Bìoball air-loidhne

ÀPÒKÀLIƁSƐ̀ 12 - Bafia Nouveau Testament

Giɓ, man rì kìnààgɔ̀n, ɓɛ resɛɛ yì ɓi ɗyoo

¹ Coo kifèèghrɛnà ki resɛ̀ngà ɓi ɗyoo ɓi ɗùm; giɓ ŋ̀waatɛn ŋwos yɛ̀ɛ kìlàà, ŋwii à lònlòm nyi a mɛ̀kòò-zi, tàm à rìkem ànɛ à ɓaghà rì tyɔɛy ntɛ̀ɗ rì tiɓɛɛ̀ nyi ɓi nto.

² Giɓ anɛ̀n à ɓaghà rì ɗyem, à ki kuukugsɛ̀n lɛ ɗyem ɗi kikìghà nyi à wowòg rìkɛŋ ɗi giɓ a woki ɓi rìyay.

³ Fɔɔnnɛ kìfèèghrɛnà kidɛŋ ki resɛ̀ngà tì ɓi ɗyoo ɓi ɗùm; coo kinààgɔ̀n kɛɛ ɓaghà, ki ɓaŋɓàŋ yɛ̀ɛ ɗuu, kɔ mɛ̀to taàɓɛ̀ɛ̀, mɛ̀tɔŋ ǹtɛ̀ɗ; nni ɓi mɛ̀to mɛ kitaàɓɛ̀ɛ̀ mɛǹ, ɓɛ̀tàm ɓɛ rikem ɓɛ ɓalàkà miì.

⁴ Ǹghey wu kinààgɔ̀n kiǹ wu wɔɔwɔ̀ɔ̀rɛ̀ngày rì gàɓ ì kìraa ìnɛ ɓi tyɔɛy ticèm ti aɗyoo, wu suùsùùrì tyɔ ɓi zi. Kìnààgɔ̀n ki rɛlìghà giɓ anɛ à ɓoŋɓòŋgà rìyay ànɛ̀n asu lɛ i à yali, kɛɛ sokɛn man.

⁵ Giɓ a yalà man à baŋì, ànɛ à ghɛ̀ɛ̀sɛɛ kì kɛ̀ɛkɛɛ̀sì ɓìlɔ̀ŋ ɓìcèm rì gbaǹ ànɛ à rì ǹkìyɛn ɗi bɔŋ. Nni ɓɛ ki ɓɔkà rì man wiì ànɛ̀n yɛ̀ɛ Bɛ̀ll rì ɓi kɔ̀ɔ̀ wii wu rilàmì.

⁶ Fɔɔnnɛ giɓ anɛ̀n à ghɛŋìghà ɓi-reɓ, wɔɔnnɛ jàŋ inɛ Bɛ̀ll à pègsɛ̀ngà nyi ì ɓaghà, lɛ à rì wɔɔ ɓiì ɗiɗii à kpaŋ mɛ̀ru tɔɔsìm ɓɛ̀hɔnɗɛ̀ɗ ɓɛɓɛɛ̀ rì mɛ̀ru mɛ̀tin mɛraa.

⁷ Fɔɔnnɛ wɛ̀y wu ɗuurɛ̀ngà ɓi ɗyoo ɓi ɗùm; Mikaɛl rì ɓum ɓii ɓɛ titom ɓɛ ɗùùghà ri kìnààgɔ̀n. Kìnààgɔ̀n girig, ki ɗuughà wɛ̀y wiǹ rì ɓum ɓii ɓɛ titom,

⁸ kìɓan kifog, àa kìnààgɔ̀n kɔ yɛɛ ceeghà ɓi-tèɗ; fɔɔnnɛ ɓɛ ɓatìghà ɓi ri jàŋ i ǹkɔ̀riyɛn aɗyoo.

