Bìoball air-loidhne

ÀPÒKÀLIƁSƐ̀ 6 - Bafia Nouveau Testament

Rìŋwàɗ ɗi ɓɛ̀sìtam̀ ɓɛ kitaàfog ɓɛ asu

¹ Fɔɔnnɛ ǹseesèèghà; yɛ̀ɛ Man à jɔ̀ɔ̀ à ŋwàɗkà kìbog ki ɓi ɓɛ̀sìtam̀ ɓɛ kitaàɓɛ̀ɛ̀, ǹwog kìbog ki ɓi nyàm yi kinìn di ki toòghrɛɛ yɛ̀ɛ baàbàn, kì kpaa lɛ: Yu.

² Nni ǹghɛ̀ngà zòm i kìmbɛ̀rɛ̀ ìmpuɓ. Ŋwaànɛ à ɓaghà miì aɗyoo à ɓaghà rì bàsàg; ɓɛ fa nyi tàm à rìkem, à kɛ̀n fɛlɛ yɛ̀ɛ ŋwaànɛ à rì ǹceeyɛn wɛ̀y lɛ a ki yagsàg.

³ Yɛ̀ɛ à ŋwàɗkà sìtam̀ à kìɓɛ̀ɛ̀, ǹwog di nyàm ì kìɓɛ̀ɛ̀ i kpaa lɛ: Yu.

⁴ Fɔɔnnɛ zòm i kìmbɛ̀rɛ̀ ìdɛŋ ìnɛ ì ɓàŋɓàŋgà yɛ̀ɛ ɗuu, ì kpagày, ŋwaànɛ à ɓaghà miì aɗyoo à teɗ ìtèɗ wulɛ a pisi fyòoog ɓi ziinɛ di ɓum ɓɛɛ woòwòòsɛ̀n ɓɔ rì ɓɔ; fɔɔnnɛ ɓɛ faghà nyi coo gàfàg.

⁵ Yɛ̀ɛ Man à jɔ̀ɔ̀ à ŋwàɗkà sìtam̀ à kìraa, ǹwog di nyàm ì kìraa ì tòòghrɛɛ ì kpaa lɛ, Yu. Nni ǹghɛngà zòm i ǹfin, ŋwaànɛ à ɓaghà miì aɗyoo à ɓanɓàngà kilò ɓi càg.

⁶ Ǹwokà gom ìdɛŋ yɛ̀ɛ ɓɛɛ̀ kali lɛ jɛ̀ɛ̀ yɛ̀ɛ tòtog ɓi nyìinyìm à nyàm yi kinìn di yɛɛ̀ kpaakpaa lɛ: Mità à gèŋ bog, ɓi mɛ̀lèɓ mɛ mɛ ghɛɛ̀sɛɛ rì kìsay ki ɓi bimiɗ à ŋwos, ɓɛ̀mità ɓɛ rikuu ɗi gèŋ ɗidɛŋ ɓɛraa ɓisuu mɛlèɓ mɛ kisay ki bimiɗ à ŋwos; ɓi ɓɛg ànɛ a mɔ̀ɔ rì mɛ̀rɔ̀g kɔ̀ɔ kòm ɓyɔ.

⁷ Yɛ̀ɛ Man à jɔ̀ɔ̀ à ŋwàɗkà sìtam̀ à kìnìn, ǹwog di nyàm ì kìnìn ì kpaa lɛ: Yu!

⁸ Fɔɔnnɛ ǹghɛngà zòm i kìmbɛ̀rɛ̀; nyoo ì zòm inɛ̀n ì ɓaghà ɓi mis yɛ̀ɛ rùnì. Ŋwaànɛ à ɓaghà miì aɗyoo ɗii lɛ rìwu, kìlɔ̀ŋ ki nyɔ̀ɛ̀y ki nɔɔ̀nɔ̀ɔ̀tìì nyi ajɛ̀m. Fɔɔnnɛ ɓɛ faghà ɓɔ ìtèɗ ɓi kìlànà kìfog ki ɓi ɓìlànà ɓi zi ɓi kinìn lɛ ɓɛɛ cuùsi ɓum lɛ rì gàfàg, rì zày, rì tìroɓ ti ceeceèrɛ̀n, rì nyàm yi ɓaaɓanɛ̀n yi ɓi ziinɛ.

