FÌLÌPYƐŊ 1 - Bafia Nouveau Testament

Ɓɛ̀ Pol ɓɛ togsii ɓɔ

¹ Ɓìsi ɓɛ̀kìì-ɓìsay ɓɛ Yeesus Kiris lɛ rì Pol, rì Timote, tì kàni ɓum ɓɛ Bɛ̀ll ɓɛ̀ ɓi Yeesus Kiris ɓɛ̀cèm ɓɛ ɓi bàn ì Filiɓ, rì ɓɛ̀kɛ̀ɛ̀sì ɓaa rì ɓɛ̀dyaakìrɛ̀.

² Bɛ̀ll à Seŋi wìs rì Kan Yeesus Kiris ɓɛɛ fa mìni lɛ rì geesɛ̀n, rì fyòoog.

Rìfa ɗi Bɛ̀ll ɓìtògsɛ̀n, rì kìnyàà, ɓi bɔ̀ŋzɛ̀n ì Pol

³ Cààmɛ̀n kìcèm ki ǹ-yitii mìni, ǹti falàg Bɛ̀ll wɛ̀m ɓìtògsɛ̀n.

⁴ Ɓi bɔ̀ŋzɛ̀n yìcèm yi nkìki ɓisu win ɓɛsɛ̀ɛ̀ ɓɛ̀cèm, ǹti m̀ɓɔ̀ŋzàg rì kìnyàà,

⁵ ɓisuu gàɓ ìnɛ ɓì mɛ teɗ ɓi rìsààtì ɗi Syeesyee à Ɓɔlɛ, à tumɛ̀n ŋwos a ǹtonto, à kpaŋ ɓigomìnɛ.

⁶ Ǹ-yii syeesyee à rìyi lɛ roànɛ à tumɛ̀ngà syeesyee à kìsay anɛ̀n ɓi mìni, à rì ɓiì kɛ̀ɛ ri kɔ asu à kpaŋ yɛ̀ɛ à ri wɔmɓɛn kɔ ɓi ŋwos a Yeesus Kiris.

⁷ Ki wooghrɛɛ gì lɛ mɓa rì mekuu mɛ mɛyitì mɛ fɔlɔɔ ɓi san wìn, ɓisuulɛ ɓì rì mɛ̀ ɓi nɗem, rì tì lɛ, nsoò cààmɛ̀n ki ǹɗì ɓi naà-zày, nsoò cààmɛ̀n ki ǹɗì ɓidan nkàakamɛ̀n ǹki sìisiìràg Syeesyee à Ɓɔlɛ, mìniìcèm ɓì ti ɓì tekì gàɓ ɓi geesɛ̀n ìnɛ Bɛ̀ll à kìghà mɛ̀.

⁸ Lɛ Bɛ̀ll à rì mɛ̀ wusìnɛ̀ɗ lɛ, ǹkeesii mìni ɓɛ̀sɛ̀ɛ̀ ɓɛ̀cèm rì syeesyee à ǹkɔ̀nɛ̀n à Yeesus Kiris.

⁹ Com ki mɛ̀ɛ ntɔtɔg Bɛ̀ll ɓi bɔ̀ŋzɛ̀n yɛm̀ ki ri lɛ, ǹkɔ̀nɛ̀n wìn a kɛn asu à tɔɔtɔ̀ɔ̀, ɓi rìyi ɗi ɓiɓan, rì ɓi syeesyee à rìwog,

¹⁰ fɔlɔɔ nnɛ ɓi ɓiì yiì rìghasì ɗi ɓiɓan ɓi ɓi ri rì gɛɓsɛ̀n, ɓì ki ɓa mɛrem lɛ sɛɛghi sɛɛghi, kɛ̀ɛ̀ kìɓan ki ɓɛ ri lɛ ɓɛ ɓɛy mìni miì ŋwos a Kiris;

¹¹ ɓì ki ɓa ɓɛronɛn rì mɛ̀kìkìì mɛ saaɗ mɛ mɛ ti mɛ ghɛnàg a lɔ̀ŋkis lɛ Yeesus Kiris ɓisuu rikem, ɗì rìɓɔgsì ɗi Bɛ̀ll.

