ÀPÒKÀLIƁSƐ̀ 7 - Bafia Nouveau Testament

Ɓum ɓɛ Bɛ̀ll

¹ Ajɛ̀m ìnɛn nni ǹghɛngà ɓum ɓɛ titom ɓɛnin ɗi ɓɛ rɛrɛlii ɓi mɛ̀fon mɛ zi mɛ kinìn mɛ ɓi ziinɛ, lɛ di bɛ̀ɓ yɛ̀ kɛɛ̀ kì ɓi ziinɛ nsoò ɓi rìɓày à kìkòn, nsoò ɓi kìte kifog.

² Fɔɔnnɛ ǹghɛngà ŋwaà-fìtom adɛŋ di a ɓɔɓɔg yi ɓɛg ànɛ ŋwos a ti à kpagìì, à ɓanɓàn yì sìtam̀ à Bɛ̀ll ànɛ à rì cem ɓi càg. Nni à nyàmgà jɛ̀ɛ̀ aɗyoo, a kpaa kìnìn ki ɓum ɓɛ titom ɓɛ ɓɛ tekà ìtèɗ wulɛ, ɓɛɛ ki ziinɛ, ɗì rìɓày à kìkòn ǹtɔɓ lɛ:

³ Kɛ̀ ɓi kòm zi lɛ ɓi ki yɔ̀ kiɓe; nsoò rìɓày à kìkòn, nsoò ɓìte, di tì ka legsi ɓi kirèmzaagh mɛsu mɛ ɓɛ̀kìì-ɓìsay ɓɛ Bɛ̀ll wìs ri sìtam̀.

⁴ Fɔɔnnɛ ǹwokà bàlì ì ɓumɓɛ ɓɛ remzàkà rì sìtam̀; ɓi mɛ̀pwìɗ mɛ̀cèm mɛ a Isirayɛl, ɓum ɓɛ ɓaghà ɓɛ̀tɔɔsìm mɛ̀tin taàɓɛ̀ɛ̀ rì ɓum ɓɛ̀tɔɔsìm ɓɛnin.

⁵ Ɓi rìpwìɗ ɗi Zyuda, ɓum ɓɛ rèmziyɛn ɓɛ ɓaghà ɓɛ̀tɔɔsìm ǹtɛ̀ɗ rì ɓɛɓɛɛ̀; ɓi rìpwìɗ ɗi Ruɓɛn, ɓum ɓɛ rèmziyɛn ɓɛtɔɔsìm ǹtɛ̀ɗ rì ɓɛɓɛɛ̀; ɓi rìpwìɗ ɗi Gaad ɓum ɓɛ rèmziyɛn ɓɛtɔɔsìm ǹtɛ̀ɗ rì ɓɛɓɛɛ̀;

⁶ ɓi rìpwìɗ ɗi Azɛr ɓum ɓɛ̀tɔɔsìm ǹtɛ̀ɗ rì ɓɛɓɛɛ̀; rìpwìɗ ɗi Nɛftalii ɓum ɓɛ̀tɔɔsìm ǹtɛ̀ɗ rì ɓɛɓɛɛ̀; rìpwìɗ ɗi Manase ɓum ɓɛ̀tɔɔsìm ǹtɛ̀ɗ rì ɓɛɓɛɛ̀;

⁷ ɓi rìpwìɗ ɗi Simeyɔŋ ɓum ɓɛ̀tɔɔsìm ǹtɛ̀ɗ rì ɓɛɓɛɛ̀; rìpwìɗ ɗi Levi ɓum ɓɛ̀tɔɔsìm ǹtɛ̀ɗ rì ɓɛɓɛɛ̀; rìpwìɗ ɗi Isakar, ɓɛ̀tɔɔsìm ǹtɛ̀ɗ rì ɓɛɓɛɛ̀;

⁸ rìpwìɗ ɗi Zaɓulon, ɓɛ̀tɔɔsìm ǹtɛ̀ɗ rì ɓɛɓɛɛ̀; rìpwìɗ ɗi Yoosɛɓ ɓɛ̀tɔɔsìm ǹtɛ̀ɗ rì ɓɛɓɛɛ̀; rìpwìɗ ɗi Bɛŋzyamɛŋ ɓum ɓɛ rèmziyɛn ri sìtam̀ ɓɛ̀tɔɔsìm ǹtɛ̀ɗ rì ɓɛɓɛɛ̀.

