Bìoball air-loidhne

MARIKUS 3 - Bafia Nouveau Testament

Yeesus à wɔ̀ɔ̀zii ŋwaànɛ à ɓaghà ri càg kiɓɔmɛn
( Mt. 12:9-14 ; Lk. 6:6-11 )

¹ Yeesus à sugtìghà ki ɗiŋii ɓi naà-bɔ̀ŋzɛ̀n. Ŋwaàdɛŋ à ɓaghà wɔɔ ri càg ki ɓɔmɛn,

² ɓumɓɛ ɓɛ ɓaghà wɔɔ, ɓɛ pɛɛ̀zì mis rì Yeesus lɛ ɓɛɛ ghɛǹ, ǹkòo à wɔ̀ɔ̀zii ŋwaànɛ̀n ŋwosi Saɓàt, di ɓɛɛ sɔmɛn nyi.

³ Nni Yeesus à kpaaghà mum àncèm lɛ: Pɛ̀sɛn aɗyoo, u rɛli foo ɓi nyìinyìm.

⁴ Fɔɔnnɛ à tɔkà ɓɔ lɛ: Ɓìdɔ̀gsɛna ɓis ɓi gherɛɛ nya lɛ mum a ki kìrɔɔ gìn kìɓe ŋwosi Saɓàt? Lɛ mum a ghɛɓsi romum gìn, a wey nyi ŋwosi Saɓàt? Ɓumɓɛ̀n ɓɛ minɛ̀n ɓɛ̀ kɛɛ̀ ɓàg ntɔɔ̀tɔɔgh wii.

⁵ Fɔɔnnɛ Yeesus à kɛɛ̀sìghà mis ɓi ɓumɓɛ̀n di a wowog bim, rì ǹɗemi-kɛŋɛn ɓi kìtèri kaa ki ǹɗem, à kpaa min ŋwaànɛ à ɓaghà càg kiɓɔmɛn lɛ: Nàma càg kɔɔ, ŋwaànɛ̀n a nàm càg kii kiǹ, ki sugtì lɛ syeesyee.

⁶ Ɓɛ̀fàrìzyɛŋ ɓɛ kpagà, ɓɛ ghas kì kìi righàdà rì ɓɛ̀gàŋgam ɓɛ Eroodɛ, lɛ ɓɛɛ ghɛǹ lannɛ ɓɛ ri lɛ ɓɛ ki lɛ ɓɛɛ wey Yeesus.

Ɓum ɓɛɛ̀ yùyu yɛ̀ɛ Yeesus ɓìtuu ɓìtuu

⁷ Nni Yeesus à kɛ̀ngà rì ɓɛ̀yilàg ɓii ɓi bèn ì rìɓày, coo kituu ki ɓum ki nɔɔ̀tì nyi; ɓumɓɛ̀n ɓɛ pɛsɛ̀ngày a Galile rì a Zyude

⁸ rì a Yorisalɛm, rì a Idume, rì cɛcɛɗ ki Zyuridɛŋ rì ɓi ɓɛ̀kòdò ɓɛ ɓɛ wuɓsɛɛ bàn yi lɛ, rì Tiir ri Sidɔŋ; ɓum lɛɛ̀gwey ɓɛ yuyùghà Yeesus a nyoo, lɛ ɓɛ wokà ɓìɓan ɓìcèm ɓi à kìkìghà.

⁹ Nni Yeesus à kpaaghà ɓɛ̀yilàg ɓii lɛ, ɓɛɛ yu nyi ri maa kìkɔm, lɛ gwìy i ɓum ìnɛ̀n yɛ̀ kɛɛ̀ turi nyi.

¹⁰ Ɓisuulɛ, yɛ̀ɛ à wɔ̀ɔ̀wɔ̀ɔ̀zìghà ɓum lɛɛ̀gwey, ɓum ɓɛ̀cèm ɓɛ ɓɛ ɓaghà ɓiì roroɓi ɓɛ kpikpìghà nyi ɓi nyoo lɛ ɓɛɛ kom nyi.

