MATYOO 25 - Bafia Nouveau Testament

Dàɗkì ì ɓɛ̀gɔ̀n ɓɛ kiǹtɛ̀ɗ

¹ Fɔɔnnɛ kìlɔ̀ŋ ki aɗyòò ki pisɛɛ rì ɓɛ̀gɔ̀n ɓɛ ɓɛ̀yiɓ ǹtɛ̀ɗ ɓɛ ɓɛ tekà ɓɛ̀lamɓà ɓaa lɛ ɓɛɛ kɛǹ kì ɓoŋì ŋwaànɛ à ɓaghà lɛ a wɔlɛ̀n.

² Kìtaǹ ki ɓi ɓɔ ki ɓaghà kɛ̀ɛ̀ ɗyomzɛ̀n, kìtaǹ kimbog rì ɗyomzɛ̀n.

³ Ɓɛ̀roɓɛ ɓɛ ɓaghà kɛ̀ɛ̀ ɗyomzɛ̀n, ɓɛ tekà ɓɛ̀lamɓà, ɓɛ̀ kɛɛ̀ teɗ kàràsin,

⁴ wɔ̀lɛ, ɓɛ̀roɓɛ ɓɛ ɓaghà rì ɗyomzɛ̀n ɓɛ tekà lɛ: rì ɓɛ̀lamɓà, rì kàràsin ɓi ɓɛ̀kɔliba.

⁵ Nni yɛ̀ɛ ŋ̀waà rìwɛy à lɛ̀mzìghày, ɓɛ̀gɔ̀n ɓɛǹ ɓɛ cuu tìlo di ɓɛ mɛ fɔy.

⁶ Yɛ̀ɛ nyìinyìm à-ru à kpagà, nni ɓɛ wokày jɛ̀ɛ̀ lɛ ǹwɔlì innɛ, kpaŋinay ɓi kɛǹ nyi kì ɓoŋì.

⁷ Fɔɔnnɛ ɓɛ̀gɔ̀n ɓɛ ɓɛ̀yiɓ ɓɛ kìntɛ̀ɗ ɓɛǹ, ɓɛ pɛsɛ̀ngà aɗyòò, ɓɛ roòsàg ɓɛ̀lamɓà ɓaa.

⁸ Nni ɓɛ̀roɓɛ ɓɛ ɓaghà kɛ̀ɛ̀ ɗyomzɛ̀n ɓɛ tɔkà ɓɛ̀roɓɛ ɗyomzɛ̀n lɛ: Faana ɓìsi kàràsin, ɓɛ̀lamɓà ɓis ɓɛ ti ɓiì ɗimii.

⁹ Ɓɛ̀gɔ̀n ɓɛ ɓɛ ɓaghà rì ɗyomzɛ̀n ɓɛ ɓaàg ɓɔ lɛ: Èe èe, gàɓ ì kàràsin ìnɛ ì ghɛ̀ɛ̀sɛ̀n lɛ, rì ɓìsi, rì mìni ì yin, ɓì rì ɓiì ɓàŋi ki kɛ̀ɛ jàŋ inɛ ɓɛɛ̀ kàkàɓ, lɛ ɓì lag yì ànkìn wɔɔ.

¹⁰ Yɛ̀ɛ ɓɔɔ kɛngà kì làagh kàràsin, ǹwɔlì à rɔ̀ɓ kì kpaŋì ɓɛ̀roɓɛ ɓɛ ɓaghà jàŋbog, ɓɛ ɗiŋì rì nyi ɓi kìkpanà ki riwɛy; fɔɔnnɛ ɓɛ rogà ìsuunaa.

¹¹ Ɓɛ̀gɔ̀n bɛmbog ɓɛ yughày girig di cààmɛ̀n ki mɛ ghaàgh, ɓɛ kpaa lɛ: Kan, ŋ̀wàra ɓìsi naa.

¹² Nni ǹwɔlì à ɓàkà ɓɔ lɛ: Ǹkalii mìni ɓi saaɗ lɛ: Mɛ̀ ǹ-yii ɓì mini.

¹³ Fɔɔnnɛ ɓì ghɛ̀ɛ̀sɛɛ kì kɔ̀rii cem, lɛ ɓì yii ɓì gòn nsoò cààmɛn.

