Bìoball air-loidhne

ÀPÒKÀLIƁSƐ̀ 22 - Bafia Nouveau Testament

¹ Fɔɔnnɛ ŋwaà-fìtom a rèsìghà mɛ̀ rìɓày à mɛ̀nig mɛ cɛɓ, ànɛ à ɓaghà lɛ saŋì-saŋì yɛ̀ɛ kìpɛsà ki ŋwii; rìɓày ànɛn à kpaŋkpàŋgày ɓi-kɔ̀ɔ̀ wu rilàmì wu Bɛ̀ll rì wu Man à jɔ̀ɔ̀.

² Ɓi nyìinyìm à ǹlɛmɓog wu bàn rì ɓi mɛ̀wɔŋì mɛ riɓày mɛ kiɓɛ̀ɛ̀, innɛ kìte ki cɛɓ ki ri; kìte kiǹ ki ti ki wumgì gɛ̀n ǹtɛ̀ɗ ɗì yiɓɛɛ̀ ɓi bèg, ŋwii bimiɗ, ki wum gɛ̀n bog. Tyɛn ti kite kiǹ tyɛɛ̀ti ɓɛ ti ɓɛ wɔɔ̀zàg ɓumɓɛ ɓi ɓìlɔ̀ŋ rì tyɔ.

³ Ǹcɛ̀m àa ɓa ti ɓi. Ikɔ̀ɔ̀ wu rilàmì wu Bɛ̀ll rì wu Man à jɔ̀ɔ̀ wu ri ɓa ɓi bàn ìnɛn, fɔɔnnɛ ɓɛ̀kìì-ɓìsay ɓɛ Bɛ̀ll ɓɛ ri ɓɔɔɓɔgsì nyi.

⁴ Ɓɛ ki ghɛn ìsu wii, ɗii ɗìì ɗi ɓa ɗìkànɛn ɓi mɛ̀su maa.

⁵ Ìru waa ɓati ɓi, ɓumɓɛ̀n ɓɛ̀ kɛɛ̀ ɓati ri zày ì kìtɛɛtɛn ki lamɓà, nsoò ki ŋwos ɓisuulɛ Kan Bɛ̀ll à rì ɓɔ ɓiì kpeekpeŋzì rì kìtɛɛtɛn kii, fɔɔnnɛ ɓɛ ɓiì làmii fiɗyàɓ fikɔ̀ɔ̀.

Deɓ yi siitòn

⁶ Nni à kpaaghà mɛ̀ lɛ: Jɛ̀ɛ̀ yi yi ri miì, yi ki ɓa saaɗ. Kan Bɛ̀ll ànɛ ǹghay wìì a kɛ̀ɛ̀sag ɓɛkpaŋzì-ɓìɓan, nnyɛɛ nɗomiì mum wiì à fìtom lɛ a resi ɓɛ̀kìì-ɓìsay ɓii ɓiɓan ɓi ɓi ri ɓiì kìlɛɛ di maa cààmɛ̀n à ghaghii.

⁷ Mɛ̀ yɛɛ tiì lɔɔ ɓi cààmɛ̀n ki. Mààgh rì ŋwaànɛ à ɓèŋi jɛ̀ɛ̀ yi kaàtà ànɛ; yi ri jɛ̀ɛ̀ yi yɛɛ̀ kpaakpaŋzì ɓìɓan ɓi Bɛ̀ll.

⁸ Mɛ̀ Zyaŋ, ǹkìghà lɛ ǹwog, ǹki ghɛn ɓiɓan ɓiǹ. Nni yɛ̀ɛ ǹwokà ɓyɔ ǹki ghɛn, nni ǹkpìghà a mɛ̀kòò mɛ ŋwaà-fìtom anɛ à rèrèsìghà mɛ̀ ɓyɔ lɛ mɓɔgsi nyi.

⁹ Kìɓan kifog à kpaaghà mɛ̀ lɛ, kɔ̀ɔ fèghrɛn ki kìi com kidɛŋ fɔlɔɔ! Ǹɗì lɛ, mɛ̀ reŋkàŋ wɔ̀ɔ̀ a kìsay, ǹki ɓati reŋkàŋ à ɓɛ̀goni ɓɛ lɛ ɓɛ̀kpaŋzì-ɓìɓan, rì ɓɛ̀roɓɛ ɓɛɛ̀ ɓèŋɓeŋ jɛ̀ɛ̀ yi ɓi kaàtà ànɛ, Bɛ̀ll innɛ ɓɔgsi.

¹⁰ Fɔɔnnɛ à kpaaghà mɛ̀ lɛ: Kɔ̀ɔ nyam jɛ̀ɛ̀ yi ɓi kaàtà ànɛ yi yɛɛ̀ kpaakpaŋzì ɓìɓan ɓi Bɛ̀ll ɓisuulɛ cààmɛ̀n ki ti jàŋbog.