Naà-zày ì Pol

¹² Ɓɔɔsoŋ̀, ki kɔni mɛ̀ lɛ di ɓyàa yii lɛ, kìɓan ki ki nkìi mɛ̀, ki nghɛɓsii kɔm̀ lɛ Syeesyee à Ɓɔlɛ a kɛɛ̀di beèbɛ̀y.

¹³ Lɛ ɓɛ̀sujàà ɓɛ̀cèm ɓɛ ɓi gari ì rìfòm, rì jàŋ yimbog yìcèm ɓɛ yii lɛ tɛntɛ̀ɛ̀n lɛ ǹɗì ɓi naà-zày lɛ ǹɗì nkìì-kìsay a Kiris.

¹⁴ Ntyweeyi wu mɛ yùti ɓɛgeni ɓɛ̀m lɛɛ̀gwey ɓi Kan, lɛ naà-zày ìnɛ ǹkɛ̀ngà; fɔɔnnɛ ɓɛ ti rì kìghɛɛsii ki ki cee lɛ ɓɛɛ ghaàghàgsì jɛ̀ɛ̀ ì Bɛ̀ll kɛ̀ɛ̀ ìris.

¹⁵ Ki ri lɔŋ saaɗ lɛ ɓɛ̀ro ɓɛdɛŋ ɓɛɛ̀ làalam̀ɓɛ̀n Kiris rì ǹɗem wu yàaka ki ɓa yɛ̀ɛ ɓɛ ri ɓi ǹlog rì mɛ̀, wɔ̀lɛ ɓɛ̀ro ɓɛmbog ɓɛ làalamɓɛ̀n nyi rì ǹɗem wu sɛɛghi sɛɛghi.

¹⁶ Ɓɛ̀roɓɛ̀n ɓɛɛ̀ kìki kisay rì ǹkɔ̀nɛ̀n lɛ ɓɛ yii lɛ Bɛ̀ll à rɛsìghà mɛ̀ lɛ nkaàkàmɛ̀n rì Syeesyee à Ɓɔlɛ.

¹⁷ Ɓɛ̀ro ɓɛm̀bog ɓɛ yin ɓiì làalam̀ɓɛ̀n Kiris rì ǹɗem wu sɛɛghi sɛɛghi, ɓɛɛ̀ kìki kisay kiǹ rì ǹɗem wulɛ ɓɛ ri ɓi nlog, ɓɛ fekì lɛ, ɓɛɛ̀ foofoŋdì mɛ̀ ǹtɔɓ ɓi naà-zày ìnɛ ǹɗì miì.

¹⁸ Ki kii ɓi mɛ com. Nsoò mɛ̀yitì maa maa ɓeɓtɛɛ, nsoò maa rɔɔtɛɛ, kìɓan ki ki ri miì ki ri lɛ, ɓɛɛ̀ làalam̀ɓɛ̀n Kiris; mɛ̀ nki wowog kirɔɔ fɔlɔɔ, ǹɗì ɓiì ki kɛ̀nkɛni asu ǹwowòg kìrɔɔ,

¹⁹ ɓisuulɛ ǹ-yii lɛ, kìɓan kiǹ ki ɓiì lɔ̀ɔ̀ghrɛɛ ɓi bee inɛ lɛ mɛ̀ ǹghɛɓ lɛ bɔ̀ŋzɛ̀n yin, rì ǹghɛɓsɛn wu Ǹghay à Yeesus Kiris à ti à yùlàg rì wɔ.

