RÒMƐŊ 11 - Bafia Nouveau Testament

Bɛ̀ll à màagh ɓi Isirayɛl à kìlɔ̀ŋ kii

¹ Nni ǹtɔɔgh lɛ, Bɛ̀ll àa m̀màagh nya kìlɔ̀ŋ kii? Èe èe, à màagh ɓi kɔ. Ɓisuulɛ, mɛ̀ ǹɗì girig kìyalì ki a Isirayɛl, dòò yì Abiraham ɓi rìpwìɗ ɗi Bɛŋzyamɛŋ.

² Bɛ̀ll à màagh ɓi kilɔ̀ŋ kii ki à lokà kì ɓɔ̀ni abɛ̀y. Ɓì yii ɓi yɛ̀ɛ ki ri kìkànɛn ɓi jàŋ inɛ Eli à sɔmɛɛ Isirayɛl rì Bɛ̀ll, à kpaa lɛ:

³ Kan, ɓɛ mɛ kì lɛ, ɓɛ cuusì ɓɛ̀kpaŋzì-ɓìɓan ɓɔɔ, ɓɛ waàghì jàŋ yi ɓɛ ti ɓɛ tɔngì ɓyom ɓi ɓɛɛ ɓɔgsi wɔ̀ rìɓyɔ miì, lɔŋ mɛ̀ cɛ̀ncɛm yɛɛ mɛ rɔ̀ɓ, ɓɛɛ̀ ki kaakaa lɛ ɓɛɛ wey mɛ̀.

⁴ Nni rìɓàg ɗi Bɛ̀ll ɗi ri lɛ cɛ? Ɗi ri lɛ: Mɛ̀ɛ m̀mɛ rɔ̀tɛn ɓum ɓɛ̀tɔɔsìm taàɓɛ̀ɛ̀ lɛ ɓɛɛ ɓa ɓɛŋkɛ̀m, ɓumɓɛ̀n ɓɛɛ mɓaagh ɓi mɛɗu ɓi zi lɛ ɓɛɛ ɓɔgsi Baal.

⁵ Fɔlɔɔ nnɛ ɓi cààmɛ̀n ki tì rì ki miì, maa gàɓ à ɓum àdɛŋ ànɛ Bɛ̀ll à ɓɔ̀ngà ɓi geesɛ̀n yìì, à rì girig wɔɔ.

⁶ À ɓɔ̀ngà ɓɔ lɛ geesɛ̀n yìì, àa lɛ mɛ̀kìkìì maa, i kɛɛ ɓa lɛ mɛ̀kìkìì maa, di geesɛ̀n ì Bɛ̀ll ì yin kɔɔ̀kɔɔ̀ à geesɛ̀n.

⁷ Nni la min? Com ki Isirayɛl à kaakààghà, à fɔ̀ngà ɓi kɔ, wɔ̀lɛ ɓɛ̀roɓɛ Bɛ̀ll à ɓɔ̀ngà ɓɛɛ fɔngà com kiŋcèm, ɓɛ̀ro ɓɛm̀bog ɓɔɔ ɗiŋì ɓɛ̀lɔg ɓi ǹɗeèghreŋi wu Bɛ̀ll,

⁸ lɔŋ yɛ̀ɛ ki ri kì kànɛn lɛ: Bɛ̀ll à faghà ɓɔ Ǹghay wu laalalɛ̀n, à kì lɛ mis maa mɛ̀ kɛɛ̀ ghɛnɛn, mɛ̀reè maa mɛɛ ɓa rì ɓɛ̀lɔg à kpaŋ gɛɛ̀nɛ.

⁹ Davit à kpaa girig lɛ: Teɓèrè wàà a ɓìɗilàg à ghɛ̀ɛ̀sɛɛ kì ɓaà fìram fi fi ri fìgheŋdiyɛn ɓisu waa, nsoò lɛ dam ìnɛ ì ghɛ̀ɛ̀sɛɛ ɓɔ kì wɔɔsii, rì com ki kɛɛ kɛɓti ɓɔ fìɓàg, lɛ ɓɛɛ teɗ mɛ̀lèɓ,

¹⁰ mis maa mɛ ghɛɛ̀sɛɛ kì sigtɛɛ birìm lɛ ɓɛ̀ kɛɛ̀ ghɛnɛn ti; kìya lɛ ɓɛɛ ɓa mɛ̀laŋ cààmɛ̀n kìcèm.

