ÀPÒKÀLIƁSƐ̀ 18 - Bafia Nouveau Testament

¹ Ajɛ̀m ìnɛn nnɛ ǹghɛngà di ŋwaà-fìtom adɛŋ a sɛnsɛn yi aɗyoo, nyi rì coo itèɗ wu rilàmì, kìtɛɛtɛn ki ɓi rìkem ɗii ki kpeŋzì zi bimiɗ.

² Nni à làmɓɛ̀ngà jɛ̀ɛ̀ aɗyoo lɛ: Baɓilon àgwey a kpìi, Baɓilon àgwey a kpìi! À ghali mɛɛ mɛ ɓiɓeɓtàg ɓi mɛghay, rì ǹnyamzɛn wu mɛghay mɛ ɓeɓtɛn mɛkuu mɛ̀cèm, rì wu ɓìɓeɓtàg ɓi tììlì ɓi ɓi ti ɓi ɓeɓkì ɓum,

³ ɓisuulɛ ɓìlɔ̀ŋ ɓìcèm ɓi nnɔɔ mɛ̀rɔ̀g mɛ cɛɓ kii ki tifin ki ki ri koŋnyoo; rì tì lɛ mɛ̀fòm mɛ ɓi ziinɛ mɛ nkìkii tìsɔ̀mɔ̀g ri nyi, ɓɛ̀kìì-dùne ɓɛ ɓi ziinɛ ɓɛ kum, lɛ coo gɛn à ìkum wiì.

⁴ Nni fɔɔnnɛ ǹwokà di jɛ̀ɛ̀ ìdɛŋ ì rìì aɗyoo lɛ: Mìni ɓɔn ɓɛm, pɛ̀sɛɛna ɓi bàn ìnɛn, di kɛ̀ ɓi teɗ gàɓ ɓi kìɓe ki yɔ̀, fɔɔnnɛ ɓyàa ɓa ɓi ri gàɓ ɓi mɛ̀tɔɓ mɛ yɔ̀.

⁵ Ɓisuulɛ ɓìɓe ɓi yɔ̀ ɓi mɛ saɓtàg à kɛ̀n kì kpaŋì aɗyoo, nni Bɛ̀ll àa n-yitii mɛ̀kìkìì mɛ yɔ̀ mɛ ɓeɓtɛn.

⁶ Kìina nyi yɛ̀ɛ à kìghà mìni, ɓì lèɓ nyi rìkì ɗii gɛ̀n yiɓɛɛ̀ ɓi ɓeŋ ànɛ à fogà mìni mɛ̀rɔ̀g mii miì; càɓina nyi mɛ̀rɔ̀g miì gɛ̀n yiɓɛɛ̀.

⁷ Faana bàn ìnɛn ǹtɔɓ, ɓì ki cuusi yɔ̀ lèg ànɛ yɛ̀ɛ rìkem ɗi kɔngà yɔ̀, bas rì ìkum, ɓisuulɛ bàn ìnɛn yɛɛ̀ kpaakpaa ɓi nɗem ɓi ɗùm lɛ: Ǹkɔ̀kɔrii lɔŋ yɛ̀ɛ giɓ anɛ à rì rìfòm a kɔ̀ràg, ǹ-yin nkpɔɓ, rìwu ɗyaa tanɛɛ gɛ ɓi mɛ.

⁸ Kìɓan kiǹ kɛɛ̀ki mɛ̀tɔɓ mii mɛ ri yù lɔŋ ŋwos bog, mɛ ɓa lɛ: ɗì rìwu, ɗì ɓìlɛ̀ɓì, rì zày, ɗuu ɗi ki rì nyi ɓiì ɗigsii. Ɓisuulɛ Kan Bɛ̀ll ànɛ àa n-yɔ̀mi kìɓan kii a rì rì ìtèɗ.

⁹ Mɛ̀fòm mɛcèm mɛ ɓi ziinɛ, mɛ mɛ ɓaghà ɓi fìsɔ̀mɔ̀g ɗì nyi, mɛ ki nɔ̀ɔnɔɔ̀tì ìkum wii, mɛ ri ɓiì rènɗeni, mɛ ki seeghseèghkɛ̀n ɓisuu kiɓan kii, yɛ̀ɛ ɓɛ ri ghɛn di fìsilì fi ɗuu ɗi ɗyɛɛ̀ ɗiighɗigsì nyi fyɛɛ̀ syoosyòò.

