ÀPÒKÀLIƁSƐ̀ 21 - Bafia Nouveau Testament

Ɗyoo ɗi nyɔn ɗì zi ì nyɔn

¹ Fɔɔnnɛ ǹghɛngà nyɔɔnyɔn à ɗyoo rì nyɔɔnyɔn à zi, lɛ ɗyoo ɗi ǹtonto rì zi i ǹtonto ɓi silìghà, nsoò rìɓày à kìkòn kɛ̀ɛ ɓa ti.

² Nni ǹghɛngà bàn ì ǹtɛnɛn, nyɔɔnyɔn à Yorisalɛm, m̀pègsɛn yɛ̀ɛ gurà ànɛ à rɛ̀ŋɗɛɛ ɓisuu yii wiì, di a sɛnsɛn yi aɗyoo, di à pɛ̀sɛɛ yì jàŋbog rì Bɛ̀ll.

³ Fɔɔnnɛ ǹwokà di coo jɛ̀ɛ̀ ki riì ɓi-kɔ̀ɔ̀ wu rilàmì, ki kpaakpàà lɛ: Kìnuugh ki Bɛ̀ll kɛɛ̀ki, ǹɗaŋ ɗi ɓum ɓii; à rì ɓiì kɔ̀rii nɗaŋ ɗi ɓɔ, ɓɔɔ ɓa kìlɔ̀ŋ kii; fɔɔnnɛ Bɛ̀ll nyimiɗ a rì ɓiì ɓaà ǹɗaŋ ɗi ɓɔ.

⁴ À ɓiì tɔ̀saagh misì mɛ̀cèm mɛ ɓɔ ɓi mis; fɔɔnnɛ rìwu ɗyaa ɓa ti ɓi nsoò ɓìlɛ̀ɓì, ǹsoò ɓìkiŋ, nsoò rìkɛŋ, ɗyɛ̀ kɛɛ̀ ɓa ti, ɓisuulɛ ɓìɓan ɓi ǹtonto ɓìn ɓi mɛ ghaàgh.

⁵ Fɔɔnnɛ roànɛ à ɓaghà ǹkɔ̀kɔriyɛn ɓi-kɔ̀ɔ̀ wu rilàmì à kpaaghà lɛ: Ɓyom ɓìcèm ɓyɛɛ̀ ɓi m̀pɛ̀ɛ̀zii lɛ nyɔn; à ki kpaa lɛ: Kàna! ɓisuulɛ jɛ̀ɛ̀ yi yi ri miì, yi ki ɓa saaɗ.

⁶ Nni à kpaghà mɛ̀ lɛ ki leègh. Ǹɗì Alfà rì Òmegà, rìtumɛ̀n ɗì rìsugtɛ̀n. Ŋwaànɛ a wowog kinɔli, nnɛ ǹɗì ɓiì faà ǹsim à mɛ̀nig mɛ cɛɓ zɛy rì zɛy, kɛ̀ɛ kòòsɛn.

⁷ Ŋwaànɛ à rì ɓiì yagsaagh nnyɛɛ ri ɓiì fɔ̀ni mɛwus mɛǹ, ǹɗì ɓiì ɓaà Bɛ̀ll wìì, nyii ɓa mɛ̀ man.

⁸ Wɔ̀lɛ ɓi ɓɛg ànɛ a ɓɛ̀riris, rì ɓumɓɛ ɓɛ gherɛɛ ɓi, rì ɓɛ̀kìì-ɓìɓan ɓi ɓeɓtɛn, rì ɓɛ̀wolì ɓum, rì ɓɛ̀kìì-tìsɔ̀mɔ̀g, rì ɓɛ̀kìì-majìg, rì ɓɛ̀kìì-ɓìnùn, rì ɓɛ̀pwààpwaà ɓɛ̀cèm, gàɓ yàà i ɓaa gɛ ɓi kìràà ki ɗuu ɗi ghɛ̀g-ghɛ̀g rì ǹdùsi, kɛɛ ri rìwu ɗi kiɓɛ̀ɛ̀.

⁹ Fɔɔnnɛ kìbog ki ɓi ɓum ɓɛ titom ɓɛ kitaàɓɛ̀ɛ̀ ɓɛ ɓɛ ɓaghà rì ɓɛ̀ɓeŋ ɓɛ̀ rongakɛn ɗi mɛ̀tɔɓ mɛ kitaàɓɛ̀ɛ̀ mɛ siitòn, ki yughà mɛ̀ kìkpaa lɛ: Yu nɗesi wɔ̀ gurà, gili Man à jɔ̀ɔ̀.