¹¹ Ŋwaànɛ à rì kìɓeɓtàg ki mum, a kɛnkɛn lɔŋ ɗi rìkìkì ɗi ɓiɓan ɓi ɓeɓtɛn asu, ŋwaànɛ à rì ǹtɔɓɓakɛn, a tɔɔ̀tɔ̀ɓɓɛ̀n lɔŋ, wɔ̀lɛ ŋwaànɛ à rì syeesyee à mum a kɛnkɛn asu ɗì rìkìkì ɗi ɓiɓan ɓi syeesyee, roànɛ à rì ǹtɛnɛn, a kaà lɔŋ lɛ a ɓa ti ntɛnɛn.

¹² Ghɛna, mɛ̀ yɛɛ̀ yùyuiy lɔɔ ɓi cààmɛ̀n ki, nki yùyuiy rì mɛ̀lèɓ mɛm̀ lɛ nleɓ mum bimiɗ lɔŋ yɛ̀ɛ rìkì ɗii ɗi ri.

¹³ Mɛ̀ yɛɛ ri Alfà rì Òmegà, ŋwaà ǹtonto rì ŋwaà siitòn, rìtumɛ̀n ɗì rìsugtɛ̀n.

¹⁴ Mààgh rì ɓɛ̀roɓɛ ɓɛ soò ɓɛ̀kàɓà ɓaa lɛ di ɓɛɛ fa ɓɔ ìtèɗ wulɛ ɓɛɛ ɗi kìte ki cɛɓ, ɓɛ ki ɗiŋi ɓi mɛ̀suunaa mɛ gari lɛ ɓɛɛ kɛǹ ɓi bàn.

¹⁵ Ɓɛ̀kìì-ɓìɓan ɓi ɓeɓtɛn rì ɓɛ̀kìì-majìg, rì ɓɛ̀kìì-tìsɔ̀mɔ̀g, rì ɓɛ̀wolì-ɓum, rì ɓɛ̀kìì-ɓìnùn, rì mum ǹcèm ànɛ à ti à keesàg rìkì ɗi ɓɛpwàà, ɓɛ ri ɓiì rɔ̀ɓi ɓi dan, ɓɛ̀ kɛɛ̀ ɗiŋi ɓi bàn ìnɛn.

¹⁶ Mɛ̀ Yeesus, mɛ̀ yɛɛ nɗomiì mum wɛm̀ à fìtom lɛ a yu mìni kì rèsii ɓiɓan ɓiǹ, ɓi ɓìseŋi ɓyɛ̀m. Ǹɗì maa dòòridoòrì ànɛ ɓi boo ì mum ì Davit, ǹki ɓati fyɛy fi fyɛɛ̀ lònlom sariwa.

¹⁷ Ǹghay rì gurà ɓyɛɛ̀ kpaakpaa lɛ: Yuiy. Ŋwaànɛ à woogh kìɓan kiǹ à kpaa girig lɛ yuiy. Ŋwaànɛ a wowog kinɔli, à ghɛ̀ɛ̀sɛɛ kì yùu, ŋwaànɛ à kɔ̀ni, à teɗ mɛ̀nig mɛ cɛɓ zɛy, kɛ̀ɛ kòòsɛn.

¹⁸ Ǹkalii mum ǹcèm ànɛ à woogh jɛ̀ɛ̀ yi yɛɛ̀ kpaakpaŋzì ɓìɓan ɓi Bɛ̀ll, yi yi ri ɓi kaàtà ànɛ lɛ yi ri saaɗ; i ŋwaà foŋdii com kidɛŋ miì, Bɛ̀ll à foŋdii gɛ ŋwaànɛ̀n miì mɛ̀tɔɓ mɛ kaàtà ànɛ a kpaakpàà.

¹⁹ I mum à ki pisii ɓìɓan ɓidɛŋ ɓi kaàtà ànɛ a kpaakpaŋzì ɓìɓan ɓi Bɛ̀ll ànɛ, Bɛ̀ll à pisii gɛ gàɓ yìì inɛ ɓi kìte ki cɛɓ rì ɓi bàn ì ntɛnɛn ɓi ɓɛ kalii, ɓi kaàtà ànɛ.

²⁰ Roànɛ a kalag lɛ ɓiɓan ɓiǹ ɓi ri saaɗ a kpaaghi lɛ: Ɛ̀ɛ̀! Mɛ̀ yɛɛ̀ yùyuiy lɔɔ ɓi cààmɛ̀n ki. Ààmɛ̀n! Yuiy ɓà, Kan Yeesus!

²¹ Geesɛ̀n ì Kan Yeesus yɛ̀ɛ ɓa rì ɓum ɓɛ̀cèm!

« Roimhe

Air adhart »

Bible Society of Cameroon

Lean sinn:

Ceanglaichean taic

Sanasan