¹⁰ Mɛ̀fòm mɛǹ mɛ ri rɛlag yi fìràɓ lɛ mɛɛ̀ ririsi ntɔɓ wu bàn ìnɛn, mɛ kpaakpàà lɛ: Nyìighnyìg, nyìighnyìg ɗì coo bàn ì Baɓilon, bàn ìnɛ ì rì kìtèetèɗ ki bàn; kìɓan kɔɔ ki yɔm̀ɓɛɛ lɔŋ ɓi hawò bog.

¹¹ Ɓɛ̀kìì-dùne ɓɛ ɓi ziinɛ ɓɛ rènɗèn, ɓɛ ki waatɛn ɓilɛ̀ɓì ɓisu wii, lɛ mum à làgtii tì ɓi dùne yàà,

¹² dùne ìnɛ̀n ì rì ɓyom mɛ̀kuu mɛ̀kuu, lɛ rì gol, rì swiɗ à mɔ̀ɔ̀ni, rì gɔ̀g yi ŋwèrim-ŋwèrim, rì tìcaka, rì syeesyee à kìrimitì, rì ɓìlàà ɓi ɓàŋ lɛ pɔŋŋ, rì silig, rì ɓi ɓi ri ɓìɓàŋ lɛ ɓùlùg-ɓùlùg; rì mɛ̀ɓam mɛ ɓite ɓi ɓi kaarɛɛ rì ɓyom ɓìcèm ɓi ɓɛ syaagh rì mam mɛ zòg, rì ɓi ɓɛ soɓi rì ɓìte ɓi syeesyee, rì ɓìcèm ɓi ɓɛ kiì rì rìkuu ɗi swiɗ ɗidɛŋ nsoò lɛ rì bɔŋ nsoò lɛ rì gɔ̀g yi ɗyɔ̀ɔ̀ɗyɔ̀ɔ̀gh;

¹³ ɓìɓaaɓaa ɓi kite ki lɛ kanèlìyee rì ɓyom ɓi nùnnumɛn, rì tìrààre, rì rìkuu ɗi firu ɗi lɛ miìr, rì fìru fi lɛ àŋsaŋ, rì mɛ̀rɔ̀g, rì mɔ̀ɔ, rì fàriǹ ɗì rìkuu ɗi gèŋ ɗi ɓɛɛ̀ kìlag bìrɛs miì, rì ɓɛ̀sanìnya, rì jɔ̀ɔ̀, rì zòm yi kimbɛ̀rɛ̀, rì ɓyalig, rì ɓɛkpàn rì ɓyɛɓ ɓi ɓum.

¹⁴ Ɓyom ɓìcèm ɓi ǹɗem wɔɔ wu kɔnkɔ̀ngà, ɓi mɛ ràɓsɛn wɔ; ìkum wɔɔ, rì gìn yi ɓyom yi wɔ̀ɔ nɗi rì yɔ, ɓi ti ɓìɗimɛn ɓi san ànɛ a lɔ̀ŋkɔɔ, wàa ki ghɛɛ̀dii gɛ ɓi ɓyɔ.

¹⁵ Ɓɛ̀kìì-dùne ɓɛ ɓɛ kumgà lɛ bàn ìnɛn, ɓɛ ri rɛlii fìràɓ, lɛ ɓɛɛ̀ ririsi ntɔɓ wu bàn ìnɛn; ɓɛ ri ɓiì rèni, ɓɛ waatɛ̀n ɓìlɛ̀ɓì;

¹⁶ ɓɛ kpaa gɛ lɛ: Nyìighnyìg, nyìighnyìg rì coo bàn ìnɛ ìi nɗì ǹwaatɛn lɛ rì syeesyee à kìrimitì, rì ɓìlàà ɓi ɓàŋɓaŋɛn lɛ pɔŋŋ rì ɓi ɓàŋ lɛ ɓùlùg-ɓùlùg, yɔ̀ lɛ ri mɛ̀rɛ̀ŋ mɛ gol, rì mɛ ŋwèrim-ŋwèrim rì tìcaka, coo ikum wiǹ wùcèm wu ɗyoŋi ɓi bimiɗ à hawò.

