RÒMƐŊ 14 - Bafia Nouveau Testament

Ɓɛ̀tèteɗ rì ɓìkpɔ̀gkpɔ̀g ɓi ɓi rìgherɛ̀n

¹ Ghàɓkiina ŋwaànɛ à rì lɛ kpɔ̀gkpɔ̀g ɓi rìgherɛ̀n, kɛ̀ ɓi nyolɛn ri nyi ɓi mom̀zɛ̀n mɛ à rì rì mɔ ɓi kìɓan ki righerɛ̀n.

² Rìgherɛ̀n ɗi ŋwaàdɛŋ ɗi ri lɛ ɗi tinì nyi lɛ a ɗiɗi ɓyom ɓìcèm kɔlɛ ŋwaàmbog ànɛ rìgherɛ̀n ɗii ɗi teèsɛɛ ɓi, nyii ɗiɗì lɔŋ lɛ ɓìnyàa.

³ Fɔɔnnɛ ŋwaànɛ a ɗiɗi ɓyom ɓìcèm à ghɛ̀ɛ̀sɛɛ ɓi lɛ à sɛɛtì roànɛ à yin ɓiì ɗiɗii, roànɛ à ki yin ɓiì ɗiɗii ɓyom lɛ ɓus ɓùs ɓus à ghɛ̀ɛ̀sɛɛ ɓi lɛ à sɛɛtì ŋwaànɛ a ɗiɗi ɓyom ɓìcèm ɓisuulɛ Bɛ̀ll à ghàɓkà ŋwaànɛ a ɗiɗi ɓyom ànɛ̀n.

⁴ Wɔ̀ɔ̀ rì ghɛn anɛ ù rì lɛ ù yɔ̀m ǹkìì-kìsay a ɓɛ̀gan? Àa soo rì ǹsììrɛn ɓi kìsay kii, àa soo kpìi kìɓan kiǹ ki seesee masà wìì, nni à rì ɓiì ki sììrɛɛ ɓi kìsay kii kɛ̀ɛ kpì, lɛ Kan à rì rì ìtèɗ wulɛ à lènlèm nyi.

⁵ Ŋwaàdɛŋ à ti à ghɛngì lɛ ɓɛ̀ŋwos ɓɛdɛŋ ɓɛ ceerɛɛ rì ɓɛm̀bog, ŋwaàmbog nyii ghɛngì ɓɛ̀ŋwos ɓɛ̀cèm lɛ ɓɛ ri lɔŋ com kìfog, mum ǹcèm à ghɛ̀ɛ̀sɛɛ kì konaagh ki yiì com ki a fèfeg ɓi nɗem wìì.

⁶ Ŋwaànɛ a ghaghasi gòn a kìki fɔlɔɔ ɓisuu Kan, ŋwaànɛ a ɗiɗi ɓyom ɓìcèm a ɗiɗi ɓyɔ ɓisuu Kan, lɛ à ti à falàg Bɛ̀ll ɓìtògsɛ̀n; ŋwaànɛ à ti kɛ̀ɛ ɗi, à ti kɛ̀ɛ ɗi ɓisuu Kan, nyi girig à ti à falàg Bɛ̀ll ɓìtògsɛ̀n.

⁷ Kɛ̀ɛ̀ ŋwaàdɛŋ ànɛ ɓi ɓìsi ànɛ à ti à ghɛɓkì ɓi kìrɔɔ kii ki nyimiɗ, kɛ̀ɛ̀ roànɛ à ti à wulàg ɓisuu nyimiɗ.

⁸ Fɔlɔɔ yɛɛ lɛ i ti ghɛghɛ̀ɓ, ti ghɛghɛɓ ɓisuu Kan, i tì ki wii, tì wii ɓisuu Kan, nni fɔɔnnɛ tyàa soo ghɛghɛ̀ɓ, tyàa ki soo cuu, tì wooghrɛɛ lɔŋ ɗi Kan.

⁹ Lɛ Kiris à wughà, à ki ghemɓɛn lɛ di a ɓa Kan ànɛ à làmii lɛ rì ɓìloŋ rì ɓum ɓɛ cem.

¹⁰ Nni wɔ̀ɔ yɔmgi goni ɓisuucɛ? Nsoò lɛ wɔ̀ɔ sɛɛtag goni lɛ la? Ɓìsi ɓɛ̀sɛ̀ɛ̀ ɓɛ̀cèm tì rì ɓiì rɛlii ɓɛyɔ̀m ɓi kìkpana ki ɓɛyɔ̀m ki Bɛ̀ll.

¹¹ Lɛ ki ri kìkànɛn lɛ: Kan a kpaaghi lɛ: Ǹɗì cem, ɓum ɓɛ̀cèm ɓɛ ri mɛ̀ ɓiì ɓaàgh mɛ̀ɗu asu, mum bimiɗ à làmɓɛ̀n jɛ̀ɛ̀ aɗyoo lɛ, Bɛ̀ll a teɗ rìkem.

