ÀPÒKÀLIƁSƐ̀ 9 - Bafia Nouveau Testament

¹ Ŋwaàfìtom a kìtaǹ à rɔgà ɗyam; fɔɔnnɛ ǹghɛngà fyɛy fi fi kɔsɛ̀ngày aɗyoo fi kpi ɓi zi; nni ɓɛ tekà fìɗìɓà fi ɓi coo riɓee ɗi rimɛn, ɓɛ fa rì fyɔ.

² Fɔɔnnɛ fyɛy fi ŋwaɗkà coo riɓee ɗiǹ. Coo fisilì fi tumɛ̀n rìsyoo ɓi rìɓee ɗiǹ lɔn yɛ̀ɛ fìsilì fi fi riì ɓi kìgɛ̀ŋ ki ɗuu, fìsilì fiǹ fi fiìzì lɛ rì ŋwos rì bɛ̀ɛ̀bɛ̀ɛ̀.

³ Ɓìtàtàɗ ɓi kpagày ɓi fìsilì fiǹ, ɓi saàtɛ̀n ɓi zi, nni ɓɛ faghà ɓìtàtàɗ ɓiǹ ìtèɗ wu wu pisɛɛ rì ìtèɗ wu tìrèè ti zi.

⁴ Ɓɛ kpaa ɓìtàtàɗ ɓiǹ lɛ, ɓyɛ̀ kɛɛ̀ kòm caaɓi ki ɓi ziinɛ nsoò kìfog, nsoò kìtìbag, nsoò kìte kidɛŋ, lɔŋ ɓumɓɛ ɓɛ yin ɗi sìtam̀ à Bɛ̀ll ɓisu ɓɛɛ̀ɓɛ ɓi ghɛɛ̀sɛɛ kì kìi kiɓe ɓɔ rì ɓɔ.

⁵ Ɓɛ faghà ɓi ɓyɔ ìtèɗ wulɛ ɓyɛɛ cuusi ɓumɓɛ̀n, kìɓan kifog ɓɛ faghà ɓyɔ ìtèɗ wulɛ ɓyɛɛ wogsi ɓɔ rìkɛŋ ɓɛ̀bimiɗ ɓɛ ɓɛ̀ŋwii ɓɛtaǹ, nni rìkɛŋ ɗi ɓi ghɛɛ̀sɛ̀ngà kì wogsii ɓum ɗi ri rìkɛŋ ɗi mum à ti à wokì di fìrèè fi taɓi nyi.

⁶ Ɓi mɛ̀ru mɛ̀n, ɓum ɓɛ ri kaakaa gɛ bee inɛ lɛ ɓɛɛ wu, ɓɛ̀ kɛɛ̀ ghɛn ki kɔnkɔ̀n ɓɔ lɛ ɓɛɛ cuu, wɔ̀lɛ rìwu ɗi ghɛŋì ɓɔ fìràɓ.

⁷ Ɓìtàtàɗ ɓiǹ ɓi ɓaghà yɛ̀ɛ zòm yi kimbɛ̀rɛ̀ yi yi ri yì pègsɛn lɛ yɛɛ kɛǹ wɛ̀y. Mɛ̀to mɛ ɓyɔ mɛ ɓaghà rì ɓɛ̀tàm ɓɛ rikem ɓɛ ɓɛ ɓaghà lɔŋ yɛ̀ɛ gol, mɛ̀su mɛ ɓyɔ mɛ ɓa yɛ̀ɛ mɛ̀su mɛ ɓum.

⁸ Ɓi ɓaghà rì tyòŋ yɛ̀ɛ tyòŋ ti giɓ, ɓyɔ rì min yɛ̀ɛ mɛ kimonɗo.

⁹ Dwey yi ɓitàtàɗ ɓiǹ yi ɓaghà fɛlɛ yɛ̀ɛ yi ri yì pàmgakɛn ri bɔŋ; mɛ̀keɓ mɛ ɓyɔ mɛ kikì gom lɔŋ yɛ̀ɛ ɓyalig ɓi kìtuu ki zòm yi kimbɛ̀rɛ̀ yɛɛ̀ tùtug mɛ̀ree rì mɛ̀ree lɛ yɛɛ kɛǹ kì ɗùu wɛ̀y.

¹⁰ Ɓìtàtàɗ ɓiǹ ɓi ɓalàkà rì mɛ̀ghey mɛ mɛ pisɛ̀ngà rì tìrèè, mɛ̀ghey mɛncèm mɛ ɓalàg rì ɓìlɔ̀ɔ̀, nni ɓi mɛ̀ghey mɛ̀n innɛ ìtèɗ wulɛ ɓɛɛ wogsi ɓum rìkɛŋ ɓɛ̀ŋwii ɓɛtaǹ, wu ɓaghà.

¹¹ Rìfòm ɗi ɓitàtàɗ ɓiǹ ɗi ri ŋwaà-fìtom anɛ ɓi rìɓee ɗi rimɛn anɛ à rì ɗii ɓi rì Ebìreegh lɛ Aɓadon, ɓi rìgìrɛg lɛ Apolyɔŋ.

¹² Ǹtɔɓ wu ǹtonto wu mɛ ghaàgh, nni wɔ̀lɛ mɛ̀tɔɓ mɛdɛŋ mɛɓɛɛ̀ mɛ ri tìì ajɛ̀m ì wiǹ.

