RÒMƐŊ 16 - Bafia Nouveau Testament

Ɓìtɔkì ɓi Pol à romi ɓumɓɛ a Rom

¹ Geni wìs a giɓ anɛ lɛ Feɓe innɛ ǹɗeɓsɛɛ yì mìni lɔɔ, à rì dyàkɔ̀nɛs ànɛ ɓi kìseŋi ki Kiris ki a Saŋkire.

² Ghàɓina nyi ɓi ɗii ɗi Kan lèg ànɛ yɛ̀ɛ ɓɛ̀gherɛ̀n ɓɛ ghɛɛ̀sɛɛ kì kìlaagh, ɓì ki ghɛɛghɛɓsì nyi ɓi ɓìɓan ɓìcèm ɓi à rì lɛ à ɓa rì zày ìnɛ lɛ ɓi ghɛɓsi nyi miì, ɓisuulɛ, nyimiɗ a mɛ ghɛɓsi ɓum lɛɛ̀gwey, nsoò mɛ̀ɛmiɗ anɛ.

³ Ɓì tɔkì mɛ̀ Piriska ɓɛɛ̀ Akilas ɓɛ ɓɛ ri ɓɛ̀reŋkàŋ ɓɛm ɓɛ ɓi kìsay ki Yeesus Kiris.

⁴ Ɓɔ yɛɛ mɛɛ̀ ɓɔ̀ɓkà ǹto ɓi rìrùnɛ̀n ɗi cɛɓ kɛ̀m; àa mɛ̀ cɛ̀ncɛm̀ yɛɛ̀ foŋfoŋ kirɔɔ ki ɓɛ kighà mɛ̀ kiǹ, ɓìseŋi ɓi Kiris ɓìcèm ɓi a ɓumɓɛ ɓɛ yin Ɓɛ̀yudɛ̀n ɓyɛɛ̀ kìki girig fɔlɔɔ.

⁵ Ɓì tɔkì girig kìseŋi ki Kiris ki ki ti ki taŋzàg ɓi naa yàà, ɓì tɔkì mɛ̀ Epayinɛt, mum wɛm̀ à ǹɗem, ànɛ à ɓaghà ǹtonto à mum ànɛ a gherɛn Kiris ɓi kìlànà ki zi ki a Azii.

⁶ Ɓì tɔkì Marii ànɛ à tekàkà mɛ̀tɔɓ lɛɛ̀gwey ɓisu win.

⁷ Ɓì tɔkì mɛ̀ Andironikus ɓɛɛ̀ Zyuniyas ɓɛ ɓɛ ri ɓɔɔseŋi ɓɛ̀m ɓɛ ripwìɗ ɓɛ ti ɓaghà rì ɓɔ ɓi naà-zày. Ɓumɓɛ̀n ɓɛ ri ɓumɓɛ ɓɛ̀kɛ̀nì-fìtom ɓɛ Yeesus ɓɛ kuuraagh yɛ̀ɛ mɛ̀nɔ̀ɓɔ̀, ɓɔɔ ki lokà gì kì gherɛɛ Kiris ɗì mɛ̀.

⁸ Ɓì tɔkì mɛ̀ Ampilyatus ànɛ à rì mum̀ wɛm̀ à ǹɗem ɓi rìɓa ɗi tì rì ɓi Kan ɓi ɗùm.

⁹ Ɓì tɔkì mɛ̀ Uriɓɛŋ reŋkaŋ̀ wìs anɛ ɓi kìsay ki Kiris, rì Sitakis à mum wɛm̀ à ǹɗem.

¹⁰ Ɓì tɔkì mɛ̀ Apelɛs, ànɛ à mɛ fa ɓirèmzɛnà ɓi ɓi rìgherɛ̀n ɗi à gherɛɛ Kiris; ɓì tɔkì naa ì ɓum ì Aristobul.

¹¹ Ɓì tɔkì mɛ̀ Erodiyɔŋ à maaseŋi wɛ̀m; ɓì tɔkì ɓumɓɛ ɓi naa ì ɓum ì Narisis, ɓɛ ɓɛ gherɛɛ Kan.

¹² Ɓì tɔkì mɛ̀ Tirifɛn ɓɛɛ̀ Tirifos ɓɛ ɓɛɛ̀ kìki Kan kìsay; ɓì tɔkì girig Pɛrisiidɛ à geni wɛ̀m à giɓ anɛ à ri mɛ̀ ɓi nɗem, nnyɛɛ mɛ say lɛɛ̀gwey ɓisuu Kan.

¹³ Ɓì tɔkì mɛ̀ Rufus ànɛ à rì ŋwaànɛ Kan à ɓɔ̀ngà, rì jɛɛ wìì anɛ à rì girig jɛɛ wɛ̀m.

¹⁴ Ɓì tɔkì lɛ rì Asɛŋkirit, rì Filegɔŋ, rì Ɛrimɛs, rì Patiroɓas, rì Ɛrimɛs rì ɓɔɔseŋi ɓɛ̀m ɓɛmbog ɓɛ ɓi rìgherɛ̀n ɓɛ ɓɛ ri ǹɗaŋ ri ɓɔ.

