ÀPÒKÀLIƁSƐ̀ 13 - Bafia Nouveau Testament

Nyàm ìnɛ ì kpagày ɓi rìɓày à kìkòn

¹ Fɔɔnnɛ ǹghɛngà di nyàm ìdɛŋ yɛɛ̀ kpaŋkpaŋ yi ɓi rìɓày à kìkòn; ì ɓaghà mɛ̀tɔŋ ǹtɛ̀ɗ, rì mɛ̀to taàɓɛ̀ɛ̀, mɛ̀tɔŋ mɛ yɔ̀ mɛǹ mɛ ɓalàkà rì ɓɛ̀tàm ɓɛ rikem, mii mɛ tifena ɓisuu Bɛ̀ll mɛ ɓalàkà mɛ̀ kàngakɛn ɓi mɛ̀to mɛ nyàm ìnɛn.

² Nyàm ìnɛ ǹghɛngà ìnɛn ì pisɛ̀ngà ǹgɔn, mɛ̀kòò mɛ yɔ̀ mɛ ɓa yɛ̀ɛ mɛ̀kòò mɛ kpaò, ŋwɔm wu yɔ̀ wu ɓa yɛ̀ɛ ŋwɔm wu kimonɗo. Kìnààgɔ̀n ki tekà lɛ, rì ìtèɗ wu ki ɓaghà rì wɔ, rì ìkɔ̀ɔ̀ wu rilàmì, rì coo itèɗ wu rilàmì, ki fa nyàm ìnɛn.

³ Nni ǹghɛngà kibog ki ɓi mɛ̀to mɛ nyàm ìnɛn rì coo beŋ i nfin, kìɓan kifog ɓɛ wɔɔ̀zìghà coo beŋ inɛ̀n. Zi bimiɗ ì kuùkùùghràg nyàm ìnɛn, ì ki nɔ̀ɔ̀ti yɔ̀.

⁴ Fɔɔnnɛ ɓum ɓɛ̀cèm ɓɛ kɛngà kìɓaàgh mɛ̀ɗu ɓi mis mɛ kinààgɔ̀n ɓɛ ɓɔgsì kɔ, ɓisuulɛ ki faghà ìtèɗ wu rilàmì rì nyàm ìnɛn; nni ɓɛ ɓakà girig nyàm ìnɛn mɛ̀ɗu asu di ɓɛɛ̀ kpaakpaa lɛ: Ghɛn yɛɛ ri lɛ à ɓa yɛ̀ɛ yɔ̀? Ghɛn yɛɛ ki rì lɛ à ɗùù rì yɔ̀?

⁵ Nni ɓɛ faghà nyàm ìtèɗ wulɛ yɛ̀ɛ kpaàkpaa ɓìɓan ɓi mɛ̀càŋà, ì feèfèngì Bɛ̀ll. Ɓɛ ki fa ti yɔ̀ ìtèɗ wulɛ, yɛ̀ɛ lami ɓɛ̀ŋwii mɛ̀tin mɛɓɛɛ̀ rì ɓɛ̀ŋwii ɓɛɓɛɛ̀.

⁶ Nni ì pinìghà ŋwɔm lɛ yɛ̀ɛ fengi Bɛ̀ll, rì ɗii ɗi Bɛ̀ll, rì kìnuugh ki Bɛ̀ll, rì ɓum ɓɛ̀cèm ɓɛ ɓɛ ri ɓi ɗyoo ɓiɗùm.

⁷ Ɓɛ ki fa nyàm ìnɛn ìtèɗ wulɛ yɛ̀ɛ ɗuùzi ɓɔ wɛ̀y, ì yag ɓɔ. Ɓɛ fa yɔ̀ ìtèɗ wu yɛ̀ɛ lami ɓumɓɛ ɓi mɛ̀pwìɗ mɛ̀cèm, rì mɛ̀kuu mɛ̀cèm, rì ɓìtòkì ɓìcèm rì ɓìlɔ̀ŋ ɓìcèm.

⁸ Ɓum ɓɛ̀cèm ɓɛ ɓi ziinɛ, ɓɛ mii maa mɛ ka ɓaghà ɓi mɛ kànɛn ɓi kaàtà à cɛɓ à Man à jɔ̀ɔ̀ ànɛ ɓɛ wolà, à tumɛ̀n a rìyàghɛ̀n ɗi zi, ɓɛ ɓaagh gɛ mɛ̀ɗu ɓi zi ɓɛ ɓɔgsì nyàm ìnɛn.