¹³ Fɔɔnnɛ ŋwaà-fìtom a kìtaàfog à rɔgà ɗyam, ǹwog di jɛ̀ɛ̀ ì pɛ̀sɛɛ yì ɓi mɛ̀tɔŋ mɛ kinìn mɛ ɓi com ki gol rì gol ki ɓɛ ntɔ̀ngì ɓyom miì ɓi rìɓɔgsì ɗi Bɛ̀ll, com kìn kɛɛ rɛrɛ̀lìghà Bɛ̀ll asu.

¹⁴ Jɛ̀ɛ̀ ì kpaa ŋwaà-fìtom a kìtaàfog anɛ à ɓaghà rì ɗyam lɛ: Fùmi ɓum ɓɛ titom ɓɛ kinìn ɓɛ ɓɛ ri ɓɛ̀kàgakɛn bɛn ɓi coo riɓày ànɛ lɛ Efirat.

¹⁵ Nni ɓɛ fumìghà ɓum ɓɛ titom ɓɛ kinìn ɓɛǹ, ɓɛ ɓaghà di ɓɛ mɛ ɓùŋɛn ɓisuu cààmɛ̀n kiǹ, rì gòn inɛ̀n, rì ŋwii ànɛ̀n, rì bèg ìnɛn, lɛ ɓɛɛ cuùsi gàɓ ì kìraa ìnɛ ɓi ɓum ɓɛ̀cèm ɓɛ ɓi ziinɛ.

¹⁶ Bàlì ì ɓɛ̀ɗùù wɛ̀y inɛ ɓi nɗaŋ wu ɓɛsujàà wu wu ɓaghà rì zòm yi kimbɛ̀rɛ̀ ì ɓaghà ɓum ɓɛ̀mìlìyɔŋ ɓɛ̀hɔnɗɛ̀ɗ ɓɛɓɛɛ̀, ǹwokà di ɓɛ faa bàlì ì ɓɛ̀sujàà ɓɛǹ.

¹⁷ Fɔɔnnɛ ɓi ɓìɓan ɓi ǹseesèèghà ɓiǹ yɛ̀ɛ ɓìdɛ̀ndɛm, ǹghɛngà zòm yi kimbɛ̀rɛ̀ rì ɓumɓɛ ɓɛ ɓaghà miì aɗyoo; ɓumɓɛ̀n ɓɛ ɓaghà ɓɛ̀pàmɓɛn dwey rì bɔŋ yi yi ɓaghà lɛ yɔ yì ɓàŋ yɛ̀ɛ ɗuu, yɔ bùrum ɓi mis yɛ̀ɛ gɔ̀g ìnɛ lɛ yàsɛŋtɛ̀, yɔ tì ɓi mis yɛ̀ɛ ǹdùsi. Mɛ̀to mɛ zòm yi kimbɛ̀rɛ̀ yiǹ mɛ ɓaghà yɛ̀ɛ mɛ̀to mɛ ɓimonɗo, fɔɔnnɛ ɗuu rì fìsilì rì ǹdùsi ɓi fafàŋìghày yɔ ɓi myɔm.

¹⁸ Ɓìɓeɓtàg ɓi ɓyom ɓi kiraa ɓi lɛ rì ɗuu rì fìsilì rì ǹdùsi ɓi ɓi kpaŋkpàŋgày ɓi myɔm mɛ zòm, ɓi cuusìghà gàɓ ì kìraa ìnɛ ɓi ɓumɓɛ ɓi ziinɛ.

¹⁹ Ɓisuulɛ ìtèɗ wu zòm yiǹ wu ri lɛ rì ɓi myɔm rì ɓi mɛ̀ghey; mɛ̀ghey mɛ yɔ mɛ ri yɛ̀ɛ nyoo, mɔ rì mɛ̀to, mɛ̀to mɛ̀n mɛɛ̀mɛ mɛ̀ghey mɛ̀n mɛ ri lɛ mɛ ki kìɓe miì.

²⁰ Ɓum ɓɛmɓog ɓɛ ɓìɓeɓtàg ɓi ɓyom ɓìn ɓi cuusìghà ɓi, ɓɛ ɓengà kìlɔ̀ɔ̀ghrɛɛ mɛrem lɛ ɓɛɛ caɗ ɓìnùn ɓi ɓɔmiɗ ɓɔ yɛɛ syaagh rì ɓyàg ɓyaa; fɔɔnnɛ ɓɛ kɛngà lɔŋ beèbɛ̀y ɗì rìɓɔɔ̀ɓɔ̀gsì ɗi ɓiɓeɓtàg ɓi mɛghay, rì ɓìnùn ɓi ɓi ri ɓì syaghɛn ri gol nsoò lɛ rì swiɗ à mɔ̀ɔ̀ni, nsoò lɛ rì bɔŋ idɛŋ, nsoò lɛ rì gɔ̀g, nsoò lɛ rì kìte; ɓìnùn ɓiǹ ɓyɛɛ yin lɛ ɓi ghɛnɛ̀n, ɓyɛ̀ kɛɛ̀ wooghrɛn, ɓyɛ̀ kɛɛ̀ ki kɛ̀ɛ̀ghi.

²¹ Ɓɛ ɓengà kì lɔ̀ɔ̀ghrɛɛ mɛrem lɛ ɓɛɛ caɗ rìwowèy ɗi ɓum, rì ɓìɓan ɓi kifuu rì tìsɔ̀mɔ̀g, rì wii.