Bìoball air-loidhne

MATYOO 7 - Bafia Nouveau Testament

Rìfa ɗi ɓɛroɓum bɛ̀lɛn

¹ Kɛ̀ ɓi yɔ̀mgi ɓum ɓɛdɛŋ, fɔɔnnɛ ɓaa yɔ̀m ɓi girig mìni.

² Lɛ lèg ànɛ yɛ̀ɛ ɓì yɔ̀mi ɓɛ̀ro ɓɛmbog innɛ ɓɛ ri mìni ɓiì yɔ̀mi; vèg ìnɛ ɓì ti ɓì fèkì ɓum miì, yɛɛ̀nɛ ɓɛ ri mìni ɓiì fèegh miì.

³ Lannɛ kìfɛfɛy ki ki ri goni ɓi ɗis kɛɛ̀ki ù ghɛɛ, kɔ̀ɔ ghɛn nwɔ̀g wu wɔ̀ ɓi ɗis?

⁴ Nsoò lɛ, lannɛ ù rì lɛ ù kpaa goni lɛ: Kìya m̀pisi wɔ̀ kìfɛfɛy ki ki ri wɔ̀ ɓi ɗis, kɔm̀ lɛ ǹwɔ̀g wu ri ɓi ɗiŋkɔ̀ɔ̀.

⁵ Wɔ̀ ŋwaà fyɛɛ̀fyɛɛ̀ ɓi ŋwɔm ìghèy ɓi ɗùm, ka logha kì pisii ǹwɔ̀g wu wɔ̀ ɓi ɗis di Fɔɔnnɛ u konag kì ghɛɛ̀ yɛ̀ɛ u pisi kìfɛfɛy ki ki ri ɓi ɗis ɗi goni.

⁶ Kɛ̀ ɓi falag bu ɓyom ɓi ɓi ri kìcèlì, kɛ̀ ɓi ki teki tìcaka tin ɓi pìg ɓɔn ɓɛ jèè tyɔ, lɛ ɓɛ ri lɛ ɓɛ nyɔ̀ɔ̀ghì tyɔ rì mɛ̀kɔ̀ɔ̀, ɓɛ ki lɔ̀ɔ̀ghrɛn yi lɛ ɓɛɛ ghaski mìni.

⁷ Lonina fɔɔnnɛ ɓɛ ri mìni ɓiì faà, kaana fɔɔnnɛ ɓi ɓiì tanɛɛ, ɓooghna naa fɔɔnnɛ ɓɛ ri mìni yɔ̀ ɓiì nɛmì.

⁸ Ɓisuulɛ mum ǹcèm ànɛ à lɔni, nnɛ ɓɛ ti ɓɛ falàg. Roànɛ à kaa, nnyɛɛ ti à ghɛngì, ŋwaànɛ à ɓoogh naa, nnɛ ɓɛ ti ɓɛ nɛmgì yɔ̀.

⁹ Ghɛn anɛ ɓi mìni yɛɛ ri lɛ à fa man wiì kìɗun ki gɔ̀g di a lɔni nyi ɓìɗilàg?

¹⁰ Nsoò lɛ à fa nyi kìɗyòs di à lɔni nyi kìzɛn?

¹¹ I mìni ɓɛ ɓì ɓeɓtɛɛ mɛ̀rem ɓɛ, ɓì yii rìfa ɗi ɓɔn ɓin ɓyom ɓi syeesyee, lannɛ Seŋi wìn anɛ à rì ɓi ɗyoo ɓi ɗùm yɛɛ ri ɓiì rɔ̀ɓi kɛ̀ɛ fa ɓyom ɓi syeesyee a ɓumɓɛ ɓɛ lɔni nyi ɓyɔ.

Rìkì ɗi yɛ̀ɛ ɓìɓan ɓi Bɛ̀ll ɓyɛɛ̀ kpaakpàà

¹² Com kìcèm ki ɓi kɔ̀ngi lɛ di ɓum ɓaa kìi mìni, mìni girig, kìlaaghna ɓɔ kɔ, lɛ fɔlɔɔ nnɛ rìrèsàg ɗi ɓiɗɔ̀gsɛna ɓi Moyis rì ɗi ɓɛkpaŋzì-ɓìɓan ɗi ri.

¹³ Ɗiŋiina ɓisuunaa wu wu ri lɛ sɔgsɔ̀ɔ̀g ɓisuulɛ ìsuunaa wu wu ri wù fùùghrɛn, rì bee inɛ ì rì ǹgbɛ̀ŋɛn ɓyɛɛ̀ kɛ̀ɛkɛɛ̀zì mum a rìɗyaŋ. Nni ɓum lɛɛ̀gwey ɓɛɛ̀ ki fyeefyee miì.

¹⁴ Kìɓan kifog ìsuunaa wu a cɛɓ, rì bee inɛ a cɛɓ, ɓi ri lɛ Sɔgsɔ̀ɔ̀g, nni ɓum lɛsàg ɓɛɛ ti ɓɛ tanàg bee inɛ̀n.

Ɓɛɛ yilag kite ɓi ɓìɗùn ɓi kɔ̀
( Lk. 6:43-44 )

¹⁵ Konaaghna rì ɓɛ̀kpaŋzì-ɓìɓan ɓɛ ɓɛ ri ɓɛ̀pwààpwaà; ɓɛ ti ɓɛ yulàg mìni a nyoo ɓɛ̀pàmɓɛn gòò ì jɔ̀ɔ̀, wɔ̀lɛ wɔɔ ɓiɗùm, ɓɛ ɓa ɓìmonɗo ɓi ɓaaɓanɛ̀n.