¹² Fɔlɔɔ nnɛ mum ǹcèm ànɛ ɓi ɓìsi nyimìɗ yɛɛ ɓiì rèsii Bɛ̀ll cɛɓ ki à ghɛɓkà.

¹³ Tì ghɛ̀ɛ̀sɛɛ min ki càri kiɓan ki rifiìfìɓɓɛ̀n ɗì rìfaàfàlɛ̀n, ɗi zɔɔ ɓi nyìinyìm wìs; ǹɗɛli wu ɓì ghɛ̀ɛ̀sɛɛ kì terì wu ri lɛ; kɔ̀ɔ kì kiɓan ki ki ri lɛ ki kɛɓtì goni fìɓàg nsoò lɛ ki tinì nyi lɛ a kpi ɓi kìɓe.

¹⁴ Mɛ̀ ǹ-yii kɔɔ̀kɔɔ̀ à rìyi lɛ ɓi Yeesus Kiris com kidɛŋ ki yin ɗi kìsyeg ɓi kɔmiɗ, wɔ̀lɛ i ŋwaà ghɛɛ lɛ com kidɛŋ ki ri rì kìsyeg, com kìn ki ghay lɛ ki ti rì kìsyeg ɓisu wìì.

¹⁵ I ù ɓeɓsii goni ǹɗem ɓi rìkuu ɗi ɓiɗilàg ɗidɛŋ ɗi u ɗiɗi, di ù rèsii tì ɓi ǹkɔ̀nɛ̀n yɛ̀ɛ ki ghɛɛ̀sɛɛ; ù ghɛ̀ɛ̀sɛɛ kì kɔ̀rii ɗyomzɛ̀n lɛ kɔ̀ɔ kì lɛ, ŋwaànɛ Yeesus Kiris à wughà ɓisu wii a ɗyaŋ̀ lɛ kìɓan ki ɓiɗilàg.

¹⁶ Com ki mìnii ghɛɛ lɛ ki ri lɛ syeesyee, ki ghɛɛ̀sɛɛ ɓi ki ɓaà com ki kɛɛ ki lɛ ɓi totog ɓɛ̀geni ɓin kiɓe miì.

¹⁷ Ɓisuulɛ kìlɔ̀ŋ ki Bɛ̀ll ki yin kiɓan ki riɗi rì rìnɔ, ki ri lɛ rì saaɗ rì fyòoog, rì kìnyàà ɓi Kìtɛntɛ̀ɛ̀n ki Nghay ki ti ki falàg.

¹⁸ Ŋwaànɛ a kìki Kiris kìsay ɓikòò wìn, Bɛ̀ll a woki kirɔɔ rì nyi, ɓum ɓɛ ki sɛki nyi.

¹⁹ Fɔlɔɔ nnɛ tì ghɛ̀ɛ̀sɛɛ min kikaà lɛ ti ki ɓìɓan ɓi ɓyɛɛ̀ kìki lɛ fyòoog a ɓa, ɓi ki fa ti ɓisi ɓɛ̀sɛ̀ɛ̀ ɓɛ̀cèm ìtèɗ ɓi rìgherɛ̀n.

²⁰ Kɔ̀ɔ yogsi kisay ki Bɛ̀ll lɛ kìɓan ki ɓiɗilàg. Ki ri lɔŋ saaɗ lɛ ɓìɗilàg ɓìcèm ɓi ri kɛ̀ɛ̀ kìsyeg, wɔ̀lɛ ki ɓeɓtɛɛ lɛ mum a ɗi com di kìɓan kiǹ ki ri lɛ ki kɛɓtì ɓum ɓɛdɛŋ fìɓàg.

²¹ Kìɓan ki ki ri syeesyee à kìɓan ki ri lɛ, kɔ̀ɔ ɗi ɓyɛn, kɔ̀ɔ nɔ mɛrɔ̀g, ù lɛg com ki ki ri lɛ ki kɛɓtì goni fìɓàg.

²² Fèg ànɛ rìgherɛ̀n ɗyɔɔ ɗi faa wɔ̀ ɓi kìɓan kiǹ, ɓeŋa nyi ɓisu wɔɔ, ɓi mis mɛ Bɛ̀ll. Mààgh rì ŋwaànɛ à ti kɛ̀ɛ̀ falɛn nyimiɗ zɔɔ ɓi cààmɛ̀n ki à teri ǹɗɛli lɛ a ki kìɓan.

²³ Wɔ̀lɛ i ŋwaà ɗii ɓìɗilàg ɓidɛŋ rì ìris ɓi nɗem, Bɛ̀ll à fa nyi bɛ̀lɛn ɓisuulɛ à kìi ɓi kiɓan kiǹ ɗì rìgherɛ̀n ɓi nɗem; fɔɔnnɛ kìɓan kicèm ki mum à rì lɛ à kì kɛ̀ɛ̀ rìgherɛ̀n ɓi nɗem ki ri kìɓe.