¹⁰ Fɔɔnnɛ à tekà mɛ̀ ɓi nghay, à kɛ̀n ɗì mɛ̀ ɓi coo kiteŋtèèŋ ki dòn aɗyoo, nni à rèsìghà mɛ̀ bàn ì ǹtɛnɛn inɛ lɛ Yorisalɛm, di yɛɛ̀ sɛnsɛn yi aɗyoo, di ì pɛ̀sɛɛ yì jàŋbog rì Bɛ̀ll.

¹¹ Kìtɛɛtɛn ki rigwey ɗi Bɛ̀ll ki lonlòmgà ɓi bàn ìnɛn; rìlòm ɗi ì lònlòmgà ɗi ɓaghà yɛ̀ɛ gɔ̀g ì ŋwèrim-ŋwèrim, ɗi ɓa tì yɛ̀ɛ gɔ̀g ìnɛ lɛ zyaspɛ̀ ìnɛ yɛɛ̀ lònlom yɛ̀ɛ kìpɛsà ki ŋwii.

¹² Bàn ìnɛn ì ɓaghà rì coo kiteŋtèèŋ ki gari ki ki ceŋzɛ̀ngà yɔ̀; gari inɛ̀n ì ɓaghà mɛ̀suunaa ǹtɛ̀ɗ rì mɛɓɛɛ̀, ɓum ɓɛ titom ntɛ̀ɗ rì ɓɛɓɛɛ̀ a mɛ̀suunaa mɛ̀n. Mii mɛ ɓaghà mɛ̀kàngakɛn a mɛ̀suunaa, mii mɛ̀n mɛ ɓaghà mii mɛ mɛpwìɗ ǹtɛ̀ɗ rì mɛɓɛɛ̀ mɛ ɓɔn ɓɛ Isirayɛl.

¹³ Mɛ̀suunaa mɛ̀n mɛ ɓaghà lɛ, mɛraa a rìkpagì ɗi ŋwos, mɛraa ǹkòkwey, mɛraa duŋzi, mɛraa a rìnɔ̀ŋɗàg ɗi ŋwos.

¹⁴ Bàŋbàŋ yi gari i bàn yi ɓalàkà yì toŋɛn ɓi ɓyoo gɔ̀g ǹtɛ̀ɗ ɗì ɓiɓɛɛ̀ aɗyoo, mii mɛ ɓɛkɛ̀nì-fìtom ɓɛ Man à jɔ̀ɔ̀ ntɛ̀ɗ rì ɓɛɓɛɛ̀, mɛ ɓalàkà mɛ̀kànɛn ɓi gɔ̀g yiǹ.

¹⁵ Roànɛ à tòtòkà rì mɛ̀ à ɓaghà rì kìsyòŋ ki gol ɓi sìg à vèg, lɛ a feg lɛ rì bàn, rì mɛ̀suunaa mɛ gari, rì bàŋbàŋ yi ɓi gari inɛ̀n.

¹⁶ Bàn ì ɓaghà yɛ̀ɛ fookɔnà, rìràɓ ɗi yɔ̀ ɗì rìfùùrɛ̀n ɗi yɔ̀, ɓi ɓaghà com kìfog. Fɔɔnnɛ à fèkà yɔ̀ ri kìsyòŋ kiǹ, ì kpaŋ ɓɛ̀kilòmɛɛ̀tɛ̀rɛ̀ tɔɔsìm bog rì ɓɛ̀hɔnɗɛ̀ɗ ɓɛɓɛɛ̀ ɓi rìràɓ; rìràɓ, ɗì yɔ̀ ɗì rìfùùrɛ̀n ɗi yɔ̀ ɗì rìteŋmɛ̀n ɓi ɓaghà com kìfog.

¹⁷ À fèkàkà girig gari, ì kpaŋ ɓɛ̀mità mɛ̀tin mɛraa rì ɓɛ̀mità ɓɛtaǹ; vèg ìnɛ ŋwaà-fìtom a ɓaghà rì yɔ̀, ì rì vèg ì ɓum.

