Bìoball air-loidhne

ÀPÒKÀLIƁSƐ̀ 2 - Bafia Nouveau Testament

Ɓɛ̀kaàtà ɓɛ à romi Ɓìseŋi ɓi kitaàɓɛ̀ɛ̀

¹ Kàna ŋwaà-fìtom anɛ ɓi Kìseŋi ki Kiris ki a Efɛɛzɛ lɛ: Roànɛ à wowotii tyɔɛy ti kitaàɓɛ̀ɛ̀ ɓi weèlem wìì, roànɛ a kɛ̀ɛ̀kɛɛ ɓi nyìinyìm à ɓìrɛsì ɓi lamɓà ɓi gol taàɓɛ̀ɛ̀ a kalag fɛlɛ̀:

² Ǹ-yii mɛ̀kìkìì mɔɔ, ǹ-yii kìsay kɔɔ rì kìsììrì kɔɔ. Ǹ-yii lɛ ù yin lɛ ù cenɛ̀n ɓìɓeɓtàg ɓi ɓum, wɔ̀ɔ nfèèghrɛ̀ ɓumɓɛ ɓɛ nkpaakpaa lɛ ɓɔɔ ri ɓɛ̀kɛ̀nì-fìtom, kɔm̀ lɛ ɓɛ yin ɓɛkɛ̀nì-fìtom, fɔɔnnɛ wɔ̀ɔ nghɛɛ lɛ ɓɛ ri ɓɛ̀pwààpwaà.

³ Ù rì rì kìsììrì, wɔ̀ɔ ǹwoogh mɛ̀tɔɓ ɓisuu ɗii ɗyɛ̀m, kɔ̀ɔ ki càrɛn.

⁴ Wɔ̀lɛ kìɓan ki ǹɗì wɔ̀ rì kɔ ki ri lɛ wɔ̀ɔ ncàri ǹkɔ̀nɛ̀n ànɛ ù ɓaghà rì nyi ǹtonto.

⁵ Yiti min jàŋ inɛ wɔ̀ɔ nkpìi, u lɔgti rìkì, ù tumɛn rìkìkì ɗi ɓiɓan ɓi ù kìkìghà ǹtonto, kɛ̀ɛ̀ fɔlɔɔ di ǹɗì ɓiì yùu a lɔ̀ŋkɔɔ, m̀pisì kìrɛsì ki lamɓà wɔ̀ɔ̀ jàŋ inɛ ki ri, di ù ɓèni kìcenɗɛɛ.

⁶ Nsoò fɔlɔɔ kìɓan ki syeesyee ki ù rì rì kɔ ki ri lɛ, ù ɓèèzɛɛ mɛ̀kìkìì mɛ Nikolayit mɛ mɛ ti mɛ ɓeɓkì girig mɛ̀.

⁷ Ŋwaànɛ à rì rì mɛ̀reè à ghɛ̀ɛ̀sɛɛ kì woògh com ki Ǹghay a kakali Ɓiseŋi ɓi Kiris, ŋwaànɛ à rì ɓiì yagsaagh innɛ ǹɗì ɓiì faà kìɗùn ki kite ki cɛɓ ki ki ri ɓi pàràɗis à Bɛ̀ll.

Kaàtà à Kìseŋi ki a Simirinɛ

⁸ Kàna ŋwaà-fìtom anɛ ɓi Kìseŋi ki a Simirinɛ lɛ: Mum ànɛ à rì lɛ nyi ŋwaà ǹtonto, nyi ŋwaà siitòn, mum ànɛ à wughà à ki ghèmɓɛn, a kpaaghi fɛlɛ:

⁹ Ǹ-yii ǹtɔɓ wu ɓɛɛ̀ kìki wɔ, rì kìsowà kɔɔ, kɔm̀ lɛ ù rì rì ìkum; ǹ-yii lɛ ɓumɓɛ ɓɛɛ̀ reereŋɗɛ̀n lɛ ɓɛ ri Ɓɛ̀yudɛ̀n ɓɛ̀ kɛɛ̀ ki ɓa Ɓɛ̀yudɛ̀n, ɓɛɛ yooyogsì wɔ̀ ɗii; ɓɛ ri lɔŋ ntaŋzɛn wu Satàn.

¹⁰ Kɔ̀ɔ risi ntɔɓ wu ù rì ɓiì tulɛɛ ri wɔ. Ghɛna lɛ Satàn a rì ɓiì pìigh kigwey ki ɓi mìni ɓi naà-zày lɛ a feèghrɛn mìni, fɔɔnnɛ ɓì rì ɓiì tulɛɛ ri ǹ-yeesɛ̀n ànɛ à rì ɓiì finɛɛ mɛru ǹtɛ̀ɗ. Sììrɛn ɓi rìgherɛ̀n à kpaŋ a rìwu, fɔɔnnɛ ǹɗì wɔ̀ ɓiì faà tàm à cɛɓ.