²⁰ Lèg ànɛ ǹɗì rì coo zày, ǹki ɓa ri dyàɓɛn, màa wog ɓi ntoòrìɗ ri com kidɛŋ. Ɓi cààmɛ̀n ki, lɔŋ yɛ̀ɛ ɓi ɓyààmɛ̀n ɓimbog, rì ǹtyweeyi wu wu ri mɛ̀ ɓiì ronì ɓi nɗem, Kiris à ɓiì kemì ɓi nyoo yɛ̀m, màa soo rì cem, màa soo wìì.

²¹ Ɓisuulɛ Kiris à rì cɛɓ kɛ̀m, fɔɔnnɛ rìwu ɗi ri mɛ̀ rì kɔ̀misɔ̀n.

²² Wɔ̀lɛ i rìɓaɓà ɗi cem ɓi mɛ̀mùù ɗi ri lɛ ɗi ɓa rì gɛɓsɛ̀n lɛ nki kìsay, com ki ǹɗì lɛ mɓɔ̀n ki yag mɛ̀.

²³ Ǹɗì mɛ̀rem mɛɓɛɛ̀; ǹɗem wu lɛ di màa kɛ̀ɛ, ti kɔkɔri ɗì Kiris, kìɓan kiǹ ki ki rɔɔtɛn ki cee.

²⁴ Wɔ̀lɛ ki pɔɔ̀zii mìni kì ɓaà rì gɛɓsɛ̀n lɛ mɛ̀ nka ghɛghɛɓ.

²⁵ Nɗem wɛ̀m wùcèm wu gherɛɛ kìɓan kiǹ lɛ ǹ-yii lɛ ǹɗì ɓiì ka ghɛghɛɓi ǹki kɔ̀ri mìniìcèm jàŋbog lɛ ɓi tɔɔ̀, ɓì ki nyààrɛn ɓi rìgherɛ̀n ɓi ɗùm.

²⁶ Rìsugtìì ɗi mɓiì sugtii yi a lɔ̀ŋkin, ɗi ri mìni ɓiì faà coo nyɔɔnyɔn à kìɓan anɛ ɓi rì lɛ ɓì sànsàm miì ɓi Kiris ɓi ɗùm, lɛ mɛ̀.

Deɓ

²⁷ Kìɓan kifog, ghɛɓina rìkuu ɗi cɛɓ ɗi ɗi ghɛɛ̀sɛɛ rì Syeesyee a Ɓɔlɛ à Kiris ɓi lèg ànɛ lɛ nsoò màa yùu mìni kì ghɛɛ̀, nsoò lɛ màa rì mìni fìràɓ, ǹghɛ̀ɛ̀sɛɛ kì woògh lɛ ɓum ɓɛɛ̀ kpaakpaa lɛ: Ɓì rì lɔŋ ɓɛsììrɛn, ɓì ɓa ɓɛ̀fèg ɓɛ̀fog, ɓi ki ɗùùɗuu nɗem wùfog ɓisuu ǹtyweeyi wu wu ri ɓi Syeesyee à Ɓɔlɛ.

²⁸ Kɛ̀ ɓi càrɛn lɛ ɓɛ̀bènàbena ɓɛɛ niŋzi mìni nyoo nsoò lɛsàg; kìɓan kiǹ ki ri kìrèmzɛnà ki lɛ, ɓɛ ri ɓi rìɗyaŋ; wɔ̀lɛ ɓi san wìn, ki ɓa kìrèmzɛnà ki cɛɓ.

²⁹ Kìɓan kiǹ ki riì yɛ̀ɛ Bɛ̀ll, ɓisuulɛ àa mààgh ànɛ lɛ ɓi gherɛn Kiris nnɛ Bɛ̀ll à faghà mìni nyi rì nyi, ànɛ lɛ ɓi wog girig mɛ̀tɔɓ ɓisu wii, à rì girig miì.

³⁰ Kɛɛ̀ki ɓi ɗùùɗuu zàà ìnɛ ɓì ghɛngà mɛ̀ di nɗùùɗùù, ìnɛ ɓì ki yii lɛ ǹkaka ǹɗùùɗùù à kpaŋ ɓigomìnɛ.