ÀPÒKÀLIƁSƐ̀ 14 - Bafia Nouveau Testament

Man à jɔ̀ɔ̀ rì ɓum ɓii ɓɛ à kwèɗkà

¹ Nni ǹseesèèghà, ǹghɛn Man à jɔ̀ɔ̀ ǹɗɛrɛliyɛn ɓi dòn ì Siyon, ǹɗaŋ ri ɓum ɓɛ̀tɔɔsìm mɛ̀tin taàɓɛ̀ɛ̀ rì ɓum ɓɛ̀tɔɔsìm ɓɛnin; ɓi mɛ̀su mɛ ɓumɓɛ̀n ɗii ɗii, rì ɗii ɗi Seŋi mɛ ɓaghà mɛ̀ kànɛn.

² Fɔɔnnɛ ǹwokày jɛ̀ɛ̀ aɗyoo di yɛɛ̀ wɔ̀ɔ̀wɔɔ yi yɛ̀ɛ ɓìkus ɓi riɓày, ì pisɛ̀n tì coo gom ì baàbàn; gom ìnɛ ǹwokà ìnɛ̀n ì ɓaghà fɛlɛ yɛ̀ɛ fìloŋ fyɛɛ̀ fi ɓum ɓɛɛ̀ ɓoɓòg.

³ Ɓumɓɛ̀n ɓɛ kɛkɛ̀ghìghà fyem fi nyɔn di ɓɛ rɛrɛlii asu wu ikɔ̀ɔ̀ wu rilàmì, rì nyàm yi kinìn, rì asu wu ɓɛsɛ̀ɛ̀mɛn ɓɛ ɓum. Ŋwaàdɛŋ à ɓaghà ɓi lɛ à yilàg fyem fìn, i ki yin lɛ ɓum ɓɛ̀tɔɔsìm mɛ̀tin taàɓɛ̀ɛ̀ rì ɓum ɓɛ̀tɔɔsìm ɓɛnin ɓɛ à kwèɗkà ɓi ziinɛ.

⁴ Ɓumɓɛ̀n ɓɛɛ tɔɓɓɛ̀ngà ɓi tifin rì ɓɛyìɓ; ɓɛ ri ɓumɓɛ ɓɛ yii ɓi ɓɛyìɓ; ɓɛɛ̀ nɔ̀ɔnɔɔ̀tì Man à jɔ̀ɔ̀ jàŋ bimiɗ ìnɛ à kɛ̀ɛ. Ɓɛ ɓaghà ɓɛ̀kòrɛn ɓi nyìinyìm à ɓum lɛ ɓɛɛ ɓa fɛlɛ yɛ̀ɛ ɓumɓɛ ɓɛ ri ɓìɗùn ɓi ǹtonto ɓisuu Bɛ̀ll rì ɓisuu Man à jɔ̀ɔ̀,

⁵ fɔɔnnɛ ŋwɔm wu roàdɛŋ wu kpaaghà ɓi kiɓan ki ɓɛpwàà; ɓɛ ri ɓumɓɛ ɓɛ ri kɛ̀ɛ̀ bɛ̀lɛn.

Ɓum ɓɛ titom ɓɛraa ɓɛɛ̀ làalamɓɛ̀n rìbaŋì ɗi Bɛ̀ll

⁶ Fɔɔnnɛ ǹghɛngà ŋwaà-fìtom adɛŋ di a lɛŋlɛŋ ɓi ɗyoo ɓi ɗùm, à ɓaghà rì Syeesyee à Ɓɔlɛ à fìɗyàɓ fikɔ̀ɔ̀ ànɛ lɛ a ghagsi ɓum ɓɛ̀cèm ɓɛ ɓi ziinɛ, ɓumɓɛ ɓi ɓìlɔ̀ŋ ɓìcèm, rì mɛ̀pwìɗ mɛ̀cèm, rì ɓìtòkì ɓìcèm, rì mɛ̀kuu mɛ̀cèm.

⁷ À lààlàmɓɛ̀ngà jɛ̀ɛ̀ aɗyoo lɛ: Risiina Bɛ̀ll, ɓì fa nyi rìkem ɓisuu cààmɛ̀n ki ɓɛyɔ̀m ɓii ki ki kpaŋi; ɓaaghna mɛ̀ɗu ɓi zi ɓi mis mɛ roànɛ à kìghà lɛ rì ɗyoo rì zi, ɗì rìɓày à kìkòn rì ɓɛ̀ǹsim ɓɛ mɛnig ɓɛ̀cèm.

⁸ Nni ŋwaà-fìtom adɛŋ, ànɛ à ɓɔ̀ɓkày roà ǹtonto, à yùghà di a kpaakpaa lɛ: Baɓilon àgwey a kpìi, Baɓilon àgwey a kpìi; nnyɛɛ nɔsìghà ɓìlɔ̀ŋ ɓìcèm mɛ̀rɔ̀g mɛ ɓi cɛɓ kii ki tifin ki ki ri koŋnyòò.