¹¹ Ŋwaànɛ à rì rì mɛ̀reè à ghɛ̀ɛ̀sɛɛ kì woògh com ki Nghay a kakali ɓiseŋi ɓi Kiris, ŋwaànɛ à rì ɓiì yagsaagh innɛ rìwu ɗi kiɓɛ̀ɛ̀ ɗyaa kòm ɓi.

Kaàtà à kìseŋi ki a Pɛrigam

¹² Kàna ŋwaà-fìtom anɛ ɓi kìseŋi ki a Pɛrigam lɛ, fɛlɛ nnɛ roànɛ à rì rì gàfàg ìnɛ ì rì ǹto lɛ pyɔŋpyɔŋ, yɔ̀ mpooyɛn ɓɛɓɛg ɓɛ̀cèm a kalàg:

¹³ Ǹ-yii jàŋ inɛ ù kɔ̀kɔrii, jàŋ inɛ̀n yɛɛ̀ nnɛ ìkɔ̀ɔ̀ wu Satàn wu rilàmì wu ri, kìɓan kifog ù rì lɔŋ ǹsììrɛn ɓi ɗii ɗyɛ̀m, ù roòzɛ̀ngà ɓi ntyweeyi wu ù rì rì wɔ a lɔ̀ŋkɛm̀, nsoò ɓi mɛ̀ru mɛ ɓɛ wolà wusìnɛ̀ɗ wɛ̀m à ǹtyweeyi ànɛ lɛ Antipas a lɔ̀ŋkin jàŋ inɛ Satàn a kɔ̀kɔrii.

¹⁴ Nsoò fɔlɔɔ, ǹɗì rì ɓìɓan ɓidɛŋ ɓi ɓi ɓeɓi mɛ̀ rì wɔ̀; ù rì foo ri ɓum ɓɛdɛŋ ɓɛ ɓɛɛ̀ nɔ̀ɔnɔɔ̀tì dɔgtɛ̀n ì Balam; Balam àa nɗèsàg Balag lɛ a ki com ki lɛ ɓɔn ɓɛ Isirayɛl ɓɛɛ kɛɓtɛn fìɓàg lɛ ɓɛ ɗii ɓyɛn ɓi nyàm yi ɓɛ funɛɛ ɓi rìɓɔgsì ɗi ɓinùn, ɓɛ ki ɗiŋi ɓi rìkìkì ɗi tisɔ̀mɔ̀g.

¹⁵ Fɔɔnnɛ ù rì girig foo ri ɓumɓɛ ɓɛ siìrɛɛ ɓi dɔgtɛ̀n ì Nikolayit.

¹⁶ Lɔ̀ɔ̀ghrɛn min nɗem, kɛ̀ɛ̀ fɔlɔɔ di nkpaŋkpaŋ wɔ a nyoo lɛ fyɛ̀ɗ, ǹki ɗùùzi ɓumɓɛ̀n wɛ̀y ri gàfàg ìnɛ ì rì mɛ̀ ɓi ŋwɔm.

¹⁷ Ŋwaànɛ à rì rì mɛ̀reè à ghɛ̀ɛ̀sɛɛ kì woògh com ki Ǹghay a kakali ɓiseŋi ɓi Kiris. Ŋwaànɛ à ɓiì yagsaagh ǹfa nyi manà mɛ mɛ ri mɛ̀ nyamɛn, rì gɔ̀g ìmpuɓ; gɔ̀g ìnɛn ì rì rì ɗii ɗi nyɔn miì ɗìkànɛn ɗi ŋwaàdɛŋ à yii ɓi, i ki cee ɓi lɛ ŋwaànɛ ɓɛ faa gɔ̀g ìnɛn.

Kaàtà à Kìseŋi ki a Tyatiir

¹⁸ Kàna ŋwaà-fìtom anɛ ɓi Kìseŋi ki à Tyatiir lɛ: Fɛlɛ nnɛ Man à Bɛ̀ll ànɛ mis mɛ ri yɛ̀ɛ ǹɗòò wu ɗuu, mɛ̀kòò yɛ̀ɛ rìkuu ɗi swiɗ ɗiɗɛŋ, a kalàg:

¹⁹ Ǹ-yii mɛ̀kìkìì mɔɔ, rì ǹkɔ̀nɛ̀n wɔ̀ɔ̀, ɗì rìgherɛ̀n ɗyɔɔ, rì càg kɔɔ ki kisay, rì kìsììrì kɔɔ, rì mɛ̀kìkìì mɔɔ mɛ siitòn mɛ mɛ teghɛɛ mɛ cee mɛ ǹtonto.