⁹ Ajɛ̀m ìnɛn nnɛ ǹghɛngà coo kituu ki ɓum ki mum à ɓaghà ɓi lɛ à ɓày, ɓumɓɛ̀n ɓɛ pɛsàkày ɓi ɓìlɔ̀ŋ ɓìcèm, rì ɓi mɛ̀pwìɗ mɛ̀cèm, rì mɛ̀kuu mɛ̀cèm, rì ɓìtòkì ɓìcèm; ɓɛ rɛrɛ̀lìghà asu wu ikɔ̀ɔ̀ wu rilàmì, rì ɓi mis mɛ Man à jɔ̀ɔ̀, ɓɛ waatàg ɓɛ̀kàɓà ɓɛ puɓ, ɓɛ ki ɓa ri maŋ ɓi ɓyàg.

¹⁰ Ɓɛ kpaàkpàgsɛ̀n jɛ̀ɛ̀ aɗyoo lɛ: Ǹghɛɓsɛn wu ti wu ɓalàg yì yɛ̀ɛ Bɛ̀ll wìs anɛ à kɔ̀kɔrii ɓi-kɔ̀ɔ̀ wu rilàmì, rì yɛ̀ɛ Man à jɔ̀ɔ̀.

¹¹ Ɓum ɓɛ titom ɓɛ ceŋzɛ̀ngà ìkɔ̀ɔ̀ wu rilàmì, rì ɓɛ̀sɛ̀ɛ̀mɛn ɓɛ ɓum, rì nyàm yi kinìn; ɓɛ ɓakàkà mɛ̀su ɓi zi asu wu ikɔ̀ɔ̀ wu rilàmì, ɓɛ ɓɔgsì Bɛ̀ll,

¹² di ɓɛɛ̀ kpaakpaa lɛ: Ààmɛ̀n, bɔgsɛ̀n, rìkem, ɗyomzɛ̀n, ɓìtògsɛ̀n, nyaasɛ̀n, ìtèɗ wu rilàmì, rì ìtèɗ wu zɛy, ɓi ri ɓyom ɓi Bɛ̀ll wìs fìɗyàɓ fikɔ̀ɔ̀ Ààmɛ̀n.

¹³ Nni kìbog ki ɓi ɓɛ̀sɛ̀ɛ̀mɛn ɓɛ ɓum ki tekà jɛ̀ɛ̀ ki kpaa mɛ̀ lɛ: Ɓumɓɛ ɓɛ waataagh ɓìlàà ɓi puɓ ɓɛ, ɓɔɔ ri ɓɛ̀ghɛn?

¹⁴ Nni m̀ɓàkà nyi lɛ: Kan wɛ̀m wɔ̀ yɛɛ yii! Fɔɔnnɛ à kpaaghà mɛ̀ lɛ: Ɓɛ ri ɓumɓɛ ɓɛ pɛsɛɛ yì ɓi jàŋ yi ǹ-yeesɛ̀n à ɓɛ̀gherɛ̀n à rì lɛɛ̀gwey. Ɓɛ sooghà ɓɛ̀ kàɓà ɓaa ɓɛ ki puɓsi ɓɔ ɓi bwaɓ yi Man à jɔ̀ɔ̀.

¹⁵ Kìɓan kiǹ kɛɛ̀ki ɓɛ rɛrɛlii miì asu wu ikɔ̀ɔ̀ wu rilàmì wu Bɛ̀ll, ɓɛ ki ɓɔɔɓɔgsì nyi yɛ̀ɛ ìru yɛ̀ɛ ŋwos ɓi naa yìì. Yɛ̀ɛ roànɛ à rì ǹkɔ̀kɔriyɛn ɓi-kɔ̀ɔ̀ wu rilàmì, à rì toŋ kìnuugh kii à foŋ ɓɔ miì.

¹⁶ Ɓaa wogtii gɛ ɓi zày, ɓɛ̀ kɛɛ̀ wogti kinɔli nsoò ŋwos kɛ̀ɛ ɓogti ɓɔ, ɓɛ̀ kɛɛ̀ ki wogti nsoò cɔ̀ɔ̀zɛ̀n.

¹⁷ Ɓisuulɛ Man à jɔ̀ɔ̀ ànɛ à kɔ̀kɔrii ɓi nyìinyìm à ìkɔ̀ɔ̀ wu rilàmì à rì ɓɔ ɓiì mɛnii à kɛ̀n ɗì ɓɔ ɓi jàŋ yi ɓɛ̀ǹsim ɓɛ mɛnig ɓɛ cɛɓ ɓɛ ri. Bɛ̀ll à ki tɔ̀sag misì mɛ ɓɔ ɓi mis mɛ̀cèm.