RÒMƐŊ 15 - Bafia Nouveau Testament

Ngherɛ̀n a puɓsi geni ǹɗem à cee lɛ a puɓsi wuŋkii

¹ Ɓìsi ɓɛ tì rì rì ìtèɗ ɓi rìgherɛ̀n tì ghɛ̀ɛ̀sɛɛ kì ghɛɓsii ɓɛroɓɛ ɓɛ ri kɛ̀ɛ̀ ìtèɗ, lɛ ɓɛ̀ kɛɛ̀ càrɛn ɓi-ɓwɛɗ waa; tyɛ̀ ki kaa lɛ ti ki ɓìɓan ɓi ɓyɛɛ puɓsi ɓìsi nɗem.

² Mum ǹcèm ànɛ ɓi ɓìsi à ghɛ̀ɛ̀sɛɛ kì puɓsii geni nɗem ɓi kìɓan ki ki rɔɔtɛɛ, lɛ a siìrag nyi ɓi rìgherɛ̀n.

³ Ɓisuulɛ Kiris à kaaghà ɓi com ki lɛ kɛɛ puùpùɓsì nyi ǹɗem, wɔ̀lɛ lɔŋ yɛ̀ɛ ki ri kì kànɛn lɛ: Tìfena ti ɓumɓɛ ɓɛɛ̀ feefengì wɔ̀ ti syɔngà rì mɛ̀.

⁴ Kɔlɛ ɓìɓan ɓìcèm ɓi ɓɛ lokà kìkàni, ɓi kanɛ̀ngà ɓisuulɛ ɓyɛɛ fa ɓìsi ɗyomzɛ̀n, lɛ di ti ɓa rì dyàɓɛn ɓi bee ì rìnìɗ ɗi nɗem, rì rìfɔɔsì ɗi nɗem ɗi mɛ̀kànì mɛ ti mɛ falàg.

⁵ Bɛ̀ll ànɛ a falag kinìri ki nɗem, à ki fɔɔsag mɛrem, à fa mìni ìtèɗ wulɛ ɓi woòghrɛn ɓi nyìinyìm wiǹ yɛ̀ɛ kɛɛ̀ kɔ̀ngi Yeesus Kiris.

⁶ Lɛ di mìni ɓɛ̀sɛ̀ɛ̀ ɓɛ̀cèm ɓi ɓasɛn jɛ̀ɛ̀ bog lɛ ɓi kemzi Bɛ̀ll ànɛ à rì Seŋi Kan wìs Yeesus Kiris.

⁷ Fɔɔnnɛ ghàaghàɓɓɛɛna mìni rì mìni rì syeesyee à nɗem fɛlɛ yɛ̀ɛ Kiris à ghàɓkà mìni ɓisuu rikem ɗi Bɛ̀ll.

Kiris à rì ǹkìì-kìsay a ɓum ɓɛ̀cèm

⁸ Mɛ̀ ǹkalii mìni lɛ Kiris à ti ǹkìì-kìsay a Ɓɛ̀yudɛ̀n lɛ a resi lɛ Bɛ̀ll a roozag mɛkàg mii, à ki sììrag mɛkàg mɛ à faghà ɓɛ̀seŋi ɓaa ɓɛ ɓɛsɛ̀ɛ̀.

⁹ Ɓi san ànɛ a ɓumɓɛ ɓɛ yin Ɓɛ̀yudɛ̀n, ɓɔɔ̀ keekemzì Bɛ̀ll ɓisuu nɗem wu nyìinyìg wu à rì rì wɔ lɔŋ yɛ̀ɛ ki ri kìkànɛn lɛ: Ɓisuu kiɓan kiǹ nnɛ ǹɗi wɔ̀ ɓiì kemzii ɓi nyìinyìm à ɓìlɔ̀ŋ ɓi zɛy ǹki ghàɓ tyem ti tyɛɛ fa wɔ̀ rìkem.

¹⁰ Ki ri tì kìkaliyɛn lɛ: Mìni ɓìlɔ̀ŋ ɓimbog nyààrɛɛna ǹɗaŋ ri kìlɔ̀ŋ kii.

¹¹ Rì tì lɛ: Mìni ɓìlɔ̀ŋ ɓìcèm ɓɔgsiina Kan, mɛ̀kuu mɛ ɓum mɛ̀cèm mɛɛ fa nyi rìkem.

¹² Ezayii à kpaa girig lɛ: Fyàn fi Isayii fi ri ɓiì yùu, fi pɛsɛ̀n aɗyoo lɛ fyɛɛ lami ɓìlɔ̀ŋ ɓi zɛy, ɓìlɔ̀ŋ ɓiǹ ɓi ki foŋ dyàɓɛn yaà ɓi nyi.