¹¹ Ɓìɓeɓtàg ɓi mɛghay ɓi ɓalàkà lɛ, i ɓi ghɛɛ Yeesus, ɓi ɓag nyi mɛ̀ɗu asu, ɓi ki syan jɛ̀ɛ̀ aɗyoo lɛ: Ù ri Man à Bɛ̀ll.

¹² Kìɓan kifog Yeesus à ɓààɓàŋzìghà mis lɛɛ̀gwey, à rèrèg ɓyɔ lɛ byɛ̀ kɛ̀ɛ kì lɛ ɓum ɓɛɛ yi nyi.

Yeesus à ɓɔ̀ni ɓɛ̀kɛ̀nì-fìtom ǹtɛ̀ɗ rì ɓɛɓɛɛ̀
( Mt. 10:1-4 ; Lk. 6:12-16 )

¹³ Fɔɔnnɛ Yeesus à ɓɔkà min ɓi dòn aɗyoo , à regì ɓumɓɛ à kɔ̀ngà lɛ a reŋi, ɓɛ̀roɓɛ̀n ɓɛ kɛǹ nyi a nyoo.

¹⁴ A ɓɔ̀n min ɓum ǹtɛ̀ɗ rì ɓɛɓɛɛ̀ ɓi ɓumɓɛ̀n lɛ a kɛɛ̀ghag rì ɓɔ, à ki rom ɓɔ lɛ ɓɛɛ kɛǹ kì kakalii Ɓɔlɛ à Bɛ̀ll.

¹⁵ À faghà ɓɔ ìtèɗ wulɛ, ɓɛɛ nanaɓ ɓìɓeɓtàg ɓi mɛghay.

¹⁶ Ɓumɓɛ à ɓɔ̀ngà ǹtɛ̀ɗ rì ɓɛɓɛɛ̀ ɓɛ ɓaghà lɛ: Rì Simɔn ànɛ Yeesus àa ǹkpɔgì lɛ Pyɛɛri

¹⁷ rì Zyag, man à Zeɓede ɓɛɛ Zyaŋ à geni, ɓɛ Yeesus a ǹkpɔgii lɛ: Bwanɛrigɛs, yɛɛ lɔɔ lɛ, ɓɔn ɓɛ baàbàn;

¹⁸ rì Andire, rì Filiɓ, rì Batelemi, rì Matyoo, rì Tomas, rì Zyag man à Alfe, rì Tadee, rì Simɔn ànɛ à ɓaghà ŋwaànɛ a Kana;

¹⁹ ri Zyudas Iskariyot ŋwaànɛ à kàɓkà Yeesus.

Ɓɛ̀yudɛ̀n ɓɛ kpaa lɛ Yeesus a nànaɓ ɓiɓeɓtàg ɓi mɛghay rì ìtèɗ wu Bɛlzeɓul
( Mt. 12:22-32 ; Lk. 11:15-23 )

²⁰ Ajɛ̀m ìnɛn, nni ɓɛ sugtìghày a mɛɛ, coo gùl ì ɓum ì taŋzɛ̀n tì lèg ànɛ lɛ ɓɛ ɓaghà ɓi ri bee inɛ ɓɛ ri lɛ ɓɛ ɗi ɓìɗilàg.

²¹ Yɛ̀ɛ naà-ɓum ì Yeesus i wokà kìɓan kiǹ nni ɓɛ yughà nyi kì terì lɛ ɓɛ kpaakpààghà lɛ, à rì nya m̀ɓùùsɛn.

²² Ɓɛ̀rèsàg-ɓìdɔ̀gsɛna ɓɛ ɓɛ pɛsɛ̀ngày a Yorisalɛm, ɓɛ kpaaghà girig lɛ: À rì rì kìɓeɓtàg ki nghay ki lɛ Bɛlzeɓul, a nànaɓ ɓiɓeɓtàg ɓi mɛghay rì ìtèɗ wu Bɛlzeɓul ànɛ à rì rìfòm ɗi ɓiɓeɓtàg ɓi mɛghay.

