MATYOO 24 - Bafia Nouveau Testament

Yeesus à kalii ɓum lɛ naà-Bɛ̀ll ìnɛ a Yorisalɛm ì rì ɓiì wààrɛɛ

¹ Yɛ̀ɛ Yeesus à kpagày ɓi naà-Bɛ̀ll à tumɛ̀n rìghaàgh, ɓɛ̀yilàg ɓii ɓɛ yughày nyì a nyoo lɛ ɓɛɛ kali nyi lɛ, a ghɛǹ kisay ki ɓum ɓɛ kighà ɓi rìtoŋ ɗi naà-Bɛ̀ll ìnɛn.

² Wɔ̀lɛ, Yeesus à ɓàkà ɓɔ lɛ: Aa ɓì ghɛɛ kìtoŋ kiǹ kìcèm yɛ̀ɛ ki ri? Ǹkalii mìni ɓi saaɗ lɛ: mɛɛ mɛ, mɛ ri ɓiì wààrɛɛ mɛcèm, nsoò gɔ̀g bog yàa ɓa ti ɓi ǹsasaghiyɛn ɓi ìdɛŋ aɗyoo ɓi jàŋ ìnɛ.

³ Nni à kɔ̀rìghà ɓi dòn ì ɓɛ̀òlìvyee, ɓɛ̀yilàg ɓii ɓɛ yu nyi kìtɔɔ̀gh a dwìɗ lɛ: Kali ɓìsi fin innɛ kìɓan kiǹ ki ɓiì kìlɛɛ, ù ki fa ɓisi kìrèmzɛnà ki ɓi rìsugtìì ɗyɔɔ, rì rìlèg ɗi zi.

⁴ Fɔɔnnɛ Yeesus à ɓàkà ɓɔ lɛ: Ɓì konàg lɛ mum kɛ̀ɛ yègsi mini.

⁵ Ɓisuulɛ ɓum lɛɛ̀gwey ɓɛ ɓiì yùu ri ɗii ɗyɛ̀m, ɓɛ kpaakpàà lɛ: Mɛ̀ yɛɛ ri Kiris; fɔɔnnɛ ɓɛ ri ɓiì syoŋi ɓum lɛɛ̀gwey.

⁶ Ɓì rì ɓiì woògh di ɓɛɛ̀ kakali ɓiɓan ɓi mɛ̀y mɛ mɛɛ̀ ɗùuɗuùrɛ̀n, rì mɛ mɛɛ̀ pèeghpegsɛ̀n yì, konaaghna lɛ, ìris wɛ̀ kɛɛ̀ ɓan mini, ɓisuulɛ ki ghɛɛ̀sɛɛ kì kìlɛɛ fɔlɔɔ; nni àa rìlèg ɗi zi ɗyɛɛ ri ɓiì ɓaà lɔɔ.

⁷ Ki ɓiì ɓaà lɛ: ɓumɓɛ ɓì tum a zi anɛ ɓɛ ram wɛ̀y ri ɓɛ ɓi tum àmbog; ɓɛ ɓi kìlɔ̀ŋ ki ɓɛ ram wɛ̀y ri ɓɛ ɓi kimbog; fɔɔnnɛ zày ì ɓiì kìi jàŋ jàŋ, zi ì ki nyɛ̀ɛnyɛŋɗɛ̀n lɛ rì foo ì nyɛ̀ŋɗɛ̀n, rì foo ì nyɛ̀ŋɗɛ̀n.

⁸ Ɓìɓan ɓiǹ ɓìcèm ɓi ri ɓa lɔŋ ritumɛ̀n ɗi rikɛŋ ɗi ɓi riyay.

⁹ Fɔɔnnɛ ɓɛ ri mìni ɓiì ɓangii, ɓɛ ki lɛ ɓi woòg mɛ̀tɔɓ, ɓɛ weeyì mìni, ɓìlɔ̀ŋ ɓìcèm ɓi ri mìni ɓiì ɓèèzɛɛ ɓisu wɛ̀m.

¹⁰ Kìɓan kiǹ ki ɓiì kɛ̀ɓtii ɓum lɛɛ̀gwey fiɓàg, ɓɛ tɔɔ̀tɔ̀kɛ̀n ɓɔ rì ɓɔ, ɓɛ ki ɓigti bènà ɓi nyìinyìm wàà.

¹¹ Ɓɛ̀pwààpwaà ɓɛ ɓɛkpaŋzì-ɓìɓan ɓɛ ri ɓiì yùu lɛɛgwey, ɓɛ syoŋ ɓum kìtuu.