⁹ Nni ɓɛ tyɔkày coo kinààgɔ̀n kiǹ, fìɗyàɓ fi nyoo fìn, fi fi ri ɗii lɛ ǹɗèm nsoò lɛ Satàn, nnyɛɛ ri ǹ-yègsì zi bimiɗ ìnɛ ɓum ɓɛɛ̀ ghɛghɛɓ miì, ɓɛ tyɔkày nyi ɓi zi, ɓɛ ki tyɔg yi girig ɓum ɓii ɓɛ titom ǹɗaŋ ri nyi.

¹⁰ Fɔɔnnɛ ǹwokà di coo jɛ̀ɛ̀ kɛɛ̀ kpaakpaa yi ɓi ɗyoo lɛ: Cààmɛ̀n ki gòri rì ìtèɗ, rì kìlàmì ki Bɛ̀ll, kɛɛ ti lɛ ɓigomìnɛ, rì ìtèɗ wu rilàmì ɗi Kiris wìì, ɓisuulɛ ɓɛ mɛ tyɔg roànɛ à ti à sɔmàg ɓɛ̀geni ɓis, lɛ nnyɛɛ nti à sɔmàg ɓɔ yɛ̀ɛ ìru yɛ̀ɛ ŋwos, ɓi mis mɛ Bɛ̀ll.

¹¹ Ɓɛ mɛ yag nyi ɓi wɛ̀y lɛ bwaɓ yi Man à jɔ̀ɔ̀, rì jɛ̀ɛ̀ ìnɛ ɓɛ nɗèresii saaɗ ànɛ miì; ɓɛ nki keesii ɓi ɓyɛɓ ɓyaa à kpaŋ lèg ànɛ lɛ ɓɛɛ risi rìwu.

¹² Kìɓan kiǹ kɛɛ̀ki ɗyoo, rì mìni ɓumɓɛ ɓì kɔ̀kɔrii aɗyoo, ɓì ghɛ̀ɛ̀sɛɛ kìnyàànyaa! Nyìighnyìg rì ziinɛ, ɗì rìɓày à kìkòn, ɓisuulɛ Satàn a mɛ sɛn yi a lɔ̀ŋkin, ǹwoghɛn coo bim lɛ à yii lɛ, cààmɛ̀n kii ki mɛ rɔ̀ɓ lɛsàg.

¹³ Yɛ̀ɛ kìnààgɔ̀n ki ghɛngà lɛ ɓɛ tyɔghiì kɔ ɓi ziinɛ, nni ki ɓɛɓsɛ̀ngà rì giɓ anɛ à yalà man baŋì.

¹⁴ Fɔɔnnɛ ɓɛ faghà giɓ anɛ̀n kìɓɛ̀ɛ̀ ki mɛkeɓ ki coo bèè i fììlì, lɛ a lɛŋ ɓi-reɓ, ɓi jàŋ inɛ ɓɛ ri nyi ɓiì mɛnii bèg yiraa rì kìden, fìràɓ ri nyoo.

¹⁵ Fɔlɔɔ nnɛ nyoo ì looghày giɓ anɛ̀n mɛ̀nig ajɛ̀m yɛ̀ɛ rìɓày lɛ di rìɓày a ɓɛǹ ɗì nyi.

¹⁶ Kìɓan kifog zi i rùnɛ̀ngà giɓ, ì ghasì ŋwɔm ì mìn rìɓày ànɛ kìnààgɔ̀n kiǹ ki looghày a ŋwɔm̀.

¹⁷ Fɔɔnnɛ kìnààgɔ̀n ki wokà bim ri giɓ anɛ̀n ki ki kɛ̀n ki kpaŋì dòò yii wɛ̀y, rì ɓum ɓɛ̀cèm ɓɛ ɓɛ ti ɓɛ ɓegì ɓìdɔ̀gsɛna ɓi Bɛ̀ll rì saaɗ ànɛ Yeesus à rèsìghà.

¹⁸ Fɔɔnnɛ ki kɛngà kì rɛlii ɓi sɛɛ̀sɛɛ anɛ ɓi nwɔŋì wu riɓày à kìkòn.

« Roimhe

Air adhart »

Bible Society of Cameroon

Lean sinn:

Ceanglaichean taic

Sanasan