¹³ Bɛ̀ll ànɛ à ti à falàg ɓum dyàɓɛn ɓi nɗem a roòzi mìni lɛ rì kìnyàà, rì fyòoog ɓi nɗem lɛ pisa ɓi rìgherɛ̀n, di dyàɓɛn yiǹ yɛ̀ɛ roǹ ì sòsòɓ rì ìtèɗ wu Kitɛntɛ̀ɛ̀n ki Nghày.

Kìsay ki Pol, rì rìkɛ̀ɛ̀ ɗi a ɓeɓeg lɛ a kɛǹ a Rom

¹⁴ Ɓɔɔsoŋ̀, ɓi kìɓan ki ki seesee mìni, mɛ̀ɛmiɗ ǹ-yii kɔɔ̀kɔɔ̀ à rìyi lɛ, ɓì rì ɓɛ̀ronɛn ɗi kìrɔɔ-ǹɗem lɛ pisa, ɓi ki konag ki yiì ɓìɓan ɓi mum à ghɛ̀ɛ̀sɛɛ lɛ a yi; ɓì ki rì rì ìtèɗ wulɛ ɓì reèrèɓɓɛ̀n mìni rì mìni.

¹⁵ Nsoò fɔlɔɔ mɛ̀ ǹkàniì mìni rì kìghɛɛsii lèg àdɛŋ, lɛ nghem̀zi mìni mɛ̀rem ɓi ɓìɓan ɓi ɓì ɓaghà di ɓyàa yilàg, mɛ̀ɛ ǹkàniì fɔlɔɔ, lɛ geesɛ̀n ìnnɛ Bɛ̀ll à rèsìghà mɛ̀,

¹⁶ lɛ mɓa ǹkìì-kìsay a Yeesus Kiris ɓisuu ɓumɓɛ ɓɛ yin Ɓɛ̀yudɛ̀n, fɔɔnnɛ nɗooroòzì kìsay ki righagsì ɗi Syeesyee à Ɓɔlɛ à Bɛ̀ll, kɛɛ ri kìsay ki ki ri kìtɛnɛn, lɛ di ɓumɓɛ ɓɛ yin Ɓɛ̀yudɛ̀n ɓɛɛ ɓa fɛlɛ yɛ̀ɛ rìfa ɗi ɗyɛɛ̀ rɔɔghi Bɛ̀ll; ɗyɛɛ̀ɗi Kìtɛntɛ̀ɛ̀n ki Ǹghay ki mɛ tɛɛ̀zì.

¹⁷ Ǹɗì min lɛ ǹsanɛ̀n kìsay ki nkìki Bɛ̀ll ɓi Yeesus ɓi ɗùm.

¹⁸ Ɓisuulɛ ǹ-yin lɛ ǹfèg kìɓùŋi kìɓan kidɛŋ ki ki yin ki Kiris yɛɛ kighà di à faa mɛ̀ ìtèɗ wulɛ nki, lɛ di a syoŋ yì ɓumɓɛ ɓɛ yin Ɓɛ̀yudɛ̀n lɛ ɓɛɛ ki Bɛ̀ll mɛ̀wog. À kìghà kìɓan kiǹ lɛ rì ɓi ɓìtòkì, rì ɓi ɓìɓan ɓi à kìkìghà,

¹⁹ rì ìtèɗ wu dàm rì ɓɛ̀koŋnyoo ɓɛ ɓiɓan, ɓi-tèɗ wu Kitɛntɛ̀ɛ̀n ki Nghay. Fɔɔnnɛ mɛ̀ɛ nghagsii Syeesyee à Ɓɔlɛ à Kiris lɛɛ̀gwey, à tumɛ̀n a Yorisalɛm à kɛ̀n kì kpaŋì a Ilirii.

²⁰ Ǹfalɛ̀ngà mɛ̀ɛmiɗ rikem ɗi lɛ nkakali Syeesyee à Ɓɔlɛ lɔŋ ɓi jàŋ yi ɗii di Kiris ɗi ɓaghà di ɗi ka ɓuŋ̀ɗɛn ɓi, lɛ kɛ̀ɛ nki ɓa lɛ ǹtoŋ ɓi jàŋ inɛ ŋwaàdɛŋ à ɓaghà di à mɛ yàghɛn kitoŋ, wɔ̀lɛ lɔŋ yɛ̀ɛ ki ri kìkànɛn lɛ:

²¹ Ɓɛ̀roɓɛ à kalɛ̀ngà ɓi a lɔ̀ŋkaa ɓɛ ri nyi ɓiì ghɛɛ̀, nsoò ɓɛ̀roɓɛ ɓɛ wokà ɓi di ɓɛɛ̀ kakali kiɓan kii, ɓɛ ri ɓiì woògh.