⁹ Fɔɔnnɛ ŋwaà-fìtom a kìraa à nɔ̀ɔ̀tìghày di a kpaakpaa jɛ̀ɛ̀ aɗyoo lɛ: I mum à ɓɔgsii nyàm rì kìfèèghrɛnà ki yɔ̀ nsoò lɛ ɓɛ teɗ nyi kìrèmzɛnà ki nyàm ìnɛn ɓisu nsoò lɛ ɓi càg,

¹⁰ di à rì girig ɓiì nɔɔ̀ mɛ̀rɔ̀g mɛ ribaŋì ɗi Bɛ̀ll, mɛ mɛ ri mɛ̀ɓèniyɛn ɓi ɓeŋ à bim yiì, mɛ̀ kɛɛ̀ ɓa mɛ ɓùtɛn ɗi com kidɛŋ; à ki rì ɓiì wowoogh ntɔɓ ɓi ɗuu, rì ɓi ǹdùsi, ɓi mis mɛ ɓum ɓɛ titom ɓɛ ɓɛ ri ɓɛ̀tɛnɛn, rì ɓi mis mɛ Man à jɔ̀ɔ̀.

¹¹ Fìsilì fi ɗuu ɗi ɗyɛɛ̀ ɗiighɗigsì ɓɔ fyɛɛ̀ syoosyoo fiɗyàɓ fikɔ̀ɔ̀. Yɛ̀ɛ ìru yɛ̀ɛ ŋwos, rìfɔɔsɛ̀n ɗyaa ɓa ɓi ɓisuu ɓumɓɛ ɓɛ ɓɔgsìghà lɛ rì nyàm rì kìfèèghrɛnà ki yɔ̀, rì ɓisuu mum bimiɗ ànɛ à tekà kìrèmzɛnà ki ɗii ɗi nyàm ìnɛn.

¹² Cààmɛ̀n ki ɓɛ̀gherɛ̀n ɓɛ ɓɛɛ̀ ɓèŋɓeŋ ɓidɔ̀gsɛna ɓi Bɛ̀ll rì ǹtyweeyi wu yɛ̀ɛ Yeesus, ɓɛɛ siìrɛn kɛɛ ri lɛ̀.

¹³ Nni ǹwokà di jɛ̀ɛ̀ ì rìì aɗyoo ì kpaa lɛ: Kàna kìɓan ki! Mààgh rì ɓìloŋ ɓi ɓi wii ɓi kìsay ki Kan, à tumɛ̀n ɓigomìnɛ. Ǹghay a kpaaghi lɛ: Ki ri fɔlɔɔ saaɗ, lɛ di ɓɛɛ fɔɔ̀sɛn ɓìsay ɓyaa, ɓisuulɛ mɛ̀kìkìì maa mɛɛ̀ nɔ̀ɔnɔɔ̀tì ɓɔ.

Mɛ̀saŋ mɛ ɓi rìlèg ɗi zi

¹⁴ Nni ǹseesèèghà, ǹghɛn kìkwìɗ ki puɓ; ɓi kìkwìɗ kiǹ mum à ɓaghà ǹkɔ̀kɔriyɛn yɛ̀ɛ man à mum, à ɓaghà rì tam à rìkem ɓi nto, ànɛ ɓɛ kiì rì gol, à ki ɓanɓan zɛ̀m i mpooyɛn ɓi càg.

¹⁵ Nni ŋwaà-fìtom adɛŋ à kpagày ɓi naà-Bɛ̀ll, à kpaa ŋwaànɛ à ɓaghà ǹkɔ̀kɔriyɛn ɓi kìkwìɗ jɛ̀ɛ̀ aɗyoo lɛ: Pìgha zɛ̀m, u saŋ ɓyom, lɛ cààmɛ̀n à mɛ̀saŋ yɛɛ kpaŋi lɛ̀, ɓisuulɛ ɓyom ɓi ɓi ziinɛ ɓi mɛ tèɗ lɛ Bɛ̀ll a saŋ̀ ɓyɔ.

¹⁶ Fɔɔnnɛ roànɛ à ɓaghà ǹkɔ̀kɔriyɛn ɓi kìkwìɗ à pìkà zɛ̀m, à saŋ ɓyom ɓi ɓi ziinɛ.

¹⁷ Nni ŋwaà-fìtom adɛŋ à kpagày ɓi naà-Bɛ̀ll ìnɛ aɗyoo, à ɓaghà girig rì zɛ̀m i mpooyɛn ɓi càg;

¹⁸ fɔɔnnɛ ŋwaà-fìtom adɛŋ ànɛ à làmìghà ɗuu, à kpagày ɓi com ki ɓɛɛ̀ tɔ̀ngi ɓyom miì ɓi rìɓɔgsì ɗi Bɛ̀ll, à kpaa roànɛ à ɓaghà rì zɛ̀m i mpooyɛn ɓi càg jɛ̀ɛ̀ aɗyoo lɛ: Pìgha zɛ̀m yɔɔ̀, u syaŋ ɓìjug ɓi viìnyɛ̀, ɓisuulɛ ɓìɗùn ɓi mɛ ɓàŋ.

¹⁹ Fɔɔnnɛ ŋwaà-fìtom a pìkà zɛ̀m, à syagì viìnyɛ̀ bimiɗ ìnɛ ɓi ziinɛ, di a sùusuùrì yɔ̀ ɓi coo wayɗ wu bim i Bɛ̀ll.

²⁰ Nni ɓɛ saɓkà ɓìɗùn ɓiǹ ɓi wayɗ wu wu ɓaghà fìràɓ ri bàn; fɔɔnnɛ ɓìrɛm ɓi bwaɓ ɓi ɓɛngàkày ɓi wayɗ, ɓi riɓì ɓɛ̀kòdò lɛ ɓɛ̀kòdò, ɓi ki rim, nunùg mɛɛtɛ̀rɛ̀ bog rì kìden.