Gòri ì ɓumɓɛ ɓɛ yin Ɓɛ̀yudɛ̀n, rì rìlɔ̀ɔ̀ghrɛ̀n ɗi Isirayɛl à ɓiì siitɛɛ ki lɔ̀ɔ̀ghrɛɛ mɛrèm

¹¹ Nni ǹtɔɔgh lɛ, Ɓɛ̀yudɛ̀n ɓɛ kɛɓtɛ̀ngà nya lɛ ɓɛɛ kpi kìzog ki isuùcèm? Èe èe, ki yin fɔlɔɔ, wɔ̀lɛ rìkpì ɗi ɓɛ kpighà ɗyɛ̀ɛ mɛ ki lɛ, ɓìlɔ̀ŋ ɓi zɛy ɓyɛ̀ɛ ɓa ɓìkòrɛn, lɛ di Ɓɛ̀yudɛ̀n ɓɛɛ ki yɔ̀ɔ̀tì.

¹² I zɛ̀ɗ i Ɓɛ̀yudɛ̀n ì mɛ fa ziinɛ ìkum wu ɓi Nghay, kìzog kaa ki kum̀zì ɓum ɓɛ zɛy ɓi Nghay, ɓɔ̀ɓ yaŋ min ɗi rìrɛlì ɗi ɓɛ ri ɓiì pɛ̀ɛ̀zɛɛ ki rɛlii isuùcèm ɓi gòri ì Bɛ̀ll ɓi ɗùm! Rìrɛlì ɗiǹ ɗi ri fa ɓum ɓɛ̀mààgh lɛɛ̀gwey.

¹³ Mɛ̀ ǹkalii mìni ɓɛ ɓi yin Ɓɛ̀yudɛ̀n lɛ, ǹɗì ǹkɛ̀nì-fìtom a Yeesus ànɛ à rì ɓisuu ɓumɓɛ ɓɛ yin Ɓɛ̀yudɛ̀n, nni ɓi rìɓa ɗyɛ̀m ɗiǹ, mɛ̀ɛ nnyàanyaàrɛ̀n rì kìsay ki ki falɛ̀ngà kiǹ a lɔ̀ŋkɛm̀.

¹⁴ Lɛ i bee yàa rì lɛ ì ɓa, ǹkì lɛ ɓumɓɛ ɓi kìlɔ̀ŋ kɛm̀ ɓɛɛ wog yɔ̀ɔ̀tì, di gàɓ ìdɛŋ yɛ̀ɛ ghɛ̀ɓ.

¹⁵ Ɓisuulɛ rìkɛ̀n ɗyaa ɗi ɓi nwɔŋì ɗi kighà lɛ ziinɛ yɛ̀ɛ rarɛn tì rì Bɛ̀ll; nni cɛ kɛɛ ri min ɓiì kìlɛɛ di ɓɛ sugtii yì? Fɔlɔɔ a ɓiì ɓaà cɛɓ ki ki yuu ɓisuu ɓilòŋ.

¹⁶ Nni i mum à faa Bɛ̀ll kìɓɛghà ki bìrɛs ki ǹtonto, gàɓ ìnɛ ì rɔ̀ɓi bimiɗ ì wooghrɛ̀n girig ɗì Bɛ̀ll; i ɓɛ faa Bɛ̀ll gàŋ yi kite, di myaɓ mɛ kite kiǹ mɛ wooghrɛɛ girig ɗì nyi.

¹⁷ Wɔ̀lɛ i ɓɛ m̀pisii myaɓ mɛ òlivyee mɛdɛŋ, wàànɛ ù rì (fɛlɛ yɛ̀ɛ) òlìvyee ànɛ à ghɛghɛ̀ɓkà ɓi cog, ù ɓa lɛ ɓɛ yuù wɔ̀ kì ɓaatii ɓi nɗyèm wu òlivyee, jàŋ inɛ myaɓ mɛ ɓɛ nɗengii mɛ ǹɗì, u teteɗ girig gàɓ ì mɛ̀yaa mɛ gàŋ yi òlivyee ànɛ ɓɛ ɓɛlà yɛɛ̀ ronɗom̀ yi.