²⁰ Kìɓan kifog kìɓan ki ki ɓeɓi mɛ̀ rì wɔ̀ ki ri lɛ, ù ti ù càɗkì giɓ anɛ lɛ Zyezaɓɛl ànɛ à ti à kalàg lɛ à rì ǹkpaŋzì-ɓìɓan lɛ a reresi, à ki syòŋsyoŋ ɓɛ̀kìì-ɓìsay ɓɛm lɛ ɓɛɛ ɗiŋi ɓi tìsɔ̀mɔ̀g ti kìkiyɛn, ɓɛ ki ɗiɗi ɓyɛn ɓi nyàm ìnɛ ɓɛ funɛɛ ɓi rìɓɔgsì ɗi ɓinùn.

²¹ Ǹfaghà nyi cààmɛ̀n ki lɛ a lɔɔghrɛn ǹɗem, kìɓan kifog à kɔ̀ni ɓi lɛ di àa lɔ̀ɔ̀ghrɛɛ nɗem lɛ a caɗ ɓìɓan ɓi tifin ɓi a kìkì.

²² Ghɛna, ǹ-yùu nyi kì nɔ̀ŋzii ɓi ɓyom ɓilɔ̀ŋ lɛ a wog rìkɛŋ lɛɛ̀gwey kɛ̀ɛ̀ rìrɔ̀ɓ, lɛ rì nyi rì ɓumɓɛ à ti à kìlàg fìsɔ̀mɔ̀g rì ɓɔ; i ɓɛ lɔɔ̀ghrɛɛ nya mɛ̀rem ɓɛ caɗ mɛ̀kìkìì maa mɛǹ, fɔlɔɔ nnɛ ki lɔɔ̀sɛ̀n.

²³ Ǹɗì ɓiì cuusii ɓɔn ɓii, fɔlɔɔ nnɛ ɓìseŋi ɓìcèm ɓi ri ɓiì yiì lɛ mɛ̀ yɛɛ ri roànɛ à ti à sɔ̀gì mɛ̀yitì rì ɓìɓan ɓi ɓi ri ɓum ɓi mɛ̀rem ɓiɗùm, fɔɔnnɛ ǹɗì ɓiì lèɓi mum bimiɗ lɔŋ yɛ̀ɛ mɛ̀kìkìì mii mɛ ri.

²⁴ Wɔ̀lɛ ɓi ɓɛg ànɛ a lɔ̀ŋkin, rì ɓum ɓɛmbog ɓɛ̀cèm ɓɛ a Tyatiir ɓɛ ɓì nɔ̀ɔ̀tìghà ɓi dɔgtɛ̀n ìnɛ̀n, kɛ̀ ɓi ki tim lɛ ɓi yi com ki ɓɛ ti ɓɛ regì lɛ ɓìɓan ɓi Satàn ɓi rim, mɛ̀ ǹfoŋdii ɓi mini ǹtɛ̀g wudɛŋ.

²⁵ Kìɓan kifog, com ki ɓì rì rì kɔ kɛɛ̀ki ɓanina rì ìtèɗ, à kpaŋ yɛ̀ɛ ǹɗì ɓiì yùu.

²⁶ Ŋwaànɛ à ɓiì yagsaagh à ɓèŋ mɛ̀kìkìì mɛ mɛ ti mɛ kɔngì mɛ̀ à kpaŋ a rìsugtɛ̀n innɛ ǹɗì ɓiì faà ìtèɗ wu a lami ɓìlɔ̀ŋ.

²⁷ Fɔɔnnɛ à rì ɓyɔ ɓiì kɛ̀ɛkɛɛ̀sì rì ǹkpas wu bɔŋ fɛlɛ yɛ̀ɛ ɓɛɛ̀ weeyi bèè yi ɓɛ yeŋi rì fyòò, lɔŋ yɛ̀ɛ mɛ̀ɛmiɗ ǹtekà ìtèɗ wiǹ ɗì Seŋi wɛ̀m,

²⁸ fɔɔnnɛ ǹɗì nyi ɓiì faà fyɛy fi fi ti fi lomgì sariwa.

²⁹ Mum ǹcèm ànɛ à rì rì mɛ̀reè, à ghɛ̀ɛ̀sɛɛ kì woògh com ki Ǹghay a kakali Ɓiseŋì.

« Roimhe

Air adhart »

Bible Society of Cameroon

Lean sinn:

Ceanglaichean taic

Sanasan