¹⁸ Bàŋbàŋ yi gari i bàn ìnɛn yi ɓaghà yìtoŋɛn ɗi gɔ̀g ìnɛ lɛ zyaspɛ̀ fɔɔnnɛ bàn yɔ̀miɗ i ɓaghà ǹtoŋɛn ɗi gol ì ghaàghaŋì, ì lònlòm yɛ̀ɛ ŋwii.

¹⁹ Ɓyoo gɔ̀g ɓi bàŋbàŋ yi gari ì bàn yi ɓalàkà miì yìtoŋɛn aɗyoo, yi ɓaghà yì rɛ̀gakɛn ɗi gɔ̀g yi ŋwèrim-ŋwèrim mɛ̀kuu mɛ̀cèm; coo gɔ̀g ì ǹtonto ìnɛ ɓi gɔ̀g yiǹ ì ɓaghà ǹɗɛ̀ŋɛn ɗi zyaspɛ̀, ì kìɓɛ̀ɛ̀ ǹɗɛ̀ŋɛn ri sàfiir, ì kìraa rì kàlsèdwan, ì kìnìn rì èmèroòdɛ̀,

²⁰ ì kìtaǹ rì sàrdonis, ì kìtaàfog rì sàrìdwan, ì kìtaàɓɛ̀ɛ̀ ri kìrìzòlit, ì kìtaàraa rì bèril, ì kìtaànìn rì tòpaàzɛ̀, ì kìntɛ̀ɗ ɗi kìrìzòpìraàzɛ̀, ì kìntɛ̀ɗ ɗì bog rì ìyàsɛŋtɛ̀, ì kìntɛ̀ɗ ɗì yiɓɛɛ̀ rì àmètis.

²¹ Mɛ̀suunaa mɛ kintɛ̀ɗ rì mɛɓɛɛ̀ mɛ ɓaghà tìcaka ntɛ̀ɗ rì tiɓɛɛ̀, ìsuunaa wùcèm wu ɓalàkà fìcaka fifog; ǹlɛmɓog wu Bàn wu ɓaghà wù kìyɛn ɗi gol ì ghaàghaŋì lɔŋ yɛ̀ɛ ŋwii à ǹghɛɛghɛnɛ̀n lɛ kpeŋkpèŋ̀ŋ̀.

²² Ǹghɛngà ɓi naà-Bɛ̀ll wɔɔ ɓisuulɛ Kan Bɛ̀ll à ìtèɗ wucèm rì Man à jɔ̀ɔ̀ ɓɔ yɛɛ ri naà-Bɛ̀ll ìnɛ wɔɔ.

²³ Bàn ìnɛn ì yin ɓiì tɔtɔgh lɛ ŋwos nsoò lɛ ŋwii ɓyɛɛ kpeŋzi yɔ̀ ɓisuulɛ rìkem ɗi Bɛ̀ll ɗyɛɛ̀ kpeekpeŋzì yɔ̀, Man à jɔ̀ɔ̀ à ki ɓa lamɓà à bàn ìnɛn.

²⁴ Ɓìlɔ̀ŋ ɓi ɓi ziinɛ ɓi ri kɛ̀ɛ̀ghii gɛ ɓi kìtɛɛtɛn ki bàn ìnɛn, mɛ̀fòm mɛ ɓi ziinɛ mɛ ki yùu gɛ wɔɔ ri ìkum waa.

²⁵ Mɛ̀suunaa mɛ bàn ìnɛn maa sìmɓɛɛ gɛ ɓi ri ŋwos ɓisuulɛ ìru waa ɓatii gɛ ɓi wɔɔ.

²⁶ Ɓɛ ri yùu gɛ wɔɔ lɛ rì gol rì ìkum wu ɓilɔ̀ŋ.

²⁷ Com ki ki ri rì tìfin kaa ɗiŋi ɓi wɔɔ, nsoò ŋwaànɛ à ti à kìlàg ɓìɓan ɓi ɓeɓtɛn ɓi mis mɛ Bɛ̀ll, rì ɓɛ̀pwàà, lɔŋ ɓumɓɛ mii maa mɛ ri mɛ̀kànɛn ɓi kaàtà à cɛɓ à Man à jɔ̀ɔ̀ ɓɔ rì ɓɔ, ɓɛɛ ri ɗiŋi ɓi bàn ìnɛn.