¹² Ǹkɔ̀nɛ̀n à ɓum lɛɛ̀gwey a ri fɔy, ɓisuulɛ kìtɛ̀ŋtɛ̀ŋ ki ri ɓa di ki mɛ ɓyɔ̀ɔ̀.

¹³ Wɔ̀lɛ ŋwaànɛ à rì ɓiì sììrɛɛ ɓi rìgherɛ̀n à kpaŋ a rìsugtɛ̀n, à ɓiì ghɛɛ̀ cɛɓ.

¹⁴ Syeesyee à Ɓɔlɛ à kìlɔ̀ŋ ki Bɛ̀ll ànɛ, à ɓiì kalɛɛ zi bimiɗ, lɛ kìɓan ki Ɓɔlɛ ànɛ̀n kɛɛ yilɛn ɓi ɓìlɔ̀ŋ ɓìcèm, ajɛ̀m ìnɛn nnɛ rìsugtɛ̀n ɗi zi ɗi ri ɓa.

¹⁵ Yɛ̀ɛ ɓi ɓiì ghɛɛ̀ di ɓum ɓɛ ti ɓiì kìkii ɓiɓe ɓi ɓi ri koŋnyoo ɓi jàŋ inɛ ì rì kìcèlì yɛɛ Daniyɛl à kpaaghà, ŋwaànɛ a ɓàɓay ɓìɓan ɓi Bɛ̀ll, à ghɛ̀ɛ̀sɛɛ kì kɔ̀rii ɗyomzɛ̀n.

¹⁶ Fɔɔnnɛ ɓumɓɛ ɓɛ ri ɓa a Zyude, ɓɛ ghɛɛ̀sɛɛ kì ghɛŋii ɓi dòn aɗyòò;

¹⁷ ŋwaànɛ à ri ɓa ɓi mɛɛ aɗyòò, kɛ̀ɛ sɛɛdiì tì lɛ a teɗ ɓyom ɓi ɓi ri nyi ɓi naa.

¹⁸ Fɔɔnnɛ ŋwaànɛ à ri ɓa ɓi dɛm, kɛ̀ɛ sugti a mɛɛ lɛ a teɗ kìlàà kii.

¹⁹ Nyìighnyìg rì ɓɛ̀yiɓ ɓɛ ɓɛ rì ɓa ri mem, rì ɓɛ̀gɛɓyɛ̀y ɓɛ ɓi mɛ̀ru mɛ̀n.

²⁰ Ɓɔ̀ŋzaaghna Bɛ̀ll lɛ, cààmɛ̀n ki lɛ ɓi ghɛŋi, kɛ̀ kɛɛ̀ ɓa cààmɛ̀n à bùmà nsoò lɛ ŋwosi Saɓàt.

²¹ Ɓisuulɛ, ɓi cààmɛ̀n kiǹ ǹtɔɓ wu wu ri ɓiì ghɛnɛɛ wu ɓiì tèghɛɛ wu cee mɛ̀tɔɓ mɛ̀cèm mɛ maa ghɛɛ̀ghɛ̀nɛ̀n à tumɛ̀n yɛ̀ɛ zi i kìlɛ̀ngà, à kpaŋ ɓi cààmɛ̀n ki, fɔɔnnɛ ǹtɔɓ wu kpaŋdiyɛn yɛ̀ɛ wiǹ waa ghɛnɛɛ gɛ tì ɓi.

²² I mɛ̀ru mɛ̀n mɛ̀ kɛɛ̀ ɓa kìden, di nsoò mum bog à yin lɛ à ghɛɓ; wɔ̀lɛ ɓisuu ɓumɓɛ ɓɛ ri ɓɛ̀rɔ̀tɛn nnɛ mɛ̀ru mɛ̀n maa finɛn ɓi.

²³ Nni i mum à kalii min mini lɛ: Kiris à rì fɛ, nsoò lɛ, à rì fɛnii, kɛ̀ ɓì wog.

²⁴ Ɓisuulɛ ɓɛ̀kiris ɓɛ ɓɛpwàà, rì ɓɛ̀pwààpwaà ɓɛ ɓɛkpaŋzì-ɓìɓan ɓɛ ɓiì yùu, ɓɛ kikì ɓyoo dàm rì ɓɛ̀koŋnyoo ɓɛ ɓiɓan ɓi lèg ànɛ lɛ, i kaa rì lɛ ki kilɛ̀n, di ɓɛ ri lɛ ɓɛ syoŋ̀ nsoò ɓumɓɛ ɓɛ ri ɓɛ̀ɓɔ̀nɛn.