Dàɗkì ì ɓɛ̀kìì-ɓìsay ɓɛ, masà wàà a falàkà mɔ̀ɔ̀ni lɛ ɓɛɛ yaàsi

¹⁴ Kìlɔ̀ŋ ki aɗyoo ki ɓaa gɛ fɛlɛ yɛ̀ɛ ŋwaàdɛŋ ànɛ à reŋìghà ɓɛ̀kìì-ɓìsay ɓii, di à ti ɓiì kɛɛ rikɛ̀ɛ̀, à reɓsɛ̀n ìkum wii ri ɓɔ.

¹⁵ Fɔɔnnɛ à kìghà lɛ: à fa roànɛ tìraŋ̀ tìtaǹ, roànɛ tìraŋ̀ tiɓɛɛ̀, roàmbog fìraŋ̀ fìfog; à faghà mum bimiɗ ànɛ ɓi ɓɔ gàɓ ìnɛ ì ghɛ̀ɛ̀sɛɛ rì ìtèɗ wii, à kɛ̀n min rikɛ̀ɛ̀ ɗii.

¹⁶ Nni ǹkìì-kìsay ànɛ ɓɛ faghà tìraŋ̀ titaǹ à ghàskà kì tumɛɛ dùne rì tyɔ à fɔ̀n tìraŋ̀ tidɛŋ titaǹ.

¹⁷ Roànɛ ɓɛ faghà tìraŋ̀ tiɓɛɛ̀, à kì girig dùne, à fɔ̀ɔ̀dì tidɛŋ tiɓɛɛ̀.

¹⁸ Roànɛ ɓɛ faghà fìraŋ̀ fìfog à kɛ̀ngà, à tim zi, à ɓòm mɔ̀ɔ̀ni mɛ masà wìì miì.

¹⁹ Di ki mɛ finɛn lɛɛ̀gwey yɛ̀ɛ masà à ɓɛ̀kìì-ɓìsay ɓɛǹ à kɛ̀ngà rìkɛ̀ɛ̀, nni à sukày, à tɔg ɓɔ lɛ, ɓɛɛ resi nyi kìsay ki ɓɛ rɔɓkà kì kìi ri mɔ̀ɔ̀ni.

²⁰ Fɔɔnnɛ roànɛ ɓɛ faghà tìraŋ̀ titaǹ à yughày rì tìraŋ̀ tidɛŋ titaǹ miì aɗyòò, à kpaa lɛ: Masà, ù faghà mɛ̀ tìraŋ̀ titaǹ nni tidɛŋ tyɛɛ̀ti titaǹ ti mɛ̀ɛ ǹɗɔ̀ɓi kì yaasii.

²¹ Masà wìì a kpaaghà nyi lɛ: Ki rɔɔtɛɛ; ù rì syeesyee à ǹkìì-kìsay, wɔ̀ tì ǹkìì-kìsay a ǹtyweeyi. Yɛ̀ɛ ù rèsii mɛ̀ lɛ, ù rì ŋwaà-ǹtyweeyi ɓi ɓyom ɓisàg, ǹɗì wɔ̀ ɓiì rɛsii ǹlàmì ɓi ɓyom ɓigwey; ɗiŋi ɓi kìnyàà ki masà wɔ̀ɔ̀.

²² Fɔɔnnɛ roànɛ ɓɛ faghà tìraŋ̀ tiɓɛɛ̀ à yughày girig, à kpaa lɛ: Masà, ù faghà mɛ̀ tìraŋ̀ tìɓɛɛ̀, nni tidɛŋ ti mɛ̀ɛ n-yaasii tyɛɛ̀ti tiɓɛɛ̀.

²³ Masà wìì a kpaa nyi lɛ: Ki rɔɔtɛɛ; ù rì syeesyee à ǹkìì-kìsay, wɔ̀ tì ǹkìì-kìsay a ǹtyweeyi; yɛ̀ɛ ù rèsii mɛ̀ lɛ, ù rì ŋwaà-ntyweeyi ɓi ɓyom ɓisàg, ǹɗi wɔ̀ ɓiì rɛsii ǹlàmì ɓi ɓyom ɓigwey fɔɔnnɛ, ɗiŋi ɓi kìnyàà ki masà wɔ̀ɔ̀.