²³ Nni Yeesus à reŋìghà ɓɔ, a kpaa ɓɔ ɓi dàɗkì lɛ: Lannɛ Satàn a rì lɛ à nàɓtì nyimiɗ?

²⁴ Kìlɔ̀ŋ kìcèm ki ɓum ɓɛ miì ɓɛ lanɛɛ, ɓɛ ram wɛ̀y ɓɔ rì ɓɔ, ki ti ki cuughì.

²⁵ Naà-ɓum ìnɛ ɓum ɓɛ miì ɓɛ ramzɛɛ wɛ̀y ɓɔ rì ɓɔ, ì yin lɛ ì kɛ̀n beèbɛ̀y;

²⁶ i Satàn a pɛ̀sɛɛ, à ram wɛ̀y ri nyimiɗ, di à ti yɛɛ lɔɔ ri ǹlànag; kìlɔ̀ŋ kii ki yiìdi lɛ ki kɛǹ asu ki ɓaɓà, di ki ɓi nyi ki leègh.

²⁷ Ŋwaà yin lɛ à ɗiŋì ɓi naà kìtèetèɗ ki mum, à sàŋ ìkum wu roànɛ̀n, di à loogh ɓi nyi kì kàŋi bɛn; i à mɛ kàŋ nyi bɛn, fɔɔnnɛ à rì lɛ à sàŋ min ɓyom ɓi roànɛ̀n.

²⁸ Ǹkalii mìni ɓi saaɗ lɛ, Bɛ̀ll à ɓiì cenɛɛ ɓum ɓìɓe ɓyaa ɓìcèm, rì tìfena ticèm ti ɓɛ fengàkà nyi;

²⁹ kìɓan kifog ɓaa cenɛɛ gɛ ɓi ŋwaànɛ à fengii Kìtɛntɛ̀ɛ̀n ki Nghay nsoò ŋwos bog, ɓisuulɛ ŋwaànɛ̀n miì à kìi kìɓe ki à kɔ̀rii gɛ rì kɔ fìɗyàɓ fikɔ̀ɔ̀.

³⁰ Yeesus à kpaaghà ɓum fɔlɔɔ lɛ, ɓɛ kpaakpààghà lɛ, à rì rì kìɓeɓtàg ki nghay.

Jɛɛ Yeesus rì ɓɛ̀geni ɓɛ Yeesus ɓɛ yuu nyi kì reŋii
( Mt. 12:46-50 ; Lk. 8:19-21 )

³¹ Jɛɛ Yeesus rì ɓɛ̀geni ɓii, ɓɛ yughày, ɓɛ rɛrì ɓi dan, ɓɛ rom mum lɛ a reŋiì nyi.

³² Ɓum ɓɛ kɔrìghà ɓɛ kɔmzɛ̀n nyi, nni ɓɛ kpaaghà nyi lɛ: Gaa, ri ɓɛ̀goni ɓɛɛ tɔtɔg wɔ fɛnii ɓi dan.

³³ Nni Yeesus à ɓàkà lɛ: Ghɛn yɛɛ ri jɛɛ wɛ̀m, ɓɛ̀ghɛn ɓɛɛ ri ɓɛ̀geni ɓɛ̀m?

³⁴ Fɔɔnnɛ à kɛ̀ɛ̀sìghà mis ɓi ɓumɓɛ ɓɛ kɔmzɛ̀ngà nyi ɓɛ̀n, à kpaa lɛ: Jɛɛ wɛ̀m rì ɓɛ̀geni ɓɛ̀m, ɓɛɛ kɔ̀ɔ̀kɔɔ̀tɛ̀n lɛ;

³⁵ ɓisuulɛ, ŋwaànɛ à kìi rìkɔ̀n ɗi Bɛ̀ll, nnyɛɛ ri geni wɛ̀m à baŋì, nsoò lɛ à giɓ nsoò lɛ jɛɛ wɛ̀m.

« Roimhe

Air adhart »

Bible Society of Cameroon

Lean sinn:

Ceanglaichean taic

Sanasan