²⁵ Kɛɛ̀ki ǹloogh mìni kì wogsii lɔɔ.

²⁶ I ɓɛ kalii mìni lɛ: Ghɛɛna, à rì fɛnii ɓi-reɓ, kɛ̀ ɓi kɛ̀n wɔɔ, nsoò ɓɛ kpaa mìni lɛ, à rì nyamzɛn fɛnii, kɛ̀ ɓi wog.

²⁷ Ɓisuulɛ, rìyù ɗi Man à mum ɗi ri ɓa yɛ̀ɛ ŋwaàŋwàɗ ànɛ à ti lɛ, i à ŋwàriì a rìpɛ̀sàg ɗi ŋwos, kìtɛɛtɛn kii ki kpaŋ a rìnɔ̀ŋɗàg ɗì ŋwos.

²⁸ Jàŋ ìnɛ kiloŋ ki com ki nɔnɔŋii yɛɛ̀nɛ tìgheèghèè ti ri ɓiì sùùrɛɛ wɔɔ.

Rìsugtìì ɗì Man à mum

²⁹ Ajɛ̀m ì ɓìɓeɓtàg ɓi mɛru ɓìn, kisaa ki ŋwos ki ri ɓiì ghàsi ki lɔ̀ɔ̀ghrɛɛ birìm, ŋwii kɛ̀ɛ lòmdi, tyɔɛy ti kɔɔ̀kɔ̀sɛ̀n yì aɗyòò di tyɛɛ̀ kpìkpì; mɛ̀tèɗ mɛ ɓi ɗyoo mɛ nyɛŋɗɛ̀n.

³⁰ Fɔɔnnɛ kìfèèghrɛnà ki Man à mum ki ɓiì resɛɛ yi aɗyòò, mɛ̀kuu mɛ ɓum mɛ̀cèm mɛ ɓi ziinɛ mɛ ɓiì seeghkɛɛ mɛ ki ghɛn di Man à mum a sɛnsɛn yi aɗyòò ɓi ɓìkwìɗ, ǹɗonɛn rì coo ìtèɗ, rì coo rikèm.

³¹ À romi gɛ ɓum ɓii ɓɛ titom rì ɗyam ɗigwey, ɓi mɛ̀fon mɛ zi mɛnin, lɛ ɓɛɛ taŋzɛn ɓum ɓii ɓɛ ɓɛ ri ɓɛ̀ ɓɔ̀nɛn ɓi zi bimiɗ rì ɓi ɓɛ̀tum ɓɛ zi ɓɛ̀cèm.

³² Terina kìfèèghrɛnà ɓi fìgyee: cààmɛ̀n kìcèm ki ɓɛ ghɛɛ di myaɓ mɛɛ̀ wòowomzɛ̀n, tyɛn ti tɔtɔ̀ɓ ɓɛ ti ɓɛ yilàg lɛ: Kìlòm ki yùu.

³³ Fɔlɔɔ nnɛ mìni girig ɓì ghɛ̀ɛ̀sɛɛ kì yiì lɛ: Man à mum à ti jàŋbog ɗì rìyù di ɓì ghɛɛ ɓìɓan ɓiǹ ɓìcèm.

³⁴ Nkalii mìni ɓi saaɗ lɛ, bɔ̀ɓ i ɓum ìnɛ, yàa lèg ɓi bimiɗ, di ɓìɓan ɓi ɓìcèm ɓi kaka kɛ̀ɛ̀ kì kìlɛɛ.

³⁵ Ɗyoo rì zi ɓi ri ɓiì ghaghii, kìɓan kifog ɓìɓan ɓyɛm̀ ɓyaa ghaagh ɓi.

Bɛ̀ll cɛ̀ncii yɛɛ yii cààmɛ̀n ki zi ìrì ɓiì lèegh miì

³⁶ Wɔ̀lɛ, ɓi kìɓan ki gòn, nsoò lɛ cààmɛ̀n kiǹ, ŋwaàdɛŋ à yii ɓì; nsoò ɓum ɓɛ titom ɓɛ aɗyòò, nsoò Man, lɔŋ Tààta cɛ̀ncii yɛɛ yii.

³⁷ Kìɓan ki ki kìlɛ̀ngà ɓi mɛ̀ru mɛ Nowe, kɛɛ ri kìlɛn ɓi rìsugtìì ɗi Man à mum.