¹⁵ Ɓì tɔkì Filoloogɛ, rì Zyuli, rì Neree ɓɛɛ̀ geni à giɓ, rì Olɛmpas, rì ɓɛ̀gherɛ̀n ɓɛ̀cèm ɓɛ ɓɛ ri ǹɗaŋ ri ɓɔ.

¹⁶ Tòotògsɛɛna mìni rì mìni, di ɓi lɔ̀ɔlɔ̀rɛ̀n ɓi nkɔ̀nɛ̀n à rìgeni. Ɓìseŋi ɓìcèm ɓi ɓi Kiris ɓi tɔkii yì mìni.

¹⁷ Ɓɔɔsoŋ̀, ǹkalii mìni lɛ, ɓi konag rì ɓumɓɛ ɓɛɛ̀ syòŋsyoŋ yi gasɛ̀n, ɓɛ ki kɛ̀ɛkɛɓtì ɓɛ̀gherɛ̀n tìɓàg, rìkì ɗiǹ ɗyɛɛ̀ yooyogsì rìrèsàg ɗi ɓì tekà. Kɛ̀ ɓi ɓasɛn ɗi mɛ̀kuu mɛ ɓum mɛ̀n.

¹⁸ Ɓisuulɛ àa kìsay ki Kiris ànɛ à rì Kan wìs kɛɛ̀ki ɓɛɛ̀ kìkì, ɓɛɛ̀ sasay lɔŋ ɓisuu mùm maa, fɔɔnnɛ ɓɛ ti ɓɛ yegsàg ɓumɓɛ mɛ̀rem maa mɛ ka yin ɗi ɗyomzɛ̀n ɓi kìɓan ki kiɓe, rì ɓìsyeesyee ɓi jɛ̀ɛ̀, rì fìɗyɛɓi.

¹⁹ Ɓi san ànɛ a lɔ̀ŋkin, ɓum ɓɛ̀cèm ɓɛ yii mɛ̀wog mɛ ɓì rì rì mɔ ɓi ɓɛg ànɛ yɛ̀ɛ Kan, ǹɗem wɛ̀m wɛɛ̀ pupuɓ ri mìni, fɔɔnnɛ kɛɛ̀ kɔ̀nkɔn mɛ lɛ ɓi ɓa rì ɗyomzɛ̀n ɓi rìkì ɗi kirɔɔ, ɓì ki ɓa ɓɛtɛnɛn ɓi rìlɛg ɗi kiɓe.

²⁰ Cààmɛ̀n lɛsàg, Bɛ̀ll ànɛ à ti à falàg fyòoog, à rì ɓiì turii Satàn a mɛ̀kòò min zi. Geesɛ̀n ì Kan wìs Yeesus yɛ̀ɛ ɓa rì mìni.

²¹ Timote ànɛ ti kìki kisay ri nyi nɗaŋ à tògsaghiì mìni, nsoò Lusyus rì Jazɔŋ rì Sosipatɛr ɓɛ ɓɔɔseŋi ɓɛ̀m.

²² Mɛ̀ Tɛrityus, ànɛ ǹkàni kaàtà ànɛ ɓi Kan ɓi ɗùm ǹtogsii mìni.

²³ Gayus ànɛ ǹkɔ̀kɔrii a mɛɛ mii, ànɛ kìseŋi kìcèm ki ti ki taŋzàg a mɛɛ mii a tògsii mìni; Erast ànɛ à rì baŋ-masà ànɛ ɓi bàn, rì geni wìs anɛ ɓi rìgherɛ̀n ànɛ lɛ Karitus, ɓɛ togsii mìni.

²⁴ Geesɛ̀n ì Kan wìs Yeesus Kiris yɛ̀ɛ ɓa rì mìni ɓɛ̀sɛ̀ɛ̀ ɓɛ̀cèm. Ààmɛ̀n.

Sugtag à bɔgsì

²⁵ Roànɛ à rì rì ìtèɗ wulɛ à sììrag mìni lɔŋ yɛ̀ɛ Syeesyee à Ɓɔlɛ ànɛ mɛ̀ɛ nghaaghagsì di nlàalamɓɛ̀n Yeesus Kiris à rì, rì lèg ànɛ yɛ̀ɛ tì tekà fèg à Bɛ̀ll ànɛ à ɓaghà ǹnyamɛn fiɗyàɓ fikɔ̀ɔ̀,

²⁶ kìɓan kifog nnyɛɛ mɛ rèsɛn ɓigomìnɛ ɓi ɓìɓan ɓi ɓɛ̀kpaŋzì-ɓìɓan ɓɛ kangà, lɔŋ yɛ̀ɛ Bɛ̀ll à fìɗyàɓ fikɔ̀ɔ̀ a tɔkà lɛ kɛɛ kilɛ̀n, fèg ànɛ̀n innɛ ɓɛ mɛ rèsi ɓilɔ̀ŋ ɓìcèm lɛ ɓyɛɛ gherɛn Bɛ̀ll ɓi ki kì nyi mɛ̀wog.

²⁷ Bɛ̀ll ànɛ à rì ŋwaà ɗyomzɛ̀n cɛ̀ncii, a teɗ rìkem fìɗyàɓ fikɔ̀ɔ̀ lɛ Yeesus Kiris. Ààmɛ̀n.