ÀPÒKÀLIƁSƐ̀ 4 - Bafia Nouveau Testament

Ìkɔ̀ɔ̀ wu rilàmì wu Bɛ̀ll rì ɓyom ɓi ɓyɛɛ̀ ɓɔɔɓɔgsì Bɛ̀ll ɓi ɗyoo ɓi ɗùm

¹ Ajɛ̀m ìnɛn nnɛ m̀pɛ̀ɓsɛ̀ngà, ǹghɛn ìsuunaa kìkpaŋ ɓi ɗyoo ɓi ɗùm, jɛ̀ɛ̀ ì ǹtonto ìnɛ ǹwokà di ì tòòghrɛɛ rì mɛ̀ ì ɓaghà yɛ̀ɛ ɗyam ɗyɛɛ̀ɗi ɓɛɛ̀ rɔŋɗɔ̀ŋ ì kpaakpàà lɛ: Ɓɔghay fɛ di nɗesi wɔ̀ ɓìɓan ɓi ɓi ri ɓiì kìlɛɛ ɓi mɛ̀ru mɛ asu.

² Fɔɔnnɛ Ǹghay à ghàskà kìsɛnì ɓi mɛ̀, ǹghɛn ìkɔ̀ɔ̀ wu rilàmì wɔɔ ɓi ɗyoo, mum miì ǹkɔ̀kɔriyɛn.

³ Ŋwaànɛ à kɔ̀kɔ̀rìghà ànɛn ɓi-kɔ̀ɔ̀ wu rilàmì à ɓaghà ɓi mis yɛ̀ɛ gɔ̀g yi lònlomɛn yi lɛ rì Zyaspɛ̀ rì Sàrìdwanà; fɔɔnnɛ ǹsyèɗ wu wu lonlòmgà ɓi mis yɛ̀ɛ gɔ̀g ìnɛ ɓɛɛ̀ regi lɛ èmèroòdɛ̀ wu ceŋzɛ̀ngà ìkɔ̀ɔ̀ wu rilàmì wuncèm.

⁴ Mɛ̀kɔ̀ɔ̀ mɛ rilàmì mɛdɛŋ rìtin ɗì mɛnin mɛ ceŋzɛ̀ngà ìkɔ̀ɔ̀ wu rilàmì wu ǹtonto; ɓìtùg ɓi ɓum rìtin ɗì ɓinin ɓi ɓaghà ɓìkɔ̀kɔriyɛn ɓi mɛ̀kɔ̀ɔ̀ mɛn, ɓi waatɛ̀n ɓìlàà ɓi puɓ, ɓyɔ tì rì ɓɛ̀tàm ɓɛ gol ɓi mɛ̀to.

⁵ Ɓi-kɔ̀ɔ̀ wu rilàmì wiǹ, ŋwàaŋwàɗ à ŋwàŋwàɗkà, gom, rì baàbàn ɓi fafàŋìghày miì. Ɓɛ̀lamɓà taàɓɛ̀ɛ̀ ɓɛ roòròò lɛ pàŋ pàŋ asu wu ikɔ̀ɔ̀ wu rilàmì, ɓɛ̀lamɓà ɓɛǹ ɓɛ ri mɛ̀ghay mɛ Bɛ̀ll mɛ kitaàɓɛ̀ɛ̀.

⁶ Tì tì fɛlɛ asu wu ikɔ̀ɔ̀ wu rilàmì, jàŋ i ghay lɔŋ yɛ̀ɛ rìɓày ànɛ à rì ɓɛ̀ŋwii rì ɓɛ̀ŋwii, ì lònlòm yɛ̀ɛ maa kìpɛsà à ŋwii. Ɓi nyìinyìm à ìkɔ̀ɔ̀ wu rilàmì rì ɓi mɛ̀wɔŋì, nyàm yi ɓaghà yinin, yɔ yì ronɛn ri mis jàŋ bimiɗ lɛ, rì asu rì ajɛ̀m.

⁷ Nyàm ì ǹtonto ì pisɛ̀ngà kìmonɗo, ì kìɓɛ̀ɛ̀rɛn ì pisɛ̀n man à sanìnya, ì kìraa ì ɓaghà rì ìsu yɛ̀ɛ wu mum, nyàm ì kìnìn ì ɓa yɛ̀ɛ bèè i fììlì ìnɛ yɛɛ̀ lɛŋlɛ̀ŋ.

⁸ Nyàm yi kinìn yiǹ yi ɓalàkà lɛ, nyàm bog mɛ̀keɓ taàfog, yɔ̀ mis nyoo bimiɗ lɛ rì ɓi ɗùm, rì ɓi ɓyàs. Fɔɔnnɛ yɛ̀ɛ ìru yɛ̀ɛ ŋwos, ɓɛ fɔli ɓi rikakàlì lɛ: Kan Bɛ̀ll à ìtèɗ wucèm à rì ǹtɛnɛn, à rì ǹtɛnɛn, à rì ǹtɛnɛn, Bɛ̀ll ànɛn yɛɛ, ɓaghà nnyɛɛ ri nnyɛɛ̀ ki yùyuiy.

⁹ Nni cààmɛ̀n kìcèm ki nyàm yiǹ yi fafàghà roànɛ à kɔ̀kɔrii ɓi-kɔ̀ɔ̀ wu rilàmì, ànɛ à rì cem fiɗyàɓ fikɔ̀ɔ̀ lɛ, rì rìkem, rì bɔgsɛ̀n,

¹⁰ ɓìtùg ɓi ɓum ɓi ritin ɗì ɓinin ɓi nti ɓi kuŋɗàg roànɛ à kɔ̀kɔrii ɓi-kɔ̀ɔ̀ wu rilàmì asu, ɓi ɓɔɔ̀ɓɔ̀gsì roànɛ a ghɛghɛɓ fiɗyàɓ fikɔ̀ɔ̀, ɓi nagì ɓɛ̀tàm ɓaa asu wu ikɔ̀ɔ̀ wu rilàmì di ɓyɛɛ̀ kpaakpaa lɛ:

¹¹ Wɔ̀ Kan wìs, Bɛ̀ll wìs, ù ghɛ̀ɛ̀sɛɛ lɛ, ɗì rìkem, rì bɔgsɛ̀n, rì ìtèɗ, ɓisuulɛ wɔ̀ yɛɛ kighà ɓyom ɓìcèm, yɛ̀ɛ ki kɔngà wɔ̀ lɛ ɓyom ɓìn ɓyɛɛ ɓa, nnɛ ɓi kilɛ̀ngà.