³⁸ Ɓisuulɛ ɓi mɛ̀ru mɛ mɛ ghaghìghà, di don ì ka tumɛn ɓi, ɓum ɓɛ kikìghà lɛ, ɓɛ ɗiɗi, ɓɛ nɔnɔ, ɓɛ wɔwɛ̀y ɓɛ̀yiɓ, ɓɛ ki fafa ɓɛgɔ̀n a mɛ̀wɛy, à kpaŋ ŋwos anɛ Nowe à ɗiŋìghà ɓi kìkɔm,

³⁹ ǹɗem wu kɛsìghà ɓi ɓɔ ri kìɓan kidɛŋ à kpaŋ yɛ̀ɛ don i yùghà, ì teɗ ɓɔ ɓɛ̀sɛ̀ɛ̀ ɓɛcèm; folɔɔ nnɛ ki ri ɓa ɓi rìsugtìì ɗi Man à mum.

⁴⁰ Fɔɔnnɛ ki rì ɓa lɛ: i ɓum ɓɛ ri a dɛm ɓɛsɛ̀ɛ̀ ɓɛɓɛɛ̀, ɓɛ teɗ bog, ɓɛ caɗ àmbog.

⁴¹ Nsoò lɛ i ɓɛ̀yiɓ ɓɛ ri ɓi rìwɔ̀g ɗi ɓyom ɓi gɔ̀g ɓɛ̀sɛ̀ɛ̀ ɓɛɓɛɛ̀, ɓɛ teɗ bog ɓɛ caɗ bog.

⁴² Fɔɔnnɛ kɔ̀riina cem, lɛ ɓi yii ɓi fin ìnnɛ masà wìn a rì ɓiì yùu.

⁴³ Nni yiina lɛ, i ŋwaàmɛɛ àa ti à yilàg cààmɛ̀n ki wiiwìì à rì lɛ à yù nyi ki yii ɓyom miì rì ìru, di à rì lɛ à kɔ̀rì cem, lɛ ɓɛ̀ kɛɛ̀ ɓɛg nyi mɛ̀ɛ̀.

⁴⁴ Fɔlɔɔ nnɛ mìni girig, kɔ̀riina cem, lɛ Man à mum à ɓiì yùu ɓi cààmɛ̀n kɔm̀ ki ɓì yii ɓi lɛ, à ri ɓiì kpaŋì miì.

Syeesyee à ǹkìì-kìsay, rì kìɓeɓtàg ki ǹkìì-kìsay

⁴⁵ Nkìì-kìsay anɛ à rì lɛ: nyi rì mɛ̀wog, nyi rì ɗyomzɛ̀n, nnyɛɛ rì ǹkìì-kìsay anɛ masà wìì a ɓɔgsìghà rìfòm ɗi ɓɛ̀kìì-ɓìsay ɓii ɓɛmbog, lɛ a falag ɓɔ ɓìɗilàg ɓi ɓyààmɛ̀n ɓi ɓi ghɛɛ̀sɛɛ.

⁴⁶ Mààgh rì ǹkìì-kìsay anɛ̀n di masà wìì a sughiì à tanɛ̀n nyi di a kìki kisay kiǹ.

⁴⁷ Ǹkalii mìni ɓi saaɗ lɛ, masà wìì à rì ɓiì reɓsɛɛ ɓyom ɓii ɓìcèm rì nyi.

⁴⁸ Kìɓan kifog, i à rì kìɓeɓtàg ki ǹkìì-kìsay, nnɛ à fèegh wɔɔ ɓɛɛ̀ nyimiɗ lɛ, masà wɛ̀m àa sug yi ɓi lɛ fyɛ̀ɗ,

⁴⁹ à tumɛ̀n rìkwiy ɗi ɓɛ̀kìì-ɓìsay ɓɛmbog, à kì lɛ: à ɗi, à nɔ, bas rì ɓɛ̀nɔɔ̀-mɛ̀rɔ̀g.

⁵⁰ Fɔlɔɔ nnɛ masà à ǹkìì-kìsay anɛ̀n à rì ɓiì peetɛɛ yi ŋwos nyimiɗ anɛ à ɓoŋɓoŋi ɓi nyi, rì ɓi cààmɛ̀n ki nyii yii ɓi lɛ masà wìì a rì lɛ à kpaŋ.

⁵¹ Masa wìì a rì nyi ɓiì pàkii mpàkakɛn , à ki foŋ nyi ɓi nɗaŋ wu ɓum ɓɛ fyɛɛ̀fyɛɛ̀ ɓi ŋwɔm ìghèy ɓi ɗùm, jàŋ ìnɛ ɓum ɓɛ ri ɓiì rèereèdɛ̀n ɓɛ ŋaàŋààdì min.