⁹ I ŋwaà rì rì mɛ̀reè à wog.

¹⁰ I mum à yalɛ̀ngà lɛ à kɛ̀ɛ gɛ rìkpàn, à rì ɓiì kɛ̀ɛ, i ŋwaà woli mum rì gafàg, ɓɛ woli gɛ nyi rì gàfàg. Cààmɛ̀n ki ɓɛ̀gherɛ̀n ɓɛ ghɛɛ̀sɛɛ kì sììrɛɛ, ɓɛ ki ɓa ri ǹtyweeyi kɛɛ̀ki.

Nyàm ìnɛ ì kpagày ɓi zi

¹¹ Nni ǹghɛngà nyàm ìdɛŋ di yɛɛ̀ kpaŋkpaŋ yi ɓi zi, Nyàm ìnɛn ì ɓaghà mɛ̀tɔŋ mɛɓɛɛ̀rɛn yɛ̀ɛ mɛ̀tɔŋ mɛ man à jɔ̀ɔ̀, ì ki tòtog yɛ̀ɛ kìnààgɔ̀n.

¹² Ì kìkìghà kìsay ri ìtèɗ wu rilàmì wu nyàm ì ǹtonto, ɓi mis mɛ nyàm ìncèm ìnɛn. Ì ki kàŋkaŋ zi, ri ɓumɓɛ miì lɛ ɓɛɛ ɓɔgsi nyàm ì ǹtonto ìnɛ ì ɓaghà rì coo beŋ i ǹfin ìnɛ ɓɛ ɓooghà ì wɔ̀n.

¹³ Ì kìkì ɓɛ̀koŋnyoo ɓɛ ɓiɓan, à kpaŋ lɛ yɛ̀ɛ kɔsag yì ɗuu ɓi ɗyoo, ɗyɛɛ sɛǹ yì ɓi ziinɛ, ɓum ɓɛ̀cèm ɓɛ seesèè.

¹⁴ Ì yègsì ɓumɓɛ ɓi ziinɛ rì dàm yi ɓɛ faghà yɔ̀ itèɗ wulɛ yɛ̀ɛ kiki ɓi mis mɛ nyàm ì ǹtonto di yɛɛ̀ kpaakpaa ɓumɓɛ ɓi ziinɛ lɛ ɓɛɛ ki kìfèèghrɛnà ki nyàm ìnɛ ɓɛ kpɛɛ̀ghà rì gàfàg ì ki ghɛɓ.

¹⁵ Ɓɛ faghà nyàm ìmbog ìnɛ̀n ìtèɗ wulɛ yɛ̀ɛ ki lɛ kìfèèghrɛnà ki nyàm ì ǹtonto kɛɛ nyɛɛ̀nyɛ̀ŋɗɛ̀n lɛ di kɛɛ toòghrɛn ki ki lɛ, ɓɛɛ cuusi ɓum ɓɛ̀cèm ɓɛ ɓɛ ɓeni kìɓɔgsii kifèèghrɛnà ki ncèm kiǹ.

¹⁶ Nyàm ì kìɓɛ̀ɛ̀ inɛ̀n ì kàŋkàŋgà lɛ rì ɓɔɓti rì ɓɛ̀sɛ̀ɛ̀mɛn rì ɓɛ̀guŋgum rì ɓɛ̀soghàsogha, rì ɓumɓɛ ɓɛ yin ɓɛkpàn rì ɓɛ̀roɓɛ ɓɛ ri ɓɛ̀kpàn, lɛ ɓɛ̀sɛ̀ɛ̀ ɓɛ̀cèm ɓɛɛ ɓalag rì kìrèmzɛnà ɓi càg ki weèlem, rì ɓisù,

¹⁷ rì tì lɛ mum kɛ̀ɛ ɓa ri bee inɛ lɛ a lag com nsoò lɛ a kaɓ, di à yin ɗi kìrèmzɛnà kiǹ, kɛɛ ri ɗii ɗi nyàm ìnɛn, nsoò lɛ bàlì ì ɗii ɗi nyàm ìnɛn.

¹⁸ Cààmɛ̀n ki lɛ mum a womzɛn kɛɛ̀ki, ŋwaànɛ à wom̀zɛɛ, a kaà lɛ à tanɛ̀n bàlì ì nyàm ìnɛn, ɓisuulɛ bàlì ìnɛn ì rì bàlì ì ɗii ɗi mum. Bàlì yìì inɛ̀n ì rì ɓɛ̀hɔnɗɛ̀ɗ taàfog rì mɛ̀tin mɛraa rì taàfog.