi ti mɛ̀kàg mii?

⁴ Ɓi saaɗ ki yin fɔlɔɔ! Ɓum ɓɛ ghɛɛ̀sɛɛ kì gherɛɛ lɛ, Bɛ̀ll à rì roànɛ à ti à kpaaghì saaɗ, ɓum ɓɛɛ ri ɓɛ̀pwààpwaà ɓɛ̀sɛ̀ɛ̀ ɓɛcèm; lɛ ki ri kìkànɛn lɛ: Ki ghɛɛ̀sɛɛ lɛ ɓɛɛ yi lɛ ù rì mum à saaɗ ɓi ɓìɓan ɓi ù kalii, ù ki yagsag ɓɛyɔ̀m di ɓɛ sɔmɛɛ wɔ̀.

⁵ Wɔ̀lɛ i ki ri lɛ rìɓa ɗis ɗi tì rì ɓìtɛ̀ŋtɛ̀ŋ ɓi ɓum ɗyɛɛ̀ rèresi ɓi kìtɛɛtɛn lɛ Bɛ̀ll à rì lɛ saaɗ, cɛ tì rì min lɛ tì kpaa? Ti kpaa nya lɛ Bɛ̀ll à rì ɗì kìtɛ̀ŋtɛ̀ŋ di à paàzii rì ɓìsi? Ǹkpaa fɔlɔɔ yɛ̀ɛ ɓum ɓɛ ti ɓɛ kpaaghì.

⁶ Ki yin fɔlɔɔ! I Bɛ̀ll àa rì fɔlɔɔ di à rì lɛ à yɔ̀m ziinɛ la?

⁷ I pwàà wɛ̀m a kìki lɛ saaɗ à Bɛ̀ll a konag kì ghɛnɛɛ, fɔlɔɔ a ɓa ɓisuu rikem ɗii, ɓisuucɛ nnɛ ɓɛ ghɛɛ̀sɛɛ tì mɛ̀ kìyɔ̀mi yɛ̀ɛ ǹkìì-kìɓe?

⁸ I ki ri fɔlɔɔ, ɓisuucɛ nnɛ tì yin min lɛ tì kpaa lɛ ti kiki kìɓe di kìrɔɔ kɛɛ kpaŋ yì miì? Fɛlɛ yɛ̀ɛ ɓum ɓɛdɛŋ ɓɛ ɓɛɛ tòtog ɓisi kìɓe ɓi nyoo ɓɛ ti ɓɛ kpaakpaà lɛ ɓìsii ti tì kalàg fɔlɔɔ; ɓumɓɛ̀n ɓɛ ri ki teɗ deɓ yi yi ghɛsɛɛ rì ɓɔ.

Ŋwaà saaɗ à yin nsoò bog ɓi ziinɛ

⁹ Nni la min? Ɓìsi Ɓɛ̀yudɛ̀n tì cee nya ɓìlɔ̀ŋ ɓimbog? Tì cee ɓi ɓyɔ nsoò lɛsàg! Ɓisuulɛ tì mɛ rèsi lɛ kìɓe ki lamii ɓum ɓɛ̀cèm, nsoò Ɓɛ̀yudɛ̀n, nsoò ɓumɓɛ ɓɛ yin Ɓɛ̀yudɛ̀n.

¹⁰ Lɔŋ yɛ̀ɛ ki ri kìkànɛn lɛ: Ŋwaà saaɗ à yin lɔŋ nsoò bog,

¹¹ Ŋwaà ɗyomzɛ̀n kɛ̀ɛ ɓa, nsoò ŋwaà ǹkaakaayɛn Bɛ̀ll kɛ̀ɛ ghɛnɛn. Ɓɛ̀sɛ̀ɛ̀ ɓɛ̀cèm ɓɛ ri ɓɛ̀ ɗimɛn bee, ɓɔɔ̀cèm ɓɛ ɓa ɓɛ̀ɓùùsɛn.

¹² Ŋwaà ǹkìkiyɛn kirɔɔ, kɛ̀ɛ ɓa lɔŋ, nsoò bog.

¹³ Ɓoŋ waà à rì yɛ̀ɛ zɔ̀ŋ ìnɛ ì rì kìbwaŋ, rìlemàg ɗyaa ɗyɛɛ̀ɗi ɓɛ ti ɓɛ pwaàghì ɓum miì, ìrɔg wu nyoo wɛɛ ti wu kpagìì ɓi ɓɛ̀ɓeeɓee ɓaa ɓɛ ŋwɔ̀m.

¹⁴ Myɔm maa mɛ roni rì ɓɛ̀nyɔ̀ma ɓɛ lòlolɛn.

¹⁵ Mɛ̀kòò maa mɛ fɛmɓɛ̀n ɓi rìkɛ̀n ɗi wolɛn mum.

¹⁶ Bee bimiɗ ìnɛ ɓɛ fyee miì, ɓɛ càɗ wɔɔ lɛ, rì cuu, ɗì rìkɛŋ.

¹⁷ Ɓɛ yisɛɛ ɓi ri cɛɓ ki fyòoog.

¹⁸ Ɓɛ yin ɗi ìris wu Bɛ̀ll nsoò lɛsàg ɓi cɛɓ kàà.

¹⁹ Kɔlɛ ɓìsii yii lɛ com kìcèm ki ɓìdɔ̀gsɛna ɓi Bɛ̀ll ɓyɛɛ̀ kpaakpàà, ki ri kì kaliyɛn ɓisuu ɓumɓɛ ɓìdɔ̀gsɛna ɓi lamii, lɛ di mum kɛ̀ɛ ɓa ri kìɓan ki kaliyɛn, rì tì lɛ, di kɛɛ ghɛnɛn lɛ zi bimiɗ ì rì ǹkpìyɛn kiɓan ri Bɛ̀ll.