²⁴ Fɔɔnnɛ roànɛ ɓɛ faghà fìraŋ̀ fìfog, à tyòŋdɛ̀ngày min à kpaa lɛ: Masà, ǹ-yighà lɛ ù tèri mum yɛ̀ɛ mɛ̀nɔ̀ɓɔ̀, lɛ ù ti ù kɛ̀ngì kìɓùmii ɓyom ɓi dɛm inɛ ŋwaàdɛŋ à sali, ù ki sagi ɓiɗilàg ɓi jàŋ inɛ ù mìskà ɓi.

²⁵ Fɔɔnnɛ ǹrisìghà, ǹkɛ̀n kì ɓòmi mɔ̀ɔ̀ni mɔɔ ɓi zi, nni, tera mɔ̀ɔ̀ni mɔɔ mɛɛ̀mɛ.

²⁶ Masà wìì a ɓàg nyi lɛ: Wɔ̀ ǹkìì-kìsay anɛ, ù kìi lɛ ù ɓeɓtɛ̀n ǹɗem, ù ki ɓa ɓɔɓwɛɗ! Ù yighà lɛ ǹti ǹkɛ̀ngi kìɓùmì ɓi dɛm inɛ ŋwaàdɛŋ yɛɛ sali, ǹki sagi ɓiɗilàg ɓi jàŋ inɛ m̀ɓɛ̀là ɓi.

²⁷ Ù ghɛ̀ɛ̀sɛ̀ngà min ki nyamì mɔ̀ɔ̀ni mɛ̀m a baŋ̀; di yɛ̀ɛ mɛ̀ɛ ǹsughii di mɛ̀ɛ ǹkɛ̀ɛ mɔ kì terì di mɛ mɛ yay.

²⁸ Ɓatɛɛna nyi fìraŋ̀ fiǹ, ɓi fa fyɔ rì ŋwaà tìraŋ̀ ntɛ̀ɗ.

²⁹ Ɓisuulɛ ŋwaànɛ à rì rì ɓyom innɛ ɓɛ ɓiì fatii lɛ à ɓa rì ɓyɔ lɛɛ̀gwey, kìɓan kifog, ŋwaànɛ à rì kɛ̀ɛ̀ com, ɓɛ ɓatɛ̀n maa gàɓ ànɛ à rì rì nyi.

³⁰ Ɓi ɓɛg ànɛ yɛ̀ɛ ǹkìì-kìsay a kɛ̀ɛ̀ gɛɓsɛ̀n ànɛn, pìighna nyi ɓi birìm ìnɛ ɓi dan, jàŋ inɛ ɓum ɓɛ ri rèereèdɛ̀n ɓɛ ŋaàŋààdì min.

Ɓɛ̀yɔ̀m ɓɛ siitòn

³¹ Yɛ̀ɛ Man à mum à rì ɓiì yùu, ɓì rìgwey ɗii, ǹɗaŋ ri ɓum ɓɛ titom ɓɛ̀cèm, à ɓiì kɔ̀rii ɓi-kɔ̀ɔ̀ wii wu rilàmì wu rikem.

³² Ɓìlɔ̀ŋ ɓìcèm ɓi ɓi ziinɛ ɓi kunì nyi asu; à ghasì ɓum gàɓ yiɓɛɛ̀ fɛlɛ yɛ̀ɛ m̀ɓèŋì-ɓìtuwe a ghasag lɛ, rì bwiy yi ɓɛ̀yiɓ, rì ɓìpiì;

³³ à ɓiì rɛsii bwiy ɓi weèlem, ɓìpiì ɓi kìmɛŋ.

³⁴ Fɔɔnnɛ rìfòm ɗi ɓiì kalii ɓɛroɓɛ ɓi weèlem ɓɛ̀n lɛ: Mìni ɓumɓɛ Seŋi wɛ̀m à màgà, yùunay, ɓi teɗ kìlɔ̀ŋ ki ɓɛ pegsɛ̀ngà ɓìsu win, à tumɛ̀n yɛ̀ɛ ɗyoo rì zi ɓi kilɛ̀ngà.

³⁵ Lɛ yɛ̀ɛ zày ì kɔ̀ngà mɛ̀, ɓì faghà mɛ̀ ɓìɗilàg, kìnɔli ki ki mɛ̀, ɓì fa mɛ̀ mɛ̀nig mɛnɔyɛn; m̀ɓaghà ǹken, ɓì ghàɓ mɛ̀ a mɛɛ min.

