RÒMƐŊ 13 - Bafia Nouveau Testament

Mɛ̀wog mɛ ɓum ɓɛ ghɛɛ̀sɛɛ kì kìi ɓɛ̀làmì-kìlɔ̀ŋ

¹ Mum ǹcèm à ghɛɛ̀sɛɛ kìwoògh ɓɛ̀làmì ɓɛ ɓɛɛ̀ kɛ̀ɛkɛɛ̀sì kìlɔ̀ŋ ɓisuulɛ rìlàmì ɗi ti ɗyɛ̀ kɛɛ̀ kpì yi ǹlɛŋlɛŋ̀ di Bɛ̀ll à faa ɓi, rì tì lɛ, Bɛ̀ll yɛɛ rɛsàkà ɓɛ̀làmì ɓɛ̀cèm ɓɛ ɓɛ ri ɓi ziinɛ.

² Kìɓan kiǹ kɛɛ̀ki, mum ànɛ à ɓiì ramì wɛ̀y ɗi rìlàmì, a yi lɛ à rami wɛ̀y ri rìkɔ̀n ɗi Bɛ̀ll, nni ɓɛ̀roɓɛ ɓɛ ri fɔlɔɔ ri ǹtoòtèɗ, ɓɛ ri ɓiì syoŋiì ɓɔmìɗ ǹcɛ̀m ɓi nyòò.

³ Ɓɛ̀làmì ɓɛ yin ɓumɓɛ lɛ mum à nìŋ di a kìki ɓiɓan ɓi syeesyee, lɔŋ ɓumɓɛ ɓɛɛ̀ kìki ɓiɓan ɓi ɓeɓtɛn, ɓɛɛ ti ɓɛ risàg ɓɔ. I ù kɔ̀ni lɛ kɔ̀ɔ ririsi rilàmì, ù ghɛ̀ɛ̀sɛɛ kì kìkii ɓiɓan ɓi syeesyee fɔɔnnɛ rìlàmì ɗi sɛg wɔ̀.

⁴ Rìlàmì ɗyɛɛ̀ kìki Bɛ̀ll kìsay lɛ ɗyɛɛ toni wɔ̀ lɛ u ki kìrɔɔ, kìɓan kifog i ù kìi kìɓe, ù ghɛ̀ɛ̀sɛɛ ɗyɔ kì risii lɛ àa zɛy nnɛ ɗi ri rì ìtèɗ wulɛ ɗyɛɛ pɔnɔ̀sag ɓum; ɗyɛɛ̀ kìki kisay ki Bɛ̀ll lɛ ɗyɛɛ resi bim yiì ɓi ɓɛg ànɛ ŋwaànɛ à kìi kìɓe.

⁵ Kìɓan kiǹ kɛɛ̀ki ki ghɛɛ̀sɛɛ lɛ mum a ki ɓɛ̀làmì mɛ̀wog, àa lɔŋ ɓaà lɛ yɛ̀ɛ a ririsi ribaŋì ɗi Bɛ̀ll, kìɓan kifog à ghɛ̀ɛ̀sɛɛ ɓɔ kì kìi mɛwog rì nɗem wulɛ com ki à ghɛ̀ɛ̀sɛɛ kì kìi kɛɛ ri.

⁶ Ɓisu wìn miì nnɛ ɓì ti ɓì peeghì girig ɓɛ̀làmpoŋ̀; ɓumɓɛ ɓɛ ti ɓɛ tekì làmpoŋ̀ ɓɛ ri ɓɛ̀roɓɛ Bɛ̀ll à faghà ìtèɗ wulɛ ɓɛɛ kilag kìɓan kiǹ yɛ̀ɛ ki ghɛɛ̀sɛɛ.

⁷ Lèɓkiina mum ǹcèm com ki ki ghɛɛ̀sɛɛ rì nyi, ɓì peeghì làmpoŋ̀ rì ŋwaànɛ a tɔtɔg mini làmpoŋ̀, ɓì peeghì tikis rì ǹtɔɔ̀gh-tikis, ɓì risàg ɓɛ̀roɓɛ ɓì ghɛ̀ɛ̀sɛɛ kì risii, ɓì ki nyaasag ɓɛroɓɛ ɓì ghɛ̀ɛ̀sɛɛ kì nyaasii.

Mum à ghɛ̀ɛ̀sɛɛ kì keesii romum

⁸ Kɛ̀ ɓi ɓa mum rì pon i ki yin lɛ pon anɛ lɛ ɓi kɔnɛn mìni rì mìni; lɛ ŋwaànɛ à keesii romum, à mɛ roozi ɓidɔ̀gsɛna yɛ̀ɛ kɛɛ̀ kɔ̀nkɔ̀n.

⁹ Ɓisuulɛ ɓìdɔ̀gsɛna ɓi lɛ: Kɔ̀ɔ̀ kì fisɔ̀mɔ̀g, kɔ̀ɔ wey mum, kɔ̀ɔ yii com ki mum, kɔ̀ɔ lem com ki mum, rì ɓimbog ɓìcèm, ɓi ri ɓì ɓasɛn ɓi jɛ̀ɛ̀ ìnɛ lɛ: Ù rì ɓiì keesii romum ànɛ wɔ̀ jàŋbog yɛ̀ɛ wɛ̀ɛmìɗ.

¹⁰ Ŋwaànɛ à rì rì ǹkɔ̀nɛ̀n à ti kɛ̀ɛ kì romum kìɓe, ǹkɔ̀nɛ̀n à rì syeesyee à rìroòzì ɗi ɓidɔ̀gsɛna.

¹¹ Lɛ yɛ̀ɛ ɓì yii cààmɛ̀n ki tì rì miì ki, cààmɛ̀n ki ɓi ghemɓɛn min ɓi fìlo kɛɛ ti lɛ, ɓisuulɛ gòri ì ti ɓìsi jàŋbog ɓigomìnɛ, à cee lèg ànɛ ì ɓaghà ɓi cààmɛ̀n ki tì gherɛ̀ngà.

¹² Iru waa rim, duri i kɛ̀ɛ̀kɛ̀ɛ̀ yì, nni ti riniina ɓìɓan ɓi birìm, tì wotì ɓyom ɓi ribaŋì ɓi mum à rì lɛ à ɗùù rì ɓyɔ ɓi kìtɛɛtɛn.

¹³ Tì ghɛ̀ɛ̀sɛɛ kì ghɛɓì cɛɓ ki ki ri lɛ tɛntɛ̀ɛ̀n ki ki ghɛɛ̀sɛɛ rì kìtɛɛtɛn ki ŋwos, tì womzɛ̀n ɗì dili, rì kìɓan ki riceesì ɗi rinɔ ɗi mɛrɔ̀g ɗì tìsɔ̀mɔ̀g, rì cɛɓ ki sààsaa, rì ɓɛ̀paàzì, rì yàaka.

¹⁴ Kìɓan kifog, waatɛɛna Kan Yeesus Kiris kɛ̀ ɓi càɗ mɛrem min lɛ mɛɛ ɓɔm̀ɓɔm ɓìɓan ɓi ɓi mɛ̀mùù, lɛ di ɓi kaàkaa rìyɛ̀y ɗi ɓiɓan ɓiǹ.