RÒMƐŊ 1 - Bafia Nouveau Testament

Pol à tògsii ɓɔ

¹ Pol, ǹkìì-kìsay a Yeesus Kiris, ànɛ Bɛ̀ll à reŋìghà lɛ a ɓa ǹkɛ̀nì-fìtom a Yeesus, à ki ɓa ti nɗɛsiyɛn dɛgà ɓi rìghagsì ɗi Syeesyee à Ɓɔlɛ à Bɛ̀ll.

² Bɛ̀ll à kàkà Syeesyee à Ɓɔlɛ ànɛ̀n abɛ̀y, ɓɛ̀kpaŋzì-ɓìɓan ɓɛ ki kàngà kìɓan kiǹ ɓi kaàtà à Bɛ̀ll.

³ Syeesyee à Ɓɔlɛ ànɛ̀n à seesee Man wiì, ànɛ à yalɛ̀ngà mum ɓi boo ì ɓum ì Davit.

⁴ Ɓi san ànɛ a Kìtɛntɛ̀ɛ̀n ki Nghay, ki ghɛnɛ̀n lɛ à rì Man à Bɛ̀ll, rì ìtèɗ, ɓi rìghèmɓɛ̀n ɗi à ghèmɓɛ̀ngày a ɓìloŋ.

⁵ Ɓi Yeesus Kiris à Kan wìs nnɛ Bɛ̀ll à kìghà mɛ̀ geesɛ̀n ìnɛ lɛ mɓa ǹkɛ̀nì-fìtom ɓi rìkem ɗi Kiris lɛ nsyoŋ̀ yì ɓumɓɛ ɓi ɓìlɔ̀ŋ ɓìcèm lɛ ɓɛɛ gherɛn nyi, ɓɛ ki nyi mɛ̀wog.

⁶ Ɓì rì girig ɓi bàlì ì ɓumɓɛ̀n, mìni ɓɛ Yeesus Kiris à reŋìghày;

⁷ nni mìni ɓɛ̀sɛ̀ɛ̀ ɓɛ̀cèm ɓɛ Bɛ̀ll à keesii yɛ̀ɛ mɛ̀nɔ̀ɓɔ̀, ɓɛ bì rì a Rom, mìniì ɓɛ à reŋìghà lɛ ɓi ɓa ɓum ɓii, Bɛ̀ll à Seŋì wìs ɓɛɛ̀ Kan Yeesus, ɓɛɛ fa mìni lɛ rì geesɛ̀n rì fyòoog.

Pol à rèsii lɛ à keesii ɓɛ̀gherɛ̀n ɓɛ a Rom

⁸ Mɛ̀ ǹka faa Bɛ̀ll wɛ̀m ɓìtògsɛ̀n lɛ Yeesus Kiris, ɓisu win mɛ̀to mɛ̀cèm ɓisuulɛ rìgherɛ̀n ɗin ɗyɛɛ̀ keŋkem zi bimiɗ.

⁹ Bɛ̀ll ànɛ nkìki kisay ɓi nghay wɛ̀m ɓi rìghaàghàgsì ɗi Syeesyee à Ɓɔlɛ à Man wiì, à rì mɛ̀ wusìnɛ̀ɗ lɛ ǹti mɓùgì mìni ɓyààmɛ̀n ɓìcèm,

¹⁰ ɓi bɔ̀ŋzɛ̀n yɛm̀ kɛ̀ɛ nfɔɛy, ǹtɔtɔ̀g Bɛ̀ll lɛ, i ki ri lɛ ki kɔǹ nyi, mɛ̀ɛ mɓa ɓà min ɗi bee inɛ lɛ n-yu a lɔ̀ŋkin.

¹¹ Ɓisuulɛ ǹɗì rì coo zày ìnɛ lɛ di màa ghɛɛ mìni, lɛ n-yuy mìni rì rìfa ɗi Kitɛntɛ̀n ki Nghay ridɛŋ ɗi ɗyɛɛ fati mìni ìtèɗ.

¹² Nsoò gì lɛ di ti faàfàlɛ̀n ìtèɗ nɗaŋ a lɔ̀ŋkin ɓi rìgherɛ̀n ɗi ɗi ri ɓìsi bas lɛ rì mɛ̀ rì mìni.

¹³ Ɓɔɔsoŋ̀ ǹkɔ̀ni ɓi lɛ ɓi naǹ lɛ, mmɛ ɓeg ɓyààmɛ̀n ɓidɛŋ lɛ n-yu mìni kì ghɛɛ̀ lɛ di kìsay kɛm̀ kɛɛ wum gàɓ ì ɓìɗùn a lɔ̀ŋkin, yɛ̀ɛ ki faghà ɓi ɓìlɔ̀ŋ ɓimbog. Nni à kpaŋ ɓigomìnɛ, bee ì ka ghɛnɛ̀ngà ɓi.