³⁶ M̀ɓaghà nyoozɛy, ɓì waasì mɛ̀ ɓìlàà, m̀ɓaghà roròɓ, ɓì yù mɛ̀ kì ghɛɛ̀. Mɛ̀ ɓi naà-zày, ɓì yù mɛ̀ kì tògsii.

³⁷ Fɔɔnnɛ ɓum ɓɛ saaɗ ɓɛ̀n ɓɛ pɛ̀ɛ̀zii gɛ nyi lɛ: Kan, fin innɛ tì ghɛngà wɔ̀ di zày yɛ̀ɛ kɔ̀nkɔn wɔ tì ki fa wɔ ɓìɗilàg? Nsoò lɛ di kìnɔli kɛɛ̀ kìki wɔ, tì ki fa wɔ mɛ̀nig mɛnɔyɛ̀n?

³⁸ Fin innɛ tì ghɛngà wɔ̀ di ù rì ǹkèn, tì ki ghàɓ wɔ a mɛɛ mis? Nsoò lɛ di ù rì nyoozɛy, tì ki waasi wɔ ɓìlàà?

³⁹ Fin innɛ ù ɓaghà ɓi cem, nsoò lɛ ɓi naà-zày, tì ki yù wɔ kì ghɛɛ̀?

⁴⁰ Nni rìfòm ɗi pɛɛ̀zii gɛ ɓɔ lɛ: Ǹkalii mìni ɓi saaɗ lɛ, cààmɛ̀n kìcèm ki ɓì kìghà kìbog ki ɓi ɓɔɔ ɓɔɓti ɓɛ ɓɛ rì ɓɛ̀geni ɓɛ̀m fɔlɔɔ, mɛ̀ innɛ ɓi kìghà lɔɔ.

⁴¹ Fɔɔnnɛ rìfòm ɗi kalii gɛ ɓumɓɛ ɓi kìmɛŋ kii lɛ: Mìni ɓumɓɛ ɓì rì ɓɛ̀cɛ̀mɛn, pɛ̀sɛɛna mɛ̀ ɓi mis; ɓi kɛǹ ɓi ɗuu ɗi fiɗyàɓ fikɔ̀ɔ̀ ɗi ɓɛ pegsɛ̀ngà ɓisuu Satàn, ɗì ɓum ɓii ɓɛ titòm.

⁴² Lɛ yɛ̀ɛ zày ì kɔ̀nkɔ̀ngà mɛ̀, ɓi faghà ɓi mɛ ɓìɗilàg; kìnɔli ki kikì mɛ̀ kɛ ɓi fa mɛ mɛ̀nig mɛnɔyɛ̀n;

⁴³ m̀ɓaghà ǹkèn, kɛ̀ ɓi ghàɓ mɛ a mɛɛ min; mɛ̀ nyoozɛy, kɛ̀ ɓi fa mɛ ɓìlàà; ǹɗoròɓkà, mɛ̀ tì ɓi naà-zày, kɛ̀ ɓi yù mɛ kì ghɛɛ̀.

⁴⁴ Fɔɔnnɛ ɓɛ̀roɓɛ̀n ɓɛ ɓàagh gɛ girig nyi lɛ: Kan, fin innɛ tì ghɛngà wɔ̀ di zày yɛ̀ɛ kɔ̀nkɔn wɔ, nsoò lɛ di kìnɔli kɛɛ̀ kìki wɔ, nsoò lɛ di ù rì ǹkèn, nsoò lɛ nyoozɛy, nsoò lɛ roròɓ, nsoò lɛ ɓi naà-zày, tì ki rɔ̀ɓ tyɛ̀ ki ghɛɓsi wɔ?

⁴⁵ Nni rìfòm ɗi pɛɛ̀zii gɛ ɓɔ lɛ: Ǹkalii mìni ɓi saaɗ lɛ, cààmɛ̀n kìcèm ki ɓi ɓèngà kì kìi kibog ki ɓi ɓɔɔɓɔɓti ɓɛ fɔlɔɔ, mɛ̀ nnɛ ɓì ɓèngà kì kìi lɔɔ.

⁴⁶ Fɔɔnnɛ ɓumɓɛ̀n ɓɛ teri gɛ deɓ yi fiɗyàɓ fikɔ̀ɔ̀, wɔ̀lɛ ɓum ɓɛ saaɗ ɓɔɔ teɗ cɛɓ ki fiɗyàɓ fikɔ̀ɔ̀.