¹⁸ Kɔ̀ɔ saasanɛ̀n di u feefengì myaɓ mɛ ɓɛ rengàkà, i ù saasanɛ̀n, ù ghɛ̀ɛ̀sɛɛ kì yiì lɛ àa wɔ̀ yɛɛ ɓanɓani gàŋ, gàŋ yɛɛ ɓanɓani wɔ̀.

¹⁹ Wàa rɔ̀ɓ ɓi lɛ ù kpaa ɓi lɛ: Ɓɛ rengàkà myaɓ mɛdɛŋ, lɛ di ɓɛɛ ɓaati mɛ̀ ɓi-kɔ̀ɔ̀ wu myaɓ mɛǹ.

²⁰ Ki ri lɔŋ fɔlɔɔ lɛ ɓɛ rengàkà myaɓ mɛǹ lɛ rìɓa ɗi mɛ ɓaghà kɛ̀ɛ̀ rìgherɛ̀n nni kɔ̀ɔ kaakalɛ̀n, ù ghɛ̀ɛ̀sɛɛ gì kì risii.

²¹ Ɓisuulɛ Bɛ̀ll à kèŋìghà ɓi myaɓ mɛ kite mɔmiɗ, àa kèŋi ɓi girig wɔ̀,

²² Kuurag kìpuɓì-ǹɗem à Bɛ̀ll, rì kìnyɛn kii; à rèsii kìnyɛn ɓisuu ɓɛroɓɛ ɓɛ kpighà, à rèsì wɔ̀ kìpuɓì-ǹɗem, wɔ̀lɛ kɛɛ̀ kɔ̀ɔkɔnɛ̀n lɛ u ɓaɓa lɔŋ ɓi kìpuɓì-ǹɗem wìì, kɛ̀ɛ̀ fɔlɔɔ ɓɛ pisì girig wɔ̀.

²³ Fɔɔnnɛ i ɓɔ girig ɓɛ kɛǹkɛni ɓi asu ɓɛ ɓenɓèn kì gherɛɛ, ɓɛ ɓiì pɛ̀ɛ̀zii ɓɔ kì ɓaatii ɓi ǹɗyèm, lɛ Bɛ̀ll à rì rì ìtèɗ wulɛ à pɛ̀ɛ̀zì ɓɔ kì ɓaatii ɓi ǹɗyèm.

²⁴ Wàànɛ ù yin muu Ɓɛ̀yudɛ̀n, ù rì (fɛlɛ yɛ̀ɛ) ŋwaɓ wu òlìvyee ànɛ ɓi cog, ŋwaɓ wii wɛɛ̀wu ɓɛ reniì, ɓɛ yu kì ɓaatii ɓi ǹɗyèm wu òlìvyee ànɛ ɓɛ ɓɛlà m̀ɓɛ̀lɛn, kìɓan ki lɛ ɓɛɛ ɓaati ŋwaɓ wu kite ɓi ǹɗyèm wu kite kidɛŋ, ki ri ki mum kɛ̀ɛ wog; Ɓɛ̀yudɛ̀n ɓɔ yɛɛ ri myaɓ mɛ òlìvyee à m̀ɓɛ̀lɛn, fɔɔnnɛ ki ri ɓiì pɔ̀ɔ̀zii ki ɓaà lɛ fɛnfɛn lɛ ɓɛɛ pɛɛ̀zi ɓɔ kìɓaatii ɓi ǹɗyèm waa.

²⁵ Ɓɔɔsoŋ̀, kìɓan kidɛŋ ki a rìnyam ki ri wɔɔ, kɛɛ̀ki ǹkɔ̀ni ɓi lɛ ɓi comɛn lɛ ɓì ɓiì ki ghɛnɛɛ miniì ɓɔmiɗ yɛ̀ɛ ɓum ɓɛ ɗyom̀zɛ̀n; kìɓan kiǹ kɛɛ ri lɛ, gàɓ ì ɓum ìnɛ a Isirayɛl ì yiìdi ri ìtèɗ wulɛ ì wog, wɔ̀lɛ kìɓan kiǹ ki ri ɓiì finɛɛ à kpaŋ yɛ̀ɛ ɓìlɔ̀ŋ ɓimbog ɓi ɓi yin Ɓɛ̀yudɛ̀n ɓìcèm ɓi ɓiì ɗiŋii ɓi gòri ì Bɛ̀ll.