⁹ Yɛ̀ɛ Man à jɔ̀ɔ̀ à ŋwàɗkà sìtam̀ à kìtaǹ, nni ǹghɛngà mɛ̀ghay mɛ ɓumɓɛ ɓɛ cuusìghà ɓisuu jɛ̀ɛ̀ ì Bɛ̀ll, rì ɓisuu riɓa ɗyaa ɗi ɓɛ resìghà lɛ ɓɛ ri ɓɛ̀wusìnɛ̀ɗ ɓɛ Kiris. Mɛ̀ghay mɛ̀n mɛ ɓaghà ɓi jàŋ inɛ ɓɛ ntɔ̀ngì ɓìtuwe ɓi riɓɔgsì ɗi Bɛ̀ll fɛlɛ yì azi.

¹⁰ Ɓɛ nyàmgà jɛ̀ɛ̀ aɗyoo lɛ: Wɔ̀ Kan ànɛ ù rì ǹtɛnɛn, ù ki ɓa kɔɔ̀kɔɔ̀ à Bɛ̀ll, ù rì ɓiì ɓooɓoŋ̀zì ɓɛ̀yɔ̀m, ɗì rìrɔ̀ŋ ɗi bwaɓ yis yi ɓumɓɛ ɓi ziinɛ ɓɛ yogsìghà à kpaŋ fin?

¹¹ Fɔɔnnɛ ɓɛ falàkà ɓɔ ɓɛ̀kàɓà ɓɛ puɓ ɓɛ tɔg ɓɔ lɛ ɓɛɛ ka ɓoŋdi ti lɛ tɛ̀tɛ̀rɛ̀ɛ̀ maa cààmɛ̀n lɛsàg à kpaŋ yɛ̀ɛ bàlì ì ɓɛ̀reŋkàŋ ɓaa ɓɛ kisay rì ɓɛ̀geni ɓaa ɓɛ ɓum ɓɛ ghɛɛ̀sɛɛ girig kì cuusii fɛlɛ yɛ̀ɛ ɓɛ cuusìghà ɓɔ, yɛ̀ɛ raɗ.

¹² Nni ǹghɛngà yɛ̀ɛ Man à jɔ̀ɔ̀ à ŋwàɗkà sìtam̀ à kìtaàfog, fɔɔnnɛ zi i nyɛ̀ŋɗɛ̀ngà lɛɛ̀gwey, ŋwos a lɔ̀ɔ̀ghrɛ̀n ǹfin yɛ̀ɛ kìlàà ki lɛ mɛ̀rin, ŋwii à sug bimiɗ lɛ zyɔŋŋ yɛ̀ɛ bwaɓ.

¹³ Tyɔɛy ti aɗyoo ti ki kɔ̀ɔkɔsɛ̀n yì di tyɛɛ̀ rààraa ɓi zi lɔŋ yɛ̀ɛ ǹɗyèm wu firònì wu coo bɛ̀ɓ yɛ̀ɛ nyɛ̀ɛnyɛŋzì wu ti wu raàsàg tìrònì.

¹⁴ Fɔɔnnɛ ɗyoo ɗi ghɛŋìghà yɛ̀ɛ kaàtà ànɛ ɓɛ taagh yɛ̀ɛ kìkàrà; dòn yìcèm, rì ɓìrìŋ ɓi riɓày ɓi pɛsàg ɓi mɛ̀kɔ̀ɔ̀ mɛ ɓyɔ.

¹⁵ Mɛ̀fòm mɛ ɓi ziinɛ, rì ɓìtèetèɗ ɓi ɓum, ɓɛ̀kɔ̀mɛ̀n ɓɛ̀sujàà, ɓɛ̀guŋgum, ɓɛ̀tèteɗ, ɓɛ̀kpàn ɓɛ̀cèm rì ɓumɓɛ ɓɛ yin ɓɛkpàn, ɓɛ nyamzàkà lɛ rì ɓi bùù rì ɓi bagsɛn yi mɛɓan mɛ ɓi dòn.

¹⁶ Di ɓɛɛ̀ kpaakpaa dòn rì mɛ̀ɓan lɛ: Kpìlaaghna ɓìsi ɓi nyoo, ɓi lɔg ɓìsi di tyɛ̀ ki wuɓsɛn ti ìsu wu roànɛ à kɔ̀kɔrii ɓi-kɔ̀ɔ̀ wu rilàmì, tyɛ̀ ki ki wuɓsɛn ribaŋì ɗi Man à jɔ̀ɔ̀;

¹⁷ ɓisuulɛ coo ŋwos a rìbaŋì ɗyaa a mɛ kpaŋ, nni ghɛn yɛɛ ri ɓiì cenɛɛ?

« Roimhe

Air adhart »

Bible Society of Cameroon

Lean sinn:

Ceanglaichean taic

Sanasan