²⁰ Ɓisuulɛ ŋwàdɛŋ àa ghɛnɛn ɓi lɛ saaɗ ɓi mis mɛ Bɛ̀ll, lɛ à ɓègà ɓìɓan ɓi ɓìdɔ̀gsɛna ɓyɛɛ̀ kpaakpàà; ɓìdɔ̀gsɛna ɓyɛɛ̀ ghɛɛghɛɓsì lɔŋ mum lɛ a yi lɛ à kìi kìɓe.

Mum à ɓiì ɓaà saaɗ à mum ɓi mis mɛ Bɛ̀ll lɛ rìgherɛ̀n ɗi à gherɛɛ Yeesus Kiris

²¹ Wɔ̀lɛ ɓigomìnɛ, Bɛ̀ll à mɛ rèsi ɓisi lannɛ à ti à kìlàg lɛ ti ɓa lɛ saaɗ ɓi mis mii, kɛ̀ɛ̀ ɓìdɔ̀gsɛna; kaàtà à ɓìdɔ̀gsɛna rì ɓɛ̀kpaŋzì-ɓìɓan ɓɛ ɓugà kìɓan kiǹ;

²² kɛɛ ri rìkì ɗi Bɛ̀ll à ti à kìlàg lɛ ɓum ɓɛɛ ɓa lɛ saaɗ ɓi mis mii lɛ rìgherɛ̀n ɗi ɓɛ gherɛɛ Yeesus Kiris, kìɓan kiǹ ki ri ɓisuu ɓum ɓɛ̀cèm ɓɛ ɓɛ gherɛɛ; ǹlànag wu ki yin miì;

²³ ɓisuulɛ ɓɛ̀sɛ̀ɛ̀ ɓɛ̀cèm ɓɛ kighà kìɓe fɔlɔɔ nnɛ ɓɛ yin lɛ ɓɛ wuɓsɛ̀n rìkem ɗi Bɛ̀ll.

²⁴ Wɔ̀lɛ Bɛ̀ll, ɓi coo geesɛ̀n yìì, à ti à ghaasàg ɓɔ ɓum ɓɛ saaɗ, zɛy rì zɛy lɛ Yeesus Kiris ànɛ à mɛ kwèɗ ɓɔ ɓi rìkpàn.

²⁵ Yeesus ànɛ̀n nnɛ Bɛ̀ll à fèkà lɛ a ɓa roànɛ à rì ɓiì sòo ɓiɓe ɓi ɓum rì bwaɓ yii ɓi bee ì rìgherɛ̀n; à kìghà fɔlɔɔ lɛ a resi saaɗ wìì ɓisuulɛ, à càɗkà ɓum kɛ̀ɛ fa ɓɔ deɓ ɓi ɓìɓe ɓi ɓɛ kikìghà abɛ̀y, cààmɛ̀n ki à ɓaghà di à ka kɔn ɓi lɛ bim yiì yɛ̀ɛ resɛ̀n.

²⁶ Nni ɓi cààmɛ̀n ki tì ti ki miì Bɛ̀ll a rèresi saaɗ wìì, lɛ a kɔ̀nkɔn lɛ, ɓɛɛ yi lɛ à rì lɛ saaɗ, à ki kì lɛ ɓum ɓɛ̀cèm ɓɛ ɓɛ gherɛɛ Yeesus, ɓɛɛ ɓa lɛ saaɗ ɓi mis mìì.

²⁷ Nni kìɓan aɗi kɛɛ̀ki ŋwaà rì lɛ à saàsànɛ̀n miì? Kìɓan ki saasanɛ̀n miì ki yin. Ɓisuucɛ? Ɓisuulɛ ɓɛ yii rìɓèŋ ɗi ɓiɗɔ̀gsɛna? Èe èe, lɔŋ ɓisuu righerɛ̀n.

²⁸ Lɛ ɓìsiì fèki lɛ mum à rì ɓi ghɛnɛɛ lɛ à rì lɛ saaɗ ɓi mis mɛ Bɛ̀ll lɛ rìgherɛ̀n, kìɓan kiǹ kɛ̀ kɛɛ̀ ɓa lɛ, rìɓèŋ ɗi à ti à ɓègì ɓìdɔ̀gsɛna.

²⁹ Bɛ̀ll à cɔ̀ɔ̀ghrɛɛ nya lɔŋ Ɓɛ̀yudɛ̀n ɓɔrìɓɔ gìn, à rì girig Bɛ̀ll ɓìlɔ̀ŋ ɓimbog? À rì girig Bɛ̀ll à ɓìlɔ̀ŋ ɓimbog a tààkaà.

³⁰ Ɓisuulɛ Bɛ̀ll à rì lɔŋ bog, nnyɛ̀ɛ ri ɓiì kìi lɛ Ɓɛ̀yudɛ̀n ɓɛɛ ɓa lɛ saaɗ ɓi mis mii lɛ rìgherɛ̀n, nsoò ɓɛ̀roɓɛ ɓɛ yin Ɓɛ̀yudɛ̀n, ɓɛ ɓa girig lɛ saaɗ ɓi mis mii lɛ rìgherɛ̀n.

³¹ Kìɓan kiǹ ki resii nya yɛɛ lɔɔ lɛ tì pisii ìtèɗ wu ɓidɔ̀gsɛna lɛ rìgherɛ̀n? Èe èe, fɔlɔɔ a rì kɔm̀ lɛ tì sììraagh ɓìdɔ̀gsɛna.

« Roimhe

Air adhart »

Bible Society of Cameroon

Lean sinn:

Ceanglaichean taic

Sanasan