¹⁷ Ɓɛ̀kɔ̀mɛ̀n tìtimà ɓɛ̀cèm, rì ɓɛ̀pusì tìtimà rì ɓum ɓɛ̀cèm ɓɛ ɓɛɛ̀ sasay ɓi tìtimà, rì ɓɛ ɓɛɛ̀ kɛ̀ɛ̀kɛɛ miì, ɓɛ rɛlàkày fìràɓ,

¹⁸ ɓɛ kuùkùgsɛ̀n di ɓaa ghɛn fisilì fi ɗuu ɗi ɗyɛɛ̀ ɗiighɗigsì bàn ìnɛn, ɓɛ kpaakpàà lɛ bàn ì be yɛ̀ɛ kpagà yɛ̀ɛ coo bàn ìnɛ?

¹⁹ Ɓɛ ɗyɛɛɗyɛ̀ɛ̀rɛ̀ngà kùrùɓu ɓi mɛ̀to, di ɓɛɛ̀ rèereèdɛ̀n, ɓɛ waatɛ̀n ɓìlɛ̀ɓì, di ɓɛɛ̀ kuukugsɛ̀n jɛ̀ɛ̀ aɗyoo lɛ: Nyìighnyìg, nyìighnyìg rì coo bàn ìnɛ; ɓum ɓɛ̀cèm ɓɛ ɓɛ ri rì tìtimà ɓi rìɓày à kìkòn, ɓɛ mmɛ kum lɛ ìkum wu ɓi bàn ìnɛn, yɛ̀ɛ ghali ìreɓ ɓi maa hawò bog!

²⁰ Wɔ̀ ɗyoo, ù rì lɛ ù sàmsàm ɓi rìɗyaŋ ɗi bàn ìnɛn ì ɗyaŋi, rì mìni ɓɛ̀gherɛ̀n, rì ɓɛ̀kɛ̀nì-fìtom rì ɓɛ̀kpaŋzì-ɓìɓan girig, ɓisuulɛ Bɛ̀ll à rɔ̀ŋi kìɓan kin yɛ̀ɛ à pɔnɔsii yɔ̀.

²¹ Fɔlɔɔ nnɛ kìtèetèɗ ki ŋwaà-fìtom ki pɛsìghà gɔ̀g ìnɛ ì ɓaghà yɛ̀ɛ coo rikem ɗi kipɛn, à pìg yɔ̀ ɓi rìɓày à kìkòn di a kpaakpaa lɛ: Fɛlɛ nnɛ ɓɛ ri ɓiì pìigh coo bàn ì Baɓilon fɛlɛ azi ri ìtèɗ, ɓum ɓaa ghɛɛ̀dii gɛ tì ɓi yɔ̀.

²² Ɓɛ ri wogtii gɛ ɓi gom ì ɓɛ̀ɓoògh-fìloŋ, rì ɓɛ̀ɓoògh-ɓyom, rì ɓɛ̀rɔŋì-zàro, rì ɓɛ̀rɔŋì-mam a lɔ̀ŋkɔɔ. Ɓɛ̀ kɛɛ̀ ki tanɛn ti ŋwaànɛ à yii rìkì ɗi rikuu ɗi kisay ɗiɗɛŋ nsoò ɗìfog; ɓɛ wogtii gɛ ɓi gom ì rìkem ɗi kipɛn foo,

²³ kìtɛɛtɛn ki lamɓà kaa ghɛnɛɛ gɛ tì ɓi foo, ɓɛ ki wogtii gɛ ɓi jɛ̀ɛ̀ ì ǹwɔlì giɓ rì gil foo. Ɓisuulɛ ɓɛ̀kìì-dùne ɓɔɔ ɓɛ ɓaghà ɓìtèetèɗ ɓi ɓi ziinɛ, rì tì lɛ, ù yègsìghà ɓìlɔ̀ŋ ɓìcèm rì mɛ̀ghèy mɔɔ mɛ kifuu,

²⁴ rì tì lɛ, ɓɛ tanɛ̀ngà lɛ rì bwaɓ yi ɓɛkpaŋzì-ɓìɓan, rì yi ɓɛgherɛ̀n, rì yi ɓum ɓɛ̀cèm ɓɛ ɓɛ cuusìghà ɓi ziinɛ a lɔ̀ŋkɔɔ.