¹⁴ Ɓisuulɛ ǹɗì rì ǹtɛ̀g wulɛ nkɛǹ a ɓum ɓɛ̀cèm, a ɓɛ̀roɓɛ ɓɛ yii cɛɓ rì a ɓɛ̀roɓɛ ɓɛ ka yi ɓi cɛɓ, a ɓɛ̀yiì-ɓìɓan, rì a ɓumɓɛ ɓɛ yii ɓi com.

¹⁵ Kìɓan kiǹ kɛɛ̀ki ǹɗì rì coo zày ìnɛ lɛ nghagsi girig mìni Syeesyee à Ɓɔlɛ, mìni ɓɛ ɓì rì a Rom.

¹⁶ Ɓisuulɛ, ǹ-yin lɛ ǹwog ǹtoòrìɗ ɓi rìghagsì ɗi Syeesyee à Ɓɔlɛ, lɛ à rì ìtèɗ wu Bɛ̀ll wu wɛɛ̀ ghɛɛghɛɓsì ɓum ɓɛ̀cèm ɓɛ ɓɛ gherɛɛ, à tumɛ̀n lɛ Ɓɛ̀yudɛ̀n à kpaŋ lɛ ɓumɓɛ ɓɛ yin Ɓɛ̀yudɛ̀n.

¹⁷ Ɓisuulɛ Syeesyee à Ɓɔlɛ a rèresi yɛ̀ɛ Bɛ̀ll à ti à kìlàg lɛ ɓum ɓɛɛ ɓa lɛ saaɗ ɓi mis mii lɛ rìgherɛ̀n rì ɓisuu righerɛ̀n lɔŋ yɛ̀ɛ ki ri kìkànɛn lɛ: Ŋwaànɛ à rì mum à saaɗ ɓi mis mɛ Bɛ̀ll, lɛ rgherɛ̀n, à ɓiì ghɛɓì.

Ɓumɓɛ saaɗ à ɓanɓani ɓi rìkpàn

¹⁸ Bim i Bɛ̀ll ì ti ì rèsàg yì aɗyoo ɓisuu kiɓe kicèm, rì kìtɛ̀ŋtɛ̀ŋ kicèm ɓi ɓum ɓɛ ri rì ɓyɔ, ɓyɛɛ ɓanɓani saaɗ ɓi rìkpàn ɓi zɛ̀ɗ aɗyòò;

¹⁹ ɓisuulɛ, ɓìɓan ɓi ɓum ɓɛ ri rì ìtèɗ wulɛ ɓɛ yi ɓi ɓɛg ànɛ yɛ̀ɛ Bɛ̀ll, ɓi ri lɛ tɛntɛ̀ɛ̀n ɓi mis maa, lɛ Bɛ̀ll à rèsìghà ɓɔ ɓyɔ lɛ syeesyee.

²⁰ À tumɛ̀n yɛ̀ɛ Bɛ̀ll à kìghà zi, mɛ̀ròŋa mii mɛ ɓum ɓɛ yin lɛ ɓɛ ghɛn lɛ, rì ìtèɗ wii wu wu ri fìɗyàɓ fikɔ̀ɔ̀, rì rìɓa ɗii ɗi àrì Bɛ̀ll, ɓyɛɛ̀ rèeresɛ̀n ɓi ɓyom ɓi à kìghà; fɔlɔɔ nnɛ ɓɛ yin ɗi com ki ɓɛ ri lɛ ɓɛ kpaa ki ki ki lɛ ɓɛɛ cenɛn ɓɔ.

²¹ Ɓisuulɛ ɓɛ yii Bɛ̀ll, kìɓan kifog ɓɛ̀ kɛɛ̀ ɓɔgsi nyi yɛ̀ɛ ki ghɛɛ̀sɛɛ lɛ ɓɛɛ ɓɔgsag nyi, ɓɛ̀ kɛɛ̀ ki fa nyi ɓìtògsɛ̀n, wɔ̀lɛ ɓìdìmìdimi ɓyaa ɓi ɓɛfèg ɓi mɛ tɔɔsi ɓɔ cog, ɓìdùŋdùŋ ɓyaa ɓi mɛrèm ɓi sigtɛ̀n birìm.

²² Ɓɛ sasànɛ̀n lɛ ɓɛ wom̀zɛɛ, kɔlɛ ɓɛ ri ɓìyèg.

²³ Jàŋ inɛ ɓɛ ghɛɛ̀sɛ̀ngà kìɓɔgsii Bɛ̀ll ànɛ à rì Loy ɓìfèèghrɛnà ɓi lɛ, rì mum ànɛ à ti à wulàg, rì tììlì, rì nyàm yi mɛkòò mɛnin, rì yi wɔwɔghɛn ri mùm, ɓyɛɛ̀ ɓi ɓɔɔ ɓɔɔ̀ɓɔ̀gsì.

