ÀPÒKÀLIƁSƐ̀ 10 - Bafia Nouveau Testament

Maa kaàtà ànɛ ɓɛ faghà Zyaŋ

¹ Nni ǹghɛngà kìtèetèɗ ki ŋwaà-fìtom kidɛŋ di kɛɛ̀ sɛnsɛn yi aɗyoo, kì waatɛn kikwìɗ, ǹsyèɗ wu ɓaghà nyi wu gheniyɛn ɓi nto, ìsu wu lonlòm yɛ̀ɛ ŋwos, mɛ̀kòò mii mɛ ɓa yɛ̀ɛ mɛ̀kwìy mɛ ɗùù.

² À ɓaghà rì maa kaàtà ǹŋwàrɛn ɓi càg; à kìghà lɛ, à rɛsì ìkòò wii wu weèlem ɓi rìɓày à kìkòn, wu kimɛŋ ɓi zi ì zɛy,

³ nni à nyàmgà jɛ̀ɛ̀ aɗyoo lɔŋ yɛ̀ɛ kìmonɗo kɛɛ̀ nyàmgì, lɔŋ yɛ̀ɛ à nyàmgà fɔlɔɔ, baàbàn yi kitaàɓɛ̀ɛ̀ yi ɓog, gom ì ghaàgh.

⁴ Yɛ̀ɛ baàbàn yi kitaàɓɛ̀ɛ̀ yi ɓokà fɔlɔɔ, m̀mɛɛ̀ kìghà lɛ nkaǹ, nni ǹwokà jɛ̀ɛ̀ ìdɛŋ di ì rìì aɗyoo lɛ: Nyama kìɓan ki baàbàn yi kitaàɓɛ̀ɛ̀ yi kpaa kìn, kɔ̀ɔ kàn kɔ.

⁵ Nni ŋwaà-fìtom ànɛ à ɓaghà ǹɗɛrɛliyɛn lɛ ìkòò wu ɓi rìɓày, wumbog a cɛɗ, à pɛ̀sìghà weèlem wìì aɗyoo;

⁶ fɔɔnnɛ à kànɛ̀ngà bɛ̀ɗ ɓi ɗii ɗi roànɛ a ghɛghɛɓ fiɗyàɓ fikɔ̀ɔ̀, ànɛ à kìghà ɗyoo rì ɓyom ɓìcèm ɓi ɓi ri miì, à kì lɛ rì zi rì ɓyom ɓi ɓi ri miì, à kì lɛ rì rìɓày à kìkòn, rì ɓyom ɓi ɓi ri miì; à kànɛ̀ngà bɛ̀ɗ lɛ cààmɛ̀n ki lɛ ɓum ɓɛɛ ɓuŋɛn kaa ɓa ti ɓi,

⁷ kìɓan kifog ɓi mɛ̀ru mɛ jɛ̀ɛ̀ ì ŋwaà-fìtom a kìtaàɓɛ̀ɛ̀ ì rì ɓiì wooghrɛɛ, di à ti lɛ à tumɛ̀n ɗìrɔŋ ɗi ɗyam, innɛ fèg à Bɛ̀ll ànɛ a ɓalag nyamɛn à ɓiì ronì lɔŋ yɛ̀ɛ à wogsìghà Syeesyee à Ɓɔlɛ ànɛ ɓi fèg ànɛn rì ɓɛ̀kpaŋzì-ɓìɓan ɓɛ ɓɛ ri ɓɛ̀kìì-ɓìsay ɓii.

⁸ Nni jɛ̀ɛ̀ ìnɛ ǹwokà di ì rìì aɗyoo ì tòòghrɛ̀ngà tì rì mɛ̀ fɛlɛ̀: Kɛ̀na, u teɗ maa kaàtà ànɛ à rì ǹŋwàrɛn ɓi càg ki ŋwaà-fìtom anɛ à rì ǹɗɛrɛliyɛn lɛ rì ɓi rìɓày à kìkòn rì a cɛɗ.

⁹ Fɔɔnnɛ ǹkɛ̀ngà yɛ̀ɛ ŋwaà-fìtom anɛ̀n ǹkpaa nyi lɛ a fa mɛ̀ maa kaàtà àncèm; nni à kpaaghà mɛ̀ lɛ: Tera nyi, u miǹ, à rì wɔ̀ ɓiì lòloli ɓi mɛ̀ɗyɔɔ, kìɓan kifog à yɛ̀yɛ̀y wɔ̀ ɓi ŋwɔm yɛ̀ɛ mɔ̀ɔ mɛ ilòò.

¹⁰ Nni ǹtekà maa kaàtà ànɛ̀n ɓi càg ki ŋwaà-fìtom m̀mìn nyi; à ɓaghà mɛ̀ ɓi ŋwɔm yɛ̀ɛ mɔ̀ɔ mɛ ilòò, nni yɛ̀ɛ m̀mìngà nyi, mɛ̀ɗyɔɔ mɛ̀m mɛ tumɛ̀n rìlòlòèy.

¹¹ Fɔɔnnɛ ɓɛ kpaaghà mɛ̀ lɛ: Ki ghɛɛ̀sɛɛ lɛ u kpaŋzi tì ɓìɓan ɓi Bɛ̀ll ɓi ɓi seesee mɛ̀kuu mɛ ɓum lɛɛ̀gwey, rì ɓìlɔ̀ŋ lɛɛ̀gwey, rì mɛ̀fòm lɛɛ̀gwey.