¹⁶ Ɓì rì ɓɔ ɓiì yiì ɓi mɛ̀kìkìì maa; ɓaà kɛs bi gas ɓi kìtwìɗ ki keŋ, ɓɛ̀ kɛɛ̀ ki kɛs dii ɓi ǹɗyèm wu riwòm.

¹⁷ Syeesyee à kìte bimiɗ à ti à wumgì ɓìɗùn ɓi syeesyee; kìɓeɓtàg ki kite ki wumgì ɓìɓeɓtàg ɓi ɓiɗùn.

¹⁸ Syeesyee à kìte a yin lɛ à ɓa rì ɓìɓeɓtàg ɓi ɓiɗùn, fɔɔnnɛ kìɓeɓtàg ki kite ki yin girig lɛ ki ɓa rì ɓìsyeesyee ɓi ɓiɗùn.

¹⁹ Kìte kicèm ki kaa wum ɓi ɓiɗùn ɓì syeesyee, kɛɛ̀ki ɓɛ ri ɓiì reni, ɓɛ woǹ ɓi ɗuu.

²⁰ Fɔɔnnɛ ɓìɗùn ɓyaa, ɓyɛɛ ri ɓiì kìi lɛ ɓi yi rìkuu ɗi ɓum ɗi ɓɛ ri.

²¹ Àa ɓum ɓɛ̀cèm ɓɛ ɓɛɛ rereŋi mɛ lɛ: Kan, Kan ɓɛɛ ri ɓiì ɗiŋii ɓi kìlɔ̀ŋ ki aɗyòò, lɔŋ roànɛ à kìi rìkɔ̀n ɗi Tààta wɛ̀m ànɛ à rì ɓi ɗyoo ɓi ɗùm, nnyɛɛ ɓiì kɛ̀ɛ wɔɔ.

²² Ɓum lɛɛ̀gwey ɓɛ ri kpaa gɛ mɛ̀ ɓi ŋ̀wos anɛ̀n lɛ: Kan, Kan àa ɓi ɗii ɗyɔɔ nnɛ tì kpaàkpàŋzìghà ɓìɓan ɓi Bɛ̀ll? Àa rì ɗii ɗyɔɔ nnɛ tì nànàɓkà ɓìɓeɓtàg ɓi mɛghay? Ti kìkìghà ɓi nya dàm yi ɓiɓan lɛɛ̀gwey rì ɗii ɗyɔɔ?

²³ Fɔɔnnɛ ǹkalii gɛ ɓɔ lɛ tɛntɛ̀ɛ̀n lɛ, ǹka yighà ɓi mini nsoò ŋwos bog, pɛ̀sɛɛna mɛ̀ ɓi mis, mìni ɓɛ̀kìì-ɓìɓe ɓɛ!

²⁴ Nni fɔlɔɔ nnɛ mum ǹcèm ànɛ à woogh ɓìɓan ɓi nkpaakpaa ɓi, à ki nɔ̀ɔ̀ti ɓyɔ à ɓiì pisɛɛ ŋwaà ɗyomzɛ̀n ànɛ à togà mɛɛ mii ɓi rìɓan aɗyòò.

²⁵ Yɛ̀ɛ bwey ì nɔghà, ɓɛ̀poɓɓo ɓɛ ɓɛngì, bɛ̀ɓ ì fɛɓsì, ɓyom ɓìn ɓìcèm ɓi roŋɗɛ̀n ɓi mɛɛ mɛǹ, mɛ̀ kɛɛ̀ kpìlag, lɛ mɛ ɓaghà mɛ̀ toŋɛn ɓi rìɓan.

²⁶ Kìɓan kifog mum ǹcèm ànɛ à woogh ɓìɓan ɓi nkpaakpaa ɓi, kɛɛ̀ nɔ̀ɔ̀ti ɓyɔ, à pisɛɛ kìdùŋdùŋ ki mum ki ki togà mɛɛ ɓi sɛɛ̀sɛɛ.

²⁷ Yɛ̀ɛ bwey ì nɔghà, ɓɛ̀poɓɓo ɓɛ ɓɛngì, bɛ̀ɓ ì fɛɓsì, ɓyom ɓìn ɓìcèm ɓi yu kì roŋɗɛɛ ɓi mɛɛ mɛn, nni mɛ kpilàkà mɛ ki wààrɛn syeesyee à rìwààrɛ̀n.

²⁸ Yɛ̀ɛ Yeesus à lègsìghà ɓìtòkì ɓii ɓiǹ, ɓum lɛɛ̀gwey ɓɛ kuuràkà rìkuu ɗii ɗi rirèsàg ɗiǹ;

²⁹ ɓisuulɛ, rìrèsàg ɗii ɗi ɓaghà ɓi yɛ̀ɛ ɗi ɓɛ̀rèsàg-ɓìdɔ̀gsɛna ɓɛ Ɓɛ̀yudɛ̀n, nyii rèrèsàkà fɛlɛ yɛ̀ɛ ŋwaànɛ Bɛ̀ll yɛɛ faa ìtèɗ lɛ a reèrèsàg ɓum.

« Roimhe

Air adhart »

Bible Society of Cameroon

Lean sinn:

Ceanglaichean taic

Sanasan