²⁴ Kìɓan kiǹ kɛɛ̀ki Bɛ̀ll à cìtɛ̀ngà ɓɔ ɓi ɓìɓan ɓi tifin, ɓi mɛ̀rem maa mɛ ɓiisɛ̀ngà kì kɔ̀ni, fɔlɔɔ nnɛ ɓɛɛ̀ sòosoòtì nyoo yaa yi ɓɔmiɗ.

²⁵ Ɓɛ koɓsɛ̀n saaɗ à Bɛ̀ll rì ɓɛ̀pwàà, ɓɛ ɓɔɔ̀ɓɔ̀gsì ɓyom ɓi Bɛ̀ll à kìghà, ɓɛ kikì ɓyɔ mɛ̀wog jàŋ inɛ ɓaa ghɛ̀ɛ̀sɛɛ kìɓɔgsii ǹkìì-ɓyom ɓìcèm ànɛ à ghɛ̀ɛ̀sɛɛ rì rìkem fìɗyàɓ fikɔ̀ɔ̀, ààmɛ̀n.

²⁶ Kìɓan kiǹ kɛɛ̀ki Bɛ̀ll à tinìghà ɓɔ lɛ ɓɛɛ kiki ɓìɓan ɓi ntoòrìɗ; ɓɛ̀yiɓ ɓaa ɓɛ pɛɛ̀zì rìràrɛ̀n ɗi Bɛ̀ll à fèkà lɛ rì giɓ rì baŋì ɓi bee ì dùne.

²⁷ Fɔlɔɔ nnɛ ɓɛ̀baŋì girig, ɓɛ mɛ càɗ riràrɛ̀n ɗi Bɛ̀ll à fèkà lɛ baŋì yɛ̀ɛ rarag rì giɓ, ɓɛ̀ro ɓɛ̀baŋì ɓɛɛ̀ɓɛ ɓɛ kɔnkɔ̀n lɛ ɓɛɛ rarɛn ɗì ɓɔ. Ɓɛ̀baŋì ɓɛ kikì min ɓiɓan ɓi ntoòrìɗ rì ɓɛ̀ro ɓɛ̀baŋì, rìsyɔn ɗi miì ɗi ɓa lɛ ɓɛɛ teɗ mɛ̀lèɓ mɛ mɛ ghɛɛ̀sɛɛ rì rìnàn ɗyàa ɗiǹ.

²⁸ Yɛ̀ɛ ɓɛ ghɛngà ɓi kirɔɔ lɛ ɓɛɛ yiti lɛ Bɛ̀ll à rì wɔɔ, nni Bɛ̀ll à nagà ɓɔ rì kìyèg kaa ki ɗyomzɛ̀n lɛ ɓɛɛ kiki ɓìɓan ɓi ɓaa ghɛ̀ɛ̀sɛɛ ɓi kikìi.

²⁹ Fɔlɔɔ nnɛ ɓɛ ri ɓɛ̀ronɛn ɗi mɛ̀bèe mɛ̀kuu mɛ̀cèm, ɗì rìgɛn, rì zày ì ìkum, rì mɛ̀ghèy; ɓɛ ɓa tì ɓɛ̀ronɛn ri yàaka, ɓɛɛ woowoòsɛ̀n, ɓɔ rì ɓɛ̀paàzì, rì wii wu mɛghèy, ɓɛ keesì cɛɓ ki tisɔ̀mɔ̀g,

³⁰ rì ɓɛ̀ɓɔlɛ, rì mɛ̀wɔ̀wɔrì, ɓɛ ɓa ɓɛ̀bènàbena ɓɛ Bɛ̀ll, ɓɔ ɓɛ̀kaà-ɓìɓan, ɓɔ rì ɓìdaŋà rì kalɛn, ɓɛ womzɛ̀n ɓi rìkì ɗi kiɓe, ɓɛ ki ɓa ri ntoòtèɗ rì ɓɛ̀yalì ɓaa.

³¹ Ɓɔ kɛ̀ɛ̀ ɗyomzɛ̀n , ɓɛ̀ kɛɛ̀ ki ɓa ɓumɓɛ mum à tyweeyàg, ɓɔ kɛ̀ɛ̀ ǹkɔ̀nɛ̀n, kɛ̀ɛ̀ ǹɗem wu woghɛn romum nyìighnyìg.

³² Nsoò yɛ̀ɛ ɓɛ yii lɛ Bɛ̀ll à rengà lɛ ɓumɓɛ ɓɛɛ̀ kìki mɛkuu mɛ ɓiɓan mɛǹ, ɓɛ ghɛɛ̀sɛɛ dì rìwu, ɓɔɔ kɛnkɛ̀n lɔŋ asu ɓɛ kikì ɓyɔ, ɓɛ̀ kɛɛ̀ ki sugtɛn foo, ɓɛ kɛɛ̀dì asu ɓɛ sɛsɛ̀g ɓumɓɛ ɓɛɛ̀ kìki girig ɓìɓan ɓi fɔ̀lɔ̀ɔ̀.