²⁶ Fɔlɔɔ nnɛ Isirayɛl bimiɗ à rì ɓiì ghɛɛ̀ cɛɓ yɛ̀ɛ ki ri kì kànɛn lɛ: Ǹkòri-bum à ɓiì ɓaà yì a Siyon, à pisì ǹtoòtèɗ wu dòò yi Yakɔɓ.

²⁷ Bee inɛ ǹɗì ɓiì renì rì ɓɔ yɛ̀ɛnɛ̀n lɔɔ, di màa pisi ɓiɓe ɓyaa.

²⁸ Ɓi san ànɛ a Syeesyee à Ɓɔlɛ ànɛ ɓɛ ɓengà, Ɓɛ̀yudɛ̀n ɓɛ ri ɓɛ̀bènàbena ɓɛ Bɛ̀ll, fɔlɔɔ à ki ɓa ɓi kìrɔɔ kin, wɔ̀lɛ i tì nɔ̀ɔ̀tii rìɓɔ̀n ɗi Bɛ̀ll à ɓɔ̀ngà ɓɔ, Ɓɛ̀yudɛ̀n ɓɛ ri ɓɛ̀roɓɛ Bɛ̀ll à keesii ɓisuu ɓɛseŋi ɓaa ɓɛ ɓɛsɛ̀ɛ̀.

²⁹ Ɓisuulɛ rìɓòò ɗi Bɛ̀ll à tì à kìlàg ɓum kɛ̀ɛ̀ azi adɛŋ, rì ǹɗeèghreŋi wii, ɓi yin lɛ ɓi lɔgtɛ̀n.

³⁰ Fɛlɛ yɛ̀ɛ mìnii kighà Bɛ̀ll ǹtoòtèɗ ɓi mɛ̀ru mɛ abɛ̀y, ɓigomìnɛ, Bɛ̀ll à mɛ wog mini nyìighnyìg lɛ ǹtoòtèɗ wu Ɓɛ̀yudɛ̀n ɓɛ nkii nyi.

³¹ Fɔlɔɔ nnɛ ɓɔ girig ɓɛ mɛ rèsi ǹtoòtèɗ ɓigomìnɛ, lɛ di Bɛ̀ll a wog ɓɔ girig nyìighnyìg fɛlɛ yɛ̀ɛ àa ncenɛɛ mìni.

³² Ɓisuulɛ Bɛ̀ll à ghaasìghà ɓum ɓɛ̀cèm ɓɛ̀kpàn ɓi ǹtoòtèɗ, ɓi ɗùm, lɛ di a wog ɓɔ ɓɛ̀sɛ̀ɛ̀ ɓɛ̀cèm nyìighnyìg.

³³ Rìkuu ɗi coo nɗem wu nyìighnyìg ɗi Bɛ̀ll à rì rì ɗyɔ! Ɗyomzɛ̀n ɗii, rì rìyi ɗii ɗi ɓiɓan, ɓi rimi yɛ̀ɛ mɛ̀nɔ̀ɓɔ̀. Mum à yin lɛ à yi ɓɛ̀fèg ɓii, mɛ̀yitì mii mɛ yin lɛ mum à wog.

³⁴ Ɓi saaɗ ghɛn yɛɛ ɓaghà lɛ à yi fèg à Kan, ghɛn yɛɛ ki ɓaghà lɛ à reɓ nyi?

³⁵ Ghɛn yɛɛ ka lokà nyi kìfaà com ki à rì lɛ à ɓoŋɓòŋ mɛ̀lèɓ mɛ miì?

³⁶ Lɛ ɓyom ɓìcèm ɓi fuuyì ɓi nyi, ɓi ri lɛ nyi, ɓi ki rì ɓisu wìì, nnyɛ̀ɛ ghɛɛ̀sɛɛ rì rìkem fìɗyàɓ fikɔ̀ɔ̀. Ààmɛ̀n.