²² Kìɓan kiǹ kɛ yaà rèrèg mɛ̀ rìyù ɗi a lɔ̀ŋkin.

²³ Nni ɓigomìnɛ, m̀mɛ lègsi kisay kɛm̀ ɓi ɓìlànà ɓi zi ɓi fɛ. Ki ti bèg lɛɛ̀gwey yɛ̀ɛ maà ɓeɓèg lɛ n-yu a lɔ̀ŋkin; yɛ̀ɛ ǹɗi ɓa ɓi rìkɛ̀n a Kpanya,

²⁴ ɓisuulɛ ǹɗì rì dyàɓɛn lɛ ǹɗi ghɛn mini ɓi rìkɛ̀nkɛ̀n, ɓì ki ghɛɓsi mɛ lɛ nkpaŋ wɔɔ di m̀mɛ ka wog gàɓ ì kìnyàà ɓi cààmɛ̀n ki nɗi ghagsi a lɔ̀ŋkin.

²⁵ Nni wɔ̀lɛ ɓi cààmɛ̀n ki, ǹkɛ̀ɛ a Yorisalɛm ɓisuu fitom fi fi seesee ɓɛ̀gherɛ̀n ɓɛ wɔɔ.

²⁶ Ɓisuulɛ ɓɛ̀gherɛ̀n ɓɛ a Masedwan rì ɓɛ̀roɓɛ a Akayi ɓɛ nghɛɛ kìrɔɔ lɛ ɓɛɛ syɔɔ̀ mɔ̀ɔ̀mi ɓisuu ɓumɓɛ ɓɛ ri nyìinyìg ɓi nyìinyìm à ɓɛ̀gherɛ̀n ɓɛ a Yorisalɛm.

²⁷ Lɛ ɓɔmiɗ ɓɔ yɛɛ reǹgà kìɓan kiǹ, ki ki ghɛ̀ɛ̀sɛn fɔlɔɔ lɛ, i ɓumɓɛ ɓɛ yin Ɓɛ̀yudɛ̀n ɓɛ ti rì gàɓ ɓi ɓìrɔɔ ɓi ɓi nghay ɓi ɓi ɓaghà ɓisuu Ɓɛ̀yudɛ̀n, ɓɛ ghɛɛ̀sɛɛ girig ɓɔ kì ghɛɓsii cààmɛ̀n ki ɓɛ ri rì mɛ̀tɔɓ mɛ kisoghà.

²⁸ Ǹɗi ɓa lɛ, i màa kì kiɓan kiǹ, ǹfa ɓɔ com ki ki ri kpaŋ ɓi syɔ̀ɔ̀ ànɛn, fɔɔnnɛ ǹɗì min ɓiì kɛ̀ɛ a Kpanya, ǹki fyee yi a lɔ̀ŋkin ɓi rìkɛ̀nkɛ̀n.

²⁹ Ǹ-yii lɛ, yɛ̀ɛ ǹɗi yù a lɔ̀ŋkin, ǹɗi yuiy rì ɓɛ̀mààgh ɓɛ̀cèm ɓɛ yɛ̀ɛ Kiris.

³⁰ Ɓɔɔsoŋ̀, mɛ̀ ǹtɔɔgh mìni ɓisuu Kan wìs Yeesus Kiris, rì ɓisuu nkɔ̀nɛ̀n ànɛ Kìtɛntɛ̀ɛ̀n ki Nghay ki ti ki falàg lɛ, ɓi lem̀ mɛ̀ ɓyàg ɓi zàà ìnɛ ǹɗì miì, rì bɔ̀ŋzɛ̀n yi ɓì rì ɓiì ɓɔ̀ɔɓɔŋ̀zì Bɛ̀ll ɓisu wɛ̀m.

³¹ Di fɔɔnnɛ nghɛɓ ɓumɓɛ ɓɛ yin ɓɛ kìristɛn a Zyude, rì tì lɛ ɓɛ̀gherɛ̀n ɓɛɛ ghaɓ gɛɓsɛ̀n ìnɛ ǹɗì ɓiì kɛ̀ɛ ri yɔ̀ a Yorisalɛm rì kìnyàà.

³² Fɔlɔɔ nnɛ ǹɗì ɓiì kpaŋì a lɔ̀ŋkin ɗi kìnyàà di Bɛ̀ll à kɔ̀ni, ǹki fɔɔsɛn a lɔ̀ŋkin lèg àdɛŋ.

³³ Bɛ̀ll à fyòoog a ɓa rì mìni ɓɛ̀sɛ̀ɛ̀ ɓɛ̀cèm. Ààmɛ̀n.